Lûqa 17
17
Gune, îman û wezîfe
(Metta 18:6-7; Marqos 9:42)
1Îsayî şagirdanê xwu ra wina va: “Damê ke însanî fînenê gune miheqeq tim do estbê. Feqet, wey halê înan rê ke enê rê benê wasita! 2Wey halê ey rê ke enê merdimanê mutewazîyan ra yewî fîneno gune! Eke kerraya arêyî debo vîyeyê yewê winasî û bierzîyo deryayî miyan, hîna bixeyr o. 3Dîqet bikerê! Eger waye yan zî birayê şima yo bawermend gune bikero, îqaz bikerê. Eger tewbe bikero, efû bikerê. 4Eke roje de hewt rey vera şima de gune bikero, la hewt rey bêro şima het û vajo mi tewbe kerd, efû bikerê.”
5Hewarîyan Wayirê ma Îsayî ra va “Îmanê ma bizêdne.”
6Îsayî înan ra wina va: “Eke qasê heba xerdelî îmanê şima bibo, şima ena tuyêre ra vajê ‘Kokê xwu ra webe û derya de bironîye’ şima rê îtaet kena.
7“Ferz bikerê ke, yew xulamê şima yo ke cite yan zî şiwantî keno esto. Gama ke hêga ra bêro, şima ci ra vanê ‘Tavilî bêre sifre de ronişe’? 8Eksê ci, şima do vajê ‘Mi rê şamî amade bike, pêşmala xwu bibeste, mi rê xizmet bike. Badê ke mi werd û şimit, ti zî do biwerê û bişimê.’ 9Seba ke emirê şima ardê ca, şima xulamî rê caran sipas kenê? 10Şima zî bi eynî şekil, kerdişê heme çiyê ke şima rê emir biyê ra pey, gereka şima vajê ‘Ma qûlê sade yê, çiyo ke keweno ma ser, ma o kerd. Pêro eno yo.’”
Muhîmîya minetkarîye
11Îsayî ver bi Yeruşalîm rayirê xwu ra dewam kerd, mabeynê Samîrîye û Celîle ra vîyart. 12-13Gama ke dekewt yew dewe, des mêrikê cuzaminî ameyî Ey vera. Dûrî de vindertî û veng da va: “Îsa, Wayirê ma, ma rê bêre rehme.”
14Îsayî ke ê dî, va: “Şirê, xwu nîşanê kahînan bidê.” Des mêrikî zî gama ke şiyêne, rayir ra şîfa dî. 15Înan miyan ra yewî gama ke ewnîya şîfa dîya, ageyra Îsayî het. Bi vengo berz Homayî rê hemd kerd. 16Kol bi linganê Îsayî û Ey rê sipas kerd. Eno mêrik Samîrîyeyij bi. 17Îsayî va: “Înanê ke şîfa dî des kesî nêbî? New kesê bînî hê ça? 18Seba ke Homayî rê hemd bikerê, enê xerîbî ra teber kes apey nêame?” 19Dima Îsayî mêrikî ra va: “Wurze û şo. Îmanê to ti xelisnayî.”
Hukimranîya Homayî
(Metta 24:23-28,37-41)
20Fêrisîyan Îsayî ra persa va: “Hukimranîya Homayî do key bêro?”
Îsayî wina cewab da înan: “Hukimranîya Homayî bi şeklo ke çim bivîno nîna. 21Însanî do nêvajê ‘Biewnîyê, Hukimranîya Homayî ha tiya de!’ yan zî ‘A ha uca de!’ Çimkî Hukimranîya Homayî mabeynê şima de ya.”
22Dima, Îsayî şagirdanê xwu ra wina va: “Do wina rojî bêrê ke, o wext, şima do biwazê rojanê Benîademê Semawî ra yew roje bivînê, feqet şima do nêeşkê bivînê. 23Însanî do şima ra vajê ‘Biewnîyê, ha uca de!’ yan zî ‘A ha tiya de!’ Cayê xwu ra meaqitîyê, înanê ke wina qisey kenê dima meşêrê. 24Senî ke virso virseno û yew sere ra hetanî sereyo bîn asmînî roşin keno, ameyişê Benîamedê Semawî zî do wina bo. 25Labelê verî, gereka Benîademo Semawî zaf dej bianco û hetê enê neslî ra bêro redkerdiş.
26“Senî ke zemanê Nûhî de biyo, ameyişê Benîademê Semawî de zî do winî bo. 27Heta roja ke Nûh wenişt gemî însanan werdêne, şimitêne û zewicîyayne. Dima tofan wurişt, heme helak kerdî. 28Wexto ke Benîademo Semawî bêro, her çî eynî do sey zemanê Lûtî bo. Însanan werdêne û şimitêne, erênayne û rotêne, ramitêne û çînayne û xwu rê banî viraştêne. 29Feqet, roja ke Lût Sodom ra aqitîya, asmîn ra adir û kukird vara, heme helak kerdî. 30Gama ke Benîademo Semawî zî biaseyo, eynî do winî bibo. 31A roje keso ke serê banî de yo, wa nêro war û denêkewo zereyê keyeyê xwu. Do wextê ci çinê bo ke eşyayê xwu zî bigêro. O ke hêga de yo zî, wa anêgeyro keyeyê xwu. 32Cînîya Lûtî biyarê xwu vîr!#17:32 Cînîya Lûtî biyarê xwu vîr: Cînîya Lûtî seba ke reya peyîne Sodomê ke rijîyayne bivîno, game ke fetelîya û ewnîya, merde. 33O ke biwazo ganê xwu bixelisno do ey vindî bikero, o ke ganê xwu vindî bikero zî do ey bixelisno. 34Ez şima rê enê vajî, a şewe di kesê ke eynî nivîne de yê ra do yew bêro girewtiş, o bîn bêro verdayiş. 35-36Di cînîyê ke piya xele tehnenê ra yewe do bêro girewtiş, a bîne bêro verdayiş.”
37Şagirdanê ci zî persa va: “Wayirê ma, enê do ça bibê?”
Îsayî cewab da va: “Leş ça bo, leşwerî do uca bêrê pêser.”
Currently Selected:
Lûqa 17: diqSZZ
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
