Imilimo 27
27
Pauli ayinjila muwato aya ku Roma
1Achila chapanzwa ukuti tupite muwato tuye ku Hale, awalemeka Pauli nawakungwe wanji kwe Juliasi, e musika wavita vya wa Roma vino watanji ivita vyamfumu nkulu. 2Atupita atwinjila muwato waku Adramitia, wuno wayanga mumalambwa yamunsi ya Asia, atupita. E Aristarikasi, wa ku Makedonia wino wafumile ku Tesalonika, atusuchilila. 3Nga uwacha atufika pe Sidoni. Juliasi walinji ninkumbu kwe Pauli amuzumilizya ukuti akalolane niviwuza vyakwe, alyakuti wangaya wakamupe vino akulonda. 4Ukufuma kokonye, muno achimuza chino chatulungime atupambatila kuchilila chakwe Sayiprasi. 5Atulamba sumbi wakwe Silisia nu Pamfulia, atufika ku Mira, munsi ya Lisia. 6Kokonye musika azana uwato wuno wafumile kwe Alekizanderia wuno wayanga ku Hale, atwinjizwa muwatonye wowo.
7Atuwapita katichi-katichi kumanda muvale nintazi nkulu, lelo pakupelelechezya atufika mukaya kakwe Nida. Muno ichimuza chitatulesile, atupambatila muchilila chakwe Krete, atupitilila Salamone. 8Atulanga tupambatizile lwakuchituntu, lelo mbali nintazi nkulu atusuka atufika pamasyo yamwi izina a Malambwa mazima, pasi apatali nakaya kakwe Laseya.
9Atulanga tuli paponye impindi ntali, awusuka umusinzo witu uwapaminzi awuwa awamipamba, amuno paponye uwanda walupemu watezile wapita. Achaleka Pauli awapa ilango 10ati, Mwe wantu, manyani kuno umusinzo woo wawa awamipamba; nivintu vivule vyandi vyononeke nuwatonye, apaliponga nuwumi witunye. 11Ukuwa musika weni azumilizyania numusika wawato nga numweni wato, ukuwa nanti kupechela chino Pauli watasile. 12Patalinji ilambwa zima ilyakulimuchila penepo impindi yampepo, achaleka awavule awakunda ukuti wapite alyakuti nche wangafika kwe Foinike, ndi avino chingawa. Lyolyonye alilambwa lya mwe Krete Uno lyalozya kasika, akuno waye wakalimuke.
Ichipunga pakwe sumbi
13Umuza wakambazwa awutalika ukupupa katichi-katichi, awelengania awati wandi wachite chino walondanga; awinjizya ichela awakwazalala mumbali yakwe Krete. 14Ukuwa apala patani pazimbe umuza wukulu—wuno wakutanji, Ichimuza chakambazwa-kafumandaka—achiwapunga achifuma much ilila. 15Achuma uwato, ngamuno chatazile ukuti uwato wulozye kumuza, atuleka ukuti umuzanye wutulelulange. 16Atula twalewuka atuya atupita lwakambazwa kakalila katichi akakwe Kauda. Paponye achitala nkaninye ukuti tusuke tutule akawato kitu. 17Awala wakwemela akawato muchiwato mukasi awanyepelela ichiwato awachiliwililizya ninkusa achikala chiti-ndi, Watinanga ukuti nche wangaya wakapulike muluselesenga kuchituntu chaku Libya; awisya ichimwenda chino chikapisya uwato nga awuwasendwa numuza. 18Ichimuza achilandalila, achaleka pawanda wachitiwili awatalika ukusumbila iviya muminzi, 19nuwanda wachititatu awasumbania iviwombelo vyawato namakasa yawo. 20Kumanda mavule atuleka nukulola ilanzi nanti antanda, cheni ichimuza achilanga chikupupa nkaninye. Isuka imyezo ifwa isula kukufyuka kwitu.
21Awala wantu wikala impindi yakula nanti kulya, Pauli akatuka ayimilila pakasi pakwe woliwo ati, Mwe wantu, ndachino mwanga munjivwe nanti kuti mufume ku Krete; ngali ukusovya nukuchisika navimwi. 22Ukuwa kanonzi nkuwalambilizya, nkuti musankane! Pasi nanti wenga mwakwe mwemwe wino wandi asowele; suka ndi awato wutupu. 23Amuno uwusiku umungeli wa Mfumu yane e Leza wino nkapakata watela ayizile kwenene wanena wati, 24Pauli utatina! Wandi ule uyize ukumilile pa mfumu nkulu. E Leza muwuzima wakwe akusunjizile uwumi wakwe wane uli nawo wonsi. 25Achaleka, mwewantu, sankanani! Amuno nkusuwila Leza kuno chandi chiwe ndimuno ntachizile. 26Ukuwa twandi tusumbilwe pachilila chimwi.
27Pawanda wachitikumi nayani, twachilinji tukusendwa nichimuza pakwe sumbi wakwe Meditereneani. Ukula kwela kwawa awusiku pakasi wasiluzi awamanya kuno twatezile twati atuwafika kuchituntu. 28Achaleka awelelezya ukuzika nulukusa awazana imikono amakumi kananimonsi (80); apala pazimba katichi awelelezya swinya awazana ukuzika imikono amakumi mutanda. 29Intete aziwalema awakwelengania wakuti nche uwato wungaya kwe wamfuzi, achaleka awasumbila ivyela vini kunsizi nga awalindila ukupepa ukuti wusuke wuche. 30Wasiluzi awalonda ukuti wafume muwato; awisya akawato paminzi awakopelezya ngati wakasi wasimpule ivyela kunkolelo kuwato. 31Ukuwa Pauli anena musika wavita nawavita ati, Ndi waa wangafuma muwato mutanga mutulwe. 32Achaleka awavita awaputula inkusa zyakawato awaleka akapita.
33Muno kwatezile kwacha, Pauli awalambilizya ukuti walye, awanena ati, Uwanda woo awachitikumi namanda yani, impindinye yoo yonsi mutetala mulye akantu kamwi. 34Nkuwalambilizya, aleni, lyani; alyakuti mupusuke. Amuno pasi ulunyele lwakwe wumwi uwakwe mwemwe luno lwandi lulowe. 35Ala Pauli wavwanga wonyewoo, asenda ichakulya chimwi, asalifya
kwakwe Leza pakwe woliwo wonsi, amenya atalika ukulya. 36Ngapano wonsi awasankana nawonye awawalya. 37Swensi muwato twalinji imyanda yiwili namakumi munenulambali nawantu mutanda (276). 38Awala wonsi walya wikuta, awafumya inkumba yino yalinji muwato awasumbila mwesumbi.
Uwato awung'wela
39Awula wacha; wasiluzi awapotwa ukumanya insi, ukuwa awamanya ichikonchi chimwi ichaminzi nichituntu kweneko awapanzya ndachino wangapisya uwato mwenemo. 40Ngapano awaputala inkusa zyavyela awaleka avisiwila mwesumbi, pampindi iyiliyonga awasapula ivyakusichila uwato. Ngapano awakwezya ichimwenda kunkolelo alyakuti umuza wuwapupa wukusunchilizya uwato kunkolelo, awalungama kuchituntu. 41Ukuwa uwato awuya awuchinta paluselesenga awusimpa pansi; ichipuno chawato achilemwa nanti kupita, ukuwa ichakunsizi achitalika ukulepuka mwalwe muno amang'wimbi yachumanga.
42Awavita awapanzya ukuti wakome awakungwa, alyakuti wumwi atize asambe insamvi apusuke. 43Ukuwa musika walondanga ukupususya Pauli, achaleka awalesya ukuchita chino walondanga. Ukuwa anena wane wamanyile uk usamba insamvi ukuti wapuwile wasambe waye kuchituntu; 44wano wasyazile, awalema kumatabwa pamwi kwevimwi vino vyapandusile kuwato. Wonye-woo avino swensi twapususile atufika kuchituntu.
Currently Selected:
Imilimo 27: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
