Jone 13

Mae Jisas titihi ghahedi nogna mae fanomhore

1Ka grafi gna Gaghamu Ghasa-Polho na mae Jisas la kulu lasenihi narane na la namohi te mala jifla kokoni nauthoglu igne teke pulo ka mae Kmagna na. Funu ka vuvuhagna na te ghilei thoke ka narane glehegna na, mae Jisas ne namhadi fara naikno teke leghuni mana re.

2Kate ima rafi teu mae Jisas baludi nogna mae fanomhore, mae Satan neke kulu liliseihi ka nagnafagna mae Judas na te mala majorani mae Jisas. Mae Judas gne kaisei mae ka hatimare nabotho phei mae fanomho gre, thugna mae Simon Iskariot. 3Eghuteuna, mae Jisas kulu lasenihi mae Kmagna na neke tusu ranghini nolaghi te mala funei frunidi gobigna lepore, nu mana laseni la mana neke mei funugna ka God nei nake pulo la ka God. 4Kate gnokro teu mare na, mae Jisas ne kegra haghe kau tevo na ne atha koko phoko brahu na. Aonu mana ne hata mamango na ne pipichi. 5Mana hata khoꞌu na ne tofa soru kau dis na ne funu titihi ghahedi mae fanomhore. Eghuteuna, mana ne famomoja ghahedi mae fanomhore ka mamango te pipichi teu thegna na.

6Mae Jisas ne mei ka mae Simon Pita. Nu mae Pita ne cheke eghu ka mana, “Lord, iagho na titihi ghahegu iara gre sia?”

7Mae Jisas ne cheke eghu ka mana, “Iagho theome laseni unha te eni iara gognarona. Nu iagho ginauna laseniu thogheiro na.”

8Mae Pita ne tirogna fara ne cheke eghu ka mae Jisas, “Lord, iagho theome tangomana te titihi ghahegu iara gre funu gognaro te haghe na.”

Mae Jisas ne cheke eghu ka mana, “Uve, ghema Pita, te theome titihi iara ghahemu iagho re, iagho theome tangomana te kaisei mae nogu gloku iara na.”

9Kate nomhidi mana cheke igre, mae Simon Pita ne cheke eghu ka mana, “Lord, iagho tangomana titihi ghahegu iara gre, eghuteuna ke leghu na iagho jaola ke titihi khamegu nei pha'ugu gre eghu.”

10Mae Jisas ne cheke eghu ka mana, “Mae ihei tela kulu apu tela gaehi na mana theome tangomana teke apu thinigna tongana na. Khogla ghahegnare kolho nate titihi na. Aonu, iara na titihi ghahemu iagho gre kolho, naugna ghotilo nogu mae fanomho iara gre la kafe gaehi. Nu te chekeni iara na, ghotilo theome kafe gae.” 11Mae Jisas la kulu lasenihi mae ihei nate snakre laoni mana ka nogna mae naokare. Naugna igne mana ne cheke eghu, “Theome kafe ghotilo te gae na.”

12Kate titihi te gnafa mae Jisas ghahedi mae fanomhore, mana neke fahaghe phoko na neke gnokro pari. Aonu mana ne cheke eghu ka mare, “La laseni ghotilo unha te eni iara ka ghotilo igne? 13Ghotilo kilo ghau iara ‘Mae Velepuhi’ nei ‘Lord’. Eghuteuna tuana doglo fara, naugna mae tuana ngala iara gne. 14Iara nomi mae velepuhi nei nomi funei eghu ghotilo te titihi ghahemi ghotilo gre. Eghume ghotilo mala jaola titihi ghahe fari themi. 15Iara eni glepo igne ka ghotilo mala filo leghuni ghotilo, mala eni ghotilo jateula teke eni iara ia eghu. 16Tutuani fara te chekeni iara ka ghotilo na. Mae gloku na theome tangomana te uluni nogna mae funei na. Eghuteuna jaola mae khuru na theome uluni mae ihei teke kuru meini mana na. 17Naugna ghotilo la lasedihi unha te chekedi iara igre. Eghuteuna ghotilo ginauna keli tami fara jame te leghudi re.

18 “Iara theome kafe cheke ghami ghotilo. Naugna iara kulu lasedihi nafnata naikno teke vavahi thegu iarare. Nu cheke kau grioriso te blahi na igne ne horoghoto fara ka unha te eni gognaro gne, ‘Mae te gnokro ghamu bret teu balugu iara igne, mana ginau nake figri ke majora ghau iara.’ # 13:18 Sam 41:9.

19 “Eghume iara kulu chekeni ka ghotilo glepo igne kani theome thoke mei ngau. Aonu, kate thoke mei glepo tuana, ghotilo ginauna cheke eghu, ‘Tutuani fara, mae Jisas gne ngala mae Kraes na!’ 20Tutuani fara te chekeni iara ka ghotilo na. Mae ihei te taji fakelini kaisei nogu naikno gloku teke kuru meini iara na, mana taji fakeli ghau la iara. Nu ihei te taji fakeli ghau iara na, mana mala jaola taji fakelini mae Mama, mae teke kuru mei ghau iara na.”

Mae Jisas ne cheke thakleni mae te mala majorani mana na

(Mat 26:20-25; Mak 14:17-21; Luk 22:21-23)

21Ke leghugna te chekeni igne, mae Jisas diꞌanagnafa gna fara ne funu cheke eghu ka mare, “Tutuani fara te chekeni iara ka ghotilo na. Kaisei mae ka ghotilo ginauna majora ghau iara.”

22Kate nomhini igne, mae fanomhore ne filoi fari thedi. Naugna hatimare ne theome laseni mae ihei te chekeni mae Jisas na. 23Kaisei mae fanomho te namhani fara mae Jisas na ne gnokro rhegna mae Jisas. 24Mae Simon Pita ne kaflo gehe ka mana mala ghusnani mae Jisas mae ihei te chekeni mana na.

25Aonu, mae fanomho tuana tugha ne lao rhegna ka mae Jisas ne fanganghau eghu ka khuligna mana na, “Lord, eigna mae ihei site chekeni iagho gnea?”

26Mae Jisas ne cheke eghu ka mana, “Iagho ginauna filoni mae ihei nate atha ka iara te ghamu bret te titihi iara kau susupu na. Mae tuana ngala nate majora ghau iara na.” Aonu mae Jisas ne atha bret na ne titihi kau susupu na, ne tusu lao ka mae Judas Iskariot, thugna mae Simon. 27Theome raugha kate hata mae Judas bret na, Satan ghosei ne ruma haghe ka thiꞌagna mae Judas na ne fadiꞌani nagnafagna mana na.

Aonu mae Jisas ne cheke eghu ka mae Judas, “Faghose tei eni glepo teke ghathoni iagho na.” 28Keha nogna mae fanomho mae Jisas te gnokro ghamu teu ka tevo na, mare theome lasedi gaoghathodi unha te chekedi mae Jisas ka mae Judas igre. 29Mae Judas gne mae ihei te reireghi gna gloi sileni mare na. Eghume keha mae fanomhore te ghathoi na mae Jisas gne jame chekeni mana mala atha fajifla keha sileni mala tei foli gano malagna gaghamu na. Ba mae Jisas gne magnahagheni mae Judas mala tufa ka nodi sileni naikno te kumare. 30Ke leghugna te hata te ghamu mae Judas bret teke tusu lao mae Jisas na, mae Judas ghosei ne jifla ka suga na bongiro.

Mae Jisas ne farirhiu vetula majaghani na

31Ke leghugna te jifla te tei mae Judas na, mae Jisas ne cheke eghu ka keha nogna mae fanomhore, “Tutuani fara, gognarona naiknore na filoni nogu nolaghi biꞌo iara mae teke mei funu ka God. Eghuteuna, naiknore ginauna filoni nogna nolaghi biꞌo God na ka iara. 32Eghuteuna jame te filoni naiknore nogna nolaghi biꞌo God na ka nogu gloku iara re, God ginauna jaola fatakleni nogu nolaghi iara mae teke mei funu ka God. God ginauna ghosei fafnakno ghau iara gognaro gne.

33 “Uve, thuguro, iara ginauna theome au faraugha balumi ghotilo. Iara na jifla tei koko ghami ghotilo. Ghotilo ginauna hari ghau iara, nu ghotilo na theome filo ghau iara. Jateula teke chekeni iara tifei ka goro mae biꞌodi mae Jiura eghu, eghuteuna te chekeni iara gognarona, aheva te tei iara na ghotilo ginauna theome tangomana te mei na.

34 “Eghume, iara na tusu ari kaisei vetula majaghani ka ghotilo: ‘Fari namhai jateula ngau iara te namha ghami ghotilo. 35Te fari namhai ghotilo na, keha naiknore ginauna lase ghami ghotilo te nogu mae fanomho tutuani iara na.’ ”

Mae Jisas ne cheke eigna mae Pita nate pophoru u nanghagna mana na

(Mat 26:31-35; Mak 14:27-31; Luk 22:31-34)

36Mae Simon Pita ne cheke eghu ka mae Jisas, “Lord, na tei heva sagho ia?” Mae Jisas ne cheke eghu ka mana, “Vido aheva nate tei iara na, iagho theome tangomana te leghu ghau iara te tei gognarona. Nu iagho ginauna leghu ghau iara thogheiro.”

37Mae Pita ne cheke eghu ka mana, “Lord, naugna unha site theome tangomana iara te leghu nigho iagho gognaro na ia? Tutuani fara, iara tarabana mala lehe ranghi nigho iagho.”

38Mae Jisas ne cheke eghu ka mae Pita, “Ba, iagho na lehe tutuani ranghi ghau iara sia? Tutuani fara te chekeni iara ka iagho na. Ame tanhi nga khokorako na teuna, iagho na thilo fata chekeni ne iho ghau iara teuna.”

Currently Selected:

Jone 13: mrn

Highlight

Copy