Juan 13

Jesús favacsebi yuj muꞌin jịꞌchiyactyis muꞌ

1Aty mọꞌ rispera mọꞌ feshtas Jiꞌc̣honacdyesiꞌ. Muꞌ na Jesús chịj aty ayij tupudyeꞌ yạjquibanꞌ raꞌ ọij jac, Jenꞌyaꞌ qui raꞌ jịjcaban muꞌ. Jesús räjĉan mạꞌjeyacsi jịꞌchiyactyiꞌ muꞌ, yejĉoij jịꞌcaveyacsi mạꞌjitidyes muꞌ junꞌ quiꞌ chuc yạjquicseban. 2-3Sọyoꞌ aty dyijyedyeꞌ jasoꞌmiti muꞌ Judas paj qui caminve jiꞌmincate muꞌ Jesús. Judas, Simón Iscariotety ạvaꞌ muꞌ. Jesús chịj jam muꞌ úchety, Jenꞌyaty muꞌ atsij, Jenꞌ jayuꞌti paj qui muꞌ ayoꞌbuꞌyi räjdyes, a raꞌ meꞌsiꞌ Jenꞌyaꞌ raꞌ jịjcaban quivij, räj mọꞌ chịj Jesús.

Mọꞌdye yómos muꞌ Jesús jịꞌchiyactyiꞌtum muꞌ feshtadyes säcsi in. Aty ijaij säcsi in, 4sacyeban muꞌ Jesús meijjeyaqui p̂urꞌtyity muꞌ, shạ́quityyaꞌ qui ñutuꞌjiti fidyeꞌĉan. 5Chat qui chojjeꞌ ojñiꞌ jäꞌchäsĉan, chat qui favacsebi yuj muꞌin jịꞌchiyactyis muꞌ judyeyaꞌ qui shạcsebiban yuj muꞌin shạ́quityyaꞌ muꞌ.

6Ventyecte muꞌ Pedro aty raꞌ favbite yuj muꞌ, yi muꞌ Pedro:

—Jịꞌchiyacsity, ¿mi adac raꞌ favbutiꞌ yuj mi? —jéte.

7Vorjete Jesús:

—Q̂uinꞌ jambiꞌ chịj mi jedyeꞌ buty mọꞌ cạiꞌ favacdyeꞌ yụ, jäquiꞌve raꞌ chịj mi ọij jedyeꞌ buty cạiꞌ —jajiti.

8Vorjete Pedro:

—Jam raꞌ junꞌ favbutiꞌ yuj mi —jéte Pedro.

Vorjete Jesús:

—Jam raꞌ favbiye jụijyaꞌ yuj mi, jam raꞌ junꞌ tupuj yụ́tyiꞌ shupqui mi —jajiti Jesús.

9Vorjete Simón Pedro:

—Jụdyej, Jịꞌchiyacsity, jam raꞌ yuj mọmoꞌ favbutim, chimeꞌdye raꞌ un yụ judyeyaꞌ joꞌnoꞌ yụ, meꞌ meꞌ raꞌ favtim —jéte Pedro.

10Vorjete Jesús:

—Tyi chuc mụiꞌveyaꞌ dyuijtyiꞌ, muꞌ aty jämꞌ c̣hiconꞌtac, aty jam jemoñeꞌ quivij favac juban, yuj qui mọmoꞌ jemoñeꞌ favac muꞌ. Meꞌdye miꞌin chimeꞌ aty c̣hiconꞌtac miꞌin, jam qui namꞌ räjtum miꞌin —jéyacsi Jesús.

11Muꞌ yi: "Jam qui namꞌ räjtum miꞌin", ĉaĉaij na muꞌ chịj tyi chuc raꞌ jajiꞌmincati muꞌinĉantyiꞌ in.

12Aty meꞌsiꞌ ijaij favacsebi yuj muꞌin chat qui muꞌ Jesús cuvij yụꞌtaĉan p̂urꞌtyity muꞌ, chat qui p̂utsquenꞌyeban, jéyacseban:

—¿Chịj tyuꞌ u miꞌin jedyeꞌ buty cạiꞌ mọꞌ favacdyeꞌ yuj miꞌin? 13Meꞌ jítiĉaꞌ yụ miꞌin: "Mi Jịꞌchiyacsity, mi nash Ayoꞌ tsun", jítiĉaꞌ yụ miꞌin. Anic rụij jítiĉaꞌ miꞌin, anicdye meꞌ, yụ Ayoꞌ miꞌin judyeyaꞌ jịꞌchiyeyactyiꞌ. 14Meꞌ tsanꞌ Ayoꞌ yụ miꞌin, judyeyaꞌ jịꞌchiyeyactyiꞌ chimeꞌ, yụ qui namꞌ favbiyac yuj miꞌin, úñity buꞌyi yuꞌti yụ, mọꞌdyes jemoñeꞌ vaj meij favbutidyeij yuj miꞌin. 15Yojdyemꞌ yụ jämꞌtaqui u, meꞌdye raꞌ miꞌin chimeꞌ. 16Yụ anic jéyac, muꞌ úñity jam junꞌ cätste ayoꞌ muꞌ, uyaꞌyaꞌ muꞌ úñity, meꞌdye muꞌ chimeꞌ jutactyiꞌ uyaꞌyaꞌ, jam cätste muꞌ jajutitity. Meꞌ tsanꞌ yụ Ayoꞌ miꞌin, úñity qui namꞌ yụ miꞌinyaꞌ paj qui miꞌin cäc̣häꞌchubutiĉaꞌ dyijyedyeꞌ yụs miꞌin. 17Chiquetiñeꞌ jụijyaꞌ ọij jiꞌchäyitidyeꞌ yụ, judyeyaꞌ cäc̣häꞌchubutiĉaꞌ jụijyaꞌ yụs dyijyedyeꞌ miꞌin, meꞌ raꞌ räjĉan maꞌjoij bäꞌyi miꞌin.

18Jam qui namꞌ yụ tas jiꞌjäcyac miꞌin, yụ chịj tyijtyi chuc tsimꞌtactyiꞌ yụ. Úyaꞌ yirity jịꞌcätsety sánacdyeꞌ yiꞌ: "Muꞌ säcsity yụ́tum, muꞌdye camanꞌ fáquibun yụ", yiꞌ. 19Yụ jäꞌmij jéyac ọij jambiꞌdyemꞌ cạ̈tsiꞌ mọꞌ, paj qui miꞌin anicjitiĉaꞌ yụ miꞌin paj qui chịj miꞌin tyi buty yụ.#13:19 Griegosĉan p̂eyacdyeꞌ yiꞌ ọij YỤ́DYE NASH YỤ. Meꞌ muꞌ Jesús jịꞌchiqueyacsi anictyity Jenꞌ muꞌ. 20Yụ anic jéyac, tyi chuc tiĉuñibun jutactyiꞌ yụ, yụ́dyemꞌ tiĉuñin yụ in, tyi chuc tiĉuñin yụ in, Jenꞌ tiĉunꞌte in, muꞌ jutintyiꞌ yụ —jéyacsi Jesús.

Jesús jäꞌmij jéyacsi muꞌ Judas jajiꞌmincati raꞌ muꞌ

(Mat 26:20-25; Mar 14:17-21; Luc 22:21-23)

21Aty meꞌsiꞌ p̂eyeꞌ ọij, chat qui muꞌ Jesús där tári ĉojtyiꞌĉan muꞌ. Chat qui muꞌ chap jịꞌchiqueyaqui jịꞌchiyactyiꞌ muꞌ:

—Yụ anic jéyac, yirity miꞌinĉantyiꞌ jiꞌmincan raꞌ yụ —jéyacsi Jesús.

22Jịꞌchiyactyiꞌ muꞌ vaj meij muꞌin cavitidyeij in dyijyi ĉojtyiꞌĉan in, tyi buty jiꞌjäcte muꞌ Jesús, yi in. 23Chimeꞌdye muꞌyaꞌ mesayaꞌ yirity jịꞌchiyactyiꞌ muꞌ, cạ̈rꞌ buꞌyi bäꞌyi Jesústum, anic mujuꞌchaꞌ jạmaꞌjajitity. 24Muꞌ na Simón Pedro c̣họcoꞌ c̣họcoꞌ jéte muꞌ jạmaꞌjajitity muꞌ Jesús, mạꞌjeꞌ paj qui muꞌ cọdyete Jesús tyi buty raꞌ jajiꞌmincati. 25Anicdye meꞌ muꞌ jạmaꞌjajitity dadamꞌ c̣hẹiꞌyaꞌyeĉojĉoij Jesúsyaꞌ jéte:

—Jịꞌchiyacsity ¿tyi buty raꞌ meꞌ jiꞌmeꞌtyin mi? —jéte.

26Jesús vorjete:

—Uts pan yụ raꞌ c̣hucjete, yódyetydyemꞌ raꞌ soꞌmetety u yụ, muꞌ raꞌ jiꞌmincan yụ —jéte muꞌ Jesús.

Meꞌdye muꞌ Jesús c̣hucjete pan chat qui Judas soꞌmete, Simón Iscariotety ạvaꞌ muꞌ. 27Tapyedyeꞌĉandye pan, vatyquej Satanás jasäsbuti ĉojtyiꞌ muꞌ. Jesús jajiti:

—Cavinyeva, jịꞌcätsevaꞌ junꞌ chuc dyijyedyeꞌ mi.

28Muꞌin na jịꞌchiyactyiꞌ muꞌ penꞌdyetutety mesayaꞌ in, mijam muꞌin chiquepte p̂eyacdyeꞌ in, jedyeꞌ chuc mọꞌ cạiꞌ. 29Jeñety muꞌ Jesús p̂eyeꞌ mọꞌ yaꞌijsiꞌ raꞌ feshtadyes jedyeꞌ, judyeyaꞌ damꞌ soꞌmacsi querec̣ha ñịbety in, meꞌ meꞌ ĉọpte pạrej p̂eyacdyeꞌ in, ĉaĉaij na muꞌ Judas ĉọjcacsebity querec̣ha muꞌin, meꞌ yụꞌte in.

30Muꞌ na Judas aty tapjete muꞌ pan cavin sac tyeij shupqui. Aty na tomajyejoiꞌ atsvun.

Mụiꞌsis yụꞌtacdyeꞌ Jesússiꞌ muꞌ

31Aty tyäpäꞌyejoban muꞌ Judas chat qui muꞌ Jesús yi jéyacsi:

—Q̂uinꞌ raꞌ jorojĉanyiꞌ fer buꞌyedyeꞌ yụ, yụ Anictyity Muntyiꞌ yụ. Chimeꞌdye jorojĉanjepte raꞌ yụ fer buꞌyedyeꞌ Jenꞌsiꞌ muꞌ. 32A raꞌ meꞌ jorojĉanjepte jụijyaꞌ yụ mọꞌ fer buꞌyedyeꞌ Jenꞌsiꞌ muꞌ, chat qui raꞌ muꞌ Jenꞌ jorojĉanjibun fer buꞌyedyeꞌ yụ, cavintumdye raꞌ meꞌ jiyin yụ muꞌ Jenꞌ. 33Ạvaꞌ yụ, aty raꞌ jam men penꞌdyetuyac miꞌin. Yoj jeyacsidyemꞌ yụ jiquej u muꞌin judíoty ayoꞌ muꞌin, meꞌ raꞌ tsanꞌ quivdyiĉaꞌ yụ miꞌin, jam qui na ramꞌ junꞌ daĉudyiĉaꞌ yụ miꞌin, meꞌ yi jiquej yụ, miꞌindyes chimeꞌ ọij shupquiꞌ p̂eyacdyeꞌ. 34Q̂uinꞌ qui namꞌ mụiꞌsis p̂eyacdyeꞌ yụ raꞌ soꞌmeyac, yiꞌ: Vaj meij jäꞌmij mạꞌjitiĉamꞌ miꞌin, yojdyemꞌ yụ mạꞌjeyac u, meꞌdye raꞌ miꞌin chimeꞌ mạꞌjitidyeij. 35Vaj meij mạꞌjitidyeij jụijyaꞌ miꞌin, chäyinac raꞌ muntyiꞌ in anic cäc̣häꞌchutiĉaty yụ miꞌin.

Jesús jäꞌmij jap̂eijbuti Pedros ticamacdyemꞌ

(Mat 26:31-35; Mar 14:27-31; Luc 22:31-34)

36Chat qui muꞌ Pedro yi jéte Jesús:

—Jịꞌchiyacsity ¿janaꞌ qui bu raꞌ ĉaĉaij jịjcaij mi, yoj yi na jítiĉaꞌ tsun miꞌin?

Vorjete Jesús:

—Yócheꞌdyemꞌ raꞌ jịjcaij yụ u, meꞌ raꞌ tsanꞌ quivjunꞌ yụ mi, jam qui na ramꞌ junꞌ daĉunꞌ mi, jábiyaꞌ raꞌ daĉunꞌ mi —jajiti Jesús.

37Pedro jéte:

—Jịꞌchiyacsity ¿junꞌ buty jam tupuj cäc̣häꞌ muꞌyaꞌ yụ? Meꞌ raꞌ tsanꞌ ijan yụ in mídyes, yụ tupuj mítum —jéte Pedro.

38Vorjajiti Jesús:

—¿Tupuj adac mi säñi yụ́dyes? Yụ anic jéye, jambiꞌdyemꞌ raꞌ p̂oñi ojtereꞌ, chibin quiꞌ raꞌ yi mi ticamitim: "Yụ jam cäc̣häꞌchutety muꞌ Jesús" yi raꞌ jéyacsi mi —jéte Jesús.

Currently Selected:

Juan 13: CAS

Highlight

Copy