Ətefɨ̂aʼ 5
5
Ànàniyàs yî Sàfilà ə wam kaŋa
1Wùə vîvè tè nyi, zə vəynze e nyi Ànàniyàs, è ve kyi zhwi, zə vəynze nyi Sàfilà. Tuʼ fîfe, ghənə ə pəʼlə̂ èfɨa ə ghənə vîve. 2Pîza è və ndə̀tə̀ àpɨaʼ ekɛ ətəynke zhwi e ke. Ànàniyàs ə njìə àpɨaʼ ekɛ kɛ ə ke faŋ ə ndùə fo sê ghɨətom ə Njisə̀sghè. 3Pità ə pfɨfə nə, “Ànàniyàs, ò za nə Satàyn nji ə ghò ətəm kûmə̀ ghè? Zôyn satàyn ə nə̀yn nə ò wam sê Zuʼse Ŋwaʼase ə ò ndətə pɨaʼa kɛ kɛ ə ò pəʼle fɨa vɛ ve ətəyn. 4Tsɔ̀fə kə ò pəʼle fɨa nə vɛ, ə̀ tè kyi ghô, ə pəʼlə̂ pi ndò, ə̀ kɛ ətəynve e pa kyi ke ghò. Kûmə̀ ghè ə kwâʼtè fè kɔʼ ə ghò atu nə ò nəyn kyì eghɛ zɛ ə ò nəyn ə? Ò pâʼà wam kaŋ kɨnə kè sê wùə èwàmnə, ò wam sê Zhə̀fè.” 5Ànàniyàs ə zɨə èghɛ nə zɨ̂nə̀ kè sə ashìŋə̀ ə pfɨə ə chi ə kwuə. Fâyn ekayntəze ə ko ə̀ghɨ ə̀kɨ̂m ghɛ ə ghənə tè zɨ ghɛ nə zɨ̂nə̀. 6Kwuŋ tîte ə pə̀ njîə epfɨyn ə Ànàniyàsè, ə ngolə̂ è kɨ̂mà, ə̀ fɨə ndùə pfɨ̂mə̀.
7Ə pə̀ kə chwìəse tsɛ̂ seta, zhwîə Ànàniyàs ə njiə pə̂, keva ghɛ zɛ ze kyâyn. 8Pità ə pfɨfə sê vəyn nə, “Tsàyn sê mi nə, ə̀ vɨnə nyi ekɛ èkɨ̂m vɛ ə ghayn ndom vɛ̂vè pəʼle fɨa vaynve ə tə?”
È və pomə̂ ə pìə nə, “Ə̀ vɛ nyì èkɛ təynve èkɨ̂m.”
9Pità ə pìə sê vəyn nə, “Kûmə̀ ghè ə ghayn ndom vɛ̂vè sayne se mɔm ə Sezuʼ sə Pɛ̂pɛse ə? Ndômnè ghɛ ə ghe pɨ̂aʼà fɨ pfɨ̂mə̀ ndom vɛ̂vè pa tyəm ke echo ndɛ zôyn, nyi se pɔŋɔ pɨ̀aʼà fɨə pfɨ̀mə kəpiə ghô.” 10Kè fumə ashìŋə̀, è və pfɨ̀ə ə Pità ə shi ə kwuə. Ə pə̀ kə ndômnè ghɛ nji pə̂yn ə fe mə è və kwu, ghənə ə pɨ̀aʼà fɨə è vəyn ə pfɨ̂mə̀ ə ndom etipìə èshyə̀. 11Fâyn e ghaʼâzè ə ko ə̀ghɨ ndɛ ə̀ Fèzhə̀ əkɨ̂m è ghɨghə kɨ̂m ghɛ ə tè zɨ ghɛ zɛ ə ze tè kyâyn.
Ghɨətomə tè nəyn əghɛ əkayntə setsɨ̀
12Ghɨətom ə Njisə̀sghè tè nə̂, sèchwìə è ghɛ kayntəghe, ghe tsɨ̂ə kə nyi əfètə̂ ghɨ̀ se tyə̀yn atyaʼa Fezhə̀kè. Nâʼà ghɨə poməghe əkɨ̂m tè zàŋsə zûŋtə̀ Atɔyne ə Sòlomùynkè ə ndɛ ə̀ Fèzhə̀. 13Wùə vîvè tè paʼà mɔ̀msè se tsɨ̀yntè se ghənə, pî kə ghənə tè wàmnə̀ ghɛ kûmə̀ ə̀ ghɨətom ətəynghe ghe kɔʼnə̂ kə nyî. 14Ndômnèghè è zənə setsɨ̀ ə tə pomə̂ se Pɛ̂pɛ, ə kwəynsə̂ anɔ̀yn ə ghɨə pomə nə kɛ, kɔ̂yn ə ghənə̂kè ə tsɨ̀ə nduə kə èshike. 15Ghɨghe ə fe ə̀ghɛ ə kayntə nə ghɛ ə ghɨətomə Njisə̀sghè tè nə, ze ə nə̀ ghənə e sè pɨaʼà ə̀ghɨ zafə mkwì è ghàmə̀m, fɨə ndə̂mə̀ kə ə tetitepì tendomte. Ghənə tè nə za è kwâʼtèzè nə Pità nə̂ piə è tsɛ̀ ndò, ə nyɨ̂ŋsè ə vəynke kom ghɨ ətəynghe. 16Nɔ̂yn əghɨ̀vè ə ndò pə̂ ə setɔ̂ŋ sɛ ə se tè nyì paʼsê ə Njèlusalɛ̀m. Ghənə e njîə pə̂ è ghɨə zafə è ghɛ zuʼse pise tè fo ngəʼ sê ghənə, ə tsuʼə nâʼà ghənə əkɨ̂m.
Ə fo ngəʼ sê ghɨətom ə Njisə̀sghè
17Wùə èkɔʼsə nə èshyə̀ èngaŋtə kwəynə yî pamə tə vəynte tekɨ̂m, mə nyi atsɨ̂ynte ə ghɨə Sandùsîkè, ə zhə̀tə̀ àghə̀ʼ ə kwəmnəke se ghɨətom ə Njisə̀sghè, sè fɨasə nə ghənə nə̀ fe èghɛ. 18Ghənə ə ko ə̀ghɨtom nə ghɛ ə fâ ə ndɛ̂ chaʼ, ə fètəyn èndaʼ. 19Pîza ə nə̀ nə̂ etuʼve, tsì ə̀ Pɛ̂pɛ ə pə̀ ə chɔʼɔ ècho ndɛ ə̀ chaʼ ətəyn, ə njìə fɨə è ghənə, ə pìə se ghənə nə, 20“Ghàyn ndu tyə̂m ə ndɛ ètsə̀mə, ə ghàyn tsayn sê ghɨ ghəkɨ̂m nâʼà ə̀ghɛ əkɨ̂m kûmə̀ èndam zaynze fe zɨ̂nə.” 21Ghɨətom ə Njisə̀sghè ə zɨə èghɛ nə zɨ̂nə̀, ə nə̀ kə zamə, ə ndò ə təyn ə̀shi, ə ndùə ə ndɛ̂ ètsə̀mə ə zhə̀tə̀ sə̂ zaʼlə ə̀ghɨ.
Wùə èkɔʼsə nə èshyə̀ è ngaŋtə kwəynə è pamə̂ tə vəyn tîte ə tɔŋnə̂ sechəʼ sə ghɨ Njûsghè ghəkɨ̂m, nə ghənə pəyn kyi atsɨ̀ynte, ə fɨnə tiynsə̂ nə ə ndu nji pə̀yn ə̀ ghɨətom ə Njisə̀s ghɛ ə ndɛ chaʼ. 22Pîza ə pə̀ kə ghɨ ghɛ ə ghe tè tsɨ̀ŋnə ndɛ̂ Fèzhə̀ ndù zaʼâ, ə tàʼa fe ə ghɨətom nə ghɛ, ghənə kɛse pə̂ tsâ sê ghɨə ghɛ atsɨ̀ynte nə, 23“Ghàs ə ndù fu, ə fe ècho ndɛ̂ chaʼghe mə ə fɛte fa, ghɨ ghɛ ə ghe tsɨ̂ŋnə̀ e pɔse tyəm ke nâʼà echo ndɛ tsɨ̂ŋnə̀, pîza ghàs ghe ə chɔʼ ə tàʼa fe wùə vîvè əfètəyn.” 24Ə pə̀ kə ghɨ kɔʼsə nə èshyə̀ ngaŋtəghe è tuə sokə̀ʼ kɛ ə ke tè fɨ̀aʼa ə ndɛ̂ ètsə̀mə zɨ zâ, sè kanə nə ə̀ kyàyn ghe sê ghɨətom ə Njisə̀s nə ghɛ. 25Ke nyî, wùə ə njiə pə̂ ə pîə sê ghənə nə, “Ghɨ ghɛ ə ghàyn a fâ ə ndɛ̂ chaʼ za nyi ə ndɛ̂ ètsə̀mə, zaʼlə̂ ə̀ghɨ fu.” 26Tuə sesokə̀ʼ kɛ ə ke tè fɨ̀aʼa ndɛ̂ Fèzhə̀ ə zɨə zâ, yî ghɨ vəynghe ə ndùə njìə ə̀ghɨtom nə ghɛ. Ghənə tè paʼà ko ghənə sə atyaʼ kûmə̀ nə ghənə tè fànə nə ghɨ kaʼa ə ghe tɨmnə̂ ghənə è chighe.
27Ə pə̀ è ghɨətom ə Njisə̀s nə ghɨyn ə nə̀ nə ghənə tyəm ə ghɨ saʼaghə shi. Wùə èkɔʼsə nə èshyə̀ èngaŋtə kwəynə ə pìə sê ghənə nə, 28“Ghàs ə tə tsɛ̀sè lâŋkè nə kə ghàyn fɨyn zaʼlê ə̀ghɨ è ghɛ ghɛ ə Njisə̀s tè pi nə ghàyn ə zaʼlə̂. Ghàyn ə fe ghɛ zɛ ə ghàyn nə̀yn ə? Ghàyn kyiŋə nə ghɨghe ə ghâmə̀ ghàs pîə nə ə̀ tè nə̀yn ghàs nə ə zhwiə Njisə̀s mə?”
29Pità yî ghɨətom ə Njisə̀s ghəmɔ̀ʼɔ ə pə̀ynsə̀ nə, “Ghàs kyi sə̂ zɨə kə sê Zhə̀fè, ə̀ va chi sê ghɨghe. 30Ghàyn ə tə nə̀yn ə payntə̂ Njisə̀s ə awâmnè, è və kwuə. Pîza Zhə̀ fɛ ə pɨ̀a ghasènìghe tè kɔʼsə Fə zòmsə̀ Vəyn. 31Zhə̀fè ə njìə kɔʼsə̂ Vəyn ə Vəyn ekɔyntwɔ ə nə̀ Vəyn nə È və nyi Wùə èchisə fɨyn nyi Sɔ̀zà, kə È nəyn ə ghɨə Isìlâyghè ə kyi èndom se kwiynê ətəm ə ghɛ piə ghənə, kə Zhə̀fè lɛse fo sèpi sə ghənə̂sè. 32Ghàs nyi setsɛ̀saʼ əghɛ nə ghɨ̂yn. Zuʼse Ŋwaʼase nyi kepî tsɛ̀èsaʼ. Mə nyi efo ə Fezhə̀zè sê ghɨ ghɛ ə ghe zɨə sê Vəyn.”
33Ə tè pə̀yn kə ghɨə saʼa zɨ ghɛ nə ghɨ̂yn, ghe ə zafə ghənə nâʼà sə ŋaŋ, ghənə e sè kyiŋə se zhwi əghɨtom ə Njisə̀sghè. 34Pîza wùə ə Falàsî vîvè, zə vəynze e nyi Ngàmàlyâ, ə tyə̀ynsè àlâŋ, ghɨghe əkɨ̂m e kɔʼsə vəyn, ə ndwìə tyəmə̂ ekwùtwəyn. Ə ke kàyn nə ə nji fɨ è ghɨətom nə ghɛ əpɨəyn sə fendîŋə̀ fə ashìŋə̀fè. 35Ə ke pì sê ghɨ nə ghɛ nə, “Ghɨ Isìlâyghè, ghàyn e tɔ̂ʼnə̀ kûmə̀ èghɛ zɛ ə ghàyn kyiŋə se nə̀yn sê ghɨ ghɨ̀yn. 36Ə tè nyi kepî tuʼ fîfe, Tìyondàs ə fɨə kɔʼɔ pîə nə ə̀ nyì ke nâʼà zhi nə vɛ̂, ghɨghe ə chumtə̀ vəyn zaʼâ wəte kyàʼ. Pîza ə mɨ̀se ə pa zhwiə vəyn. Pamə̂ tə vəynte ə chyàsə̀ kə fèmɔ̀ʼ femɔ̀ʼ. 37Ə tè nyi epàm ətəyn, Njondàs vîvè mə è fɨ pə̀yn endaʼ ə Ngalìlîzè, ə fɨnə fɨə kɔʼɔ ə mtuʼ mɛ ə tè taŋa ghɨghe ətəyn ə shinə̀ ànɔ̂yn ə ghɨ kyia, ke chumtə̀ vəyn. Pîza ə mɨ̀se, ə pa zhwiə vəyn. Pamə̂ tə vəynte ə chyàsə̀ kə fèmɔ̀ʼ femɔ̀ʼ. 38M wàmnə̀ sê ghàyn zôyn kûmə̀ èkyì eghɛ zɨ̂nə̀ nə, kə ghàyn nəyn ghɛ zɛ ə ghàyn kwàʼtə̀ se nə̀yn sê ghɨ ghɨ̀yn. Ghàyn za ke ghənə zâ kûmə̀ nə ghɛ nə ghɨyn ə ghənə pîə fɨnə nə̂, ə ghənə nə̂ ə wùə atyaʼ, ə ghafke ə fɨnə tyâfə̀ va kə ghənə pfɨ. 39Pîza ə nyi mə ə̀ fo Fèzhə̀ tyaʼke nə ghənə ə nə̂, ə ze ə pɔynə̂ va sê ghàyn se tɛ ghaʼa ghənə, ə ghàyn nə fe mə ze kyaʼà kə ghàyn nò Fèzhə̀!”
Ghɨ saʼ nə ghɨ̂yn ə zɨə ètəftê zɛ ə Ngàmàlyâ fo, 40ə tɔŋɔ ə̀ghɨtom ə Njisə̀sghè nə ghe kɛse nji ə ndɛ. Ə pusə ghənə, ə fɨnə kànə̀ nə kə ghɨətom nə ghɛ nə fɨyn tɔŋtê èzə Njisə̀szè. Ə ke zà ghənə, ghənə ə ndò. 41Ghɨətom ə Njisə̀sghè ə ndò elùʼ nə vɛ, saŋnə kə nyi kûmə̀ nə Zhə̀fè ə fe nə ghənə ə kwəyn se kyîə eghomə̂ kûmə̀ ezə Njisə̀szè. 42Tuʼ mè m̀kɨ̂m ghənə e ndûə ə ndɛ̂ ètsə̀mə, è kɨsè ə ghɨghe ə sendɛ zaʼlə̂ ə̀ghɨ fɨnə ndaʼà tom èchùŋ ə̀ Njisə̀s vɛ ə chɔʼ ndə̂m.
Currently Selected:
Ətefɨ̂aʼ 5: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
