Jone 15

U cheke naba eigna u gaju te tutuani

1Mae Jisas ne cheke eghu ka nogna mae fanomhore, “Iara jateula kaisei gaju te ure sisi te kelira eghu. Mae Kmagu iara na mana jateula mae greireghi gaju te ure sisi te kelira eghu. 2Mana na kato koko grege te au ka iara te theome ure. Mae Mama na tatasrei, nei fagagae eghu grege te au ka iara re, mala tangomana reꞌe teke ure ginauna. 3Ghotilo la gaehi kau farirhiu te chekedi iara ka ghotilo igre. 4Eghume ghotilo au fabrahu balugu iara, eghuteuna iara ginauna au fabrahu balumi ghotilo. Grege te au thegna sopa na theome tangomana te ure na, naugna ne theome au fodu kau gaju gna na. Ghotilo na jateula tuana eghu te theome au ghotilo balugu iara na. Eghuteuna ghotilo theome tangomana te ure themi na.

5 “Iara jateula gaju eghu, eghuteuna ghotilo jateula grege eghu. Mae ihei te au balugu iara na, iara na au balugna mana. Mana na ure na au sisi kmana. Naugna te theome au ghotilo balugu iara na, ghotilo theome tangomana te eni kaisei glepo na. 6Mae ihei te theome au balugu iara na, mana ginauna jateula grege te gnagha te lehe ia eghu. Eghuteuna grege te lehe tuare mala salofodu mala koko lao ka khaꞌaghi mala nako. 7Jame te au fabrahu ghotilo balugu iara eghuteuna chekegu iara re au fabrahu ka ghotilo teuna, ghotilo ginauna tangomana te toreni unha te magnahagheni ghotilo na, eghuteuna God ginauna tusu ari ka ghotilo. 8Kate ure sisi kmana ka ghotilo na, ghotilo falalase ghami themi te nogu mae fanomho tutuani iara na. Eghuteuna naiknore ginauna filoni ka ghotilo nogna nolaghi biꞌo mae Mama na.

9 “Iara namha ghami ghotilo, jateula ngau mae Mama te namha ghaula iara. Eghume, ghotilo au fabrahu balugu iara, mala tangomana iara te namha ghami ghotilo na. 10Te leghudi ghotilo nogu vetula iara re, iara ginauna namha ghami ghotilo fabrahu. Jateula ngau iara te leghudi nogna vetula mae Mama re, eghuteuna mana namha ghaula iara. 11Iara chekeni igne ka ghotilo, mala keli tami ghotilo jateula ngau iara te keli tagu gne eghu. Eghuteuna iara magnahaghei ghami ghotilo te mala thofno keli tami fara. 12Igne nogu vetula iara na: Fari namhai jateula ngau iara te namha ghami ghotilo gne eghu. 13U thofno namha biꞌo te tangomana kaisei naikno te falalase ranghidi kheragnare ngala te lehe ranghidire. 14Ghotilo thofno kheragu iara, eghu te edi koba ghotilo unha te chekedi iara re. 15Gognarona iara theome kilo ghami ghotilo mae gloku, naugna mae gloku na theome tangomana te laseni gaoghathogna nogna mae funei na. Nu iara kilo ghami ghotilo mae kheragu iara, naugna iara chekedi ka ghotilo gobigna lepo teke chekedi mae Mama ka iara re ngala. 16Ghotilo neke theome vahi ghau iara, nu iara nga teke vahi ghami ghotilo te mala tei te mala ure ghotilo na, nafnata sisi te keli te au fabrahu. Te eghu ghotilo na, mae Mama na tusu ari ka ghotilo unha te toreni ghotilo ka nanghagu iara na. 17Eghume igne nogu vetula biꞌo iara te tusu ari ka ghotilo na: Fari namhai!”

Naiknore na theome magnahaghedi mae fanomhore

18 “Te theome magnahaghei ghami ghotilo naikno te leghuni puhigna u nauthoglu igne na, ghotilo lasedihi mare neke kulu theome magnahaghei ghaula iara. 19Nu jame leghuni ghotilo puhigna nauthoglu igne na, mare ginauna na namha ghami ghotilo, naugna ghotilo nogna naikno u nauthoglu igne. Nu iara neke vahi fadelei ghamihi ghotilo kau nauthoglu igne. Eghume ghotilo theome nogna naikno nauthoglu igne. Naugna tuana naiknogna nauthoglu igne ginauna theome magnahaghei ghami ghotilo. 20Thosei ghatho ihoni cheke teke cheke eghu iara ka ghotilo tifeiro ia, ‘Mae gloku na theome tangomana te uluni nogna mae funei na.’#15:20 Jon 13:16. Te theome magnahaghei ghau iara mare na, naiknore ginau nake theome magnahaghei ghami la ghotilo. Te leghudi mare nogu cheke iara re, mare ginauna leghudi la nomi cheke ghotilo re. 21Nu mare na edi glepo igre ka ghotilo naugna ghotilo nogu iara. Jaola mare theome laseni mae Mama mae ihei teke kuru mei ghau iara kau nauthoglu igne na. 22Jame theome mei iara kau nauthoglu igne te cheke ka mare na, mare na theome tangomana te filo glanidi nakhibodire. Nu gognarona theome tangomana kaisei naikno te porudi u nakhibognare. 23Ihei te theome magnahaghei ghau iara na, mana theome magnahaghe nila mae Mama. 24Iara neke edi glepo te theome tangomana kaisei naikno te edi re fari hoteidi mare. Jame theome edi iara igre na, naiknore jame theome tangomana te filo glanidi nakhibodire. Eghume neuba ngau mare ne filodihi glepo te edi iara re, mare theome kafe magnahaghei ghami ghepa mae Mama. 25Igne horoghoto ka unha teke risoni ka vetula na eigna mae Kraes, ‘Mare theome magnahaghei ghau iara kate theo nafugna.’#15:25 Sam 35:19; 64:9.

26 “Iara ginauna kuru meini ka ghotilo mae mala thotogho na. Mae igne mae Tharunga te Blahi, mae te mala falalase glepo te tutuanire. Mana na mei ka ghotilo funugna ka mae Mama mala toutonu eigu iara. 27Eghuteuna ghotilo jaola mala toutonu eigu iara kau nauthoglu igne, naugna ghotilo neke au balugu iara kani teke fufunu gna iara nogu gloku gne.”

Currently Selected:

Jone 15: mrn

Highlight

Copy