Intaliko 22
22
Leza anena Abrahamu ukumupa umwanakwe
1Pansizi pa vintu-nye vyoo, Leza ayelezya Abrahamu, amwila ati, Abrahamu! Nawe ayitawa ati, Mulali. 2Amunena ati, Senda umwanuko e musyupu e Ayizeki, wino wakunda, uye nawe kunsi ya Moriya, ukamupe inzuwi kweneko papela pa mwambu wumwi wuno nandi nkulanjizye.
3Achaleka Abrahamu akatuka aluwila umutondotondo, asenda ni ndokwe yakwe, asenda na walumendo wakwe wawili nu mwanakwe Ayizeki; atiwa ni nkuni zyakochela inzuwi, awakatuka awaya ku masyo yano Leza wamunenile. 4Pa wanda wa chititatu Abrahamu ayinula minso alola amasyo akalalamuchila. 5Achaleka Abrahamu anena awalumendo ati, Syalani paa ni ndokwe: nene nu mulumendo twandi tuye mukupepa, apano tunyoke. 6Achaleka Abrahamu asenda inkuni zyakochela inzuwi atwika umwanakwe Ayizeki, asenda umulilo nu lukala mwi kasa lyakwe; awapita wowili. 7Ayizeki ayita yisi ati, Tata! nawe ayitawa ati, Ne waa mwanane. Nga amuwuzya ali, Lola, tuli nu mulilo ni nkuni, ngafwandi umwana wa ng’onzi ali kwi uwakochela inzuwi? 8Abrahamu atolelela ati, Leza wandi ayiyanizye umwenecho ing’onzi yakocha inzuwi, mwanane. Nga awapila wowili.
9Awala wafika pa masyo yano Leza wamulayilizizye, Abrahamu azenga akavuwa penepo, alambalika inkumi ichete-chete, anyepa Ayizeki umwana kwe, amulambalika pa nkuni papela. 10Apano Abrahamu atambalika ikasa lyakwe asenda ulukala ukuti alembe umwanakwe. 11Ukuwa umusole wa Mfumu e Leza apunda kwe weliwe ukufuma mwi yulu ati. 12Abrahamu, Abrahamu! Nawe ati, mulali. Ati, Utawika ikasa lyako pa mulumendo, nanti akumuchita ichintu chimwi, amuno kanonzi namanya kuno ukatina Leza, nalola kuno utakanile ukumpa umwanako e musyupu. 13Abrahamu ayinula aminso yakwe alola kunsizi yakwe alola e sukusuku wafuma alemilwe ni vitawuluzi ku mpembe; Abrahamu aya alema sukusuku, amocha inzuwi mu masyo ya mwanakwe. 14Achaleka Abrahamu ayila amasyo-nye yayo ati, IMFUMU E LEZA AKAPA; ndivino chikavwangwa ukufika ni lelo, apwa pa mwamba wa Mfumu e Leza.
15Nga umusole wa Mfumu e Leza ayita. Abrahamu impindi ya chitiwili, ukufuma mwi yulu ati, 16Achaleka nkulapa, avino Imfumu e Leza ak utaka, Amuno uchisile choo, utakanizye umwanako e musyupu, 17nachawuzimanye nandi nkupepe, ndivuzya ikwata lyako ndivino intanda zya mwi yulu, pamwi ndivino uluselesenga lwa nwmbali yakwe sumbi, ni kwata lyako lilichimvya awalwani wawo. 18Mwi kwata lyako amuno imyiko yonsi iya munsi ilipepelwa muno wewe watontela izwi lyane. 19Apano Abrahamu anyochela ku walumendo wakwe, awakatuka wonsi awaya ku Beersheba; nu Abrahamu awakwikala mu Beersheba.
Ikwata lyakwe Nahori
20Pansizi pa vintu-nye vyoo Abrahamu wanenilwe ukuti, Nu Milika-nye wapapa awana ku munyonko e Nahori: 21Uzi e Katote, Buzi umunyina, Kemuwelo e yisi wakwe Aramu, 22Kesedi, Hazo, Pilidasi, Jidilafu nu Belueli. 23Betueli awino wapafile Rebeka. Wonsi waa kananimonsi awano Milika wapafile kwe Nahori, umunyina Abrahamu. 24Nu mwanachi wumwi winji wino watwazile umuzya wino izina lyakwe walinji we Reuma wapafile Teba, Gahamu, Tahasa nu Maaka.
Currently Selected:
Intaliko 22: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
