Génesis 33
33
Jacob judyeyaꞌ Esaú jämꞌjibun quivij in
1-2Jacob cạvi jịꞌĉojtuyeĉunꞌte muꞌ Esaú, daiꞌ tucsi muntyiꞌ muꞌ, vạjpedyeꞌ quiꞌ cien rụiꞌcuꞌ muꞌin in. Jacob pạrejtaqui ạvaꞌ muꞌ, chibin ñuruꞌ yụꞌtaqui. Tashcheꞌ buꞌyi yụꞌtacsi úñis in ạvaꞌtum mọꞌin, jäquiꞌve mọꞌ yụꞌtyeꞌ Lea ạvaꞌtum mọꞌ, judyeyaꞌ jadyicve mọꞌ yụꞌtyeꞌ Raquel ạvaꞌtumdye Josétum.#33:1-2 Meꞌ meꞌ yụꞌtaqui ĉaĉaij na muꞌ Jacob ọyaꞌyaꞌ dyijtuqui úñis muꞌ ạvaꞌtumdye, mọꞌ na Raquel mọjoꞌchaꞌ dyijtuiꞌ ạvaꞌtum mọꞌ. 3Muꞌ qui Jacob tashi repjeĉunꞌte vojity muꞌ. Yävätidyeꞌ quiꞌ dyụtsyi täjjequeꞌ jac jáfiyamꞌ, junꞌ quiꞌ chuc chaꞌshaqui vojity muꞌ. 4Esaú na shuj tyeij vojityyamꞌ c̣hobenꞌ tŝọ́tyeye pụꞌsete, pärenꞌdye táriti in. 5Cạvi muꞌ Esaú, cạvacsi p̂en in judyeyaꞌ miquiꞌmuntyiꞌ in. Yi jéte Jacob:
—Uts na in ¿tyi uts u in?
Vorjete Jacob:
—Uts nash ạvaꞌ yụ in, ñịbeꞌjintyiꞌ yụ muꞌ Jenꞌ.
6Chat qui ayij úñis in Jacobsimꞌ ạvaꞌtumdye in, ĉọcte in muꞌ Esaú, dyụtsyiꞌ muꞌyaꞌ in, täjjeꞌ jac jáfiyaꞌ muꞌ. 7Lea chimeꞌ ayij ạvaꞌtumdye, chịdyutsyiꞌdye mọꞌyaꞌ. Jäquiꞌve mọꞌ Raquel ayij, ạvaꞌtumdye mọꞌ Josétum, chịmoꞌyaꞌdye mọꞌ dyụtsyiꞌ in. 8Yi Esaú jéte Jacob:
—¿Jedyedyes caꞌ cuꞌdyeꞌ in, mọꞌ rébacsis yụ majmiyaꞌ in?
Vorjete Jacob jéte:
—Mídyes nash in paj qui maꞌjotyitiꞌve mi.
9Esaú jéte tsanꞌ:
—Jam raꞌ meꞌ vojity soꞌmitim, daiꞌ nash mọꞌyaꞌ ĉụiꞌsiꞌ cuꞌdyeꞌ yụ chimeꞌ, paj mọꞌyaꞌ mọmom, ĉụiꞌ raꞌ meꞌchuquim.
10Jacob vorjete:
—A na maꞌjotyibunꞌ jụijyamꞌ jụjjibutiꞌ ram ñịbeꞌyedyedyes yụ. A nash därsiꞌ maꞌjodyeꞌ cạvepye vejyaꞌ, jeñej Jenꞌ cạvete vejyaꞌ yụ, meꞌ shupquiꞌ, ĉaĉaij na jämꞌ tiĉunꞌtim. 11Yụ cọdyeye paj qui jụjjibutiꞌve ñịbeꞌyedyeij mọꞌ soꞌmeyes raꞌ, ĉaĉaij na muꞌ Jenꞌ jedyeꞌtum yuꞌtyin yụ, mijam jedyeꞌ jayej yụ —jéte Jacob muꞌ vojity muꞌ.
Meꞌ jévaꞌte ĉụiꞌdye jụjtyepte cuꞌdyeꞌ muꞌ mọꞌ soꞌmaquis vojity. 12Chat qui Esaú jéte:
—Jụdyej jọbajshaꞌ, yụ́dye raꞌ penꞌdyetuyac majmiyaꞌ.
13Vorjete Jacob:
—Vojity, chịj mi jambiꞌ ferdyeꞌtum miquiꞌmuntyiꞌ in, chimeꞌdye ọij oveca in judyeyaꞌ vaca in, räjtumdye ạvaꞌ mọꞌin. Vatyquej raꞌ fer jiꞌmiꞌacsejaꞌ jụijyaꞌ tsun, jiꞌnoꞌbacsejaꞌ na raꞌ vatyquej yiris mạyedyeꞌ, tupuj säñiꞌ mọꞌin in. 14Damꞌdye jämꞌ tashan mi, tsun raꞌ jäjämꞌtum junꞌ chuc tupuj cuꞌdyeꞌ in judyeyaꞌ ạvaꞌ in chat qui Seirĉan raꞌ chaꞌshebadyeyac —jéte.
15—Jụdyej —vorjete Esaú—, yụ raꞌ yụꞌtyeyetacye úñity yụ, paj qui muꞌin ñútyin in.
Jacob jam jụjyi jéte tsanꞌ muꞌ Esaú:
—Jam raꞌ jemoñeꞌ yajquiyitim.
16Mọꞌdye mạyedyeꞌ sacbun muꞌ Esaú, yạjquicseban caꞌñibun Seirĉan jijtuban. 17Muꞌ na Jacob Sucotĉan jịjcaij muꞌ. Muꞌĉan acaij muꞌ judyeyaꞌ sópeij chimeꞌ cuꞌdyedyes muꞌ. Mọꞌdyes tịj mọꞌ dyäquedyes Sucot.
18Meꞌ jiquej muꞌ Jacob yacchuiꞌ Padan-aram, Canaánĉan jịjcaij muꞌ, jam jedyeij muꞌ. Tajñiꞌĉan dyäqui muꞌ c̣hẹiꞌyaꞌ mọꞌ Canaánĉansiꞌ bäꞌyedyeꞌ Siquem. 19Muꞌĉan yaꞌij méquiꞌve jac, dyäquedyedyes muꞌ, Hamortyiꞌ chätidyeꞌ jäctyeyacsi jac yiriꞌ cien querec̣ha anictyity plata jäctyetacsi jiquej. Hamor Siquemtyiꞌ jenꞌ muꞌ. 20Chat qui Jacob jämꞌtyeꞌ yiris jiꞌcoꞌshayacdyeꞌ Jenꞌdyes. Mọꞌ yụꞌtyeyeꞌ tịj: "El Elohe Israel", meꞌ jịꞌtiꞌeꞌ. #33:20 El Elohe Israel yiꞌ ca yiꞌ "Jenꞌ na Israeltyiꞌ Jenꞌ".
Currently Selected:
Génesis 33: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
