Marcos 8
8
Jesús jiꞌsäcsacsi vạjpedyeꞌ mir muntyiꞌ in
(Mat 15:32-39)
1Yirisĉan mạyedyeꞌ shach tyeij muntyiꞌ cuvij in, aty itŝiꞌ säcsedyeꞌ muꞌin. Jesús fayacsi jịꞌchiyactyiꞌ muꞌ, jéyacsi:
2—Anic ñịbeꞌ ĉọcsi yụ uts muntyiꞌ q̂uinꞌ in, chibin mạyedyeꞌ penꞌdyetun úyaꞌ yụ in, aty itŝiꞌ säcsedyeꞌ q̂uinꞌ muꞌin. 3Jutacseban qui na ramꞌ jụijyaꞌ yụ paj qui yịñijcheꞌ acaꞌyaꞌ jịjcaban in, jam säcsi jụijyaꞌ in, vatyquej raꞌ yamjoban majmiyaꞌ in, ĉaĉaij na pạrej mochmuntyiꞌ atsij in.
4Jịꞌchiyactyiꞌ muꞌ vorjete in:
—¿Tupujtacsejaꞌ buty jiꞌsäcsacsejaꞌ uts muntyiꞌ shachtyity in? Ĉaĉaij na úyaꞌ cäjyaꞌ tsun.
5Jesús jéyacsi:
—¿Juñucsiꞌ caꞌ pan muꞌyaꞌ miꞌin?
Vorjete in:
—Yävätidyemꞌ muꞌyaꞌ.
6Chat qui Jesús jéyacsi muntyiꞌ in:
—Bäꞌjamꞌ mụijyaꞌ miꞌin. Tapjete yävätidyeꞌtyity pan, yoshoropaij jéte Jenꞌ, chat qui q̂uemiꞌvete muꞌ pan, soꞌmacsi jịꞌchiyactyiꞌ muꞌ, muꞌin qui jiꞌcheteyacsi in. 7Chimeꞌdye mọꞌyaꞌ miquiꞌmunsiꞌ tạbedyeꞌ in. Chat qui muꞌ yoshoropaij jéte Jenꞌ muꞌ, judyeyaꞌ qui soꞌmacsi jịꞌchiyactyiꞌ muꞌ paj qui muꞌin jiꞌcheteyacsi muntyiꞌ in. 8Räjdye muꞌin säcsi in c̣hụcmun yuꞌti in. Jäquiꞌve qui tsimjanꞌ in jiꞌshucdyidyeꞌ muꞌin, yävätidyeꞌ ụ́buꞌ därmuntyiꞌ meꞌsiꞌĉan jubanꞌ mọꞌ. 9Anic shachtyity muntyiꞌ säcsi in, vạjpedyeꞌ mir rụiꞌcuꞌ muntyiꞌ in. Chat qui q̂uinꞌdyemꞌ jutacseban muntyiꞌ in. 10Covambacheꞌ muꞌ jịjcaij yocsiꞌve bäꞌyedyeꞌ, Dalmanuta tịj mọꞌ.
Fariseo in cọdyetyete in paj qui jịꞌcaveyacsi ferdyeꞌ muꞌ
(Mat 16:1-4; Luc 12:54-56)
11Fariseo in pạrej ĉọshte in muꞌ Jesús tiyacchuiꞌ p̂eyacdyeꞌyaꞌ chutidyeij Jesústum in. Mạꞌjeꞌ jịꞌĉojte in areꞌ jutactyiꞌ Jenꞌtyiꞌ muꞌ, areꞌ jam, mọꞌdyes qui cọdyete in paj qui jịꞌcaveyacsi ferdyeꞌ muꞌ. 12Jesús shọijtacsi táristum jụ́tyejyi ĉojtyiꞌĉan muꞌ. Yi muꞌ:
—¿Junꞌ dash meꞌ uts muntyiꞌ q̂uinꞌ cudyityin yụ in paj qui yụ jịꞌcaveyacsi ferdyeꞌ? Yụ anic jéyac, yụ raꞌ jam junꞌ jịꞌcaveyacsi ferdyeꞌ.
13Chat qui yạjquicseban, yocve qui roiꞌjeꞌ covambacheꞌ muꞌ, nopej qui jịjcaij.
Jiꞌdujraquis fariseos in
(Mat 16:5-12)
14Jịꞌchiyactyiꞌ muꞌ yaquintute pan vítedyety muꞌin, yirity mọmoꞌ pan aꞌyaꞌ covambaĉan muꞌin. 15Jesús jéyacsi:
—Areꞌĉa miꞌin jämꞌ raꞌ ĉujcati miꞌin jiꞌdujraquisyaꞌ muꞌinsiꞌ in fariseos in judyeyaꞌ Herodessiꞌ chimeꞌ.
16Jịꞌchiyactyiꞌ in vaj meij p̂iyitidyeij in, yi in:
—Meꞌ jísinꞌ Jesús ĉaĉaij na itŝij pan úyaꞌ tsun.
17Muꞌ na Jesús chị́yacsebi dyijyedyeꞌ muꞌin, mọꞌdyes qui jéyacsi:
—¿Junꞌ meꞌ yi u miꞌin? "Itŝij pan muꞌyaꞌ tsun", yi miꞌin. ¿Tacaꞌ adac jambiꞌ chäyitiĉaꞌ yụ miꞌin, mijam chicacsi miꞌin? ¿Tacaꞌ adac yäcäj ĉojtyiꞌ miꞌin? 18Meꞌ tsanꞌ vejtum miꞌin, jam qui namꞌ naijti miꞌin, meꞌ tsanꞌ chuntum miꞌin jam qui namꞌ seꞌvaqui miꞌin. 19¿Jam dyijyeban u miꞌin yoquiꞌdyemꞌ q̂uemiꞌveteyaꞌ yụ ĉanamꞌtyity pan jiꞌcheteyeyacsiyaꞌ yụ muꞌin ĉanamꞌ mirtyity muntyiꞌ jiquej in? ¿Juñucsiꞌ caꞌ ụ́buꞌ jiꞌshucdyidyeꞌ tsimjajtiñeꞌ jiquej miꞌin?
Vorjete in:
—Yiriꞌtac päräꞌ jiyiꞌ jubanꞌ.
Jéyacsi muꞌ:
20—¿Chimeꞌdye yoquiꞌdyemꞌ yävätidyeꞌtyityyaꞌ pan jiꞌsäcsacsi u yụ vạjpedyeꞌ mirtyity muntyiꞌ in, ¿juñucsiꞌ caꞌ ụ́buꞌ jiꞌshucdyidyeꞌ tsimjajtiñeꞌ jiquej miꞌin.
Vorjete in:
—Yävätidyeꞌ jubanꞌ.
21Mọꞌdyes qui muꞌ jéyacsi:
—¿Jambiꞌ qui namꞌ chicacsi miꞌin jedyeꞌ buty ọij cạiꞌ p̂eyacdyeꞌ yụ?
Jesús jiꞌchäĉajte yirity tofety Betsaidaĉantyiꞌ
22Chat qui Betsaidave venjoij in. Muntyiꞌ in tuyete Jesús in yirity tofety, fer cọdyete muꞌ paj qui muꞌ tocoꞌjajiti. 23Muꞌ Jesús tapjepte un muꞌ, jorojyaꞌ bäꞌyedyeꞌ cạte. Muꞌve jataiꞌbuti vej muꞌ sónoꞌyaꞌ judyeyaꞌ tocoꞌjajiti. Jesús qui jajiti:
—¿Aty naijbun um?
24Cạvi muꞌ muntyiꞌ jéte:
—Atyuꞌ u tsanꞌ nạijtacseban muntyiꞌ yụ, jeñej son miꞌiꞌ in meꞌ cạvacsiij muntyiꞌ in.
25Jesús quivij tocoꞌjajibuti vej muꞌ judyeyaꞌ qui muꞌ muntyiꞌ seꞌ cạveban, anic jämꞌ chäĉänꞌ vej muꞌ, seꞌ vatyquej cạvi muꞌ tofety jiquej. 26Jesús qui jutebajte acaꞌyamꞌ chat acatuban qui muꞌ, jajiti:
—Jam raꞌ muꞌĉandye jịjcaban bäꞌyedyeꞌĉan mi.
Pedro jéte Jesús: Mi nash Jiꞌc̣honacsity Muntyiꞌ
(Mat 16:13-20; Luc 9:18-21)
27Aty meꞌsiꞌ miꞌeban muꞌ Jesús jịꞌchiyactyiꞌtum muꞌ yocsiꞌve jac jịjcaij in yóĉandyemꞌ bäꞌyedyeꞌ o, Cesarea Filipo tịj mọꞌ bäꞌyedyes. Aty majmiyaꞌ jéyaqui jịꞌchiyactyiꞌ muꞌ:
—¿Jätäjyi buty muntyiꞌ in, tyi buty ĉun yụ in?
28Vorjete in:
—Pạrej na yi in: "Uts nash Juanvun Chojtacsity", judyeyaꞌ chimeꞌ pạrej yi in: "Uts nash Elíasvun", chimeꞌdye pạrej yi in: "Uts nash yoctyiꞌ jasoꞌmitity p̂eyacdyeꞌ Jenꞌ jiquej", jam vaj cäts jiꞌjäquin in.
29Jesús quivij jéyacsi:
—Miꞌin na ¿tyi yụ ĉútiĉaꞌ u miꞌin?
Pedro vorjete:
—Mi nash Jiꞌc̣honacsity Muntyiꞌ.
30Jesús jéyacsi paj qui jambiꞌ mọꞌ yirity muntyiꞌ jịꞌchiqueyacsi in.
Jesús p̂eyeꞌ sänꞌdyeꞌ muꞌ
(Mat 16:21-28; Luc 9:22-27)
31Jesús tiyacchuiꞌ p̂eyeꞌ junꞌ chuc raꞌ ijac muꞌ. Jéyacsi:
—Anic raꞌ ñịbedyes jịꞌĉojtyeꞌ yụ Anictyity Muntyiꞌ yụ, ĉaĉaij na muꞌin tashchety ĉọjcacsity in, judyeyaꞌ muꞌin tashchety cudyitity Jenꞌcheꞌ in, judyeyaꞌ muꞌin jịꞌchiyacsity yụꞌtacdyeꞌ in, räjdye muꞌin ayoꞌ in vaꞌquiquin raꞌ yụ in, judyeyaꞌ raꞌ jiꞌijan yụ in. Chibin qui na ramꞌ mạyedyeꞌ vañinyeban yụ sänꞌdyeꞌĉantyiꞌ yụ.
32Anic jorojĉan jéyacsi mọꞌ p̂eyacdyeꞌ. Chat qui muꞌ Pedro yocyaꞌ cạte muꞌ Jesús, mạꞌjeꞌ tsanꞌ dyäcjeĉunꞌbite dyijyedyemꞌ. 33Muꞌ na Jesús camanꞌyimꞌ cạvacsi jịꞌchiyactyimꞌ. Chat qui muꞌ fạraꞌjajiĉunꞌdyi Pedro jajiti:
—Meijyeva mi Pedro atyuꞌ um jeñej buꞌyi Satanás, mijam aty Jenꞌsiꞌ dyijyedyeꞌ cäc̣häꞌchuptem, muntyis qui mọmoꞌ dyijyedyeꞌ cäc̣häꞌchucsebi mi.
34Jesús qui fayaqui jịꞌchiyactyiꞌ muꞌ judyeyaꞌ yoctyiꞌ in. Jéyacsi:
—Tyi chuc mạꞌjeꞌ cäc̣häꞌchun yụ in, paj ĉụiꞌsiꞌ dyijyedyeꞌ yacchuqui in, paj vemete crosh in,#8:34 Muꞌ crosh sänꞌdyeꞌ cạiꞌ tyi chuc jeñej buꞌyi vemetety crosh, mọꞌ yiꞌ jeñej sänꞌdyeꞌĉan bäꞌyi, aty jam ĉụiꞌsiꞌ dyijyedyeꞌ cạiꞌ, Cristos dyijyedyeꞌ cạpte. judyeyaꞌ qui raꞌ cäc̣häꞌchun yụ in. 35Tyi chuc otejjitity ĉụiꞌ jam mạꞌjeꞌ yụ́dyes bäꞌyi jụijyaꞌ, muꞌ raꞌ fibiꞌ mọmoꞌ shupquiꞌ junꞌ chuc bäꞌyi muꞌ. Tyi chuc jam otejjitity ĉụiꞌ, muꞌ yụ́dyes bäꞌyi judyeyaꞌ jämꞌsidyes p̂eyacdyeꞌ, meꞌ tsanꞌ säñi, muꞌ raꞌ jam fibiꞌ shupquiꞌ junꞌ chuc bäꞌyi, muꞌsiꞌ raꞌ mọꞌyaꞌ bijodyeꞌ muꞌ. 36Muꞌyaꞌ muntyiꞌ räj tsanꞌ meꞌchuiꞌ jacches jedyeꞌ in, meꞌ tsanꞌ meꞌ, jam qui namꞌ yụ́dyes bäꞌyi jụijyaꞌ muꞌ, fibidyety muꞌ shupqui. 37Jam yiris jedyeꞌ tupuj yụꞌtyeꞌ muꞌ paj qui tsạꞌ buꞌyi Jenꞌyaꞌ. 38Tyi chuc tsị́catyin yụ in judyeyaꞌ p̂eyacdyeꞌ yụ muꞌinsiꞌyaꞌ vej muꞌin uts juchajtumtyiꞌyaꞌ muntyiꞌ q̂uinꞌ in, vaꞌquectety Jenꞌ in, muꞌin meꞌ tsị́catyintyiꞌ yụ in, yụ raꞌ chimeꞌjeyacsidye Anictyity Muntyiꞌ tsị́catacsiij, junꞌsiꞌ chuc atsijbanyaꞌ yụ Jenꞌsiꞌtum mạijquedyeꞌ muꞌ, mọꞌtum raꞌ atsij yụ, penꞌdyetun raꞌ Jenꞌtyiꞌ anjer yụ.
Currently Selected:
Marcos 8: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
