Intaliko 17
17
Uwusilamo achimanyilo chilayano
1Pano Abramu wawa ni myaka amakumi mufundikambali ni myaka mufundikambali (99) Imfumu e Leza aloleka kwakwe weliwe amunena ati, Ne Leza wa maka yonsi, pitanga mu nzila yane swinya uwe we muzima, 2apano ndilayana nawe, ndivuzya ikwaa lyako. 3Abramu afukama, pansi, apano Leza amunena ati, 4Ilayano lyane lili pakwe wewe, ulikwata imyiko mivule. 5Utaliyitwa swinya izina lyakwe Abramu, ukuwa uliyitwa ilyakwe Abrahamu amuno ulikwata imyiko mivule. 6Ndileka uvule nkaninye, uwe nu luko lukulu, ni zya mfumu ziliwafuma mwakwe wewe. 7Swinya ilayano line nkulayana nawe, ndilifisya na ku wana wako wane walikukonka. 8Ndikupa wewe na wanako insi yoo yino mukwikalanga mwenemo, insi yonsi iya Kenani, iwe ansi yawo ukufika na ku muyayaya, ndiwa ne Leza wawo.
9Leza anena Abrahamu ati, Vino nkulayana nawe kanonzi, wewe na wanako vilifiswa ku nkulo zyonsi. 10Lyoo alilayano lino wewe na wanako wano walikukonka pansizi mulifisya: wila muntu wino a monsi alilembwa uwusilamo. 11Mulilembwa uwusilamo ukuti chize chiwe a chimanyilo chi layano lino tukulayana swensi. 12Wila mwana wensi wino wamala amanda kananimonsi ku nkwatwa yakwe wazipila ukulembwa uwusilamo, wila mwana mulumendo mu nkulo zinu zyonsi, nanti awino wakwatwa mu ng’anda zinu, nanti a wino wakalwa ni ndalama ku makandi wino asi awa luko lwinu, 13kwe wonsi wowili, kwe wino wakwatwa mu ng’anda zinu na kwe wino wakalwa ni ndalama zinu wazipila ukulembwa uwusilamo, alyakuti ilayano lyane liwe mu miwili yinu, alilayano lya muyayaya. 14Umulumendo wensi wino atizile asilamulwe umuwili wakwe alifumwa mu wantu wakwe; amuno ye wasula ilayano lyane.
15Leza anena Abrahamu ati, Serai e wakwako, utize uwamwita izina lyakwe Serai, nkandi ilyakwe Sera, alili zina lyakwe, 16Ndimupepa, ndileka akupapile umwana monsi; ndimupepa aliwa we nyina wa myiko, ni zyamfumu ziliwafuma mwakwe weliwe. 17Apano Abrahamu afukama, aseka, avwanga mu mwezo wakwe ati, Wuzye umwana angakwatwa ku monsi wino ali ni myaka umwanda (100)? Wuzye e Sera wino ali ni myaka amakumi mufundikambali (90) angapapa umwana? 18Achaleka Abrahamu avwanga kwe Leza ati, Sivyo uwe ni nkumbu kwe Ishumaeli, 19ukuwa Leza ati, Awe, e Sera e wakwako alikwata umwana umonsi, mulimwita izina lyakwe Ayizeki, apano ndifisya ilayano lyane kwe weliwe lino liliwa alilayano lya muyayaya ku wanakwe wonsi. 20Ukuwa ivyakwe Ishumaeli nivwa, achaleka ndimupepa alinyama, alivula nkaninye alikwata wasiyame ikumi na wawili, swinya ndileka awe a mwiko wukulu. 21Lelo kweni ilayano ndilayana nu Ayizeki wino Sera alipapa ku mpindi yonyeyoo mu mwaka wuno wukwiza. 22Ala pano Leza wamala ukuvwanga nu Abrahamu, amusya.
23Abrahamu asenda Ishumaeli umwanakwe, na wazya wakwe wonsi wane wakwatilwa pa muscle wakwe, na wonsinye wane wakazilwe ni ndalama, wila muntu wensi umonsi pa musolo wakwe, nukuputula imiwili yawo kukulembwa uwusilamo pa wanda wulyanye, ndimuno Leza wamunenezile. 24Abrahamu walinji ni myaka amakumi mufundikambali ni myaka mufundikambali (99) pano walemvilwe uwusilamo, 25nawe Ishumaeli walinji ni myaka ikumi na yitatu (13) pano walemvilwe uwusilamo. 26Pa wanda wulyanye wonsi walemvilwe uwusilamo apaliponga, Abrahamu nu mwanakwe Ishumaeli, 27na wantu wonsi awa pa musolo wakwe, wano wakwatizilwe penepo, na wonsi wano wakazilwe ni ndalama ukufuma munsi zinji.
Currently Selected:
Intaliko 17: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
