Imilimo 21
21
1Atuwalaya, atupita. Atula twapita muwato, atuya atufika kwe nga uwacha atufika kwe Rodi, twafuma kokonye atuya kwe Patala. 2Kokonye akuno atuya atuzana nuwato wukulu wuno wayanga ku Foinisia; atwinjila momonye atuwapita. 3Atula twalola Sayiprasi, atupita lwakambazwa atuya ku Siria. Atuya atufumila pa Ture, pano uwato wayile awutulila iviya. 4Kokonye atuya atuzan a awasuwizi wamwi, atwikala nawo amanda munenulambali. Muno amaka yakwe Muzimu yawela, awanena Pauli ukuti atize aye kwe Yerusalemu. 5Ukuwa ayala amanda yakwikala nawo yasila, atuwasya atupita. Wonsinye, apaliponga nawachi nawana wawo awatusuchilila awatufumya mukaya. Swensinye apaliponga atusokowala pachituntu atupepa. 6Ngapano atulayana atwinjila muwato nawo awanyoka kukaya.
7Atulandalila numusinzo witu uwakufuma kwe Ture ukuya kwe Putolomayi atulamuka awanawitu atwikala nawo uwanda wonga. 8Uwacha atukatuka atufika kwe Kesariya. Kokonye atuya atufichila mung'anda yakwe Filipu, ekawizya wilandwe lyakwe Leza, atwikala nawe. E Filipu-nye wee walinji awakwe wamwi wawo munenulambali wane wasozilwe mwe Yerusalemu. 9Walinji nawanakwe awachikazyana wani wane wawizyanga amazwi yakwe Leza. 10Twalile twikala kokonye amanda mavule umutumwa Agabasi afika ukufuma mwe Yudeya. 11Ayiza kwesweswe, asenda umupango wakwe Pauli, ayinyepa amanama namakasa numupangonye wowo, ati, Avino Umuzimu Mwimichile wavwanga awati, Umwenimupangonye woo alinyepwa na wa Yuda mwe Yerusalemu, wize wamulemeke kumakandi.
12Atula twivwa wowonye, sweswenye nalwitu nga nawantu wanji atuwalambilizya Pauli ukuti atize aye kwe Yerusalemu. 13Ukuwa atutolelela ati, Nga mukuchita chani, chino mukulila wonye-woo mukuntonsya umwezo? Ntanenenchelela kukukung'wa kutupu mwe Yerusalemu ukuwa nkafwe muno a Mfumu e Yesu.
14Atula twapotwa ukumutonsya, atumuleka atuti, Ndi ukulonda kwa Mfumu kuchitwe.
15Atula twikala amanda yamwi kokonye, atulongania iviya vitu atukatuka ukuya kwe Yerusalemu. 16Nawasambilizi wamwi awamwe Kesariya awatusuchilila, awatutwala kung'anda yamuntu wino twayile atufichila mwenemo—e Munasoni umusuwizi wakutalika-talika wino wafumile kwe Sayiprasi.
Pauli aya mukusyungula Jemusi
17Atula pano twafika mwe Yerusalemu awanawitu awatupochelela nichimwemwe. 18Nga uwacha atupita nu Pauli atuya mukusyungula Jemusi; nawasongo wanji wonsi apano walinji. 19Pauli awalamuka awatulila nilandwe lyonsi vino Leza wawombezile mwakwe weliwe kumakandi. 20Awala wivwa, wonsi awatumvya Leza, Ngapano awanena Pauli awati, Mwanawitu, Pauli silola, vino awa Yuda imyanda namyanda wati awawa awasuwizi, swinya wakulondesya amasundo. 21Wanenwa ivyako kuno wasambilizyanga awa Yucia wonsi wane wikala munsi zyamakandi ukuti waleke isundo lyakwe Musa, ukuwalesya ukulemba awanawawo uwusilamo nukuwalesya ukukonka imyata yachiYuda. 22Wandi wale wivwe kuno wafika moo. Achaleka, nga chandi chiwe wuli? 23Uchite chino twandi tukunene. Panye-paa pali awantu wani wano walapa ichilapo. 24Wawonye awano pitani nawo mukatelefwe apaliponga nawo uwalipile chino chingalondwa; apano wangawapela kumitwe yawo. Apano peni wonsi wangamanya kuno ivyako vino wanenwa visi avyakusimichila, ukuwa nawenye ukasunga amasundo yakwe Musa. 25Ukuwa kuvyamakandi wane wasuwila, tuwatumizile kalata wakuwalesya ukuti watize wawalya ichakulya chimwi chino chafimilwa amakolania, nanti akulya uwazi, nanti anyama yimwi yino yanyongwa awowo, nukuti waleke ukuzenkenta.
26Achaleka uwacha Pauli asenda awantu aya ayiswefya apaliponga nawo. Ngapano ayinjila mung'anda yakwe Leza awanena uwanda wuno ukuswefwa wungasilila apano wize wafime inzuwi zyawo.
Awalemela Pauli mung'anda yakwe Leza
27Ayala amanda munenulambali yati yasila, awa Yuda wamwi wane wafumile muchipya chansi yakwe Asia awalola Pauli mung'anda yakwe Leza. Awakatusya iwumba lyonsi awalema Pauli. 28Awapunda awati, Mwe wa Israeli-mwe! Twavwani! Umuntunye wee awino akapita-pita monsinye akusambilizya awantu wonsi ukusanguchila awa Israeli, apaliponga namasundo yakwe Musa, nukusanguchila ing'andanye yoo iyakwe Leza. Ale kanonzinye kaa alesile amakandi yamwi mwenemo wiza wakombezya amasyo mimichile! 29(Wavwanzile wowonye muno waweni Trofimasi wino wafumile kwe Efeso ali nu Pauli mukaya, awelengania awati Pauli winjizile numuntunye weyo mung'anda yakwe Leza.)
Iwumba aliwalonda ukukoma Pauli
30Akaya konsi akati yuwayuwa—akazunganika, awantu awasamalila apaliponganye, awalema Pauli, awamukwema awamufumya mung'anda yakwe Leza. Paponye awiyala nivisakati. 31Iwumba aliwalonda ukukoma Pauli pano amazwi yayile kwemusika wavita vyawa Roma ukuti akaya ka Yerusalemu konsi kizwile nimbilikiti. 32Nanti kuzimbanye musika asenda awavita wamwi asamalila kwiwumba. Awala vino awantu wamulola ali nawavita, awaleka ukuma Pauli. 33Musika aya kwe Pauli, amulema, akomelezya ukuti anyepwe niminyololo yiwili. Ngapano awuzya ati, Nga umuntunye wee weweni, swinya nga wachita chani? 34Wamwi mwiwumba awapongomoka chimwi, nawo wanji chinji, Kwalinji ukuzunganika nkaninye achipota nukuti musika amanyichisye chino chaponile; achaleka akomelezya awantu wakwe ukuti watwale Pauli mwilinga. 35Awamutwala pipanda, ngapano awavita awamunyamula amuno iwumba lyakalile nkaninye, 36Wonsinye awamukonka ichipupu wakupunda wakuti, Chikomani!
Pauli avwanga amazwi yakuyichinjilila
37Awala wati walonda ukutwala Pauli kwilinga, avwanga kwemusika ati, Wuzye unganzumilizya mvwange chimwi?
Musika amuwuzya ati, Wuzye wamanya ukuvwanga ichi Griki? 38Ala, fwandi usi we mu Ijeputi wino mpindi zimwi wakatusizye uwuchisanguka akolelela wachikoma imyanda ikumi impindi zini (4,000) mulumbalang'ang'a?
39Pauli atolela ati, Nenji ne mu Yuda, nakwatilwa mu Tarso wakwe Silisia, nemukaya wamusumba wukulu. Nazina leka mvwange kuwantu.
40Musika amuzumilizya ukuti avwange, ngapano Pauli ayimilila pipanda ayingania ikasa kuwantu. Awala awantu wamyalala, Pauli avwanga kuwantu mu chi Heberi ati,
Currently Selected:
Imilimo 21: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
