Matyò 25

Ngàyn kûmə̀ sèngɔ̀yn sə ezəyn seghɨm

1Njisə̀s ə fɨnə mɛ̀ ngàyn zhîzè nə, “Shîŋə̀ kɛ ə Vâ wùə tə pə̂, fɔ̂yn ə ekwùtwəyn tə nə̂ ə və nyi kə sengɔ̀yn sèghɨm ə se tè nji lâmsə ghənə̂sè ə fɨə ndûə zâ ndomə̀ wùzhɔyn. 2Ghənə ə tâyn tè nyîə ngô, ghə mɔ̀ʼɔghe ə tâyn e tɔfə. 3Ghe ngo ghɛ ə njìə sèlâm sə ghənə̂sè ə tàʼa njiə kàlàshî nə è tsɨte. 4Pîza, ghe tɔfə ghɛ ə njìə sèsɔ̀ʼ ə ndə̀mə̀ kwəynsə kàlàshî ətəyn. 5Ndom ə̀ wùzhɔyn ə layntə̂ tsɛsə̀ ghənə ə zhə̀tə̀ se məŋ, mbɨəynse ə ko ghənə.

6Ə̀ tè kàyne nyi əfètə̂yn ètuʼ pɔ̂ŋkè ə zhə̀tə̀ se fɨ pîə nə, ‘Ndom ə̀ ngɔ̀ynə̀ wùzhɔyn vɨ̂nə è pə̀! ghàyn pəyn kwəynê è vəyn!’ 7Ngɔ̀yn sɛ sèghɨm ə ndwìə ə kɔʼsə sèlâm sə ghənə̂sè. 8Ghe ngo ghɛ ə ke pì sê ghe tɔfə ghɛ nə, ‘Ghàyn fo ghàs è luʼə kàlàshî vaynve, lâm sasse sè ndɨmə̂ ndwûə ndò.’ 9Zəyn ghɛ ə tè kyi tɔfe ə pìə nə, ‘Ngaŋngaŋ! kàlàshî ətəyn vayn kàʼa è kwəyn sê ghàyn è kɨsè sê ghàs. Ghàyn ndu ə ndɛ è pəʼlə ə ghàyn zhɔyn zhîzè se ngɨŋ zâynzè.’ 10Ghənə ə ke ndo ndù se zhɔnə zhîzè, ə pə̀ kə ghənə ndô, ndom ə̀ wùzhɔyn ə pə̀, ngɔ̀yn sɛ sètâyn ə se tè nyi è pɨaʼtêzè ə njiə yighə̀ vəyn elùʼ e zhiə nə malə̂vè, ə kyiŋə̀ fâ echo ndɛve.

11Ə mòtə̀ kə nyî ghə mɔ̀ʼɔ ghɛ pə̀, tɔŋɔ piə nə, ‘Pɛ̀ apɨəyn, pɛ̀ àpɨəyn, chɔʼ cho ndɛve sê ghàs.’ 12Ndom ə̀ wùzhɔyn vɛ ə pə̀ynsə̀ kə nə, ‹Ngaŋngaŋ, m keva ghàyn.›”

13Njisə̀s ə kwùŋsə̀ ngàyn nə zɨnə nə, “Ghàyn e pfɨ̂tə̀, kûmə̀ nə ghàyn keva tuʼfe è kɨsè shîŋə̀ kɛ ə Vâ wùə tə kɛsə pə̂ ətəyn.”

Njisə̀s ə mɛ̀ ngàyn ə̀ pɛ̀ efɨaʼ è ghɨ fɨaʼa vəynghe

(Lûk 19.11-27)

14Njisə̀s ə fɨnə mɛ̀ ngàyn zhizè ə pìə nə, “Fumə ashìŋə̀ fɔ̂yn ekwùtwəyn tə nə̂ ə və nyi kepî kə wùə vîvè ə è tè kyiŋə se ndù ekwî ə tɔŋɔ̂ ə̀ghɨ fɨaʼa ə vəynghe ə ndə̀mə̀ nə ghənə naynə̂ èfɨa vəynve. 15È və fo sê nâʼà pîndè kè ke tyaʼa vəynke nyi, sê vɛ mɔ̀ʼɔ e və fo sèkam sètâyn, ə fo sê pɛ̀ sê vîvè, ə fɨnə fo èmɔ̀ʼ sê və mɔ̀ʼɔ. È və ke ndo nduə ekwî. 16Wùə èfɨaʼa vɛ ə è tè fi kam setâyn ə ndə̀mə̀ ndzɨsə̂ èkɛ vəynve elùʼ epəʼləve ə kyiə kwəynsə̂ sèkam sə mɔ̀ʼɔ setâyn. 17Kèpî famə endom, vɛ ə è tè fi kamse pɛ̀ ə kyîə kwəynsə̂ sèkam səmɔ̀ʼɔ sepɛ̀. 18Pîza, vɛ ə è fi kam èmɔ̀ʼ ə ndùə tɨmə àpûʼ ə chi ə ndə̀tə̀ èkɛ ə pɛ̀ afùʼ və təyn.

19Ə ndamə nâʼà sə ŋaŋ, Pɛ̀ èfɨ̀aʼ ə kɛsə̂ kwɨlə pə̀ ə tɔŋnə̂ ghənə se zɨ nə, ghənə tè fə̂ zayn è kɛ vɛ ə. 20Wùə èfɨ̀aʼ vɛ ə è tè fi kam setâyn ə njiə pə ə fo tsɛsə̀ sèkam sè tâyn ə pìə nə, pɛ àpɨəyn, ò tè fo mi è kam setâyn, mə ndə̀mə̀ ndzɨsə̂ ə pəʼlè, nayne kə, ə̀ sɨ̂nə̀ nyi sekam sə mɔ̀ʼɔse tâyn kə m kyi etûə təyn.’ 21Pɛ̀ efɨaʼ ə̀ vəyn ə piə sê vəyn nə, ‹Ò nə̀yn àchûŋ. Ò nyi ke nâʼà wùə èfɨ̀aʼa èchùŋ, fɨyn nyi səmɔʼ. Ò vâ nyîə nyi səmɔʼ sə̂ tɔ̂ʼnə̀ èkɛ etətə̂vè, M nə̀ fo ghò èkɛ e tsɨəve nə ò tɔʼne è vəynve. Nji pə ə chyàtə̀ ə mì esaŋnê.› 22Wùə èfɨ̀aʼa vɛ ə tè fo vəyn è kam sepɛ̀ ə njiə pə̂ ə pìə nə, ‹Pɛ̀ àpɨəyn, ò tè fo mi è kam sepɛ̀ mə ndə̀mə̀ səynse ə pəʼlè. Naynə kə! kam sə mɔ̀ʼɔse sɨ̂nə̀ sèpɛ̀ kə m kyi.› 23Pɛ̀ èfɨ̀aʼ ə̀ vəyn vɛ ə pìə sê vəyn nə, ‹Ò nə̀yn kè nâʼà àchûŋ. Ò nyi ke nâʼà wufɨ̀aʼa èchùŋ, fɨyn nyi səmɔʼ. Ò va nyiə nyi səmɔʼ sə̂ tɔ̂ʼnə̀ èkɛ etətə̂vè, e za nyi nə m nə̀ ndə̂mə̀ ghò ə o tɔ̂ʼnə̀ èkɛ etsɨəve. Nji pə ə chyàtə̀ ə mì esaŋnê.› 24Wùə vɛ è tè fi kam èmɔ̀ʼ ə njiə pə̂ ə pìə nə, ‹Pɛ̀ àpɨəyn, m ke ndô nə ò nyi wùə tɛ, kwìə mə ò tè paʼà zho, zûŋtə̀ èfɨa elùʼ mə ò tè paʼà waŋ ngwàʼ. 25M tè nyiə fânə̀, ə ndùə tɨmə àpûʼ ə ndə̀tə̀ èkɛ vɛve ətəyn. Nayne kə, kɛ vɛve vɨ̂nə̀.› 26Pɛ̀ èfɨaʼ ə̀ vəyn ə pìə sê vəyn nə, ‹Wùə èpi! wùə èfɨ̀aʼa ezɔlə, ò tè nyîə ke nə m kwîə mə m tè paʼà zho, zûŋtə̀ èfɨa elùʼ mə m tè paʼà waŋ ngwàʼ, 27e tè tsɔ̀fə nə ò ndu ndəm èkɛ vɨmve ə ndɛ èkɛ, mə m mə fi vəynve è mô mə təyn ezhoghɛ ə m kɛse pə̂yn?› 28Wùə ə̀təyn ə ke pì sê ghɨ efɨaʼa mɔ̀ʼɔghe nə, ‹Ghàyn fi tsɨsè kam ətəyn sê vəyn ə fo kwəynsê sê wùə vɛ è kyi kam seghɨm. 29Kûmə̀ nə, sê nâʼàpî ndè vɛ ə è kyi fɨake, ə nə̀ fo kwəynsə̂ setsɨ̀ sê vəyn, ə è və kyi ve tsɨə tsɛ, pîza wùə vɛ ə è kyi va fɨake, Zhə̀fè nə̀ fiə tsɨsə̀ pî fè fɨ̂atə̀ fɛ ə è kyi sê vəyn. 30Sê wùə èfɨaʼa vɨnə è nyi afɨa sə ndô nyî, ghàyn laŋ fɨse vəyn əpɨəyn ə fètə̂ àlɨm, fumə ə è və chîə kwɨlə ə̀sɔŋ.›”

Njisə̀s ə wàmnə̀ kûmə̀ etuʼ ə saʼve

31Njisə̀s ə pìə kwəynsə̂ nə, “Vâ wùə tə pə̂ kə fɔ̀yn è tsì sekɨ̂m yî vəyn, ə è tsɨsə ə fèkyə̂ fə efɔ̀ynfè se saʼa əghɨ. 32-33Ə ghɨ tèndâʼà tə mbite tekɨ̂m zuŋte ə və shi. Ə è ke chyàtə ghənə sə enɔ̀yn èpɨ̀a, ə̀ nyì kepî zamə kə ngyəyn chyasə̀ fɨsə ndzèsè ə se pfɨsəndɔŋse. Ə̀ nyi zamə kə fɔ̀yn ə̀təyn tə ndə̂mə̀ ghɨ chichighe ə vəyn ekɔyn zhiəve, è ghɨ ghɛ ə vachi ə vəyn ekɔyn ekôvè. 34Ə Fɔ̀yn ke pì sê ghɨ chichighe ə vəyn ekɔyn twɔve nə, ‘Ghàyn pəyn, ə ghàyn ghɨnə ə Pɨ̀a vɨm pɔse nyi! ghàyn nji pəyn ə kyi pɔsə efɔ̀yn ə Fezhə̀ vɛ ə nyi mə ə pɨaʼtê se ghàyn nâʼà kə tè pom mbi. 35Ghàyn tə fiə èpɔsê nə zɨnə mə kûmə̀ nə, chɨ̀ŋ tè nyîə zafə mi, ghâ fo àfɨa nə M zhi. Pfɨ̀ŋ m̀mò ezafə Mi ghâyn ə fo Mi èmôm nə m mɨ, M tè nyi wùə èmòtəpə, ghâyn ə fi ndzɨsə̂ Mi achûŋ ə ghâ sendɛ, 36kyi va ndzɨse se màʼ, ghâyn ə fo mi è ndzɨse, M tè nyîə zafə ghâyn ə tɔ̀ʼnə̀ è Mi. Kə m tè nyi ə ndɛ ə̀chaʼ, ghâ mòtə̀ Mi.’ 37Ə ghɨ chichighe ke pə̀ynse ə vəyn nə, ‘Pɛ̂pɛ, ə̀ nyì zɨ̂yn ə ghàs tyəm fe gho chɨ̀ŋ e zafə ghò, ghàs ə fo ghò è fɨazhiəve è kɨsè kə pfɨ̀ŋ m̀mò tè zafə ghô, ghàs ə fo ghò è mô mə? 38Ghàs tyəm fe zɨ̂yn gho kə ò mòtè pə̂yn ghàs, ghàs ə fiə ndzɨsə̂ ghò ə ghàs ə sendɛ ə, mə nyi ashìŋə̀ akè ə ghàs tè fo ghô è ndzɨse mə ò kyi va ndzɨse se màʼa? 39Ghàs tyəm fe zɨ̂yn gho mə ò zafə ndò, ghàs ə tɔ̀ʼnə̀ e ghò ə? mə ghàs tè mòte zɨ̂yn ghô mə ò nyi ə ndɛ ə̀chaʼ ə?’ 40Ə fɔ̀yn pəynse nə, ‹M pîə sê ghàyn səmɔʼ nə, nâʼàpî ghè vɛ ə ghàyn tè nə̀yn sê wùə èmɔ̀ʼ vɛ è chùmtə̀ mi mə è kɔʼnə̂ va, ghàyn tè nə̀yn sê Mi.›

41Ə è ke pì se ghɛ ə vəyn ekɔyn ekôvè nə, ‘Ghàyn tə ə mì əshi, ghàyn ghɨnə Zhə̀fè ti ndi sê ghàyn nyî. Ghàyn ndu ewùs vɛ ə ve pɛ ndɨmə̂ va mə Zhə̀fè pɨaʼtê ndə̂m sê ndə̂plè è tsì sə vəynse. 42Chɨ̀ŋ tè nyîə zafə mi, ghâ tàʼa fo Mi è fɨazhiəve, pfɨ̀ŋ m̀mò e zafə mi ghâyn ə tàʼa fo mi è môm nə m mɨ. 43M tè nyi wùə èmòtəpə, ghàyn ə tàʼa fiə ndzɨsə mi ə ghâyn ə sendɛ, kə m tè kyi va ndzɨse se màʼ ghâyn ə tàʼa fo mi è ndzɨse nə m maʼ, m tè nyîə zafə, nyi ə ndɛ ə̀chaʼ, ghâyn ə tàʼa tɔ̀ʼnè è mi.’ 44Ə ghənə ke pì sê vəyn nə, ‘Pɛ̂pɛ, ə̀ nyì zɨ̂yn ə ghàs tyəm fe ghô, chɨ̀ŋ e zafə ghò, pi kə zafə pfɨ̀ŋ m̀mò è ghò, pi kə wùə èmòtəpə, pi mə o kyi va ndzɨse, pi mə ò zafə ndò, pî ə ndɛ ə̀chaʼ, ghàs ə tàʼa tsàmtə gho ə?’ 45Ə fɔ̀yn pəynse nə, ‘M pîə sê ghàyn səmɔʼ nə, nâʼàpi zɨ̂yn ə ghàyn tè tə se tsàmtə wùə èmɔ̀ʼ vɛ è chùmtə̀ mi mə è kɔʼnə̂ va, ghàyn tè tə se tsàmtə Mi.’ 46Ghɨnə mə, ə fɔ̀yn ke tom elùʼ etsəfsə vɛ ə wusve pɛ ndɨmə̂ va, pîza əghɨ chichighe ndu elùʼ vɛ ə ghənə tə ndamə faŋə.”

Currently Selected:

Matyò 25: bfm

Highlight

Copy