Makòrzì 14

È wùndɛ yà lì òŋwà Yerzù

(Mat 26.1-5; Luk 22.1-2; Yòw 11.45-53)

1Ò mà tɛɛnɛ mèenyà mehwàkɛ ò hvònda yà lì Akà Ɔnɛ̀yi nà ò e Ndèma yà Èhvòòtò ema è rza òhvɛ Èhwindi ò lì uka. Ipìlìrzì ndɛnɛ nà Hwà-òkòlèlì hwa mbenda hwa mà hwɛ lì arza ŋmànò mò lì ŋgbaŋgɛ Yerzù ò jùtuta ò lì mò òŋwà. 2Ndi hwa mà òhwa nanù ema, “Ì rza gbeyà nanù ò wùnyà wò ndemà èhwanja hwatò hwa jànà kayɛ.”

Yerzù a Ɔ̀kirzɛ̀hwɛ̀yi ò Bɛ̀tanì

(Mat 26.6-13; Yòw 12.1-8)

3Nà òmà Yerzù à mà hwɛ ò Bɛ̀tanì ò ndawò yà ama Rzìmɔ̀nì, ema à mà òka è nyàmbɛ yà mɔ̀lɔ̀ŋgɔ. Nà òmà Yerzù à mà hwɛ lì làa mòlanà mɔ̀kɔ rzìi à jànà kòhwà yà lìyɔ̀kì là hvɛ̀ɛ̀hvɛ̀, lìyɔ̀kì ema lì òhvi wòlì rzayì-rzayì. Liŋgi lìyɔ̀kì lì mà gbeyàhwɛnɛ ndì nà nàadì. À mà gba mòòhvò mò èŋge kòhwà rzìi à kòmeyà Yerzù lìŋgi lìyɔ̀kì ò mòhvò mò eni. 4Lòŋgò là hwatò ema hwa mà hwɛ aŋga, hwa mà tàta rzayì-rzayì rzìi hwa à ijòwanɛ mɔ̀kɔ nà ɔ̀nɛyi nanù ema, “Mamɛ è gbèyi ndèŋgàtɛ̀ ò nò mòlanà à hvàŋgi ene tumba yà lìyɔ̀kì nanù e? 5Ò mà lìni lìyɔ̀ki lì àhwirzɛ̀hwɛ̀ wòlì rzayì-rzayì rzìi wòŋgò wòlì wò ŋgbààhwà mèlìrza mè hwatò.” Hwa mà kànja òŋgò mòlanà karzò-karzò. 6Yerzù rzìi à hwa òhweyà nanù ema, “È mò hwɛ̀mɛ mamɛ è mò tàkirzɛnɛ à nò gbèèlì ndi eyà yà gbamù. 7Mèlìrza mè hwatò mè hwèlì nà inyɔ ì hvònda jà arzɛ è tànɛyi lì wò òŋgòwàna tɔ̀ ima hvònda ndi ìmba nà rza hwɛ nà inyɔ ihvònda jà arzɛ. 8À gbèyi è yɔ yà eni ema à tànɛ̀yi. À nò kòmi lìni lìyɔ̀ki là hvɛ̀ɛ̀hvɛ̀ ò nyò yà ami ò lì wòŋgìrzɛ̀nɛ̀ lì imàhwɛlɛ là ami ndèŋgàna è hvònda. 9Nà è òhweyà nà è jɔ̀kɛ̀ nanù ema, tɔ̀ ima èki ema Ŋmɛ̀ndì mò Gbamù mò òhwahwa ò ene rze yà arzɛ, hwa òhwa eyà ema ònò mòlanà à gbèyi ò lì mò ɔ̀ŋgɛlɛnɛ.”

Jùdàrzì à emelì ò lì àhwirzɛ̀ Yerzù

(Mat 26.14-16; Luk 22.3-6)

10Jùdàrzì Ìrzìkalìyɔ̀tɛ̀ mɔ̀kɔ wa lìyòmɛ̀ la hwà-òkòwèlì nà hwahwàkɛ hwa ama Yerzù, à mà ɛ̀ndɛ lì ùŋmanɛlɛ Ipìlìrzì ndɛnɛ ò lì hwa àhwirzɛ̀lɛ̀lɛ̀ Yerzù. 11Ipìlìrzì ndɛnɛ ì ma lìŋga ò lì hweyà nanù rzìi hwa kàkɛ̀nɛ ò lì mò ŋgba kahvà. À mà wòteya rzɔ lì arza nɛ a lùweya ehvòlò ò lì hwa ŋgba è mɔ̀.

Yerzù na Hwà-òkòwèlì hwa eni hwa laa mòlelì mò e Ndema ya lì aka Ɔnɛyi

(Mat 26.17-25; Luk 22.7-14,21-23; Yòw 13.21-30)

12O wùùnya wò wòrzò wò e Ndèma ya Èhvòòtò ema è rza hwɛnɛyì ehwindi èma wò òhwa ema hwa òŋwè è ŋguma ya mɔ̀lɛ̀ŋgù ò lì rzèkeya mòlelì mò hwèlèèlì mò lì aka ɔnɛ̀yi. Hwà-òkòwèlì hwa ama Yerzù rzìi hwa mò ijòwa nanù ema, “One ò arza nanù ema ì rzèkeya hwelèelì hwe lì aka ɔnɛ̀yi e?” 13Àŋga ndi à òhweyà Hwà-òkòwèlì hwe eni hwaàwakɛ àma, “È ɛ̀ndɛ ɔnɛ̀yi mbòwà mòtò ema a hwanɛ̀yi lìŋgàki la malìhwa à è ùŋmànɛ̀lɛ̀ è mò òŋgame.” 14È uki tɛ e òhweyà e mò hwɛnɛ wa ndawò ema mɔ̀ à kpèeyà nanù ema, “È Mòòkòlèlì àma òne ilùkù ja hwàyɛ̀nì aŋga ndi mɔ̀ à leeyà mòlelì mò e ndèma ya lì Akà Ɔnɛ̀yi na hwà-òkòwèlì hwa eni. 15À è uŋmɛ̀lɛ̀ ìlùkù ndɛnɛ ja ŋmanyu ya ndawò ema irzeyahwɛlɛ è gbeyà hwe lòŋgirzani aŋga.” 16Hwà-òkòwèlì hwa eni hwà mà ɛ̀ndɛ rzìi hwa ɛ̀ndɛ ò mbòwà hwa ùŋma nanù nà òma a mà òhwe. Àŋga ndi hwaa gbeyà hwelòŋgirzani hwe hweleelì hwe e Ndèma ya lì Akà Ɔnɛ̀yi. 17Nà òmà ehwànà mòkò e ma ùke Yerzù rzìi a ɛ̀ndɛ aŋga nà lìyòmɛ̀ la Hwà-òkòwèlì na hwàhwàkɛ̀. 18Nà òmà hwà mà hwɛ lì làa ò tehwèlì, Yerzù rzìi a hwa òhweyà nanù ema, “Nà e òhweyà na e jɔ̀kɛ̀ nanù ema, mɔ̀kɔ wa anyu ema a làa anù nà ìmba a hwɛnì lì nò akɛlɛ ò maà ma hwàkɔ̀yèlì.” 19Ène eyà e mà tùulɛ̀ mèèmà me hwà-òkòwèlì hwa eni rzìi hwa wòteya lì mò ijòwa mɔ̀kɔ ò mburzà ɔnɛyi, nanù ema, “Nà hwi ema rzèketɛ imba ò.” 20Yerzù rzìi à hwa alàhwɛ̀ nanù ema, “Mɔ̀kɔ wà anyu wà lìyòmɛ̀ là Hwà-òkòwèlì nà hwahwàkɛ ema à ò tɔ̀tɔ̀ ehvòòtò yà eni ò mɔ̀njɔ nà imba. 21È Ŋmanà wà è Mòtò wà Hwènàmà à ŋwa nà òmà è tìlahwì lì mò hvòmɛ̀nɛ̀. Ndi èwòma nà òŋgò mòtò ema à ò àhwirzɛ̀ è Ŋmanà wà è Mòtò wà Hwènàmà. È mà hwɛ gbamù nanù ema, òŋgò mòtò à rzìi ŋyahwe.”

Lì làa là Rzàŋgò

(Mat 26.26-30; Luk 22.14-20; 1Kɔ̀ 11.23-25)

22Nà òmà Yerzù na hwà-òkòwèlì hwa eni hwà mà hwɛ lì làa Yerzù rzìi a wòwà ehvòòtò, a ŋgba Lohwɛ̀ jeka, à è kahwa à è ŋgba hwà-òkòwèlì hwa eni rzìi a òhwa nanù ema, “È wòwè e nyò ya ami ene.” 23Rzìi à wòwà hvɛ lìwònde, à ŋgbà Lohwɛ̀ jèka rzìi à è hwa tɛ̀tìrzɛ̀ è lɔ̀ rzìi wɔ̀ hwa arzɛ hwa è nyɔ. 24Yerzù rzìi à hwa òhweyà nanù ema, “Màyìjà mà ami manù ema mà kòmèlì ò mèyòhvò mè rzayì-rzayì jà hwatò. Manù màyija mà hwèlì ndi màyija mà hweyi hvènya. 25Nà è òhweyà è jɔ̀kɛ̀, na rzà ò nyɔ manù mimbà hvɛ, natɛ̀ɛ nà ò ma nyɔ hvɛ ma hvènya ò Lìkànèyà là ama Lohwɛ̀.” 26Hwa mà kulɛ lì emba mɔ̀rzɔ̀kɔ̀ mò lì eka rzìi hwa ɛ̀ndɛ ɔ̀nɛyi mòòlì mò Njàhwɛ̀.

Yerzù à mà òhwa nɛ Pètrò a ò mò rzɔrzɔ̀

(Mat 26.31-35; Luk 22.31-34; Yòw 13.36-38)

27Yerzù rzìi a òhweyà hwà-òkòwèlì hwa eni nanù ema, “Inyɔ hwa arzɛ e ò kùwa lì hwaŋga lì nò rzɔ̀njɛlɛ. Èhwanja e tìlahwì ò Kaàti ya ama Lohwɛ̀ nanù ema,

‘Nà òŋwà è mɔ̀ɔŋgelì hwa mɛ̀lɛ̀ŋgù,

rzìi mɛ̀ɛlɛ̀ŋgù me kùwa lì wùweya.’”

28Yerzù rzìi a òhwa hvɛ nanù ema, “Ndi Lohwɛ̀ à mà nò hvùmùlɛ tɛ nà ò hvùŋgànà ò wòrzò wò anyu ò Galìlì aŋga ndi e nà ùŋmanɛlɛ.” 29Pètrò rzìi à òhwa nanù ema, “Tɔ̀ è hwɛ ndi ema hwatò hwa arzɛ hwa hwaŋga lì ò lìya imba nà rza ò lìya.” 30Yerzù rzìi à mò òhweyà nanù ema, “Nà ò òhweyà è jɔ̀kɛ̀, nanù ema ò wònò wùù mɛnɛ ndèŋgana è mòmɛ̀ wà wuhwà à è, tòŋga ŋgèlì ihwàkɛ ò nò rzɔ̀rzɔ̀ ŋgèlì Iyàwò.” 31Pètrò rzìi à tìnɛ̀lɛ̀ nà ŋginyà nanù ema, “Tɔ̀ è hwɛ nanù ema nà hwɛnì lì ŋwa nà rza tànɛyi lì ò rzɔ̀rzɔ̀.” Hwanɛ̀yi wɔ̀ hvɛ hwa òhwa nanù mɛnɛ.

Lì kanɛ̀ là ama Yerzù ò Gɛ̀trzɛ̀mànì

(Mat 26.36-46; Luk 22.39-46)

32Yerzù nà hwà-òkòwèlì hwa eni hwa mà ɛ̀ndɛ èki ema è hwɛ̀lɛ̀hwɛ̀ Gɛtrzɛmani. Nà òmà hwa mà ùke aŋga, Yerzù rzìi à òhweyà hwà-òkòwèlì hwa eni nanù ema, “È lìyà anù nà ɛ̀ndɛ lì kanɛ̀.” 33À mà wòwa Pètrò, Jèmìrzì nà Yòwanìrzɛ̀ ò lì ɛ̀ndɛ lì kànɛ̀. À mà hwɛnɛ ndùtù nà mòtàkà ò ŋmèma mò eni. 34Rzìi à hwa òhweyà nanù ema, “È ndùtù ema è hwèlì ò ŋmèma mò ami è tànɛyi lì nò òŋwa. È lììyà anù è lìyà èhvɛ̀nyɛ nà imba.” 35À mà tòmbeya ŋmanà hvòkà lìtaŋga à ahvimbɛ ò rze lì kanɛ̀ nanù ema, è hwèlì tɛ ema ò tànɛ̀yi lì nò tìndeya ene hvònda yà mòtàkà ema è rzi nà ɔ̀lɛ̀ ò è tìnde. 36Yerzù rzìi à òhwa nanù ema, “Ìi Tàà, Tatà ò tànɛyi lì gbeyà tɔ̀ mamɛ ema ò arza lì gbeyà. Ò nò wòwanè menè mètàkà. Ndi rzeketɛ nà òmà nà àrza ndi nà òma ò arza.” 37À mà kulɛ̀ lì kanɛ̀ rzìi à timbeyà hwà-òkòwèlì hwa eni hwààyɛ̀ à ùŋma hwa nàŋgayi. Rzìi à òhweyà Pètrò nànù ema, “Ò lìmelì ndi ò ìjɔ, ò rza tanɛ lì lìya èhvɛnyɛ nà imba tɔ̀ awà hvɔ̀kɔ e? 38È lìyà èhvɛnyɛ ò màkanɛ̀ aŋga nanù Lohwɛ̀ à rza emeyà nanù ema màkèkìrzɛnɛ̀ mà è jèeyà. Ŋmèma mò lìŋgàni lì gbeyà ndi è nyàmà nyò è òka wɔ̀ŋgɔ̀.” 39À ma tìmba hvɛ lì kanɛ̀ nà òmà a mà lòmè lì kanɛ̀. 40A mà tìmba hvɛ lì hwa ùŋma ò ìjɔ èhwanjà mìirzɔ̀ ma awu ma mà lɔ̀mbɔ̀meya. Hwa rzi hwìyè mamɛ hwa mà tànɛyi lì mò òhweyà. 41A mà tìmba hvɛ e ŋgèlì ema è ma ùkirzɛ̀ iyàwò, à mà hwa òhweyà nanù ema, “È lìmelì ndi ò ìjɔ nà lì arzìyòlɛ̀ e? È hwɛmɛ nanù! È hvònda e ma ukà, e ɔŋgɔ̀ tɛ è Ŋmanà wà è Mòtò wà Hwènàmà à ò ŋgbààhwà ò màà mà hwatò hwa wòhwe. 42È tɛ̀mɛ̀ je ɛ̀ndɛ. È ɔ̀ŋgɔ e mòtò ema à ma nò àhwirzɛ̀ mòŋgò à jà.”

Hwà mà ŋgbaŋgɛ Yerzù

(Mat 26.47-56; Luk 22.47-53; Yòw 18.3-12)

43Nà òmà Yerzù à mà hwɛ lì òhwa, Jùdàrzì rzìi à jà. Jùdàrzì ema à ma hwɛ mɔ̀kɔ wà lìyòmɛ̀ là hwà-òkòwèlì nà hwahwàkɛ hwa ama Yerzù. À mà jànà è ŋgìndì. Hwàŋga hwatò hwà mà akpatɛ nà irzɔ̀lɔ̀ rzìi hwa òhva hvɛ imbèhva. Ène ŋgìndì è mà òmahwa ndi nà Ipìlìrzì ndɛnɛ nà hwà-òkòlèlì hwa mbenda nà hwàmbaki hwa èkòmè yà Irzàyɛ̀lì. 44È ŋmàhwìrzèlelì hwa ama Yerzù à mà hwɛ à mà lòma lì hwa ŋgba èèmbànelì nanù ema, “Tɔ̀ ima mòtò ema nà arzàŋgànɛ̀lɛ̀ òma è mòtò òŋgò ema e àrza. È mò ŋgbaŋgɛ e mò lɛ̀mbɛ na ŋgbaŋgò e mò ɛ̀ndɛnɛ.” 45Lìwòkìmɛnɛ à mà ɛ̀ndeya Yerzù rzìi a mò òhwàna nanù ema, “Ìi Mòòkòlèlì.” Rzìi à mò arzàŋgànɛ̀lɛ̀. 46Hwàŋga hwatò rzìi hwa ŋgbaŋgɛ Yerzù rzìi hwa mò lɛ̀mbɛ na ŋgbaŋgò. 47Mòtò mɔ̀kɔ ema à mà hwɛ aŋga nà Yerzù rzìi à ɔ̀mɔ è rzɔ̀lɔ̀ yà eni à rzenjòwa lìtò là ama è mòkòmì wà ama è Pìlìrzì è kàrzàmi. 48Yerzù rzìi à hwa ijòwa nanù ema, “Nà hwèlì ndi ŋmìhwɛ̀ ema è jana ìrzɔ̀lɔ nà ìmbèhva ò lì nò lɛ̀mbɛ e? 49Nà mà hwɛ nà inyɔ̀ wùnyà tɛ ò Ndawò yà Lohwà na òkòlɛ̀ hwatò ndi e rzìi nò ŋgbaŋgɛ̀, ndi Eyà ya Lohwà e hwɛnì lì òndìrzɛhwɛ̀.” 50Hwà-òkòwèlì hwa eni hwa arzɛ̀ hwà mà mò rzɔ̀njɛ̀lɛ rzìi hwa hwaŋga. 51O ma hwɛ mbèrza aŋga ema è ma òŋgama Yerzù. A ma wɔtɔ̀ ndi ŋmanà èhvahve ya lìhwatù. Hwàŋga hwatò hwà mà keka ò lì mò lɛ̀mbɛ, 52ndi à mà hwaŋga mòrzòmbò a lìya èŋge ehvahve ya lìhwatù na hwaŋga hwatò.

Hwà mà kàyìrzɛ̀ Yerzù

(Mat 26.57-68; Luk 22.54-55,63-71; Yòw 18.13-14,19-24)

53Hwàŋga hwatò ema hwa mà lɛ̀mbɛ Yerzù, rzìi hwa mò ɛ̀ndɛnɛ ò è Pìlìrzì è kàrzàmi. Ipìlìrzì Ndɛnɛ, hwàmbaki, nà Hwà-òkòlèlì hwa mbenda hwa jà lì arzàŋganɛ. 54Nà òmà hwa mà ɛ̀ndɛ̀nɛ̀ Yerzù, Pètrò mɔ̀ hvɛ à mò nɔ̀ŋgɔ ò ŋmanà hvòkà, natɛ̀ɛ hwa kpèeyà ò èwòka yà ama è Pìlìrzì è kàrzàmi. À mà lìya aŋga nà hwà-ɔ̀ŋgèlì hwa è Ndawò yà Lohwà, rzìi hwa atòwɛ mùùnya. 55Ipìlìrzì ndɛnɛ na Hwakànèlì hwa lìkànèyà la mbòwà hwà mà hwɛ lì arza hwatò ema hwà mà tànɛyi lì tɛ̀mɛ̀ imbòŋgi ja mòlàŋgà lì hvòmɛ̀nɛ̀ Yerzù, aŋga nanù òma hwà mà mò òŋwa. Ndi hwa rzi luwe tɔ̀ mɔ̀kɔ. 56Rzayì-rzayì ja hwatò hwa mà tɛ̀mɛ̀ mbòŋgi ja mòlàŋgà lì mò teŋgɛ̀nɛ̀, ndi wɔ̀ hwa arzɛ hwa rzi hwɛ wàna hvɔ̀kɔ. 57Rzi lòŋgò hwa mò tɛmeya mbòŋgi yà mòlàŋgà nanù ema, 58“Ì mà hwèya à òhwi nanù ema, ‘Nà wùulɛ̀ ène Ndawò yà Lohwà ema yò òŋgahwi na hwatò hwa hwènàmà, rzìi ò mèenyà meyawò nà òŋga ehvɛhvɛ ema e rza òŋgahwɛ na màà mà mòtò wa hwènàmà.’” 59Ndi tɔ̀ nanù, imbòŋgi ja awu ja mòlàŋgà ì rzi hwɛ wàna hvɔ̀kɔ. 60Rzìi e Pìlìrzì e karzami, e tɛ̀mɛ̀ ò wòrzò wò awu rzìi a ijòwa Yerzù, nanù ema, “Ò rza òhvi tɔ̀ eyà ò lì òhwa lì hvòmɛ̀nɛ̀ mamɛ hwanù hwatò hwa òhwa lì ò teŋgɛ̀nɛ̀ e?” 61Ndi Yerzù à mà andama ŋmɛ̀ɛ a rzi ŋgbe tɔ̀ ja alàhwɛ̀. Rzìi èŋge Pìlìrzì è karzami è mò ijòwa hvɛ nanù ema, “O wa ndi ò hwèlì e Mɔ̀ ema à Ɔ̀kirzɛ̀hwɛ̀yi e? È ŋmanà wa Lohwà ema lì ŋgbàahwì èluhwe e?” 62Yerzù rzìi à òhwa nanù ema, “Imba ndi nà hwèlì. Ndì o ò ɛnɛ è Ŋmanà wà è Mòtò wà Hwènàmà a lìyayi ò lìya là mòmɛ̀ lì ama Lohwà lì Karzami. O ò mò ɛnɛ à jà ò lìmbàki ema lì uwɛ̀lɛ̀lɛ̀yi ò ŋmanyu yà Lohwà.” 63È Pìlìrzì è karzami rzi è nyààwà è mbɔti yà eni mɔ̀ ŋmìti ò lì uŋmɛ̀lɛ̀ hwètàtò hwe eni. Rzìi à òhwa nanù ema, “Ima mbòŋgi, ema ja arza hvɛ e?” 64“È mà hweya nà òmà mɔ̀ à hwɛ̀nyɛ̀ Lohwɛ̀. Mamɛ è hwɛnì ò lì òhwa lì mò hvòmɛ̀nɛ̀ e?” 65Hwa arzɛ hwà mà mò akɛ̀lɛ̀lɛ̀ e mbàkò ema a hwɛnì ndi lì ŋwa. Rzìi lòŋgò hwa mà wòteyà lì mò rzɔ̀yeyà hwèyɔ̀lì, hwa mò lìŋga mìirzɔ̀, rzìi hwa wòteyà lì mò tiyà, rzìi hwa mò òhweyà nanù ema, “O jò òhweyà è mòtò ema à ò ti.” Hwà-òŋgèlì hwa e Ndawò yà Lohwà rzìi, hwa mò wòwà, rzìi hwa wòteyà ò lì mò anana.

Pètrò à mà rzɔrzɔ̀ Yerzù

66Nà òmà Pètrò à mà lìya aŋga èwòka, rzìi mògbèèlì mɔ̀kɔ wà ŋgɔ̀ndɔ̀ wa ama è Pìlìrzì è karzami è ja aŋga. 67À mà ɛnɛ Pètrò ndi à atòwɛ mùùnya. Rzìi à mò ɔ̀ŋgɔ kɔ̀yi-kɔ̀yi. Rzìi à òhwa nanù ema, “Ò wà hvɛ ò mà hwɛ nà Yerzù, ema à uhwɛlɛlɛyi ò Nàrzarɛ̀tì.” 68Ndi Pètrò à mà rzɔ̀rzɔ. Rzìi à òhwa nanù ema, “Nà rza hwi tɔ̀ lì rzɔŋgìtɛ̀nɛ̀ mamɛ ema òhwa.” Nà òmà Pètrò à mà òhwe nanù rzìi à ɛ̀ndɛ lì tɛ̀mɛ̀ ò tòŋgòŋgò yà lìyòhva là hwèkpèèlì hwe kɔtɔ̀. Lìwòkìmɛnɛ è mòme wà wuhwà à mà tòŋga. 69Ndi èŋge ŋgɔ̀ndɔ̀ è mà mò ɛnɛ hvɛ aŋga, rzìi à wòteyà lì òhweyà hvɛ hwaŋga hwatò ema hwa mà tɛ̀mɛ̀ aŋga nanù ema, “Ò nò mòtò mɔ̀ hvɛ à hwèlì ndi mɔ̀kɔ ema à mà hwɛ lì nɔ̀ŋgɔ Yerzù.” 70Pètrò rzìi à rzɔ̀rzɔ̀ hvɛ. Ndi ò mburzà ŋmanà hvòka hvònda, è wɔ̀ ema hwa mà tɛ̀mɛ̀ aŋga, hwa mà òhweyà Pètrò nànù ema, “È hwèlì ndi è jɔ̀kɛ̀. Ò hwèlì ndi mɔ̀kɔ ema à nɔ̀ŋgɔ Yerzù èhwanja, ò uwɛ̀lɛ̀lɛ̀yi ndi ò Galìlì.” 71Rzi Pètrò à wòteyà lì ajèmɛ mɔ̀ ŋmìti, nà lì ààtɛ̀ nanù ema, “Nà rza hwi ònò mòtò ema è òhwa lì hvòmɛ̀nɛ̀.” 72Lìwòkìmɛnɛ è mòmɛ̀ wà wuhwa à tòŋga è ŋgèlì ema è mà ùkirzɛ̀ ihwàkɛ. Rzìi Pètrò à ɔ̀ŋgɛ̀lɛ̀ è mbɔrzi Yerzù à mà mò òhweyà nanù ema, “Ndèŋgana è mòme wà wuhwa à è tòŋga ŋgèlì ihwàkɛ, o ò nò rzɔ̀rzɔ̀ ŋgèlì iyàwò.” Rzìi Pètrò à wùmɛ̀nɛ̀ lùwa à wòteya lì eyaa.

Currently Selected:

Makòrzì 14: bri

Highlight

Copy