Lukàrzɛ̀ 10
10
Yerzù à mà òma menì lìrzamba me Hwà-òkòwèlì nà hwahwàkɛ
1O mburzà nanù Rzàŋgò à mà hvɔ̀rzɔ̀ hvɛ mènì lìrzàmbà me hwà-òkòwèlì nà hwàhwàkɛ̀. À mà hwa òma hwàhwàkɛ̀, hwàhwàkɛ̀, ò lì ɛ̀ndɛ ò wòrzò, ò màmbòwà nà hwèki e ma mɔ̀ à mà hwiye ema à hwɛnì lì ɛ̀ndɛ. 2Yerzù à mà hwa òhweyà nanù ema, “È hvaya è ŋyàayì jɔ̀ɔ̀-jɔ̀ɔ̀, ndi hwarzàŋgà mbòtà hwa rzà kòkì. È kanɛ̀ nanù ema è mòhwɛ̀nèlì wà hvaya, à òme hwàrzàŋgèlì hwa mbòtà ò hvaya. 3È ɛ̀ndɛ̀ ndì, e hwiyè nanù ema, nà e òmà ndi nàa mɛ̀lɛ̀ŋgù ò ìtììtènì ja njùhwɛ̀. 4Nà òmà e ɛ̀ndɛ, è rzì ɛ̀ndɛnɛ tɔ̀ ekpa ya wòlì, tɔ̀ lì hvɛhvɛ lìkpà nà hwètàmbì. È rzì tɛ̀mɛ̀ ò njìya ò lì kɔ̀mɔ̀ mòtò. 5È kpèèlì tɛ tɔ̀ ima ndawò, inyɔ e kɔ̀mè nanù ema, ‘Ɛ̀yɔ̀lɛ̀ e hwɛ nà inyɔ.’ 6È hwèlì tɛ ema, ò hwèlì mòtò wà ɛ̀yɔ̀lɛ̀ ò èŋge ndawò, èŋge ɛ̀yɔ̀lɛ̀ e hwɛ nà mɔ̀. O rzà ènje hvɛ tɛ tɔ̀ mòtò, èŋge ɛ̀yɔ̀lɛ̀ ye è tìmbeyà. 7Ndawò tɛ e kpèèlì, è lìyà aŋga. È rzì ànjiya aŋga. È lèè, e nyò tɔ̀ mamɛ ema hwa e ŋgbèlì, èhwanja è mògbèèlì à àŋgàmɛ̀nɛ̀yi lì lùwà mòrzàhwèlì mò eni. Inyɔ è rzà awa ndawò tɛ e kpèeyà. 8Tɔ̀ ima mbòwà ema e kpèelì, rzi hwe karzɛ̀, e le tɔ̀ ima mòlelì ema hwe è ŋgbelì. 9È wɔ̀wìrzɛ̀ hwà-òkèlì. È hwa òhweyà hvɛ nanù ema, ‘Lìkànèyà là ama Lohwɛ̀ lì ma è kòmbɛ̀nɛ̀.’ 10Ndi è mbòwà è rza è kàrzɛ̀ tɛ, ya ɛ̀ndɛ ò màhvani ma njìyà mà arzɛ e òhwe nanù ema, 11‘Tɔ̀ irzɔ̀hwɛ̀ ja anyu ema jò ò hwèlì ò rze yà màtàŋgà ma arzu, ì ma è hvùhvùhweyà è jɔ. Ndi e hwiyè ema lìkànèyà là ama Lohwɛ̀ lì ma è kòmbɛ̀nɛ̀.’ 12Nà è òhweyà ndi e jɔ̀kɛ̀ nanù ema, ò wùnyà wò hwèkàyìrzèlèlì, Lohwɛ̀ à ò uŋmɛ̀lɛ̀ ììlì ò hwatò hwa Rzòdòmì lì aka inyɔ.
Imbowà ema ì rzà lòkɛ̀ Lohwɛ̀
(Mat 11.20-24)
13“Lìkunde lì ndɛnɛ̀ lì hwèlì lì e àmbɛ̀lɛ̀, inyɔ hwatò wa Kòràrzinì! Lìkunde lì ndɛnɛ̀ hvɛ nà hwatò hwa Bɛ̀trzàyìdà! Mànyakà ema Lohwɛ̀ a mà gbèye ò mbòwà yà anyu, ma mà gbèyɛnɛ tɛ ndì ò mbòwà yà Tàyi nà Rzidònì, hwaŋga hwatò ema hwà mà liya ò rze rzìi hwa wɔtɔ̀ màatù ma màyɛ̀ɛhwɛ̀, hwa akòmɛ hvɛ lìwù ò nyò ja awù ò lì uŋmɛ̀lɛ̀ nanù ema hwa mà ayèŋgòwɛ̀ ò wòhwe wò awu. 14O wùnyà wò hwèkàyìrzèlèlì, ɛ̀kɔ̀kìrzɛ̀ ema hwatò hwa Tàyi nà Rzidònì hwa ò lùwà e hwɛ̀nɛ̀ rzìhwɛ lì akà è hwe anyu. 15Inyɔ hvɛ hwatò hwa Kàpɛ̀nàwɔ̀mì, è ɔ̀ŋgɛ̀lɛ̀ nanù ema,
e ma uka ò ŋmanyu ya Lohwà,
ndi è hwɛnì lì rzìhwirzɛhwɛ ò tenì yà mùnya.”
16Yerzù rzìi a òhweyà Hwà-òkòwèlì hwa eni nanù ema, “Tɔ̀ ì ma mòtò ema à è hweyàni, ò ma ìmba ndi à hweyànì. Tɔ̀ njɛnɛ hvɛ ema à è rzɔ̀rzì, ò ma ìmba ndi à rzɔ̀rzi. Tɔ̀ ima mɔ̀ hvɛ ema à nò rzɔ̀rzi, ò ma à rzɔ̀rzi ndi òŋgò ema à nò òmi.”
Menì lìrzàmba me Hwà-òkòwèlì nà hwàhwàkɛ̀ hwa mà tìmba
17Mènì Lìrzàmba me hwà-òkòwèlì nà hwàhwàkɛ̀ ema Yerzù a mà òme hwa mà mò tìmbeya. Hwa mà mò òhweyà nà mɔ̀nyɛ̀ŋgì nanù ema, “Rzàŋgò e! Tɔ̀ hwèlìŋgɛ̀ hwe wòhwe hwe mà jò arzìrzɛ̀ nà òmà imà tuhwe lìinà la aŋgɔ̀.”
18Yerzù rzìi a hwa òhweyà nanù ema, “Nà mà ɛ̀nɛ nà òmà Mòkarzɛ̀ a mà unde nàa lìŋmɛ̀tì-ŋmɛ̀tì ò ŋmanyu yà Lohwà. 19È hwiyè ema! Nà è ŋgbelì è wònjà ò lì làalàna maàhwa, nà mawòhwɛ̀ ma mèhvèndò nà lì akà ì ŋginyà ja amà Mòkarzɛ̀ ja arzɛ e rzì hwɛ lì hwènà. 20Ndi tɔ̀ nanù e rzì kèka lì òkà mɔ̀nyɛ̀ŋgì èhwanja hwèlìŋgɛ̀ hwe wòhwe hwe è hweyànà ndì e òkè mɔ̀nyɛ̀ŋgì ema mìinà ma anyu ma tìlahwì ò ŋmanyu ya Lohwà.”
Yerzù à mà lìŋgà
(Mat 11.25-27; 13.16-17)
21O èŋge hvònda, Èlìŋgɛ̀ yà Wòtani e mà lìŋgìrzɛ Yerzù rzayì-rzayì, rzìi a òhwa nanù ema, “Ìi Tatɛ̀, Rzàŋgò wà ŋmanyu yà lohwà nà è rze yà mɔ̀nyɛ̀, nà ò ekì ehwànja ò ùŋmɛlɛ jùma hwanà hweyà ema ò mà wunane hwàŋgà ema hwa òhvi mahwiye nà hwaŋga hwatò ema hwa rzɔ̀ŋgìtɛ̀nɛ̀. Ɛ̀ɛ Ìi Tatɛ̀, nanù ndi ò mà àrze òma è gbeyɛ̀nɛ̀.” 22“Tatɛ̀ wà ami a nò ŋgbelì hweyà hwe arzɛ ò màa mà ami. Tɔ̀ mòtò à rza hwi njɛnɛ è ŋmanà à hweli lì aka tɛ Lohwɛ̀ e Tatɛ̀. O rza enje hvɛ tɔ̀ mòtò ema a hwi njɛnɛ e Tatɛ̀ yɔ hvɛ e hwèlì lì aka tɛ e ŋmanà na tɔ̀ ima mòtò ema e ŋmanà a ò lìŋgànɛ ò lì mò uŋmɛ̀lɛ̀.”
23Yerzù à mà ayèŋgòwɛ̀lɛ̀lɛ̀ hwà-òkòwèlì hwa eni, nàa wùndɛ̀ rzìi a hwa òhweyà nanù ema, “Mònàmɛ̀ nà hwaŋga hwatò ema hwa ɛnɛ̀yi mamɛ inyɔ hvɛ ya ɛnì! 24Nà è òhweyà nà è jɔ̀kɛ̀ nanù ema, rzayì-rzayì ja hwà-òkòwèlì hwa hwèlìŋgɛ̀, nà ìkiŋgɛ̀, hwa mà hwɛnɛ e nyɔ̀ŋgi ò lì ɛnɛ̀ hwenè hweyà ema inyɔ e ɛnì, nà ò lì hwèya hwenè hweyà hwe àrzɛ ema inyɔ e hweyi, ndi wɔ̀ hwa rzi ɛnɛ ndèŋgàna hwa rzi hweye.”
Ŋmàna mò è mòtò wà Rzàmarìyà à ma òhva ŋmèma mò ììlì
25Mòòkòlèlì mɔ̀kɔ wà mbenda à mà ɛ̀ndeya Yerzù ò lì mò kèkìrzɛ̀, rzìi a mò ijòwa nanù ema, “Ìi Mòòkòlèlì, mamɛ na tànɛyi lì gbeyà ò lì lùwa lòŋgɛ la gbìndèyà e?” 26Yerzù rzìi a mò alàhwɛ̀ nanù ema, “Nɛ e tìlahwì ò kààtì yà mbenda, mamɛ ò làŋgì ò tenì e?” 27Òŋgò mòòkòlèlì wà mbenda rzìi a mò alàhwɛ̀ nanù ema, “Ò àŋgàmɛ̀nɛ̀yi lì lìŋgàna e Rzàŋgò Lòohwà la aŋgɔ̀ nà ŋmèma mò aŋgɔ̀ mò àrzɛ, nà èlìŋgɛ̀ ya aŋgɔ̀ ya àrzɛ̀, nà è ŋginyà yà aŋgɔ̀ ya àrzɛ, nà lìlòkɛ̀ la aŋgɔ̀ la àrzɛ. Rzìi ò lìŋgàne hvɛ̀ ŋmànyàŋgò wa aŋgɔ̀ nà òmà ò alìŋgànɛ ò wa hwìti.” 28Yerzù rzìi a mò alàhwɛ̀ nanù ema, “Ò alàhwɛ̀ gbamù. O gbèyi tɛ nanù ò lùwà lòŋgɛ la mòtɛ.” 29Ndi òŋgò mòòkòlèlì wà mbenda à mà àrza lì arzùŋgɛ̀, rzìi a ijòwa nanù ema, “Njɛnɛ à hwèlì ŋmanyàŋgò wa ami e?” 30Yerzù rzìi a mò alàhwɛ̀ nà ŋmàna nanù ema, “O mà hwɛ mùnyanà mɔ̀kɔ hwà Irzàyɛ̀lì ema à ma uhwɛlɛlɛ ò Jèrurzalɛ̀mù, rzìi à mà hwɛ lì ɔ̀ndɔ̀ ò Jèrìkò. Nà òmà à mà hwɛ ò yɔ̀ndɔ̀ ya eni rzìi, hwèkɛ̀nɛ̀ŋgɛ̀ hwe mò lɛ̀mbɛ, hwe mò wòwàna hwèèmà hweni hwe àrzɛ ema à mà òhve. Hwa mò agba lìwòrzì natɛ̀ɛ a hvɛ lì ŋwa. Aŋgà ndi hwa mà mò rzɔ̀njɛlɛ, ò tòŋgòŋgò yà njìya. 31Pìlìrzì hvɔ̀kɔ yɔ hvɛ è mà ɔ̀ndeyà èŋge njìya mɛnɛ, rzìi e ùŋma òŋgò mùnyanà, a akeyà ehvɛhvɛ èhvàrzù ya njiya, a ɛ̀ndɛ e ya eni. 32Mòtò mɔ̀kɔ wà lìtumba la ama Lɛ̀hvì è mògbèèlì wà è Ndawò yà Lohwà, mɔ̀ hvɛ à mà jà rzì a ɛnɛ ònò mòtò, mɔ̀ hvɛ à mà akeyà ehvɛhvɛ èhvàrzù ya njiya, a ɛ̀ndɛ è ya eni. 33Mòtò mɔ̀kɔ wà Rzàmarìyà mɔ̀ hvɛ rzìi a akeyà èŋge njìya (Hwatò hwa Rzàmarìyà nà hwatò hwa Irzàyɛ̀lì hwa rza ahweyànɛlɛ). À mà ùkè aŋga, rzi a ɛ̀nɛ òŋgò mòtò, à mà jeja, rzìi a mò òkeya ììlì. 34À mà ɛ̀ndɛ lì ùŋmanɛlɛ òŋgò mòtò. Rzìi à mò ika màyi ò hwèhwènà hwe eni, à hwe kaka. À mà mò àgbɛlɛ ò jàkarzì ja eni, rzìi à mò ɛ̀ndɛnɛ ò ndawò yà hwàyɛ̀ni. Rzìi à mò àŋgòhweyà aŋgà. 35O ekà ya elele à mà wòwa hwekòlì hweta rzìi a hwe ŋgba è mòhwɛnɛ wà ndawò rzi a mò òhweyà nanù ema, ‘Wòwa nanù, ò nò ɔŋgeya ò nò mòtò. Tɔ̀ mamɛ ya arzɛ e ma ò hvaŋgà, ò nò òhweyà nà ò taŋgeyà è yɔ, ò hwètìmbelì hwe amì.’” 36Yerzù rzìi a ijòwa è mòòkòlèlì wà mbenda nanù ema, “O hwanù hwatò hwaayɛ̀, njɛnɛ à ma ùŋmanɛlɛ òŋgò mòtò ema hwekɛ̀nɛ̀ŋgɛ̀ hwe mà ànane, njɛnɛ ò lutelì ema à hwèlì nàa mbunda yà ama ònò mòtò e?” 37Òŋgò mòòkòlèlì wà mbenda rzìi a mò alàhwɛ̀ nanù ema, “Òŋgò ema à mà mò òkeya ììlì.” Yerzù rzìi a mò kòkòwɛ̀lɛ̀ nanù ema, “Ò wà hvɛ ɛ̀ndɛ, ò gbèyè nanù mɛnɛ.”
Màta nà Màlìyɛ̀ hwa mà lùwa Yerzù nàa è ŋmɛ̀ni hwà àwu
38Yerzù nà hwà-òkòwèlì hwa eni hwa mà hwɛ ò yɔ̀ndɔ̀, rzìi hwa uka mbòwà hvɔ̀kɔ. Mòlanà mɔ̀kɔ ema à ma hwɛ̀lɛ̀hwɛ̀ Màta, à mà mò kpɛɛlɛ nàa ŋmɛ̀ni ò ndawò yà èni. 39Màta à mà hwɛnɛ ŋmanyàŋgò wà èni mɔ̀kɔ ema à ma hwɛ̀lɛ̀hwɛ̀ Màlìyɛ̀. Màlìyɛ̀ rzìi a lìiya Yerzù ò tòŋgòŋgò yà èni lì òkànèyà hwèyòkòlèlì hwe eni. 40Màta à mà arzarzòwɛ èhwanja mɔ̀ ŋmìti ndi à mà hwɛ lì gbeyà èwòlò ya ndawò. Màta rzìi a ɛ̀ndɛ lì ùŋmanɛlɛ Yerzù, rzi a mò òhweyà nanù ema, “Ìi Rzàŋgò, ɔ̀ŋgɔ tɛ nà òmà ŋmanyàŋgò wà amì à nò kìnyɛlɛlɛ èwòlò ya ndawò ya àrzɛ̀? O mò òhweyà ema a jè a nò òŋgòwane.” 41Yerzù rzìi a mò alàhwɛ̀ nanù ema, “Ìì Màta, ìi Màta, mamɛ ò akayìrzɛ̀lɛ̀lɛ nà lì atàkìrzɛ̀ lì teŋgɛ̀nɛ̀ hweyà rzayì-rzayì e? 42Nà ò òhweyà ema eyà yɔ̀kɔ mɛnɛ yɔ ndi ya arzàhwa. Màlìyɛ̀ ndi à e hvɔ̀rzì, ema tɔ̀ mòtò à rza tanɛ lì mò wòwànà.”
Currently Selected:
Lukàrzɛ̀ 10: bri
Highlight
Share
Copy
Want to have your highlights saved across all your devices? Sign up or sign in
© 2022, CABTAL
