Intaliko 24
24
Ukukowechela kwakwe Ayizeki
1Abrahamu wakosile, uwa myaka mivule; walinji amupepwe ni Mfumu e Leza mu vintu vyonsi. 2Abrahamu anena umuwomvi wakwe, esongo wa mu ng’anda yakwe, wino walinji we songo pa nsawo yakwe yonsi yino walinji nayo, ati Wika ikasa lyako mwisika lya lupamba lwane, 3nandi ndeke ulape ku Mfumu e Leza, e Leza wa mwi yulu na munsi, ukuti utalitwalizya umwanane ku wana wanachi wa mu Kenani wane nkwikalanga mwenemo, 4ukuwa nkandi kunsi ya kumwitu, kunko zyane, akuno uyize utwalizye umwanane Ayizeki. 5Umuwomvi amunena ati, Nche pamwi umwanachi atalizumila ukwiza nani kunsi yoo; wuzye njize mbwezye umwanako kunsi yino wafumile? 6Abrahamu amunena ati, Utize uwezye umwanane kweneko. 7Imfumu e Leza wa mwi yulu, wino wamfumizye kwe tata munsi yino nakwatizilwe mwenemo, wino wamvwanzizye, swinya alapa kwe nene ati. Ndipa insi yoo ku wanako, alituma-awasole wakwe kwe wewe, kokonye akuno ulitwalizya umwanane. 8Ukuwa ndi umwanachi wiza wakana ukukukonka, ulitela walufuma ku chilapo chane; ukuwa utize uyize utwale umwanane kweneko. 9Apano umuwomvi wakwe awika ikasa lyakwe mwisika lya lupamba lwakwe Abrahamu e yisikulu, alapa ati alichita wowonye.
10Nga umuwomvi wakwe asenda ingamila zyakwe yisikulu ikumi apita, asenda ivyawila vyonsi ivizima vino yisikulu wamupile; akatuka, aya ku Mesopotamia, ku kaya kakwe Nahori. 11Aleka ingamila azisokowala ku londe ya kaya ku chifula cha minzi pa mpindi ya manguzi, impindi yino awanchi wayilanga mukusemba aminzi. 12Ngapano ati, Oko we Mfumu, e Leza wakwe tatakulu Abrahamu, nkulambilizya ukuti uleke imbe nu longo ilelo, ulanguluke nu tatakulu e Abrahamu. 13Lola, njimilile pa chifula cha minzi na wakazyana wa mu Ng’anda zyonsi izya mu kaya wakwiza mukusemba aminzi. 14Leka umukazyana wino nandi munene inti, Nkukulambilizya tula insembo yako uleke ing’we, nawe ati, Ng’wa, swinya nandi impe ni ngamila zyako-nye ukuti zing’we; leka weyonye awino awe awino wason tela umuwomvi wako Ayizeki. Apano ndimanya kuno wakunda tatakulu.
15Walanga pano atani amale ukuvwanga, alola Rebeka, wino wakwasilwe kwe Betueli umwanakwe Milika, e muka Nahori, umunyina Abrahamu, wafuma ku kaya waya, asenzile ni nsembo ya minzi pa chiweya chakwe. 16Umukazyana-nye weyo e mwali wino umonsi wumwi atatela amumanye, walinji a muzima nkaninye. Aya ku chifula ayizuzya insembo yakwe na minzi, awapita. 17Apano umuwomvi asamalila mukumusunkania, amunena ati, Nkukulambilizya mpa aminzi matichi mu nsembo ing’we. 18Nawe ati, Ng’wa tatakulu; napapo-napapo atula insembo yakwe. 19Ala pano wamupa wangwa, an, Nandi nsembele ni ngamila zyakonye, ukuti zing’we, 20Achaleka napapo-napapo ayitululila aminzi ya mu nsembo mu musuwa, nga anyochela mukusemba minzi swinya ku chifula, asembela ingamila zyonsi. 21Umuntu amulolechesya amyalala, ukuti alole ndi Imfumu e Leza amuswefezizye inzila pamwi pole.
22Azila ingamila zyang’wa, umuntu asenda imbalaminwe yimwi iyakwe golide yino yalinji nu mutengo wukulu ni vingolwa viwili ivyakwe golide iving’wame, 23amuzuzya ati, Nga we mwana wakweni? Wuzye mu nganda yakwe ’so muli amasyo yakufichila? 24Amunena ati ne mwana wakwe Betueli umwanakwe Milika, wino wapafile kwe Nahori. 25Swinya ati, Kumwitu kuli ivyakulya vivule kwakwe wewe ni nga ila zyako, na masyo yakulala. 26Umuntu ayinamika umutwe wakwe apepa Imfumu e Leza ati, 27Umupepwe a Mfumu e Leza, e Leza wakwe tatakulu Abrahamu, wino tatakulu atatela aleke ukutungulula ulukundo lwakwe. Naninye Imfumu e Leza wantungulula ku ng’anda yanko zyakwe Tatakulu.
28Apano umukazyana asamala aya anena awa mu nganda yakwe nyina vyovyonye; 29umunyina, e Labani asamalila ku muntu ku chifula. 30Alola imbalaminwe ni vingolwa kwi kasa lya nkazi yakwe, swinya ayivwa na mazwi yakwe Rebeka inkazi yakwe ati, Avino umuntu weyo wamvwanzya, achaleka aya ku muntu; amuzana yimilile papipi ni ngamila pa chifula, 31ati, Muwakwanda, we mupepwe ni Mfumu e Leza; ngachani chino uyimilile pa londe? Injinie ing’anda na masyo ya ngamila.
32Apano umuntu ayinjila mu nganda; nu Labani asapula ingamila, amupa isote ni chakulya cha ngamila, amupa na minzi yakusamba ku manama yakwe na yakusamba awantu wane walinji nawo. 33Apano amuteweta ichakulya; ukuwa ati, Ntanga indye suka ndi natela nawanena chino natunjila. Amunena ati, Vwanga.
34Apano umuntu ati, Ne muwomvi wakwe Abrahamu. 35Imfumu e Leza wapepa e tatakulu walutilizya, waleka wawa a muntu mukulu; wamupa ni ngonzi ni mbuzi ni ngombe mvulenye, nu silivara nu golide, na wawomvi awonsi na wanachi, ni ngamila ni ndokwe. 36Nu Sera e muka tatakulu wamupapizile umwana mu wukote wakwe; swinya tatakulu wamupa umwana weyo na vyonsi vino ali navyo. 37E tatakulu walesile indapa ukulingana nisundo lyakwe ilya kuti, Utalitwalizya umwanane ku wana wanachi wa mu Kenani, wane nkwikalanga mwenemo; 38ukuwa nkandi kunsi ya kumwitu, kunko zyane, akuno uyize utwalizye umwanane. 39Nani nanenile tatakulu inti, Nche umwanachi atalizumila ukunkonka. 40Ukuwa anena ati, Imfumu e Leza wino wampa uwumi alituma umusole ukukuswefezya inzila; uyize utwalizye umwanane ku wanko zyane awa pa muscle wakwe tata; 41apano ulitela walufuma ku chilapo chane, pano wiza-wiza ku nko zyane; ndi watizile wakupa umwanachi ulilufuma ku chilapo chane.
42Njizile ilelo ku chifula, nati, Oko we Mfumu Leza, e Leza wakwe tatakulu Abrahamu, ndachino unganswefezya inzila yino nkupita, 43lola njimilile pa chifula cha minzi: wala ndi umukazyana wumwi wiza mukusemba minzi, nandi njize mulambilizye inti, Nazina mpa minzi matichi mu nsembo yako ing’we, 44nawe ndi akuntolelela ati, Ng’wa, swinya nandi nsembe aminzi yanji ayakupa ingamila zyako, ndi awe a mwanachi wino Imfumu e Leza wasolela umwana wakwe tatakulu.
45Nalanga pano ntani male ukuvwanga mu mwezo wane, ndola Rebeka akwiza ni nsembo ya minzi pa chiweya chakwe; aya ku chifula asemba minzi. Achaleka imuwuzya inti, Mpa minzi ing’we; 46napapo-napapo atula insembo pansi, ati, Ngwa, apano apa ni ngamila zyane nazyo azing’wa.
47Apano imuwuzya inti, Nga we mwana wakweni? Nawe antolelela ati, Ne mwanakwe Betueli, umwanakwe Nahori, mwe Milika. Apano imbika imbalaminwe ku mpuno yakwe, ni vingolwa ku makasa yakwe. 48Apano injinama mpepa Imfumu e Leza, ntumvya Imfumu e Leza wakwe tatakulu Abrahamu, wino wanswefezizye inzila ukuti ntwalizye umwanakwe tatakulu umukazyana uwa luko lwakwe. 49Achaleka ndi muli ni nkumbu mbali nu kusimichila kwe tatakulu, nenani. Ndi chisi awowo, naponye munganena, alyakuti mpiluluchile kwe ndilo pamwi kwe kamani.
50Apano Labani nu Betueli awamutolella awati, Choo chafuma ku Mfumu e Leza; achaleka tutanga tuvwange chimwi ichiwipe nanti achizima. 51Silola, Rebeka ali pankolelo pakwe wewe, musende muwapita, uleke awe we muka mwanakwe sokulu, ndimuno Imfumu e Leza wavwanjila. 52Ala pano umuwomvi wakwe Abrahamu wivwa amazwi yawo, afukama pansi asalifya Imfumu e Leza. 53Apano umuwomvi afima uwukasi ni viya vinji ivyakwe silivara nu golide, ni vizwalo, apa Rebeka: swinya apa indume yakwe nu nyina ivintu vimwi ivya wuzi wukulu. 54Apano weliwe na wantu wane walinji nawo awalya swinya awang’wa, nga awalala pa masyo-nye yayo. Awala wakatuka umutondotondo ati, Lekani mpite kwe tatakulu. 55Indume yakwe nu nyina awati, Leka umukazyana asyale naswe ku manda matichi, pamwi nche amanda ikumi: apano apite. 56Ukuwa awanena ati, Mutize muwanchelesya, napano Imfumu e Leza apefile umusinzo wane; lekani impite inje kwe tatakulu. 57Nawo awati, Twandi twite umukazyana, tumuwuzye. 58Ngapano awita Rebeka, awati, Wuzye wandi upite nu muntu-nye wee? Nawe ati, Eta, nandi mpite. 59Apano awasuchilila Rebeka nu munyina nu kalela wakwe apaliponga nu muwomvi wakwe Abrahamu na wantu wakwe. 60Nga awapepa Rebeka, awamunena awati, We nkazi yitu, ukawe we nyina wa myanda na myanda; swinya ikwata lyako lize lichimvye wano wawapata! 61Apano Rebeka na wakazyana wakwe awakatuka, awakwelela ingamila awakonka umuntu. Mu mwata wonyewoo umuwomvi asenda Rebeka, awapita.
62Ukuwa Ayizeki weni wafumile ku Chifula-chawawumi-wino-akundola, ayiza mu kwikala munsi ya Negevu. 63Nga amanguzi Ayizeki aya mu mavunje mukwelengania; ayinula aminso yakwe atalangania, alola ingamila zikwiza. 64Nu Rebeka ayinula aminso yakwe, ala pano walola Ayizeki, ayika pa ngamila, 65awuzya umuwomvi ati, Nga weyo weweni, wino akwiza pansi mukutusunkania mu mavunje? Umuwomvi ati, we tatakulu. Apano asenda ichiwalo avwimbana. 66Umuwomvi alandila Ayizeki vyonsi vino wachisile. 67Apano Ayizeki aleka Rebeka ayinjila mu mutanda, nga atwala Rebeka awa a muchi: amukunda. Achaleka Ayizeki walinji ni chimwemwe chingatenga nyina wafwile.
Currently Selected:
Intaliko 24: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
