Imilimo 4
4
E Peter nu Yohani pipanzyo
1E Peter nu Yohani awalanga wakuvwanga nawantu, pano wasimapepo, nawamusika wakulu wang'anda yakwe Leza, na wa Saduki wayile kweneko. 2Awavitwa nkaninye amuno awapostile wowilinye wasambilizyanga awantu wakuti Yesu wazyulupuka, awapanichisya ukuti awafwe walizyulupuka. 3Achaleka awawalema awawiyalila muvingololo ukwizafika uwacha, amuno kwatizile kwila. 4Ukuwa awavule wane wivwile amazwi awasuwila; nukuvula kwawantu wane wasuwizile nche wafisile imyanda ikumi impindi zisano (5,000).
5Ukuti uwacha wakapanzya wawa Yuda, nawasongo, nawasambilizya wamasundo awawungana mwe Yerusalemu. 6Awasunkana apaliponga nu simapepo mukulu e Anasi, nu Kayafasi, nu Yohani, nu Alekizander, nawanji wane walinji awachiwanza chakwe simapepo mukulu. 7Awaleka awapostile awimilila awawawuzya wakuti, Ngamuno chani chino mwachitizile choo? Nga muli namakachi, nanti amwizinachi lino mwachitilanga wonyewoo?
8Ngapano Peter, wino wizwile nu Muzimu Mwimichile, awatolelela ati, Mwewakapanzya wawantu, namwewasongo: 9ndi sweswe ilelo lyoo tukwelezwa kumulimo wuzima wuno twachitila umulemale twamupozya, 10achaleka fwandi mwazipila ukumanya mwensi, na wa Israeli wonsi wamanye, kuno umuntunye wee ayimilile amupuma pankolelo pakwe mwemwe muno alizina lyamaka ilyakwe Yesu Klistu wa mwe Nazareti—wino mwasayisile ukuwa Leza amuzyulupula. 11E Yesu-nye awino Amazwi Matele yavwanga yati,
Iwe lino mwemwenye mwe wakazenga mwalikana mwati alyavye
lyolyonye alino lyanyosile aliwa aliwe lyenecho.
12Mwakwe weliwenye wenga-nsu amuno muli itulwa; amuno kusi winji munsi nuwukulu, wino Leza wapa awantu izina lyakwe, wino tungatulilwa mwakwe weliwe.
13Alila iwungwe lyakwe wakapanzya lyalola ukusinga kwakwe Peter nu Yohani, awivwa nakuno walinji awantu wavye wane watasambilizile, awazunguka. Apano awapanichisya nukupanichisya awati waa walinji aviwuza vyakwe Yesu. 14Ukuwa awapotwa ichakuvwanga, amuno wayilolezile kuno umuntu wino wapozizwe wimilile nu Peter nu Yohani. 15Achaleka awawanena ukuti wafumile palonde, awasyala wakuvwanzyania wonga, wakuti, 16Nga twachita chani nawantunye waa? Amuno awantu wonsi wane wakakwikala mwe Yerusalemu wamanya kuno wachita ichizungusyo chino chisitela chichitwe, naswenye tutanga tukane. 17Ukuwa muno tusinakulonda ukuti ichintunye choo chitize chilunduluke chiye apatali muwantu, tuwatetemye alyakuti watize swinya wataka izina lyakwe Yesu kumuntu wumwi.
18Ngapano awawita awawachinyintizya awati kusikwezya ukutaka izina lyakwe Yesu nanti ukusambilizya amazwi yakwe. 19Ukuwa Peter nu Yohani awawatolelela awati, Mwemwenye nalwinu panzyani chino chatuzipila pankolelo pakwe Leza, ukuwatontela mwemwe pamwi ukutontela Leza. 20Amuno tutanga tuleke chino twayilolela naminso yitu twivwa namakutwi yitu. 21Iwungwe aliwachinyintizya alilutilizya, aliwataya awapita. Awapotwa umwakuti wangawasundila, amuno awantu wonsi watumvyanga Leza kwechino chachisilwe. 22Umuntunye weyo wino ukupola kwakwe kwalinji akwakuzungusya walinji nimyaka ukulusye amakumi yani iyankulo yakwe.
Awasuwizi awapepa Leza ukuwapa ukusinga
23Awala wawataya, Peter nu Yohani awanyochela kuwawuye awawalandila vino wasimapepo wakulu nawasongo wawanenile. 24Awala wivwa wowonye, wonsi awapepa kwe Leza apaliponga awati, Oko we Mfumu wemuntu welewula iyulu, ninsi, nusumbi, navyonsi vino vili mwenemo! 25Wemuntu wavwanjizile mu Muzimu Mwimichile kwetatakulu e Davidi, umuwomvi wako, pane watili,
Ngamuno chani chino amakandi yakalaluchila;
ngamuno chani chino awantu wapanga vino vitanga vifungule chimwi?
26Izyamfumu zyamunsi zyayiyania,
nawakapanzya wawungana apaliponga
kukupiluchila Imfumu nu Mesaya wakwe.
27Amuno ichakusimichilanye e Herodi nu Pontiyo Pilato wawungine mukaya kaa apaliponga namakandi nawa Israeli wonsi ukuchita Yesu uwuwi, umuwomvi wako umutele, wino wamwimisile awa we Mesaya. 28Wawungine apaliponga ukuchita vyonsi vino wewenye, namaka yako nukulonda kwako, wapanzizye kali ukuti vize vichitwe. 29Achaleka kanonzi, we Mfumu, lola ukutetemya kuno wachita utuzumilizye, swewazya wako, ukuti tuwavwanga amazwi yako nukusinga konsi. 30Konzolola ikasa lyako pakupozya, nukuti ivizungusyo nivyamayele viwachitilwa mwizina lyamutele wako umuwomvi e Yesu.
31Awala wamala ukupepa, amasyo yano wawungine mwenemo ayazakaza. Wonsinye awizuzwa nu Muzimu Mwimichile awatalika awavwanga amazwi yakwe Leza nukusinga,
A wasanzya vyonsi apaliponga
32Iwumba lyawasuwizi lyalinji namelengania ayaliyonga numwezo wonga. Patalinji wumwi wino watanji chino achakwe, ye achakwe wenganye, ukuwa wonsinye wapananga ivintu vyonsi vino walinji navyo. 33Awapostile awapanichisya ukuzyulupuka kwa Mfumu e Yesu, awamaka makulu, Leza awapungulila ulupepo lukulu wonsi. 34Swinya patalinji wumwi mwiwumba lyawo wino wasowelwanga chimwi. Wano walinji nivyalo nizyang'anda wakazizye, awatwala indalama zino wazanile 35azipwa kuwapostile: nga indalama azyankanwa kwewonsi ndipano umuntu akulondela.
36Achaleka e Jozefu, uwachikwatilwe chawina Levi mu Sayiprasi, wino awapostile wamwitanga wakuti Bamaba (kuno akuli kuti, Ekapa wansimpo), 37nawenye akazya ichalo chakwe, atwala indalama, azipwa kuwapostile wonsi.
Currently Selected:
Imilimo 4: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
