Galaciaĉantyidyes 2
2
Muꞌin jutactyiꞌ Jenꞌtyiꞌ muꞌ jụjte Pablo in
1Aty yiriꞌtac vạjpedyeꞌ jiyiꞌ yómodyeꞌ, chat q̂uinꞌdyemꞌ quivij Jerusalénĉan jịjcaij yụ Bernabétum judyeyaꞌ Tito chimeꞌ cạte yụ. 2Muꞌĉan jịjcaij yụ ĉaĉaij na muꞌdye Jenꞌ meꞌ jutin yụ. Muꞌĉan p̂eyaqui yụ muꞌintum in tashcheꞌ buꞌyitytum anicjetety Jenꞌ in, mijam muꞌyaꞌ yoctyiꞌ muntyiꞌ in seꞌvaqui in. Yụ jéyacsi voroꞌtacdyeꞌyaꞌ yụ Jenꞌsiꞌ p̂eyacdyeꞌ muꞌ, junꞌ chuc yụ p̂eijte muꞌ Cristo jéyacsi muꞌin jam judío in. Räj mọꞌ jéyacsi yụ junꞌ chuc carijtaqui yụ paj qui jam jätäjjin yụ in voroꞌyedyedyes yụ, paj qui jam fibiꞌ shupquiꞌ mọꞌ voroꞌyedyeꞌ yụ. 3Jụjtyibun mọmoꞌ dyijyedyeꞌ yụ in. Jeshaꞌ muꞌ Tito, meꞌ tsanꞌ jam seiꞌtactyiꞌ aꞌ muꞌ ĉaĉaij na jam judío naꞌi muꞌ, muꞌin qui namꞌ jam fercheꞌ yụꞌtyeyete p̂eyacdyeꞌ in paj qui seiꞌtac aꞌ muꞌ. 4Pạrej na tsanꞌ muꞌyaꞌ mạꞌjeꞌ meꞌ in, muꞌin jeñej buꞌyi anicjetety Jenꞌ in, meꞌ buꞌyi yuꞌti in, itŝij chäteꞌ jiꞌsäsdyi tsunyaꞌ in. Mạꞌjeꞌ aꞌc̣hisyaꞌ dyijyedyeꞌ chäyibusinꞌ jiꞌchäyitidyeꞌ in junꞌ chuc muꞌ Cristo Jesús aty jiꞌc̣honsinꞌ tsun yụꞌtacdyeꞌyaꞌ Jenꞌsiꞌ muꞌ. Mọꞌ dyijyedyeꞌ muꞌin paj qui cuvij cäc̣häꞌchubajshaꞌ tsun mọꞌ yụꞌtacdyeꞌ, paj qui mọꞌ bächäbusinꞌ tsun. 5Tsun na jam méquiꞌ jụjtacsebi dyijyedyeꞌ muꞌin ĉaĉaij na jam mạꞌjeꞌ tsun mọꞌ cäjsis jiꞌchäyitidyeꞌ. Tsun mọꞌ ñutsjeꞌ mọꞌ anicsis jiꞌchäyitidyeꞌ paj qui rụijsis mọmoꞌ seꞌvetiñeꞌ miꞌin.
6Chimeꞌdye muꞌin Jerusalénĉantyiꞌ tashcheꞌ buꞌyity anicjetety Jenꞌ in jam damꞌ cächjiyin yụ in, meꞌdye jụjbun mọmoꞌ jiꞌchäyitidyeꞌ yụ in. Meꞌ tsanꞌ muꞌin mujuꞌchaꞌ buꞌyity in, yụ qui namꞌ jam méquiꞌ noiꞌyedyeꞌtum muꞌinsiꞌyaꞌ vej in, ĉaĉaij na yụ chị́yete muꞌ Jenꞌ muꞌ nash vaj cäts cạvacsi räj muntyiꞌ in. 7Muꞌin jam yocsiꞌ p̂eyacdyeꞌ soꞌmin yụ in, muꞌin chäyin yụ in junꞌ chuc muꞌ Jenꞌ yuꞌtyin yụ paj qui voroꞌtacsi yụ muꞌin jam judío in, yojdyemꞌ muꞌ Pedro jayuꞌti u muꞌ Jenꞌ paj qui muꞌ voroꞌtacsi muꞌin judío in. 8Jenꞌ ferdyeꞌ jasoꞌmiti muꞌ Pedro paj qui muꞌ voroꞌtacsi judío in, meꞌdye muꞌ Jenꞌ ferdyeꞌ soꞌmin yụ paj qui yụ voroꞌtacsi muꞌin jam judío in.
9Muꞌin tashcheꞌ buꞌyity anicjetety Jenꞌ in, Santiago judyeyaꞌ Pedro judyeyaꞌ muꞌ Juan, meꞌsiꞌdye muꞌin in chäyibun yụꞌtacdyeꞌ yụ in, junꞌ chuc muꞌ Jenꞌ meꞌ soꞌmin yụ, mọꞌdyes qui muꞌin jụjtyin yụ in, judyeyaꞌ muꞌ Bernabé, paj qui vaj cäts carijtaqui tsun Jenꞌdyes muꞌintum in. Tsun raꞌ voroꞌtacsi muꞌin jam judío in, muꞌin na raꞌ voroꞌtacsi muꞌin judío in. 10Mọꞌ mọmoꞌ cudyin tsun in paj qui tsun nọ́tacsi muꞌin jayejjotaquity jedyeꞌ in. Yụ jụjtacsebi cọdacdyeꞌ muꞌin ĉaĉaij na aty jäꞌmij yụ yụꞌtyeꞌ ferdyeꞌ paj qui meꞌ nọ́tac in.
Pablo ñutsjeĉunꞌte muꞌ Pedro
11Pedro aty venjoijyaꞌ Antioquíaĉan jiquej, yụ ñutsjeĉunꞌte ĉụiꞌsiꞌyaꞌ vej muꞌ, ĉaĉaij na jam rụijsis dyijyedyeꞌ cạiꞌ. 12Jeshaꞌ muꞌ Pedro jambiꞌdyemꞌ muꞌyaꞌ venchuij muꞌin judío in jutactyiꞌ Santiagoty muꞌ, yiqui muꞌ jebetyetacsi säcsedyeꞌ muꞌin jam judío in. Aty qui namꞌ venchuijyaꞌ judío in, meꞌquiꞌdye qui jebetyetacsi säcsedyeꞌ, ĉaĉaij na vatyquej raꞌ jịꞌfajcacsi muꞌin judío in, muꞌin tacaꞌ cäc̣häꞌchuiꞌtyiꞌ yụꞌtacdyeꞌ in. 13Meꞌ muꞌ Pedro dyijyi vatyquej raꞌ ñiñete judío in. Meꞌdye muꞌin chimeꞌ yoctyiꞌ judío jụjjetety Jenꞌ in, muꞌin chimeꞌ cäc̣häꞌ jịjcapte in cäjsis dyijyedyeꞌ Pedros muꞌ, muꞌin chimeꞌ cavin meijyeban in. Chimeꞌtyitydye muꞌ Bernabé jịjcapte cäjsis dyijyedyeꞌ Pedros, muꞌ chimeꞌ meijyeban muꞌinyaꞌ in. 14Aty meꞌ cạvacsiyaꞌ yụ junꞌ chuc muꞌin dyijyi in, jam rụij cäc̣häꞌchupte in mọꞌ rụijsis p̂eyacdyeꞌ Jenꞌsiꞌ muꞌ, mọꞌdyes qui yụ jéte muꞌ Pedro muꞌinsiꞌyaꞌ vej muꞌin anicjetetyyaꞌ Jenꞌ in. Jéte yụ: "Meꞌ tsanꞌ judío naꞌi mi, mi qui namꞌ aty jam jeñej judío bäꞌyi mi, aty jam cäc̣häꞌchucsebi yicdyeꞌ muꞌin. ¿Junꞌ qui ĉaĉaij meꞌ jéyacsi mi muꞌin jam judío in paj qui muꞌin in cäc̣häꞌchucsebi judíos yicdyeꞌ muꞌin?" meꞌ jéte yụ.
Judío in judyeyaꞌ jam judío in räj c̣hoñi anicyedyeꞌyaꞌ muꞌin
15Tsun naꞌejaꞌdye judío tsun, tsun jam nash jam judío tsun, tsun judío tsun jéyacsejaꞌ jam judío in, juchajtumtyiꞌ in, meꞌ jéyacsejaꞌ. 16Meꞌ tsanꞌ meꞌ yéjaꞌ tsun, chị́jaꞌ qui namꞌ tsun jam yirity muntyiꞌ rụij yụꞌtac Jenꞌsiꞌyaꞌ vej muꞌ cäc̣häꞌchucdyeꞌyaꞌ yụꞌtacdyeꞌ, mọꞌ mọmoꞌ rụij jayuꞌti, anicyedyeꞌyaꞌ Jesucristocheꞌ. Tsun chimeꞌ anicjeja Jesucristo paj qui muꞌ Jenꞌ rụij yuꞌsinꞌ anicyedyeꞌyaꞌ tsun, jam mọꞌ cäc̣häꞌchucdyeꞌyaꞌ yụꞌtacdyeꞌ rụij yuꞌsinꞌ, ĉaĉaij na jam yirity muntyiꞌ rụij yụꞌtac Jenꞌsiꞌyaꞌ vej muꞌ cäc̣häꞌchucdyeꞌyaꞌ yụꞌtacdyeꞌ Jenꞌsiꞌ muꞌ.
17Tsun judío tsun aty dyijtujaꞌyaꞌ tsun paj qui muꞌ Cristo rụij yuꞌsinꞌ, tsun chimeꞌ chị́jaꞌ juchajtumtyiꞌ tsun yódyemꞌ muꞌin jam judío u in. ¿Tupuj buty meꞌ yéjaꞌ tsun muꞌdye Cristo juchajtumtyiꞌ yuꞌsinꞌ? Jam junꞌ meꞌ. 18Tsun aty farajjejaꞌtyiꞌ mọꞌ yụꞌtacdyeꞌ, jam mọꞌ rụij yuꞌsinꞌ, quivij qui namꞌ chịmoꞌcheꞌ ĉúbujshaꞌ jụijyaꞌ tsun, meꞌ bäꞌbajshaꞌ jụijyaꞌ tsun, quivij chimuꞌve juchajtum shubajshaꞌ tsun. 19Aty shuban yụꞌtacdyeꞌĉan yụ, jeñej buꞌyi säñity yụꞌtacdyeꞌĉan jiquej yụ, mọꞌdye yụꞌtacdyeꞌ jiꞌsäñin yụ, Jenꞌdyes qui bäꞌyi yụ. Yụ säñi Cristotum croshcheꞌ, 20q̂uinꞌ tsạꞌ buꞌban yụ Jenꞌdyes, aty qui jam ĉụiꞌsiꞌyaꞌ ferdyeꞌ bäꞌyi yụ, Cristo qui bäꞌyi yụ́tyĉan ĉojtyiꞌ, muꞌsiꞌ dyijyedyeꞌ cäc̣häꞌchupte yụ yejĉoij qui yụ anicjepte Jenꞌtyiꞌ Ạvaꞌ muꞌ, muꞌ mạꞌjintyiꞌ yụ judyeyaꞌ jiꞌijati yụ́dyesiꞌ paj qui tsạꞌchun yụ. 21Yụ jam mạꞌjeꞌ vaꞌquecbite ñịbeꞌjitidyes Jenꞌsiꞌ muꞌ, chịj yụ muꞌ Jenꞌ ñịbeꞌjitidyesyaꞌ muꞌsimꞌ muꞌ rụij yuꞌtyin yụ. Jeshaꞌ, muꞌ Jenꞌ rụij yuꞌsinꞌ jụijyaꞌ tsun cäc̣häꞌchucdyeꞌyaꞌ mọꞌ yụꞌtacdyeꞌ muꞌ, a vuty fibiꞌ meꞌ ijac u muꞌ Cristo.
Currently Selected:
Galaciaĉantyidyes 2: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
Galaciaĉantyidyes 2
2
Muꞌin jutactyiꞌ Jenꞌtyiꞌ muꞌ jụjte Pablo in
1Aty yiriꞌtac vạjpedyeꞌ jiyiꞌ yómodyeꞌ, chat q̂uinꞌdyemꞌ quivij Jerusalénĉan jịjcaij yụ Bernabétum judyeyaꞌ Tito chimeꞌ cạte yụ. 2Muꞌĉan jịjcaij yụ ĉaĉaij na muꞌdye Jenꞌ meꞌ jutin yụ. Muꞌĉan p̂eyaqui yụ muꞌintum in tashcheꞌ buꞌyitytum anicjetety Jenꞌ in, mijam muꞌyaꞌ yoctyiꞌ muntyiꞌ in seꞌvaqui in. Yụ jéyacsi voroꞌtacdyeꞌyaꞌ yụ Jenꞌsiꞌ p̂eyacdyeꞌ muꞌ, junꞌ chuc yụ p̂eijte muꞌ Cristo jéyacsi muꞌin jam judío in. Räj mọꞌ jéyacsi yụ junꞌ chuc carijtaqui yụ paj qui jam jätäjjin yụ in voroꞌyedyedyes yụ, paj qui jam fibiꞌ shupquiꞌ mọꞌ voroꞌyedyeꞌ yụ. 3Jụjtyibun mọmoꞌ dyijyedyeꞌ yụ in. Jeshaꞌ muꞌ Tito, meꞌ tsanꞌ jam seiꞌtactyiꞌ aꞌ muꞌ ĉaĉaij na jam judío naꞌi muꞌ, muꞌin qui namꞌ jam fercheꞌ yụꞌtyeyete p̂eyacdyeꞌ in paj qui seiꞌtac aꞌ muꞌ. 4Pạrej na tsanꞌ muꞌyaꞌ mạꞌjeꞌ meꞌ in, muꞌin jeñej buꞌyi anicjetety Jenꞌ in, meꞌ buꞌyi yuꞌti in, itŝij chäteꞌ jiꞌsäsdyi tsunyaꞌ in. Mạꞌjeꞌ aꞌc̣hisyaꞌ dyijyedyeꞌ chäyibusinꞌ jiꞌchäyitidyeꞌ in junꞌ chuc muꞌ Cristo Jesús aty jiꞌc̣honsinꞌ tsun yụꞌtacdyeꞌyaꞌ Jenꞌsiꞌ muꞌ. Mọꞌ dyijyedyeꞌ muꞌin paj qui cuvij cäc̣häꞌchubajshaꞌ tsun mọꞌ yụꞌtacdyeꞌ, paj qui mọꞌ bächäbusinꞌ tsun. 5Tsun na jam méquiꞌ jụjtacsebi dyijyedyeꞌ muꞌin ĉaĉaij na jam mạꞌjeꞌ tsun mọꞌ cäjsis jiꞌchäyitidyeꞌ. Tsun mọꞌ ñutsjeꞌ mọꞌ anicsis jiꞌchäyitidyeꞌ paj qui rụijsis mọmoꞌ seꞌvetiñeꞌ miꞌin.
6Chimeꞌdye muꞌin Jerusalénĉantyiꞌ tashcheꞌ buꞌyity anicjetety Jenꞌ in jam damꞌ cächjiyin yụ in, meꞌdye jụjbun mọmoꞌ jiꞌchäyitidyeꞌ yụ in. Meꞌ tsanꞌ muꞌin mujuꞌchaꞌ buꞌyity in, yụ qui namꞌ jam méquiꞌ noiꞌyedyeꞌtum muꞌinsiꞌyaꞌ vej in, ĉaĉaij na yụ chị́yete muꞌ Jenꞌ muꞌ nash vaj cäts cạvacsi räj muntyiꞌ in. 7Muꞌin jam yocsiꞌ p̂eyacdyeꞌ soꞌmin yụ in, muꞌin chäyin yụ in junꞌ chuc muꞌ Jenꞌ yuꞌtyin yụ paj qui voroꞌtacsi yụ muꞌin jam judío in, yojdyemꞌ muꞌ Pedro jayuꞌti u muꞌ Jenꞌ paj qui muꞌ voroꞌtacsi muꞌin judío in. 8Jenꞌ ferdyeꞌ jasoꞌmiti muꞌ Pedro paj qui muꞌ voroꞌtacsi judío in, meꞌdye muꞌ Jenꞌ ferdyeꞌ soꞌmin yụ paj qui yụ voroꞌtacsi muꞌin jam judío in.
9Muꞌin tashcheꞌ buꞌyity anicjetety Jenꞌ in, Santiago judyeyaꞌ Pedro judyeyaꞌ muꞌ Juan, meꞌsiꞌdye muꞌin in chäyibun yụꞌtacdyeꞌ yụ in, junꞌ chuc muꞌ Jenꞌ meꞌ soꞌmin yụ, mọꞌdyes qui muꞌin jụjtyin yụ in, judyeyaꞌ muꞌ Bernabé, paj qui vaj cäts carijtaqui tsun Jenꞌdyes muꞌintum in. Tsun raꞌ voroꞌtacsi muꞌin jam judío in, muꞌin na raꞌ voroꞌtacsi muꞌin judío in. 10Mọꞌ mọmoꞌ cudyin tsun in paj qui tsun nọ́tacsi muꞌin jayejjotaquity jedyeꞌ in. Yụ jụjtacsebi cọdacdyeꞌ muꞌin ĉaĉaij na aty jäꞌmij yụ yụꞌtyeꞌ ferdyeꞌ paj qui meꞌ nọ́tac in.
Pablo ñutsjeĉunꞌte muꞌ Pedro
11Pedro aty venjoijyaꞌ Antioquíaĉan jiquej, yụ ñutsjeĉunꞌte ĉụiꞌsiꞌyaꞌ vej muꞌ, ĉaĉaij na jam rụijsis dyijyedyeꞌ cạiꞌ. 12Jeshaꞌ muꞌ Pedro jambiꞌdyemꞌ muꞌyaꞌ venchuij muꞌin judío in jutactyiꞌ Santiagoty muꞌ, yiqui muꞌ jebetyetacsi säcsedyeꞌ muꞌin jam judío in. Aty qui namꞌ venchuijyaꞌ judío in, meꞌquiꞌdye qui jebetyetacsi säcsedyeꞌ, ĉaĉaij na vatyquej raꞌ jịꞌfajcacsi muꞌin judío in, muꞌin tacaꞌ cäc̣häꞌchuiꞌtyiꞌ yụꞌtacdyeꞌ in. 13Meꞌ muꞌ Pedro dyijyi vatyquej raꞌ ñiñete judío in. Meꞌdye muꞌin chimeꞌ yoctyiꞌ judío jụjjetety Jenꞌ in, muꞌin chimeꞌ cäc̣häꞌ jịjcapte in cäjsis dyijyedyeꞌ Pedros muꞌ, muꞌin chimeꞌ cavin meijyeban in. Chimeꞌtyitydye muꞌ Bernabé jịjcapte cäjsis dyijyedyeꞌ Pedros, muꞌ chimeꞌ meijyeban muꞌinyaꞌ in. 14Aty meꞌ cạvacsiyaꞌ yụ junꞌ chuc muꞌin dyijyi in, jam rụij cäc̣häꞌchupte in mọꞌ rụijsis p̂eyacdyeꞌ Jenꞌsiꞌ muꞌ, mọꞌdyes qui yụ jéte muꞌ Pedro muꞌinsiꞌyaꞌ vej muꞌin anicjetetyyaꞌ Jenꞌ in. Jéte yụ: "Meꞌ tsanꞌ judío naꞌi mi, mi qui namꞌ aty jam jeñej judío bäꞌyi mi, aty jam cäc̣häꞌchucsebi yicdyeꞌ muꞌin. ¿Junꞌ qui ĉaĉaij meꞌ jéyacsi mi muꞌin jam judío in paj qui muꞌin in cäc̣häꞌchucsebi judíos yicdyeꞌ muꞌin?" meꞌ jéte yụ.
Judío in judyeyaꞌ jam judío in räj c̣hoñi anicyedyeꞌyaꞌ muꞌin
15Tsun naꞌejaꞌdye judío tsun, tsun jam nash jam judío tsun, tsun judío tsun jéyacsejaꞌ jam judío in, juchajtumtyiꞌ in, meꞌ jéyacsejaꞌ. 16Meꞌ tsanꞌ meꞌ yéjaꞌ tsun, chị́jaꞌ qui namꞌ tsun jam yirity muntyiꞌ rụij yụꞌtac Jenꞌsiꞌyaꞌ vej muꞌ cäc̣häꞌchucdyeꞌyaꞌ yụꞌtacdyeꞌ, mọꞌ mọmoꞌ rụij jayuꞌti, anicyedyeꞌyaꞌ Jesucristocheꞌ. Tsun chimeꞌ anicjeja Jesucristo paj qui muꞌ Jenꞌ rụij yuꞌsinꞌ anicyedyeꞌyaꞌ tsun, jam mọꞌ cäc̣häꞌchucdyeꞌyaꞌ yụꞌtacdyeꞌ rụij yuꞌsinꞌ, ĉaĉaij na jam yirity muntyiꞌ rụij yụꞌtac Jenꞌsiꞌyaꞌ vej muꞌ cäc̣häꞌchucdyeꞌyaꞌ yụꞌtacdyeꞌ Jenꞌsiꞌ muꞌ.
17Tsun judío tsun aty dyijtujaꞌyaꞌ tsun paj qui muꞌ Cristo rụij yuꞌsinꞌ, tsun chimeꞌ chị́jaꞌ juchajtumtyiꞌ tsun yódyemꞌ muꞌin jam judío u in. ¿Tupuj buty meꞌ yéjaꞌ tsun muꞌdye Cristo juchajtumtyiꞌ yuꞌsinꞌ? Jam junꞌ meꞌ. 18Tsun aty farajjejaꞌtyiꞌ mọꞌ yụꞌtacdyeꞌ, jam mọꞌ rụij yuꞌsinꞌ, quivij qui namꞌ chịmoꞌcheꞌ ĉúbujshaꞌ jụijyaꞌ tsun, meꞌ bäꞌbajshaꞌ jụijyaꞌ tsun, quivij chimuꞌve juchajtum shubajshaꞌ tsun. 19Aty shuban yụꞌtacdyeꞌĉan yụ, jeñej buꞌyi säñity yụꞌtacdyeꞌĉan jiquej yụ, mọꞌdye yụꞌtacdyeꞌ jiꞌsäñin yụ, Jenꞌdyes qui bäꞌyi yụ. Yụ säñi Cristotum croshcheꞌ, 20q̂uinꞌ tsạꞌ buꞌban yụ Jenꞌdyes, aty qui jam ĉụiꞌsiꞌyaꞌ ferdyeꞌ bäꞌyi yụ, Cristo qui bäꞌyi yụ́tyĉan ĉojtyiꞌ, muꞌsiꞌ dyijyedyeꞌ cäc̣häꞌchupte yụ yejĉoij qui yụ anicjepte Jenꞌtyiꞌ Ạvaꞌ muꞌ, muꞌ mạꞌjintyiꞌ yụ judyeyaꞌ jiꞌijati yụ́dyesiꞌ paj qui tsạꞌchun yụ. 21Yụ jam mạꞌjeꞌ vaꞌquecbite ñịbeꞌjitidyes Jenꞌsiꞌ muꞌ, chịj yụ muꞌ Jenꞌ ñịbeꞌjitidyesyaꞌ muꞌsimꞌ muꞌ rụij yuꞌtyin yụ. Jeshaꞌ, muꞌ Jenꞌ rụij yuꞌsinꞌ jụijyaꞌ tsun cäc̣häꞌchucdyeꞌyaꞌ mọꞌ yụꞌtacdyeꞌ muꞌ, a vuty fibiꞌ meꞌ ijac u muꞌ Cristo.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'