Romans 2
2
Ipanzyo lyakwe Leza
1lye, wechiwuza chane, wuzye ukapanzya wanji? Nanti uwe wuli, usi nakapemezyo nanti kamwi. Amuno ndi ukapanzya wanji, nga nawenye ulanga ukuchita ivintu ndivino nawo wakachita, utela ukayisinila wemwenecho. 2Twamanya kuno Leza akachita ichete pakupanzya awantu wane wakachita ivintu ndivino vyonye-vyoo. 3Ukuwa wenji, chiwuza chane, nawenye ukachita ivintu vino ukapanzya wanji! Wuzye ukuti ulipusuka kwipanzyo lyakwe Leza? 4Nche pamwi ukakwelengula inkumbu zyakwe inkulu, ukupupuzya kwakwe nuwuchimyamya. Vkuwa kweni wamanyanye-nto kuno Leza awankumbu amuno akalonda ukukutungulula ukuti utontolokwe. 5Ukuwa watumba uli numwezo wachilumba. Achaleka muno achochonye, ukuyipalila ukusundwa kukulu pawanda wuno Leza alifulichilwa ayize mukupanzya awawembu. 6Amuno Leza weni alilambula wilamuntu ukulingana nimilimo yakwe yino wachita. 7Awantu wamwi wakalandalila ukuchita ichete, awalanga wakuvwamba uwukankala, nukuchindamikwa, nga nuwumi; awamwatanye woo awano Leza aliwapa uwumi wamuyayaya. 8Ukuwa awantu wamwi wayikunda swinya wakakana vino avizima, awachita iviwipe, wawonye awano Leza alifwankulila uwukali wakwe pakwe woliwo. 9Awantu wonsi wano wakachita iviwipe waliyimba kuwulumila, awa Yuda namakandi awuliwonga. 10Ukuwa wonsi wano wakachita ichete, Leza aliwapa uwukankala, nukuchindikwa numutende, awa Yuda namakandi awuliwonga. 11Amuno Leza weni asipanzizya kukusolowola.
12Amuno amakandi yeni yatamanya amasundo yakwe Musa; wakawembuka awasowa nukusowa nanti masundo. 13Amuno ukwivwa kwamasundo kusi akuno kukaleka awantu awawa awalungamane kwakwe Leza, ukuwa nkandi ukutontela chino amasundo yakutaka. 14Ukuwa amakandi yeni yatamanya amasundo yakwe Musa; ukuwa mumano yawo ayawuntu, wakula ndi wakutontela amasundo wakayilanjizya kuno wamanya vino wangachita navino watanga wachite, chingatenga watapwa amasundo yakwe Leza. 15Weni imichitile yawo ikalanjizya kuno wamanya amasundo mumyezo yawo. Nintwitwi zyawo zikapanichisya wowonye, amuno mpindi zimwi mumelengania yawo wakati, Ye, nawifya wuli! Mpindizimwi awati, Nachita ichete. 16Achaleka ndimuno nenenye ne Pauli nkawilila Ilandwe Zima, avino chiliwa pawanda wuno Leza alituma Yesu Klistu kukwizapanzya inkama zyawantu.
Amasundo ya wa Yuda
17Ngafwandi wenji wuli? Vino ukati we mu Yuda; vino wawika umwezo pamasundo ulanga ukuyitutuwalichila Leza; 18Lelo kweni wamanya chino Leza akalonda uwachita, swinya wasambilila mumasundo ukuchita chino chiyine; 19swinya wewenye wayimanyanye-nto kuno ukatungulula intonko, swinya wekuwala kwakwe wane wikala mumfinzi, 20wekapampula wawatumpe, swinya wemusambilizya wakwe wano wachili wakukula. Wapanichisya kuno mumasundo muli amana yonsi nukusimichila konsi. 21Ngamuno chani chino utanga uyisambilizye—vino wenji ukasambilizya wanji? Ukawizya uti, Mutakwiwa—ngawenji wuzye usi wemung'o? 22Ukutanji, Mutazeleluka-ngawenji wuzye usi wemuzelele? Wapata amakolania-wuzye wenji usikwiwa mung'anda njimichile? 23Ukayitutuwalichila amasundo yakwe Leza—wuzye kweni usisonzya Leza insoni pano ukakana ukutontela amasundo yakwe? 24Amuno Amawaliko Matele yakutanji, Muno amwemwenye mwe wa Yuda, mwaleka amakandi yakavwanjila Leza uluwi.
25Ukuwa ndi mukakonka amasundo, yepeni uwusilamo winu awakusimichila, ukuwa ndi musitontela amasundo, nuwusilamo winunye awavye. 26Ukuwa ndi ikandi, lino litalembwa uwusilamo, likatontela amasundo, wuzye ye Leza atalimuwanzya ngati awino walembwa uwusilamo? 27Achaleka mwe wa Yuda mulisinilwa amuno namakandi-nye yakatontela amasundo ukuwa mwenji musiyatontela chingatenga mwayawalika swinya mwalembwa nuwusilamo, muno amakandi yeni yatontela amasundo chingatenga watalembwa uwusilamo. 28Ngafwandi, umu Yuda-yuda weweni, wino walembwa uwusilamo wenecho? Asi amu Yuda weyo wino walembwa uwusilamo kunzi kutupu, wino uwusilamo wakwe awakumuwili kutupu. 29Ukuwa umu Yuda wakusimichila, aweyo wino amu Yuda mumwezo mukasi, wino walembwa uwusilamo mumwezo wakwe mukasi. Ukulembwa uwusilamo mumwezo amulimo wamuzimu wakwe Leza, wusi amulimo wamasundo. Umuntu wamwatanye ndiwoo, chingatenga awantu watanga wamuwanzye, Leza awino akawanzya.
Currently Selected:
Romans 2: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
