Ətefɨ̂aʼ 6
6
Ə chɔʼ ghɨghe əsɛ̀mbɛ̂ kə ghe ə tsâmtə̀
1Ə̀ tè nyi ə mtuʼ nə mɛ kə ghɨə poməghe tè tsɨ̀ə ndûə kə əshi, ghɛ ə ghe tè wàmnə̀ ewàmnè ə Nglêkzè ə səʼə̀ èzô yî ghə̀ ghɨ ghɛ ə ghe tè wàmnə̀ wâmnè endaʼa Njûszè. Ghɨ ghɛ ə ghe tè wàmnə̀ wâmnè ə Nglêkzè tè piə nə, zhwiə kwuə ghənə̂ghè fiə zaʼâ va kɔ̂yn ekɛ kɛ ə fo sê zhwiə kwuə. 2Ghɨətom ə Njisə̀s ghɛ njò sepɛ̀ ə tɔŋnə̂ əghɨ epomə̂ nə ghɨ̂yn nâʼà ə̀kɨ̂m nə ghe pəyn atsɨ̀ynte, ə pìə sê ghənə nə, “Ze tsɔ̂fə̀ va nə ghàs za sə̂ ndàʼà tom ə̀ Fèzhə̀ ə tsɨsə sə̂ chyâtə̀ èkɛ. 3Ghàs piə sê ghàyn ə ghɔnyìə ghasə nə, ghàyn chɔʼ ghɨghe əsɛ̀mbɛ̂ ə ghayn əfètəyn, ghɛ ə ghe kyi ndam èchùŋ, è tɔf eghaʼâzè è Zuʼse Ŋwaʼase e fɨnə chisə̂ ghənə kə ghàs fo fɨ̂aʼ zɨ̂nə̀ sê ghənə. 4Ə nə̂yn nyiə mə, ə ghàs pɔŋ kyî àshîŋə̀ è ngɨŋ sas se, sə̂ tsə̂mə̀ fɨnə ndâʼà tom èchùŋ.”
5Nâʼà ə̀ghɨ ə poməghe əkɨ̂m ə saŋnə àchûŋ kûmə̀ èghɛ nə zɨ̂nə̀ ə ghɨətom ə Njisə̀sghè pì, ə chɔʼɔ Shìtifɨ̀yn, ə nyi wùə mə è və ə fɛte pomə̂ sê Zhə̀fè, Zuʼse Ŋwaʼase e fɨnə chisə̂ vəyn, ə fɨnə chɔʼɔ Filìp, è Pòkolùs, è Nikanò, è Timòyn, è Pàmenàs, è Nìkolùs. Nìkolùs tè nyi wùə mə è ndò pə̂yn endaʼa Antyòkzè, è tè vachi wùə Njûs pîza kwîə kə pomə əghɨ̀ ə Njûszè tyə̀nə. 6Ghɨə pomə tè pəyn è ghənə sê ghɨətom ə Njisə̀sghè, ghənə ə ndə̀mə̀ ə̀gho əghɨ nə ghɨ̂yn ətu ə tsə̀mə̀ sê ghənə.
7Tom ə̀ Fezhə̀ e fɨnə zham ndûə kə èshike. Ghɨə poməghe ə Njèlusalɛ̀m e tsɨ̀ə ndùə kə ndò. Ghɨ kɔʼsə nə eshyə̀ ə tsɨəghe e zɨə èzaʼlê nə zɨ̂nə̀ ə pɔŋɔ pomə̂.
Ə ko Shìtifɨ̀yn
8Shìtifɨ̀yn tè nyi wùə mə Zhə̀fè ə pɔsê vəyn nâʼà àchûŋ, ə fɨnə fo àtyaʼ sê vəyn nə è və nə̂ ə̀ghɛ əkayntə əfètə̂ ə̀ghɨ̀, ghe tyə̂nə̀ àtyaʼ ə Fezhə̀kè. 9Pîza, ghɨ yîghe ə zhə̀tə̀ èsaʼnê yî vəyn. Ghɨ nə ghɨ̂yn tè nyi əghɨ mə ghe ndo pə̂yn anɔ̀yn əghɨ̀ kɛ ə ke tè zàŋsə ndûə ə ndɛ àtsɨ̂ynte. Ə tè tɔŋtə ndɛ ə̀ təyn nə ndɛ àtsɨ̀yn əghɨ̀ ghɛ ə kɛse vachi èkɔ̂s. Ghɨ nə ghɨ̂yn tè nyi əghɨ Njûsə̀ mə ə ndo pə̂yn endaʼa ə Silênzè, è ndaʼa Àlèksandiyàzè. Ghənə è ghɨ Njûs əmɔ̀ʼɔ ghɛ ə tè ndò pə̂yn ə Sìlisyà è kɨsè Esiyà, ə zhə̀tə̀ saʼnə̂ yîghə̀ Shìtifɨ̀yn. 10Ghənə ə saʼnə̂ ə̀ghɛ yighə̀ Shìtifɨ̀yn ə tânə̀ andiŋ kyîke sè fɨyn kyi va ghɛze se pì kûmə̀ nə Shìtifɨ̀yn tè wàmnə̀ è tɔf eghaʼâzè, mə ə̀ fo Sèzuʼse Ŋwaʼase. 11Ghənə ə zùŋtə̀ ə̀ghɨə mɔ̀ʼɔ nə ghe wam ə pi nə, “Ghàs ə tə zɨ, è ve pîə ə̀ghɛ piə kûmə̀ Mosîs è Zhə̀fè.” 12Ghənə pìə za kè sə ashìŋə̀ ə chiyntə̂ ə̀ghɨ, è chəʼse, è tyə̀ynsè sə esaʼse, ə pə̀ kyîə Shìtifɨ̀yn ə ndùə è vəyn sê ghɨə sesaʼa. 13Kə ndû za, ə njìə ghɨə mɔ̀ʼɔ nə ghe nji pə̀yn wam àkaŋ ə̂ Shìtifɨ̀yn ətu. Ghənə njiə pə̂ ə pìə nə, “Wùə vɨ̀nə faŋə tsɛ̂ va sə̂ wàmnə̀ ə̀ghɛ ə piə kûmə̀ ndɛ̂ ètsə̀mə zɛ ə è nyi èŋwaʼze, è kɨsè elwɔ̂ŋ vɛ ə Zhə̀fè tè fo sê ghâsènì. 14Ghàs ə tə zɨ kə è pìə nə Njisə̀s ə̀ Nazalɛ̀t nə vɨ̂yn tə pɨ̂sə̀ ndɛ̂ ètsə̀mə, ə È fɨyn kwiynê endam zɛ ə Mosîs tè zaʼle ghâsènì ətəyn.” 15Nâʼà ə̀ghɨ ə̀kɨ̂m ghɛ ə ghe tè nyi elùʼ e saʼ nə vɛ ə naynə̂ ndùə Shìtifɨ̀yn ə fe èkyâʼ ə vəynze ze nyanə̂ kə kə ekyâʼ ə tsìzè.
Currently Selected:
Ətefɨ̂aʼ 6: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
