Génesis 22
22
Jenꞌ jịꞌĉojtacdyeꞌ jasoꞌmiti Abraham
1Aty meꞌsiꞌ muꞌ Jenꞌ jachäyibuti anicyedyeꞌ Abrahamsiꞌ muꞌ. Jenꞌ jafaijti Abraham:
—Abraham —jajiti.
Vorjete Abraham:
—Utsdye u yụ.
2Jenꞌ jajiti:
—Tuqui raꞌ yiritytyity ạvaꞌ mi, muꞌ Isaac, ạꞌyaty mi, cạme muꞌĉan yocsiꞌĉan jac Moriahĉan. Muꞌĉan raꞌ soꞌmitiꞌ ạvaꞌ mi, jiꞌcoꞌshayiyitim. Yụ raꞌ jịꞌĉoyeye jụꞌñitycheꞌ chuc raꞌ mụcuꞌ jiꞌcoꞌshayiyitim muꞌ ạvaꞌ mi.
3Meꞌdye nojno pamꞌ sacyi muꞌ Abraham, tätseꞌ chum tŝij jiꞌcoꞌshayacdyedyes chat qui jämꞌchuqui bórico muꞌ judyeyaꞌ qui sacti muꞌ, Isaactum judyeyaꞌ päräꞌ úñity muꞌ, muꞌve roiꞌjeꞌ in yóve jajitidyemꞌ Jenꞌ jiquej u. 4Aty chibin mạyedyeꞌ miꞌi in chat qui muꞌ Abraham rụij muꞌ cạvete mụcuꞌ. 5Abraham jéyacsi úñity muꞌ:
—Úyaꞌ raꞌ tacyaꞌ miꞌin bóricotum. Yụ raꞌ jiyi utstum nanatytum, muꞌcheꞌ raꞌ jadyiqui tsun timaꞌquecte raꞌ Jenꞌ tsun. A raꞌ meꞌsiꞌ chat qui raꞌ quivij caꞌñibun tsun.
6Abraham tapjeꞌ tŝij jiꞌcoꞌshayacdyedyes, bijbicheꞌ yụꞌtyeyete Isaac. Chat qui tapjeꞌ coc̣hino judyeyaꞌ jiꞌjäꞌnacdyety cạte in, jiyi in. 7Aty mujuꞌveyaꞌ in, Isaac yi jéyaqui jenꞌ muꞌ:
—Táta —yi.
—¿Jedyeꞌ yi tyuꞌ um ạvaꞌ? —yi Abraham.
—Jeshaꞌ, ọ́yaꞌ ọij tŝij judyeyaꞌ jiꞌjäꞌnacdyety. ¿Junaꞌ ĉaĉaij oveca jiꞌcoꞌshayacdyedyes? —yi muꞌ Isaac jéyaqui jenꞌ muꞌ.
8Abraham vorjeyaqui ạvaꞌ muꞌ:
—Ạvaꞌ, Jenꞌdye raꞌ yụꞌtyeꞌ jiꞌcoꞌshayacdyes oveca tsun.
Tacaꞌ yejĉoij miꞌi in yiriꞌyaꞌ in. 9Chijämꞌ dạquicte mụcuꞌ in yóyaꞌ jajitidyemꞌ Jenꞌ u. Chat muꞌyaꞌ qui muꞌ Abraham jämꞌtyeꞌ jiꞌcoꞌshayacdyeꞌ Jenꞌdyes, yụꞌtyeꞌ tŝij. Chat qui ạvaꞌ muꞌ c̣họcoꞌtaqui fajcheꞌ tsanꞌ tŝij yụꞌtaqui. 10Chat qui tapjeꞌ coc̣hino, mọꞌyaꞌ raꞌ tsanꞌ ijaqui ạvaꞌ muꞌ, jiꞌcoꞌshayaqui raꞌ tsanꞌ. 11Meꞌĉandye p̂eyaqui mạyedyeꞌchety anjer, Ayoꞌtyiꞌ muꞌ. Jafaijti muꞌ Abraham yi:
—Abraham, Abraham.
Vorjete Abraham:
—Utsdye u yụ.
12Yi anjer jajiti:
—Jam raꞌ meꞌjeyaqui ạvaꞌ mi. Q̂uinꞌ aty jämꞌ chị́yeye anic irijyi Jenꞌcheꞌ mi, jam damꞌ otejjityitim ĉụiꞌtyiꞌ ạvaꞌ mi yiritytyity —yi jajiti anjer.
13Chat qui muꞌ Abraham cạvi, meꞌĉandye nạijte yirity oveca sonꞌ, vecvec tŝọ́que dáshu muꞌ tsäꞌquiꞌĉan. Abraham soijjecte muꞌ oveca chat qui muꞌdye jiꞌcoꞌshayete Jenꞌdyes. Isaacdyes coꞌshaij muꞌ. 14Mọꞌdyes qui muꞌ Abraham yụꞌtyeyete tịj muꞌ mụcuꞌ, jéte "Ayoꞌ soꞌmisinꞌ jedyeꞌ chuc jemonjaꞌ", meꞌ yụꞌtyeyete tịj jéte mụcuꞌ. Meꞌdyes q̂uinꞌ mọꞌyaꞌ p̂eyacdyeꞌ muntyis muꞌin, yiꞌ mọꞌ: "Mụcuꞌcheꞌ muꞌ Ayoꞌ soꞌmisinꞌ jedyeꞌ chuc jemonjaꞌ", yi in.
15Cuvij p̂eyaqui mạyedyeꞌchety anjer Ayoꞌtyiꞌ muꞌ, cuvij jafaijti muꞌ Abraham, 16-17jajiti:
—Yi nash Ayoꞌ tsun: "Mi aty chäquibutiꞌ yụs p̂eyacdyeꞌ mi, mijam otejjityitim yiritytyity ạvaꞌ mi, mọꞌdyes yụ raꞌ fersiꞌ p̂eyacdyeꞌ yụꞌtyeꞌ mídyes, yiꞌ: Mi raꞌ anic ñịbeꞌjeye, yụ raꞌ jiꞌdaijbiye vóshiꞌ mi, yósiꞌdyemꞌ mạyedyeꞌchety ọ́rotaꞌ u in, yósiꞌdyemꞌ marĉantyiꞌ jáman u in, meꞌti raꞌ in. Muꞌin raꞌ räj jiꞌpenacsi fạ́cacsity in. 18Vóshiꞌyaꞌdye raꞌ mi yụ raꞌ ñịbeꞌjeyacsi jacchety muntyiꞌ in yoc yoc in, ĉaĉaij na yụs chäquibutiꞌ p̂eyacdyeꞌ mi", yi Ayoꞌ —jajiti anjer.
19Abraham ạvaꞌtum muꞌ atsijban in yóyaꞌdyemꞌ úñity um. Muꞌyaꞌ qui yacchubun in räjenꞌdye Beersebaĉan jịjcaij in, muꞌĉan qui bäꞌyi muꞌ Abraham.
Nacortyiꞌ ạvaꞌ muꞌ
20Aty meꞌsiꞌ muꞌ Abraham seꞌveꞌ yiris p̂eyacdyeꞌ. Yiꞌ: "Aty ạvaꞌyiꞌ Milca, daiꞌ ạvaꞌ muꞌ Nacortyiꞌ, muꞌ vojity mi." 21-23Muꞌ tashchety ạvaꞌ mọꞌ Uz tịj muꞌ, yoctyiꞌ na, Buz mus tịj, judyeyaꞌ muꞌ Kemuel, judyeyaꞌ muꞌ Quesed, judyeyaꞌ Hazo, judyeyaꞌ Pildas, judyeyaꞌ Jidlaf, judyeyaꞌ Betuel, meꞌ meꞌ tịj muꞌin q̂uenꞌĉantyity in ạvaꞌ mọꞌ Milcaty, Nacortyiꞌ ạvaꞌ muꞌ, Abrahamtyiꞌ vojity muꞌ. (Jäquiꞌve muꞌ ạvaꞌyi Kemuel, Aram tịj ạvaꞌ muꞌ, judyeyaꞌ muꞌ Betuel ạvaꞌyi, Rebeca tịj mọꞌ.)
24Chimeꞌdye muꞌ Nacor ạvaꞌyi muꞌ yocsiꞌĉan p̂en, Réuma tịj mọs. Tịj muꞌin Teba, judyeyaꞌ Gaham, Tahas, judyeyaꞌ Maaca, meꞌ meꞌ tịj muꞌinsiꞌ in.
Currently Selected:
Génesis 22: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
