Matyò 26

Ghɨ eghaʼâ Isìlâyghè pɨaʼtə̂ se zhwiə Njisə̀s

(Mâk 14.1-2; Lûk 22.1-2; Njɔyn 11.45-53)

1Kə Njisə̀s tè zaʼle mɨsè ə̀ghɛ ghɨ̀yn nâʼà ə̀kɨ̂m, È və pìə sê chùmtè èpàm sə vəynse nə, 2“Ghàyn kyi sə̂ ke nə epàm mtuʼ mpɛ̀ nə̀ nə̂ nyi è zhi efɨazhi ezaʼa tsɛve. Ə̀ nyì fumə fetuʼ kə nə̀ fo tsɛsə̀ Vâ wùə ə ghɨghe əgho nə ə paynte awâmnè.”

3Ghɨ kɔʼsə nə eshyə̀ engaŋtə è chəʼse ə kwəynə̂ ə Kayfàs, ə wùə kɔʼsə nə̂ èshyə̀ èngaŋtə kwəynə. 4Ə̀ nyì fumə kə ghənə tè nə̂ pɨaʼtê se nyaʼtə kyiə Njisə̀s se zhwiə vəyn. 5Ghənə ə pìə nə, “Ghâsènì nə̀ nə̂ va zɨnə ashìŋə̀ efɨazhiə ezaʼa tsɛve, ə̀ puzâ ə ghɨə nə ndwise nôzè.”

Wùzhɔyn vîvè ə kɨmnê Njisə̀s ə Petanì

(Mâk 14.3-9; Njɔyn 12.1-8)

6Njisə̀s tè nyi ə Petanì ə Shimùyn ə ndɛ, ə wùə mə è və fe tsôsvè, è zafə akwùszè, 7Kə Njisə̀s tè zhiə wùzhɔyn ə njiə pə̂ è mbùʼtə̀fè, è ngwɨ̂l me lɨ̂mtə tsɔfə̂m ətəyn m̀ me tɛ èkɛve ə sɨ̀sə̀ ə Njisə̀s atu. 8Chùmtè èpàm sə Njisə̀sè ə fe zɨnə mə ə fɨsə̂ èndwɔ̂. Ə pfɨfə nə, “Kûmə̀ ghè ə pofsə kyì mngwɨl zɨnə nyiə? 9Ə fə kàʼa ə pəʼle ngwɨ̂l nə mɨ̂nə̀ sə ekɛ, ve tsɨ̀ə kə nyi, ə tsamte ghɨ afɨfghe ə təyn.”

10Njisə̀s ə kê èghɛ zɛ ə ghənə kwâʼtə̀ ə pìə sê ghənə nə, “Ghàyn fo ngəʼ ə ghè sê wùzhɔyn vɨ̂yn ə? Ə̀ nyi eghɛ echûŋzè kə è nə̀yn sê Mi. 11Ghàyn nə kyi tsɛ ke ndò ghɨ afɨf ghə ghàyn əfètəyn, pîza m va se faŋ ghâsènì sə teshɨ̀ŋə̀ tèkɨ̂m. 12Ghɛ zɛ ə è nə̀yn fe nyi nə è sɨs ngwɨlə̀m ə mì ewìyn se pɨaʼtê ə mi se pfɨ̂mə̀ zɨmze. 13M pîə sê ghàyn səmɔʼ nə ə nə ndàʼà nâʼàpi ghayn tom èchùŋ zɨ̀nə̀ ə mbi èkɨ̂m, ghɛ zɛ ə è nə̀yn ə tsâ sə kwâʼtə̀ vəyn.”

Njondàs ə pomə̂ se pəʼlê ə Njisə̀s

(Mâk 14.10-11; Lûk 22.3-6)

14Wùə èmɔ̀ʼ əfètə̂ sèchùmtè èpàm njò sepɛ̀, ə vɛ ə tè tɔŋtə nə Njondàs Èskalɔ̀t ə ndùə fe ə̀ghɨ kɔʼsə nə eshyə̀ engaŋtəghe 15ə pfɨfə sê ghənə nə, “Ghàyn nə̀ fo ghè sê mi ezhoghɛ m fo Njisə̀s ə ghàyn ə gho?” Ghənə taŋtə̂ fo èkɛ ə silvàvè sê vəyn, m̀ghɨm ta. 16Se zhə̀tè fumə ashìŋə̀ se ndù əshi, Njondàs e kyiŋə àzhəm echûŋkè se fo tsɛ̀sè ə Njisə̀s sê ghənə.

Njisə̀s ə zhi fɨazhiə ezaʼa tsɛve yî chùmtè èpàm sə vəynse

(Mâk 14.12-21; Lûk 22.7-13, 21-23; Njɔyn 13.21-30)

17Ə fetuʼ fə shife mtuʼ mɛ ə tè zhiə payn ə kwaŋ kɛ ə tè nyi mə ə paʼà ndə̀m fèsə̀ʼ ətəyn, chùmtè èpàm sə Njisə̀sè ə pə̀ se Vəyn ə pfɨfə nə, “Ò kyiŋə nə ghàs ndu fɛte ghayn fɨazhiə ezaʼa tsɛve sê ghò ə?”

18È və pìə sê ghənə nə, “Ghàyn nji ndu sê wùə vîvè endaʼ ə ghàyn tsayn sê vəyn nə, ‹Tyə̀ynsè pi nə shîŋə̀ kɨmke ə pə̀yn, chùmtè èpàm sɨmse è mi nə̀ zhiə èfɨazhiə ezaʼa tsɛve ə ghò əndɛ.›”

19Chùmtè èpàm sə Njisə̀sè ə nə̀ kə kə è pì, ə pɨaʼte èfɨazhiə ezaʼa tsɛve fu.

20Kə ə̀ tè nyi ezhwikwɨlə, Njisə̀s è chùmtè èpàmse njò sepɛ̀ ə tsɨsə̂ se zhi efɨa zhiə vɛ. 21Kə ghənə tè zhiə, Njisə̀s ə pìə nə, “M tsâ sê ghàyn səmɔʼ nə wùə èmɔ̀ʼ sê ghàyn nə̀ pəʼlə̂ mi.”

22Ghɛ ətəynze ə fo ngəʼ sê chùmtè èpàm sə vəynse nâʼà sə ŋaŋ, ghənə e sè pfɨfə sê vəyn wùə èmɔ̀ʼ emɔ̀ʼ nə, “Pɛ̂, m kwaʼtə̀ nə ə̀ vachi mi.”

23Njisə̀s ə pə̀ynsə̀ nə, “Ə̀ nyì ke nâʼà wùə mə ghasè vəyn nə̀ tsɨə kɨŋnə̂ àpayn ə kwaŋke akaŋ àmɔ̀ʼ, ə̀ nyi vɛ ə è nə̀ pəʼlə mi. 24Vâ wùə nə̀ kwuə kè eghɨ kə nyi mə ə nyàʼ ə ŋwàʼlè ə̀ Fèzhə̀ pîza ngəʼ èghaʼâ nyì sê wùə vɛ ə è nə̀ pəʼlə Vâ wùə! E fe tsɔ̀fə nə ə nyi mə tè paʼà piə wùə ə̀təyn.”

25Njondàs vɛ è tè pomə se pəʼle ə Njisə̀s ə pfɨfə sê vəyn nə, “Tyə̀ynsè ə nyi mi mə?”

È və pə̀ynsə̀ nə, “E nyi ke za kə ò pi.”

Njisə̀s ə zhi kwûŋsè yî chùmtè èpàm sə vəynse

(Mâk 14.22-26; Lûk 22.14-20; 1 Kɔlìŋ 11.23-25)

26Kə ghənə tè zhiə, Njisə̀s ə njìə àpayn ə kwaŋke ə fo àzɔ̀ŋnè sê Zhə̀fè ə pɨaʼlə̂ ə fo sê chùmtè èpàm sə vəynse ə pìə nə, “Ghàyn ko zhi. Ə̀ vɨ̂nə nyi ewiyn vɨmve.”

27Epàm ətəyn, e və fɨnə njîə wà m̀lɨ̀ ə fo àzɔ̀ŋnè sê Zhə̀fè ə fo sê ghənə, ə pìə nə, “Ghàyn mɨ nâʼà ghàyn əkɨ̂m. 28Ə̀ mɨ̂nə̀ nyi mndəm mɨ̂m mə nyi mkâyn me fɛ̂m. Ə tə sɨsə̀ m̀ndəm mɨ̂m mɨ̂nə̀ əghɨ etsɨəghe elùʼ kə Zhə̀fè lɛse fo sèpi sə ghənə̂sè. 29M pîə sê ghàyn səmɔʼ m tə fɨnə mɨə va lɨ̀m nə mɨ̂yn se zaʼâ etuʼ vɛ kə m kɛse mɨ sə fe ghâsènì elùʼ efɔ̀yn ə Pɨ̀a vɨ̂mvè.”

30Ghənə ə zhəmə njàŋ ə fɨə kɔʼɔ etûə Pfɨ̀yn ə̀ Sèolìf.

Njisə̀s ə tsàyn nə Pità nə̀ tə vəyn

(Mâk 14.27-31; Lûk 22.31-34; Njɔyn 13.36-38)

31Kə ghənə tè kɔʼ zaʼâ ə pfɨyn, Njisə̀s ə pìə sê chùmtè èpàmsə vəynse nə, “Ndâyn ètuʼve ghâyn əkɨ̂m nə̀ tə zâ Mi, ghàyn nə̀ tə kûmə̀ èghɛ zɛ ə ze nə̀ kyânə̀ sê mi. Ə nyi mə ə nyàʼ nə, ‘M tə zhwiə ngyəyn, ə pfɨ sə vəyn sekɨ̂m tə chyâsè.’ 32Pîza, ezhoghɛ m kɛse ndwî ekwu, m ndu ə ghâyn əshi ə Ngalìlî. Fumə ə ghàyn kwəyne è mi.”

33Pità ə pìə sê Njisə̀s nə, “M vayn kaʼa m tə za ghò, pî ezhoghɛ ə ghɨə mɔ̀ʼɔ zâ.”

34Njisə̀s ə pìə sê Pità nə, “M pîə sê ghò səmɔʼ nə ndom ə̀ mbvɨ nə̀ piə è tɔŋə ndò ètuʼve ndâyn mə o mɛ mi shîŋə̀ teta.”

35Pità ə pə̀ynsə̀ nə, “M vayn kàʼa m tə pi èkyì eghɛ zâ, pi ezhoghɛ m nyi pî se kwu.”

Chùmtè èpàm sə mɔ̀ʼɔse ə pìə kə pî èghɛ nə zɨnə mə.

Njisə̀s ə tsə̀m ə Ngètsemenì

(Mâk 14.32-42; Lûk 22.39-46)

36Njisə̀s ə ndùə yî chùmtè èpàm sə vəynse elùʼ, etɔŋtə̂ nə, Ngètsemenì, è və pîə sê ghənə nə, “Ghàyn tsɨsə fâyn, m kɨŋte ndu əshi ə m tsəm fu.” 37È və njìə Pità yî ghɔ Zepɛndì ghə pɛ̀. Kə è ndùə tsôsvè, è kosê esəynze ə lwinə ə vəyn ə təm. 38È və pìə sê ghənə nə, “Ngəʼ nyîə nyi ə mì ətəm mə è kàʼa e zhwi mi, ghayn faŋ fâyn ə kyaʼ pɨ̂əyn ghâsènì.”

39È və kɨŋtə̂ ndûə əshi sechə, ə nyɨ̀ŋə̀ ə chi è kyaʼzè ə tsə̀mə̀ nə, “Pɨ̀a vɨm, ə e pɔynə̂ o njìə tsɨsə̀ ngəʼ zɨ̀yn sê mi! ə̀ vachi èghɛ zɛ m kɔ̂ŋɔ̀ pîza zɛ ə ò kɔ̀ŋə̀.”

40Ə pə̀ kə è tsə̀m mɨ̂sè, ə kɛsə̂ ndûə sê chùmtè èpàm sə vəyn sɛ sèta ə fe mə ghənə pɨənə̂ ndò. È və pfɨfə sê Pità nə, “Piə e za nyi nə ghàyn vayn kàʼa ghàyn pɔŋ tsɨsə èkyâʼzè ghâsènì sə chwìə emɔ̀ʼ ə? 41Ghàyn e kyaʼà, tsə̂mə̀ kə mɔ̂mè pəyn sê ghàyn. M ke nə ə̀ nyi ə ghàyn ekwâʼtè, ghàyn kɔ̀ŋɔ̀ ndò se nə̀yn kə m pî, pîza njà èwìyn e pɔylə̂.”

42È və kɛse ndò ə ndùə sè tsə̂mə̀ pîə nə, “Pɨ̀a vɨ̂m, ə ò va se fiə tsɨ̀sè akɛ̀ ə ngəʼ kɨ̂nə̀ ə mì ətu, mə m paʼà pɨ̀aʼà kəynke, o nə̀ èghɛ zɛ ə ò kàʼa ò nəyn.” 43È və tsə̀mə̀ zâ, ə pìə è kɛsə̂ pə̂ ndò ə fɨnə fe chùmtè èpàm sɛ e pa pɨəynə̂ kə ndò kûmə̀ nə mbɨəynse tè nyîə tsəʼə̂ ghənə.

44Njisə̀s ə fɨnə ndûə se tsə̀m, nə ə sè nyi tèshîŋə̀ tèta, piə kə ə̀ghɛ ghɛ è fè pîə sə shi. 45È və tsə̀mə̀ mɨ̂sə̀ ə kɛsə̂ ndûə sê chùmtè èpàm sə vəynse ə pfɨfə sê ghənə nə, “Piə e za nyi nə ghàyn pa tɔ̀ʼɔ̀ pɨəynə kə ndò, zɨ̂tə̀ ə? Ghàyn e ke nə shîŋə̀kè ə kwəyn e sè kyiŋə se fo Va Wùə ə ghɨ pighe əgho. 46Ghàyn ndwi ə ndo. Ghàyn fe. Ə̀ vɨ̂nə pə̀ wùə vɛ ə è pəʼle mi.”

Ə kyî Njisə̀s

(Mâk 14.43-50; Lûk 22.47-53; Njɔyn 18.3-12)

47Njisə̀s e sè pa wàmnə̀ kə ndò, Njondàs vɛ ə è tè nyì kepî wùə èmɔ̀ʼ əfètə̂ sèchùmtè èpàm sə vəynse njò sepɛ̀, ə kɔʼɔ pə̂ yî nɔ̂yn ə ghɨ̀kè, ke tsɨ̀ə kə nyi, kyi tefɛ̂ è mbàŋsè. Ə̀ ghənə tè tom ə ghɨ kɔʼsə nə eshyə̀ engaŋtə è chəʼse ndaʼse, 48ghənə ə pə̀ za wùə vɛ è pəʼlə vəyn e nyi mə è və fo chwìə sê nɔ̂yn ətəynke ə pìə nə, “Ə m nə̀ paŋne nâʼàpî ndè, ghàyn ə kê nə ə̀ nyi wùə vɛ ə ghàyn kyiŋə, ghàyn ə kyîə kə ndò.”

49Njondàs ə pə̀ za ə nànə̀ ndùə kə se Njisə̀s ə tɔŋtə̂ vəyn nə, “Tyə̀ynsè, pɔ̂ynè nyì sê ghò.” Kè sə ashìŋə̀ è və paŋnə vəyn.

50Njisə̀s ə ke pì sê vəyn nə, “Nə kə ghɛ zɛ ò pə̀yn se nə̀yn ə pə.”

Kè sə ashìŋə̀, ghɨ nə ghɛ pə̀ ko Njisə̀s ə fɛtə pɨamə veyn. 51Wùə emɔ̀ʼ əfètə̂ əghɨ̀ ghɛ yî ghə̀ Njisə̀s tè nyi əmɔʼɔ ə chɔʼɔ èfɛ̂ ə vəynze ə kaʼa tənə atûŋne ə wufɨ̀aʼa ə̀ wùə èkɔʼsə nə èshyə̀ èngaŋtə kwəynəke. 52Njisə̀s ə pîə sê vəyn nə, “Kɛse ndə̂m fɛ̂ zɛze apuʼle. Ə nò pîndè è fɛ̂zè, ə nyi kepî èfɛ̂ ə tə nô zhwiə vəyn ətəyn. 53Ghàyn ke va nə m kaʼa m pfɨf tsâmtèzè sê pɨ̀a vɨ̂mvè, kè sə ashìŋə̀ ə è tom tsìsè sê mi kamse eghɨm njòse pɛ̀ ə se tsamte miə?. 54Pîza, mə m nə̂yn nyi ə e tàʼa lwiynse eghɛ zɛ ə se nyi mə ə nyaʼ ə Ŋwàʼlè ə̀ Fèzhə̀.”

55Njisə̀s ə kɛsə̂ pfɨfə sê nɔ̂yn kɛ nə, “Ghàyn nyiə fɨ pə̂yn è fɛ̂tè è mbàŋsè nyiə kə ə nyiŋə ə wùə èchɔŋɔ epàm kɨ̀se kyîə miə? Tuʼmè m̀kɨ̂m m tè nyì ə Ndɛ Ètsə̀mə zaʼlə̂ ə̀ghɨ pîza ghàyn ə tàʼa kyiə mi. 56Nâʼà Pîza, ghɛ nə ghɨyn kyi se kyàyn se lwiynse ə tom ə Fèzhə̀ zɛ ə fɨ̀aʼtèsè tè nyaʼ ə Ŋwàʼlè ə̀ Fèzhə̀.”

Kè sə ashìŋə̀, chùmtè èpàm sə vəynse ə tə zâ vəyn nâʼà ə̀kɨ̂m.

Ə pə̀yn è Njisə̀s ə ndɛ ə̀ saʼ

(Mâk 14.53-65; Lûk 22.54-55, 63-71; Njɔyn 18.13-14, 19-24)

57Ghɨ ghɛ ə ghe tè kyi Njisə̀s ə njìə ndûə è vəyn ə Kayfàs ə ndɛ, ə wùə èkɔʼsə nə èshyə̀ èngaŋtə kwəynə. Ə̀ nyì fumə kə tyə̀ynsè sə alàŋsè è chəʼse tè zùŋte luʼve emɔ̀ʼ. 58Kə tè njiə ndô ndûə è Njisə̀s, Pità tè chûmtə̂ ndûə Vəyn sə aghaf, se zaʼâ kə ndu fɨ ə Kayfàs etipìə àpɨəyn. Kə ghənə ndû fɨ fumə, Pità ə njiə fumə apɨəyn. Ə tsɨsə̂ fu yî ghə̀ ghɨ tsɨ̂ŋnə ndɛ ètsə̀məghe, se fe kə saʼà Njisə̀s nə̀ mîə. 59Ghɨ kɔʼsə nə eshyə̀ engaŋtəghe è ghɨ saʼa ghəkɨ̂m e sè kyiŋə èndom se pì eghɛ akaŋze kûmə̀ Njisə̀s endom kə zhwi vəyn. 60Pîza vayn kàʼa fe zhîze, pî kə ghɨ etsɨghe tè mɔ̀msə se fɨə pə shi se wam akaŋ kûmə̀ vəyn. Ndômnè ghə pɛ̀ ə ndwìə kɔʼɔ 61ə pìə nə, “Wùə vɨ̀nə tè pi nə, ‘È nyi pɨ̀ytè ə Ndɛ Ètsə̀mə ə fètə̀m m̀tuʼ mta, ə è kɛse pɛ kɔʼsê zɨ̂ynzè.”

62Kə wùə èkɔʼsə nə èshyə̀ engaŋtə kwəynə tè zɨ zɨnə mə, ə ndwìə kɔʼɔ ə pfɨfə sê Njisə̀s nə, “Ò kyi va pə̂ynse kyîke se fo se ghɛ ghɨ̀nə ə ghâmə̀ ghò sə təyn nyiə?” 63Pîza, Njisə̀s ə kɨmə̂ kə mɔŋ. Wùə èkɔʼsə nə èshyə̀ èngaŋtə kwəynə ə wàmnə̀ kwəynsə̂ se vəyn nə, “Ezə Fezhə̀ fɛ ə fe ndamə, m pîə sê ghò tsàyn səmɔʼ sê ghàs nə ò nyi vɛ ə chɔʼ ndə̂m ə, ə Vâ Fèzhə̀ ə?”

64Njisə̀s ə pə̀ynsə̀ vəyn nə, “Kè kə ò pì, pîza m tsâ sê ghàyn əkɨ̂m nə, se zhə̀tə ndù zôyn se ndù əshi, ghàyn tə fe Vâ Wùə ə è və tsɨs ə ekɔyn etwɔ ə pɛ̀ ètwɔʼ ekɨ̂mvè. Ə ghàyn fe ə è və tsɨs tso pə̂ etûə sèmbàʼ se kwùtwəynse.”

65Zɨnə̀ ə nə̀ wùə èkɔʼsə nə̂ èshyə̀ èngaŋtə kwəynə ə pàsə̀ sèndzɨs se chwìte nə è nyîə zafsə̂ èndwɔ̂ ə tsà sê ghɨ ndɛ èsaʼa nə, “È sôylə̀ Fèzhə̀! Ghàs fɨnə kyiŋə va tsɛ̀ sə saʼ shîse! Ghàyn ə zɨ kə è sòylə̀ Zhə̀fè!” 66È və ke pfɨf sê ghənə nə, “ghàyn kwàʼtə̀ nə ghe ə?”

Ghənə pìə kə əkɨ̂m nə, “È və pfɨ̀ saʼ mə e kyi ke se kwu.”

67Ghənə ə ke tsɨlə mtɛ̂ ə vəyn ekyàʼ ə pusə vəyn, ghɨ ghɛ ə tè wulə vəyn, 68ə pìə nə, “Tsàyn sê ghàs ə vɛ ə chɔʼ ndə̂m! Sɨŋ nə ə̀ pus nde gho ə?”

Pità mɛ Njisə̀s

(Mâk 14.66-72; Lûk 22.56-62; Njɔyn 18.15-18, 25-27)

69Pità tè pa tsɨs ke ezhɔyn nə saʼve. Vâyn èzhɔyn vîvè mə è fɨaʼà sê wùə èkɔʼsə nə̂ èshyə̀ èngaŋtə kwəynə, ə pə̀ se vəyn ə pìə nə, “Ò tè nyì kepî ghâyn Njisə̀s, ə wùə vɛ ə è ndò pə̂yn apàs endaʼa Ngalìlîkè.”

70Pîza, e və kwiynsə̂ kə ghənə əshi ə̀kɨ̂m ə pìə nə, “M kêva ghɛ zɛ ə ò wàmnə̀ kûmə̀ zəynze.” 71Kə è wàmnè mɨ̂sè zâ, ə ndò fɨə ndùə endom fumə echo àpɨəyn ə saʼke. Vâyn èzhɔyn èfɨaʼa ə̀mɔ̀ʼɔ̂ ə fɨnə fe vəyn ə pìə sê ghɨ ghɛ ə ghe tè nyì fu nə, “Wùə vɨ̀nə tè nyì yî Njisə̀s vɛ ə è ndò endaʼa Nazalɛ̀tzè.”

72Pità ə fɨnə kwiynsə̂ ə pə̀ynsə̀ nə, “M kaynə̀ nə m keva wùə vɛ!”

73Ə fɨnə môtə̀ ke nyi, ghɨ ghɛ ə ghe tè tyəm fu ə pə̀ sê Pità ə pìə nə ò lote nyi wùə èmɔ̀ʼ əfètə̂ ə̀ghɨ̀ ghɛ ə chûmtə̀ wùə vɛ. “Epàm ə ghɛ ətəynghe əkɨ̂m, ndom vɛ ò wàmnə̀ ətəyn tyəynə̀ ndò nə ò nyi wùə mə ò ndò pə̂yn apàs endaʼa Ngalìlîkè.”

74Pità ə pìə nə, “M kâynə̀ nə m pîə səmɔʼ! Ə Zhə̀fè tsəfse mi ə zho m pîə va səmɔʼ! M keva wùə vɛ!”

Kə è wàmnè mɨsè zâ, ndom ə̀mbvɨ ə tɔŋə. 75Pità ə ke kɛse ə kwàʼtè eghɛ zɛ Njisə̀s fè pì sê vəyn nə, “Ndom ə̀mbvɨ nə̀ piə è tɔŋɔ ndò mə o mɛ mi shîŋə̀ teta.” Pità ə fɨ ə ndûə əpɨəyn ə chîə nâʼà sə ŋaŋ.

Currently Selected:

Matyò 26: bfm

Highlight

Copy