Marcos 13
13
Jịvaꞌchac raꞌ Jenꞌsiꞌ acaꞌ muꞌ
(Mat 24:1-2; Luc 21:5-6)
1Jesús shupqui Jenꞌsiꞌĉantyiꞌ acaꞌ muꞌ. Yirity jịꞌchiyactyiꞌ muꞌ p̂eijbite acaꞌ muꞌ, jéte:
—Jịꞌchiyacsity, cạvevaꞌ anic där jämꞌtyiꞌ uts mij in. ¡Där jäjämunsiꞌ ọij acaꞌ q̂uinꞌ in!
2Jesús vorjeyacsi:
—Anicdye meꞌ, där jäjämunsiꞌ ọij acaꞌ cạvejas q̂uinꞌ. Yụ jéyac, räj ọij q̂uinꞌ cạvetiñes, räj raꞌ jịvaꞌchac, räj raꞌ mij mọꞌ vänꞌjetac, mijam raꞌ yirity tacyaꞌ jiꞌyajcati.
Jịꞌĉocdyes aty raꞌ ayij jadyiquis tupudyeꞌ
(Mat 24:3-28; Luc 21:7-24; 17:22-24)
3Jesús mụcuꞌcheꞌ jịjcaij Orivocheꞌ, muꞌcheꞌ bäꞌyi, quic̣henꞌ buꞌyi Jenꞌsiꞌ acaꞌ muꞌ. Vạjpedyeꞌ jịꞌchiyactyiꞌ muꞌ ĉọcte in, Pedro judyeyaꞌ Santiago judyeyaꞌ Juan judyeyaꞌ Andrés, mijam yoctyiꞌ muꞌyaꞌ in. 4Jéte in:
—Jítiĉamꞌ tsun, ¿junꞌsiꞌ buty raꞌ cạ̈tsiꞌ ọij jítiĉas tsun miꞌin? ¿Jedyeꞌ buty raꞌ jịꞌĉocdyes aty raꞌ cạ̈tsiꞌyaꞌ mọꞌ?
5Jesús vorjeyacsi:
—Areꞌĉa miꞌin jam raꞌ seꞌvacsebi miꞌin väñädyeꞌ muntyis muꞌin. 6Daiꞌ raꞌ muntyiꞌ jiꞌcaviti in, yụ́siꞌ raꞌ tịj jiꞌjäcbun yụ in, yi raꞌ in: "Yụ nash Jiꞌc̣honacsity Muntyiꞌ", judyeyaꞌ qui raꞌ daiꞌ muntyiꞌ in anicjeyacsebi väñädyeꞌ muꞌin.
7Chimeꞌdye raꞌ daiꞌ seꞌvetiñeꞌ chutidyeꞌ in, c̣hẹiꞌyaꞌ bäꞌyity in judyeyaꞌ mochtyiꞌ in. Meꞌ raꞌ tsanꞌ seꞌvetiñeꞌ jam qui na ramꞌ cajotyiti miꞌin, meꞌ raꞌ tsanꞌ meꞌ cạ̈tsiꞌ, jambiꞌ qui na ramꞌ ayij jadyiquis tupudyeꞌ. 8Yiris raꞌ jac yocsiꞌtum raꞌ chutidyeij in, judyeyaꞌ yirity jacchety ayoꞌ jutaqui raꞌ väc̣häꞌtyity muꞌ, chuti raꞌ yoctyiꞌtum in. Junꞌsiꞌ ramꞌ ĉụiꞌ mọꞌyaꞌ bubacdyeꞌ chimeꞌ, chimeꞌ raꞌ mọꞌyaꞌ dáquedyeꞌ. Meꞌ raꞌ tiyacchutiꞌ ñịbedyes muntyidyes in.
9Ĉujcatiĉamꞌ jäꞌmiij miꞌin, jiꞌmeꞌtyinac nash raꞌ ayoꞌyaꞌ in judyeyaꞌ raꞌ jiꞌsiꞌbinac in vajmuꞌyadyeꞌĉan in. Yụ́dyesiꞌ raꞌ jiꞌmeꞌtyinac in bäꞌyedyeꞌĉantyiꞌyaꞌ ayoꞌ in judyeyaꞌ mujuꞌchatyyaꞌ ayoꞌ chimeꞌ. Miꞌin raꞌ jịꞌchiqueyacsi yụ́siꞌ p̂eyacdyeꞌ muꞌin ayoꞌ in. 10Jambiꞌdyemꞌ shupquetiꞌ jadyiquis raꞌ tupudyeꞌ, paiꞌtyity raꞌ in seꞌveꞌ raꞌ in jämꞌsiꞌ p̂eyacdyeꞌ Jenꞌsiꞌ muꞌ, chat q̂uinꞌdyemꞌ raꞌ chaꞌshinac jadyiquis tupudyeꞌ. 11Aty raꞌ jiꞌmeꞌtyinac jụijyaꞌ in, jam raꞌ cavin cajotyiti miꞌin mijam raꞌ dyijtutiñeꞌ miꞌin junꞌ buꞌyi chuc raꞌ ñutsjiti miꞌin p̂eyacdyeꞌyaꞌ, Jenꞌdye raꞌ soꞌminac p̂eyacdyeꞌ paj qui muꞌyaꞌ p̂eyaqui miꞌin. Miꞌin raꞌ jam ĉụiꞌsiꞌ p̂eyacdyeꞌ jiꞌshuptiñeꞌ, Jenꞌsiꞌ raꞌ Ạꞌedyeꞌ mọꞌ raꞌ p̂eyacdyeꞌ soꞌminac. 12Pạrej raꞌ muꞌyaꞌ in ĉụiꞌtyiꞌ vojity muꞌin jiꞌmeꞌtaqui raꞌ ayoꞌyaꞌ in paj qui ijate in, judyeyaꞌ raꞌ pạrej jiꞌmeꞌtaqui ayoꞌyaꞌ in ĉụiꞌtyiꞌ ạvaꞌ muꞌin paj qui ijac in, judyeyaꞌ pạrej raꞌ jiꞌijaqui ĉụiꞌtyiꞌ jenꞌ muꞌin judyeyaꞌ tseꞌ muꞌin. 13Räj raꞌ yụ́dyes mọꞌjinac fáquinac in. Tyi chuc jam peñity in junꞌ quiꞌ chuc jadyic tupudyeꞌ, muꞌin raꞌ c̣hoñi in.
14Chimeꞌdye raꞌ mọꞌ jiꞌac̣hiꞌtacsis jämꞌtacdyeꞌ mọꞌĉan raꞌ mọꞌ yụꞌtac jam junꞌtacdyeꞌĉan. (Tyi chuc p̂eyeꞌ ọij sánacdyeꞌ paj jämꞌ chiqueꞌ jätäjyiꞌ chuc.) Aty cạvetiñeꞌyaꞌ mọꞌĉan mọꞌ, chat qui raꞌ muꞌin Judeaĉantyiꞌ in yiristum ĉaꞌjoij in mụcuꞌcheꞌ jịjcaij in. 15Tyi chuc jorojyaꞌ acaꞌ jụijyaꞌ aty seꞌveꞌyaꞌ, paj jam junꞌ sitaĉan ĉụiꞌsiꞌ acaꞌ muꞌ, paj jam jäcaĉan jubij muꞌ paj muꞌvedye ĉaꞌjoij. 16Chimeꞌdye tyi chuc quịjodyeꞌĉan jụijyaꞌ, paj jam acatuban jäcaĉan quịꞌsiꞌ muꞌ, paj yiristum muꞌvedye yacchuti ĉaꞌjoij muꞌ. 17¡Där raꞌ ñịbeꞌ cạveꞌ in mọꞌin p̂en jạjtsis in, judyeyaꞌ tsiꞌyity ạvaꞌ mọꞌin! 18Cọdyemac Jenꞌ paj qui jam tsịvuꞌvudyeꞌĉan cavꞌquinac in. 19Anic raꞌ mọjoꞌchas därsiꞌ ñịbedyes jịꞌĉojtyeꞌ raꞌ muntyiꞌ in, jam jämꞌdyeyaꞌ jiquej joꞌmes ñịbedyes cạveꞌ in, yoquiꞌdyemꞌ Jenꞌ jämꞌtyeꞌyaꞌ ọij jac u meꞌdye q̂uinꞌ, mijam raꞌ jäquiꞌve cuvij joꞌmes mọꞌyaꞌ ñịbedyes. 20Jenꞌ aty dyijyi damꞌ raꞌ dyäcjeꞌ mạyedyeꞌ ñịbedyes tupudyeꞌ, jam meꞌ jụijyaꞌ a vuty tas muntyiꞌ säñi u in. Tsimꞌtactyidyes qui mọmoꞌ in, muꞌindyes ramꞌ dyäcjetyetac ñịbedyes mạyedyeꞌ in paj qui jam men meꞌ buꞌyiꞌ.
21Aty raꞌ meꞌsiꞌ jụijyaꞌ, yirity muntyiꞌ jínac jụijyaꞌ: "Mush úyaꞌ útsi Jiꞌc̣honacsity Muntyiꞌ", jam jụijyaꞌ, vatyquej raꞌ yi in: "Muꞌve muꞌ Jiꞌc̣honacsity Muntyiꞌ." Meꞌ yi jụijyaꞌ in jam raꞌ anicjeyacsebi p̂eyacdyeꞌ miꞌin. 22Ayijbanꞌ raꞌ därsiꞌ väñädyeꞌ jeñej buꞌyi raꞌ Jiꞌc̣honacsity Muntyiꞌ meꞌ buꞌyi raꞌ yuꞌti in, judyeyaꞌ raꞌ jeñej buꞌyi jasoꞌmitity p̂eyacdyeꞌ Jenꞌ in, meꞌ buꞌyi raꞌ yuꞌti chimeꞌ in. Därsiꞌ raꞌ ferdyeꞌ jịꞌcaveyacsi muntyiꞌ in paj qui anicjeyacsebive väñädyeꞌ muꞌin. Chimeꞌdye raꞌ muꞌinmun raꞌ fer väñätucsi in Jenꞌtyiꞌ tsimꞌtactyiꞌ muꞌ paj qui muꞌinmun anicjeyacsebi in chimeꞌ väñädyeꞌ muꞌin, meꞌ tupuj jụijyaꞌ in. 23Jäꞌmiij tashcheꞌ q̂uinꞌ jịꞌchiqueyeyac ọij paj qui dyij buꞌyi miꞌin jam qui anicyive miꞌin muꞌincheꞌ in.
Atsijban raꞌ Anictyity Muntyiꞌ
(Mat 24:29-35,42,44; Luc 21:25-36)
24Aty raꞌ meꞌsiꞌ jiyiꞌyaꞌ mọꞌ ñịbedyes, chat qui raꞌ tomajyi muꞌ tsun, tyumꞌ raꞌ mọꞌ tyeiꞌ ịvaj. 25Ọ́rotaꞌ raꞌ jọꞌchaij in, judyeyaꞌ raꞌ mạyedyeꞌches chimeꞌ jedyeꞌ noc̣hoꞌ noc̣hoꞌyiꞌ raꞌ in. 26Chat qui raꞌ cheꞌve jiꞌĉujtuyin yụ in yụ Anictyity Muntyiꞌ yụ, dyicbaꞌbadyeꞌ raꞌ jijtutuiꞌ yụ chạij yụ, därsiꞌyaꞌ raꞌ ferdyeꞌ yụ judyeyaꞌ mạijquedyeꞌtum raꞌ atsijban yụ. 27Chat qui raꞌ yụ jutaqui anjer yụ paj qui paiꞌ úcheꞌ jaccheꞌ jịjcaij in, jätisve, judyeyaꞌ rocve, judyeyaꞌ jijtuijve tsun, judyeyaꞌ siticheꞌ tsun, räj raꞌ dyụ́tsedyeꞌve jac jịjcaij in, meꞌ meꞌ raꞌ jäcacsi tsimꞌtactyiꞌ yụ in.
28Dyijtuvac miꞌin jedyeꞌ chuc jiꞌĉuyinac mọꞌ cätidyeꞌ higuera. Mọꞌ cätidyeꞌ aty tiyacchutiꞌ coꞌñeyebanꞌ jụijyaꞌ mọꞌ, mọꞌ jiꞌchäquiyinac aty c̣hẹiꞌyaꞌ tupudyeꞌ juñꞌyebanꞌ. 29Meꞌdye raꞌ chimeꞌ aty cạvetiñeꞌyaꞌ joꞌmes nạijyiꞌ chat qui raꞌ chịj miꞌin aty c̣hẹiꞌyaꞌ ayidyeꞌ yụ. 30Yụ jéyac, jambiꞌ raꞌ jụꞌñij mọtsi uts muntyiꞌ in räj raꞌ tashcheꞌ cạ̈tsiꞌ mọꞌ. 31Mạyedyeꞌches jedyeꞌ in judyeyaꞌ ọij jac mọtsiꞌ raꞌ in, yụ́siꞌ na p̂eyacdyeꞌ jam raꞌ junꞌ mọtsiꞌ, mọꞌ ramꞌ cạ̈tsiꞌ.
Jam tyi chị́yeꞌ in tupudyeꞌ ayidyeꞌ muꞌ
32Mijam tyi chịj junꞌsiꞌ chuc raꞌ ayij jadyiquis tupudyeꞌ. Mijam anjer muꞌchety mạyedyeꞌchety chịj in, mijam yụ Jenꞌtyiꞌ Ạvaꞌ yụ, meꞌdye Jenꞌ mọmoꞌ yirity chịj.
33Mọꞌdyes jämꞌ raꞌ ĉujcati miꞌin, tsạꞌ buꞌyi raꞌ miꞌin, ĉaĉaij na jam chịj miꞌin, ĉụiꞌdye raꞌ ayij tupudyeꞌ yụ. 34Mọꞌ raꞌ tupudyeꞌ jeñej buꞌyi yirity muntyiꞌ yocsiꞌve jac jịjcaijtyiꞌ. Aty raꞌ sactiyaꞌ muꞌ soꞌmacsetaqui carijtacdyeꞌ cäts yirity carijtaquity muꞌ. Chimeꞌdye jétacte muꞌ ĉọjcaiꞌtyiꞌ chụiꞌdyeꞌ paj qui jämꞌ ĉọjcaiꞌ. 35Meꞌdye raꞌ miꞌin chimeꞌ, ĉujcati raꞌ jämꞌ miꞌin ĉaĉaij na jam raꞌ chị́vaꞌjoij miꞌin caminve raꞌ shupqueshan yụ, jeñej buꞌyi aꞌtumtyiꞌ acaꞌ. Ĉụiꞌdye raꞌ shupqueshan yụ, vatyquej raꞌ shocam, vatyquej raꞌ menyaꞌ, vatyquej raꞌ nạijjoquiꞌve, vatyquej raꞌ pamꞌ shupqueshan yụ. 36Ĉujcatiĉamꞌ, ĉụiꞌdye raꞌ shupqueshan yụ, vatyquej raꞌ ĉọshvaꞌjoij dạquishadyeyac miꞌin. 37Ọij p̂eyacdyeꞌ jéyacsi jam miꞌindyes mọmoꞌ, räjtumdyes muntyidyes in.
Currently Selected:
Marcos 13: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
