Intaliko 33
33
Jekapu asunkania Esau
1Ala pano Jekapu winula minso yakwe alolechesya alola Esau akwiza na wantu imyanda yini (400), achaleka apawunkania awanakwe, awakwe Leya na wakwe Rakelo, na wana wa wawomvi wawili awanachi. 2Awika awawomvi wakwe awanachi na wanakwe apaliponga pankolelo, Leya na wanakwe awawakonka, nga Rakelo nu Jozefu wasyalichizile nkani. 3Weni akolela pankolelo, afukama pansi impindi munenulambali, asuka apalamila ku munyina Esau.
4Ukuwa Esau asamalila kukuya musunkania afika amukukula, awika insingo pa chiweya chakwe amufyompa, nga wowili awalila. 5Ala pano Esau winula aminso yakwe, alola awanachi na wana amuwuzya ati, Nga wawo awaweni wane muli nawo? Jekapu amutolelela amunena ati, awanane wane Leza wampepa wampa ne muzya wako. 6Apano awanachi awapalamila na wana wawo, awafika awafukama pansi awamulamuka. 7Nu Leya apalamila apaliponga na wanakwe, awafika awafukama awamulamuka; nga pakupelelechezya e Jozefu nu Rakelo awapalamila awamufukamila. 8Nga Esau ati, Nga umupanda wowo wonsi wuno nsunkine nawo awachani? Nawe Jekapu ati, A wakukuswefya ku nsingo tatakulu 9Ukuwa Esau atolelela ati, Indi ni vivule mwanawitu; sunganga vyonsi vino uli navyo. 10Ukuwa Jekapu akana ati, Nkukulambilizya pochelela ichawila cha mwi kasa lyane; ndi wankunda; pano nalola impumi yako yawa ngati a mpumi yakwe Leza, swinya amuno wampochelela nu lukundo lukulu. 11Pochelela ichawila chino ndesile chino Leza wampepa nacho, nazina. Amupatichizya ati, Indi ni vivule, apano apochelela.
12Apano Esau ati, Tuyange tulondekane, nandi nkolele. 13Ukuwa Jekapu amutolelela ati, Tatakulu, umanyile kuno awana watichi watawoma, na mawufyo ya wana wa vikwato vyazipila ukusayila: ndi nkusamazya ivikwato nanti awanda wonganye vingafwa. 14Ndi tatakulu akolele pa muzya wakwe, nenji nandi ndapita katichikatichi ukulingana ni mipitile ya wana, nsuke njize mfike kwe wewe tatakulu mu Seiri.
15Apano Esau ati, Nandi nkusile awantu wano indi nawo. Nawe amutolelela ati, Ngawachani? Nazina leka wapita. 16Apano Esau awelekania uwanda-nye wowo anyochela ku Seiri. 17Ukuwa Jekapu alungama ku Sukoti, azenga ing’anda yakwe ni nduwa zya vikwato vyakwe. Achaleka izina lya masyo-nye yayo ayitwa Sukoti.
18Nga pansizi pano Jekapu wafumile ku Mesopotamia, wayile afika umutende mu kaya kakwe Shekemu kano kali munsi ya Kenani, azenga imitanda papipi na kaya kako. 19Apano wayile akala ichipya chansi chimwi ni ndalama umwanda wonga (100) ku wana wakwe Hamori wino walinji we yisi wakwe Shekemu, kokonye akuno azenga umutanda. 20Paponye apano azenga ni Leza alita izina ati, El, kuno akulikuti e Leza wawa Israeli.
Currently Selected:
Intaliko 33: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
