Imilimo 25
25
Pauli alenga ukuti umulandu wakwe wuye kwekapanzya mukulu
1Ayala amanda yasila yatatu pano Festasi wapyanila munsi afuma kwe Kesariya aya kwe Yerusalemu. 2Kokonye akuno wasimapepo wakulu nawanankolelo wawa Yuda awaya awamba Pauli. 3Awalambilizya Festasi ukuti aleke Pauli aye kwe Yerusalemu, amuno wamvile inkama ukuti wamukome panzila. 4Festasi awatolelela ati, Pauli wasungwa muvingololo mwe Kesariya, naninye akuno nkunyochela nanti kuzimba. 5Lekani tupite nawasongo winu kwe Kesaria akuno wakalongole umuntunye wee, ndi wachita ichiwipe chimwi.
6Festasi ayonjelezya amanda nayanji ayikala nawo nampo amanda kanimonsi pamwi ikumi, ngapano awaya kwe Kesariya. Uwacha aya ayikala mwipembo lyakupanzizya imilandu, akomelezya ukuti Pauli atwalwe kweneko. 7Ala Pauli waya, awa Yuda wano wafumile kwe Yerusalemu awaya awamulilizya awamulundichila ivyakumulongola, vino watapanichisya. 8Ukuwa Pauli ayichinjirila ati, Ntasula isundo lyawa Yuda nanti katichi-tichi, nanti ang'anda yakwe Leza, nanti wekapanzya mukulu uwawa Roma.
9Festasi walondanga ukusechelesya awa Yuda, achaleka awuzya Pauli ati, Wuzye ukuzumilizya ukuti uye kwe Yerusalemu akuno nkakupanzizye umulandu wako wuno wakukulongola?
10Ukuwa Pauli ati, Ngavino njimilile mwipembo kulu ilyakupanzizya, monyemoo amuno nazipila mpanzizwe. Ntonona chimwi ku wa Yuda, nawenye umanyile. 11Ndachino nachila isundo limwi swinya nachita chimwi chino ukusundwa kwane kwazipila imfwa, insinakukana ukufwa. Ukuwa ndi ukundongola kuno wakundongola akwawufi, pasi wino wandi aleke wansende. Nkulonda umulandu wane wuye kumfumu nkulu.
12Nga ala Felix walanjililana ni nkombe zyakwe, atolelela, ati, Vino walonda ukuti uye kumfumu nkulu, akuli kokonye kuno wandi uye.
E Pauli pankolelo pakwe Agripa nu Berinisi
13Ayala amanda yamwi yapita imfumu Agripa nu Berinisi awaya kwe Kesariya kukuya pochelela Festasi wamulamuke. 14Awala wi kala kweneko amanda yavula, Festasi alandila imfumu intazi zyakwe Pauli ati, Kuli umuntu wumwi wino Felix wamusile muvingololo; 15nga nalile pano naya kwe Yerusalemu, wasimapepo wakulu awa chiYuda nawasongo awamulongola ukuti musende. 16Ukuwa imbanena inti wusi amwata wachi Roma ukulemeka umuntu wumwi wino ali numulandu pano atani alolane impumi nawano wamulongola, pano nawe akulonda ukuti ayiluwululile ayichinjilile kukulongolwa kwakwe, 17Achaleka walanga wiza koo, ntatela nzimbe, ukuwa awucha umutondo inja mwipembo lyakupanzizya imilandu nkomelezya numuntu ukuti aletwe. 18Wasimilandu wakwe wimilila, ukuwa nanti kumusinila ichiwipe chimwi chino nanga njivwe. 19Ukuwa wapanzyanianga vimwi ivyamipepele yawo nga nivyamuntu wino wakutanji Yesu, wino wafwa; ukuwa Pauli weni akuvwanga akuti amumi. 20Naposilwe nkaninye ukuzana ukusimichila pamilandunye yoo, achaleka nawuzizye Pauli ndi akulonda ukuti aye kwe Yerusalemu akuno apanzizwe imilandunye yoo. 21Ukuwa Pauli walenzile ukuti umulandu wakwe wuye kunji; walambilizizye ukuti asungwe imfumu nkulu ayino iyize ipanzye umulandu wakwe. Achaleka nakomelezizye ukuti asungwe nsuke mutume kumfumu nkulu.
22Agripa anena Festasi ati, Nkulonda njivwile nemwenecho umuntunye weyo.
Festasi ati, Ulimwivwa mutondo.
23Ngapano awula wacha umutondo e Agripa nu Berinisi awafuma nichiwanzya chikulu, awinjila mung'anda yakuvwanjila imilandu, apaliponga nawamusika wavita nawasongo wamukaya. Festasi atumilizya awaleta Pauli. 24Festasi ati, Mfumu Agripa, namwensi mwewantu muli moo apaliponga naswe: Mwayilolela umuntu wee wino awa Yuda wonsi, awamonye-moo nawane wikala mwe Yerusalemu, wizile walongola kwenene. Wakupazya wakuti umuntunye wee atize awe amumi. 25Ukuwa nenji naweni kuno atatazile chimwi chino viyine nimfwa. Ngamuno umwenecho wakusile kumfumu nkulu, njelenginie ukuti mutume. 26Ukuwa nenji insi nichakuti ingawalichila imfumu nkulu pechoo. Achaleka weyo namuleta kwakwe wewe—nga nkaninkani kwakwe wewenye mfumu Agripa!—achaleka wala wewenye, wamanyichisya ivyamulandu wakwe, apano ingawa nachimwi ichakuwalika. 27Amuno nenji chantalila ukutuma umukungwe nanti kuwumbula chino wachita.
Currently Selected:
Imilimo 25: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
