Juan 11

Lázaros sänꞌdyemꞌ

1-2Muꞌyaꞌ jiquej yirity muntyiꞌ, Lázaro tịj muꞌ Betaniaĉan bäꞌyi muꞌ vojiꞌtum muꞌ, María judyeyaꞌ Marta. Mọꞌ María taiꞌbites yuj Jesússiꞌ jiquej jẹrejresyaꞌ, chịmoꞌdye shamꞌbibajte ĉụiꞌsiꞌyaꞌ fin mọꞌ. Muꞌ na Lázaro japacjoij 3mọꞌdyes qui vojiꞌ muꞌ juteyete p̂eyacdyeꞌ Jesúsdyes, yiꞌ:

—Jịꞌchiyacsity, uts penꞌdyeꞌ mi japacjoij —yiꞌ p̂eyacdyeꞌ mọꞌin.

4Chị́qui muꞌ Jesús yi:

—Mọꞌ japacjodyeꞌ muꞌ jam sänꞌdyedyes muꞌ, mọꞌ jịꞌĉocdyes Jenꞌsidyes ferdyeꞌ paj qui jorojĉanjibun yụ ferdyeꞌ yụ Jenꞌtyiꞌ Ạvaꞌ yụ —jéyacsi Jesús.

5Jesús mạꞌjeyacsi räjtumdye in, Marta judyeyaꞌ vojiꞌ mọꞌ, María judyeyaꞌ Lázaro. 6Meꞌ tsanꞌ meꞌ aty jéyac junꞌ chuc japacjoij muꞌ Lázaro, mijam qui namꞌ cavin jaĉucdyi, taĉan chum muꞌĉan päräꞌ mạyedyeꞌ. 7Chat q̂uinꞌdyemꞌ muꞌ Jesús jéyacsi jịꞌchiyactyiꞌ muꞌ:

—Caꞌñibujshaꞌ chimuꞌĉan Judeaĉan jịjcabajshaꞌ —jéyacsi Jesús.

8Jịꞌchiyactyiꞌ muꞌ jéte in:

—Jịꞌchiyacsity, jambiꞌ men muꞌĉantyiꞌ judío in mạꞌjeꞌ mijyaꞌ ujan in, uts na meꞌ mạꞌjeꞌ chimuꞌĉan jịjcaban mi —jéte in.

9Jesús vorjeyacsi:

—Mọꞌyaꞌ nash yiriꞌtac päräꞌ jiyiꞌ hora yiris mạyedyeꞌ. Tyi chuc mạijĉan miꞌi jụijyaꞌ, muꞌ raꞌ jam tachyi, ĉaĉaij na mọꞌyaꞌ mạijyis jacchedyes. 10Tsedyedyeꞌ na miꞌi jụijyaꞌ, tachyi raꞌ ĉaĉaij na itŝiꞌ mạij buꞌyis jam junꞌ naijti —jéyacsi Jesús.

11Muꞌ qui Jesús cächjeꞌ p̂eyacdyeꞌ, yi:

—Muꞌ Lázaro penꞌdyeꞌ tsun aty ĉọshi, muꞌve raꞌ jịjcaij yụ, yụ raꞌ jịꞌtsaꞌeĉajte paj qui jam yejĉoij ĉọshi —jéyacsi Jesús jịꞌchiyactyiꞌ muꞌ.

12Vorjete in jịꞌchiyactyiꞌ muꞌ:

—Jịꞌchiyacsity, ĉọshiꞌ jụijyaꞌ muꞌ chäĉän raꞌ muꞌ jam raꞌ säñi —jéte in.

13Muꞌ na Jesús p̂eijbite sänꞌdyeꞌ muꞌ, muꞌin na jịꞌchiyactyiꞌ muꞌ ĉọshdyeꞌ ĉọpte muꞌin in. 14Chat qui muꞌ jämꞌ jịꞌchiqueyacsi jéyacsi:

—Aty säñi muꞌ Lázaro, 15meꞌ tsanꞌ meꞌ där qui namꞌ jämꞌ miꞌindyes itŝij yụ muꞌĉan, yoquiꞌdyemꞌ säñi jiquej u muꞌ, paj qui cavibutiĉaꞌ ferdyeꞌ yụs miꞌin paj qui anicjitiĉaꞌ yụ miꞌin. Jụdyej, ĉọcja yiristum muꞌ Lázaro —jéyacsi Jesús jịꞌchiyactyiꞌ muꞌ.

16Tomás qui yi, muꞌ Epoj jétety in, muꞌ jéyacsi yoctyiꞌ jịꞌchiyactyiꞌ in, yi:

—Jịjcajaꞌ tsun chimeꞌ paj tsunmun ijac yiriꞌyaꞌ muꞌtum —jéyacsi Tomás.

Jesús tsạꞌchucsity judyeyaꞌ vañinjeyacsebantyiꞌ

17Meꞌdye venjoij muꞌĉan in, aty toꞌĉan atsvun muꞌ Lázaro, meꞌ dạquicte muꞌ Jesús, aty vạjpedyeꞌ mạyedyeꞌ meꞌ buꞌyi. 18Mọꞌ Betania c̣hẹiꞌyaꞌ buꞌyiꞌ mọꞌ Jerusalén, araj chibin quirometro mọꞌ. 19Jerusalénĉantyiꞌ daiꞌ atsij judío in ĉọshseti in Marta judyeyaꞌ María, mạꞌjeꞌ tsanꞌ jiꞌjiyacsebi táredyeꞌ mọꞌin. 20Chị́quiꞌ mọꞌ Marta aty muꞌ meij jijtuij Jesús, sacyiꞌ mọꞌ jiꞌrebeĉunꞌte. Mọꞌ na María taĉan acaꞌĉan. 21Jiꞌrebete mọꞌ Marta muꞌ Jesús chat jéte:

—Muꞌyaꞌ jụijyaꞌ jiquej mi, a vuty jam säñi vojity o tsun. 22Meꞌ tsanꞌ meꞌ, yụ qui namꞌ chịꞌ jedyeꞌ chuc q̂uinꞌ cọdyete Jenꞌ jụijyam, muꞌ raꞌ jụjjibun cọdacdyeꞌ mi —jéte Marta.

23Jesús vorjeꞌ:

—Vañinyeban nash raꞌ vojity miꞌin —jeꞌ Jesús.

24Marta vorjete:

—Chịꞌ yụ vañinyeban nash raꞌ muꞌ jadyiquisĉan tupudyeꞌ, junꞌsiꞌ chuc vañinyebanyaꞌ muꞌin säñity muntyiꞌ in.

25Jeꞌ Jesús:

—Yụ nash tsạꞌchucsity judyeyaꞌ vañinjeyacsebantyiꞌ yụ. Tyi chuc anicjintyiꞌ yụ, meꞌ tsanꞌ säñi jụijyaꞌ muꞌ, vañinyeban raꞌ. 26Muꞌin tsạꞌtyiꞌ anicjin jụijyaꞌ yụ in, muꞌin raꞌ jam sänꞌdyeꞌ cạveꞌ in. ¿Meꞌ buty anicjibutiꞌ p̂eyacdyeꞌ yụs mi mọꞌ jéyes, Marta?

27Vorjete Marta:

—Anic meꞌ Jịꞌchiyacsity, yụ nash anicjeye, mi nash anictyity Jenꞌtyiꞌ Ạvaꞌ mi, mi nash Jiꞌc̣honacsity Muntyiꞌ, atsij úcheꞌ jaccheꞌ jijtuij mi, yoj yidyemꞌ Jenꞌ jiquej u.

Jesús tárete muꞌ Lázaro

28Marta qui fayaquiꞌ vojiꞌ mọꞌ, María, pạrejve jeꞌ:

—Atyuꞌ u muꞌyaꞌ muꞌ Jịꞌchiyacsity, mi fayin —jeꞌ.

29María seꞌveꞌ p̂eyacdyeꞌ, sac tyeiꞌ vatyquej ĉọcte muꞌ Jesús. 30Jorojyaꞌdyemꞌ mọꞌ bäꞌyedyeꞌ, yóĉandyemꞌ jiꞌrebeteĉan o mọꞌ Marta. 31Muꞌĉantyiꞌ acaꞌĉantyiꞌ judío in, muꞌin atsijtyiꞌ in jiꞌtäꞌtsacsebity táredyeꞌ in. Cạve in María sacyiꞌ jorojyaꞌ jịjcaiꞌ, mọꞌdyes qui muꞌin cäc̣häꞌchuiꞌ in, jeñej ruꞌdyeiꞌyaꞌ jịjcaiꞌ ĉọiꞌ in, táreĉanꞌ mọꞌyaꞌ.

32María dạquicte muꞌ Jesús, dyụtsyiꞌ mọꞌyaꞌ, jéte:

—Jịꞌchiyacsity, muꞌyaꞌ jụijyaꞌ jiquej mi, a vuty jam säñi vojity o tsun —jéte María.

33Jesús cạveꞌ táriꞌ mọꞌ, judyeyaꞌ muꞌin penꞌdyetucsity mọꞌin in chitaridye chimeꞌ muꞌin in, muꞌmun chimeꞌ fer dyijyi ĉojtyiꞌĉan muꞌ. 34Jéyacsi Jesús:

—¿Junaꞌ caꞌ rudyuꞌjetinte miꞌin?

Vorjete in:

—Jeshaꞌ cạveĉajsha, Jịꞌchiyacsity.

35Muꞌyaꞌ tári muꞌ Jesús chimeꞌ. 36Judío in aty meꞌ cạvete in chat muꞌin yi in:

—¡Anic buty fer mạꞌjete jiquej muꞌ! —yi jítidyeij in.

37Pạrej na muꞌyaꞌ yi in:

—Utsdye u jịꞌnaijbajtety muꞌ tofety muntyiꞌ jiquej, ¿jam buty tupuj jiꞌchäĉajte Lázaro paj qui jam säñi? —jítidyeij in.

Jesús vañinjebajte muꞌ Lázaro

38Jesús quivij fer dyijyi ĉojtyiꞌĉan muꞌ, chat qui ruꞌdyeiꞌyaꞌ jịjcaij. Mọꞌ toꞌ därtyiꞌyaꞌ mij ĉärꞌtac. 39Jesús jéyacsi:

—Burꞌjemac uts mij, vanacjevac mọꞌ toꞌ.

Mọꞌ na Marta Lázarovunsiꞌ vojiꞌ muꞌ, yiꞌ jéte:

—Aty na raꞌ p̂oqui muꞌ ĉaĉaij na aty vạjpedyeꞌ mạyedyeꞌ tyiti atsvun säñi jiquej —jéte Marta.

40Vorjeꞌ Jesús:

—A bajaꞌ jéye yụ, anicyiꞌ jụijyaꞌ mi cạvepte raꞌ mi därsiꞌ ferdyeꞌ Jenꞌsiꞌ muꞌ —jeꞌ Jesús.

41Chat qui meijjetyete mij in. Muꞌ qui Jesús mạyedyeꞌcheꞌ cạvi, yi muꞌ:

—Yụ́tyiꞌ Jenꞌ, yoshoropaij mi, mi nash seꞌvibutiꞌ cọdacdyeꞌ yụs mi. 42Chị́yeye yụ mi räjĉan seꞌvibutim cọdacdyeꞌ yụ, ọij mọmoꞌ q̂uinꞌ jéye mi paj seꞌvaqui uts muntyiꞌ in paj qui muꞌin anicjin yụ in yụ jutactyiꞌ mítyiꞌ —yi Jesús jéte Jenꞌ.

43Chat qui fer p̂eyaqui yi:

—¡Lázaro, shupĉada muꞌĉantyiꞌ!

44Meꞌdye muꞌ shuban säñity, meꞌ tsanꞌ comonꞌtac aꞌ muꞌ quịꞌsiꞌyaꞌ. Jesús jéyacsi:

—Dajjetyebajmac uts quịꞌsiꞌ paj miꞌeban muꞌ.

Dyijyi in mạꞌjeꞌ ĉärꞌte in muꞌ Jesús

(Mat 26:1-5; Mar 14:1-2; Luc 22:1-2)

45Muꞌin judío in ĉọ́teꞌtyiꞌ jiquej María in cạveptety in ferdyeꞌ Jesússiꞌ muꞌ, daiꞌ muꞌin anicjete in. 46Pạrej na ĉọcsequi fariseo in jéyacsequi in muꞌ Jesús vañinjebajte muꞌ Lázaro sänaquety. 47Mọꞌdyes qui muꞌin fariseo in vajmuꞌyaij muꞌin in tashchety cudyititytum Jenꞌcheꞌ in, räjtumdye judíoty ayoꞌ muꞌin. Yi jítidyeij in:

—¿Junꞌ qui bu raꞌ q̂uinꞌ tsun ĉaĉaij na muꞌ Jesús anic daiꞌ jịꞌcaveyacsi ferdyeꞌ muꞌ? 48Jẹjcaiꞌ meꞌ jụijyaꞌ, räj raꞌ uts muntyiꞌ in anicjete in, judyeyaꞌ vatyquej raꞌ muꞌin Romaĉantyiꞌ in dyijyi raꞌ in muꞌ nash anictyity ayoꞌ tsun, meꞌ raꞌ ĉúti muꞌcheꞌ in. Vatyquej raꞌ atsij in jịvaꞌchatyisinꞌ raꞌ in Jenꞌsiꞌ acaꞌ muꞌ, vatyquej raꞌ jiꞌcavꞌquisinꞌ in —yi jítidyeij in.

49Yirity muꞌĉantyiꞌdye chimeꞌ Caifás tịj muꞌ, tashchety cudyitity Jenꞌcheꞌ, meꞌ buꞌyi muꞌ mọꞌ yómodyeꞌ. Yi muꞌ jéyacsi:

—Mijam damꞌ chịj miꞌin. 50Damꞌdye jämꞌ yirity muntyiꞌ ijac muntyidyes tsun paj qui jam räj tsun meꞌjisinꞌ Romaĉantyiꞌ in —jéyacsi Caifás.

51P̂eyacdyeꞌ muꞌ Caifássiꞌ jam ĉụiꞌsiꞌyaꞌ dyijyedyeꞌ p̂eyaqui muꞌ, meꞌ tsanꞌ jam chị́yeꞌ muꞌ, p̂eijbite qui namꞌ sänꞌdyeꞌ Jesússiꞌ muꞌ, junꞌ chuc raꞌ ijac judíodyes in, meꞌ shupquiꞌ p̂eyacdyeꞌ muꞌ. Meꞌ soꞌmac Caifás p̂eyacdyeꞌ Jenꞌyaꞌ ĉaĉaij na muꞌ Jesússiꞌ sänꞌdyeꞌ p̂eijbite. Muꞌ Caifás tashchety cudyitity Jenꞌcheꞌ mọꞌ yómodyeꞌ jiquej. 52Jam judíodyes ramꞌ ijac muꞌ, räjtumdyes muntyiꞌ in paj qui Jenꞌtyiꞌ ạvaꞌ shupqui in, junanaty ĉụiꞌ in, räj raꞌ in yirity yụꞌtacsi Jesús. 53Mọꞌdye mạyedyeꞌ muꞌin judíoty ayoꞌ muꞌin, dyijyi in junꞌ buꞌyi chuc raꞌ ijate in muꞌ Jesús yiriꞌyaꞌ in.

54Mọꞌdyes muꞌ Jesús aty jam nati muntyisyaꞌ vej muꞌin Judeaĉantyiꞌ in. Chat shuban Judeaĉantyiꞌ, Efraínsiꞌĉan qui jac jịjcaij muꞌ, c̣hẹiꞌyaꞌ buꞌyiꞌ mọꞌ cäjyas jac. Muꞌĉan dyäqueban jịꞌchiyactyiꞌtum muꞌ.

55Aty raꞌ chaꞌsheꞌ in Jiꞌc̣honacdyes feshta dyijtucdyes judíos muꞌin. Anic daiꞌ muntyiꞌ in Jerusalénĉan jịjcaij in, cạvequety feshta in. Muꞌĉan jäꞌmij ĉụiꞌ jämꞌ yuꞌti in ĉụiꞌsiꞌyaꞌ yicdyeꞌ muꞌin, jambiꞌdyemꞌ chaꞌsheꞌ mọꞌ feshta in. 56Muꞌĉan tsanꞌ quevte in muꞌ Jesús. Muꞌĉan atsij in Jenꞌsiꞌĉan acaꞌ muꞌ. Yi jítidyeij in:

—¿Jätäjyi miꞌin u, meꞌ buty raꞌ atsij muꞌ Jesús úĉan cạveteꞌ feshta? —yi jítidyeij in.

57Muꞌin na tashchety cudyitity Jenꞌcheꞌ in räjtumdye fariseo in, yụꞌtyeꞌ p̂eyacdyeꞌ in, yiꞌ: tyi chuc chịj jụijyaꞌ in junꞌve chuc muꞌ Jesús cạvete in, jemoñeꞌ yi in paj qui muꞌin ĉọcte in judyeyaꞌ qui tapjete in.

Currently Selected:

Juan 11: CAS

Highlight

Copy