Makòrzì 15

Pìlatò à mà Kàyìrzɛ Yerzù

1O ekpaarzɛ ya wùnyà, Ipìlìrzì ndɛ̀nɛ, hwàmbaki hwa Irzàyɛ̀lì, hwà-òkòlèlì hwa mbenda nà hwatò hwa ndawò yà hwèkàyìrzèlì hwe kàrzàmì hwa mà hwɛnɛ hwèlìyelì. Hwà mà kaka Yerzù, hwa mò ɛ̀ndɛnɛ, rzìi hwa mò akɛlɛlɛ Pìlatò. 2Pìlatò rzìi à mò ijòwa nanù ema, “Ò wà ndi ò hwèlì è kiŋgɛ̀ yà hwatò hwa Yudà e?” Yerzù rzìi à mò tìmbìrzɛ̀lɛ̀lɛ̀ nanù ema, “Nà òma òhwi.” 3Ipìlìrzì ndɛnɛ ì mà mò gbeyà mènìtò. 4Pìlatò rzìi à mò ijòwa hvɛ nanù ema, “Ò rza hwɛnì eyà yà lì òhwa e? Ò wà hwìti òkànèyà hwenè hweyà hwe àrzɛ ema hwa ò rzamba.” 5Ndi Yerzù à rzìi tìmbìrzɛ̀lɛ̀ tɔ̀ eyà. Ènè eyà è mà tàmìrzɛ̀ Pìlatò.

Yerzù à òmàhwi ò lì òŋwahwa

6È mà hwɛ ndi nàa ɛ̀ɛ̀mɛ̀ ò Ndèma yà awu Yà lì Akà Ɔnɛyi, Pìlatò à mà yɔ̀kɔ lì hwa rzòlòhweyà mòtò wà hwèwòwà mɔ̀kɔ nà òma hwatò hwa mà arze, ò èŋge hvònda. 7Ò èŋge hvònda, mòtò mɔ̀kɔ ema à mà hwɛ̀lɛ̀hwɛ̀ Bàrabàrzì, à mà hwɛ ò hwèwòwà. À mà hwɛ ò hwèwòwà nà hwahvɛhvɛ hwatò ema hwà mà hvùŋguhwa lìkànèyà là Ròmànì. 8È ŋgìndì yà hwatò è mà jà lì òhweyà Pìlatò ema à hwa gbèeyà nà òmà a mà yɔ̀kɔ lì hwa gbèeyà. 9Pìlatò rzìi a hwa ijòwa nanù ema, “È àrzà ema nà è rzòlòhweyà è kiŋgɛ̀ yà wònyà Yudà e?” 10À mà hwiya àma Ipìlìrzì ndɛnɛ ì ma nòneyà Yerzù ɔ̀ndeŋgàtɛ̀ à mà hwa ijòwa mene mììjòwèlì. 11Ndi Ipìlìrzì ndɛnɛ̀ ì mà hwɛ ndi lì umbɛlɛlɛ èŋge ŋgìndì lì òhweyà Pìlatò nanù ema a hwa ulɛlɛ ndi Bàrabàrzì ò hwèwòwà. 12Pìlatò rzìi a hwa ijòwa hvɛ nanù ema, “Mamɛ e arza ema na gbeyànè e mɔ̀ ema inyɔ e hwɛlɛ e kiŋgɛ̀ yà wònyà Yudà e?” 13Rzìi hwa tɛ ò ŋmanyu nanù ema, “O mò wòmeya ò mbarza!” 14Pìlatò rzìi a hwa ijòwa nanù ema, “Mamɛ ndèŋgàtɛ̀ e? Ima eyà ya wòhwe a gbèyi e?” Ndi hwa mà làmbòwà ndi ò ŋmanyu nanù ema, “O mò wòmeya ò mbarza!” 15Nà òmà Pìlatò, a mà àrze lì ujìrzɛ̀ hwaŋga hwatò à hwa rzòlòhweyà Bàrabàrzì. À mà ŋgba hwaànèlì hwa njùma è wònjà ema hwa gbiyɛ̀ Yerzù rzìi hwa mò wòmeya ò mbarza.

Hwaànèlì hwa njùma hwà mà kùwa Yerzù

16Hwaànelì hwa njùma rzìi hwa tìmba Yerzù lì mò ɛ̀ndɛnɛ ò èwòka yà ama è mòkanelì rzìi hwa rzaŋga hwahvɛhvɛ hwaànèlì hwa njùma aŋga. 17Hwa mà mò wɔ̀tìrzɛ̀ mòŋgòmbè mò teyàa ema mò mà ayèkɛnɛ̀ mòŋgòmbè mò kìŋgɛ̀. Rzìi hwa òŋgà èkòòtò yà kìŋgɛ̀, hwa mò wɔ̀tìrzɛ̀ è yɔ̀ ò mòhvò mò eni. 18Rzìi hwa wòteya lì mò kùwa nà lì mò kɔmɔ nanù ema, “Ìi kiŋgɛ̀ wà wònyà Yudà. Èluhwe è hwɛ nà ò wà!” 19Hvònda nà hvònda tɛ hwa mà mò hvahva èèyè ò mòhvò, rzìi hwa mò rzɔ̀yeya hweyɔlì. Hwa mà mò, rzùmeya màwɔ̀ŋgɔ̀ŋgɔ̀ ò rze lì mò kùwa. 20È hvònda hwa mà kulɛ lì mò kùwa, hwa ulɛ mòŋgò mòŋgòmbè ò nyò yà èni rzìi hwa mò wɔ̀tìrzɛ̀ lìhwàtù la eni. Rzìi hwa mò wòwa ò lì ɛ̀ndɛ lì mò wòmeyà ò mbarza.

Hwa mà wòmeyà Yerzù ò mbarza

21È hvònda hwa mà hwɛ lì ɛ̀ndɛ, hwa mà ùŋmanɛ̀lɛ mòtò mɔ̀kɔ à ma uhwɛlɛlɛ ò mbòwà ya Rzilìni, hwa mà mò hwɛlɛ ndi Rzìmɔ̀nì. Rzìmɔ̀nì à mà hwɛ ndi è rzàŋgò yà ama Àlɛ̀rzanda na Lùhvɔ̀rzì. Rzìmɔ̀nì à mà hwɛ lì aka ò lì kpèeyà ò mbòwà, rzìi hwa mò lɛ̀mbɛ, hwa mò kànèyà ò lì hwanɛ̀ è mbàrza yà ama Yerzù. 22Hwa mà jànà Yerzù ò èki ema e hwɛ̀lɛ̀hwɛ̀ Gòlgotà, ema jànda i hwèlì ndi ema, “Èki ya Hwekeke hwe Mèyòhvò.” 23Àŋga ndì hwà mà ŋgbè Yerzù hwènyɔ̀ɔ̀nì ema hwà mà hvùŋguwàne na gbèe ema hwà mà hwɛlɛ màyi ema a nyɔ̀ ndi à rzi nyɔ̀. 24Rzìi hwa wòmeyà Yerzù ò mbarza. Hwà mà òka mèrzɔ̀ɔ̀nì ò lì hwàa è mbɔ̀ti ya eni, aŋga nanù wɔ̀ hwa ò ɛnɛ̀ e mɔ̀ ema a ò lùwà e la eni lòŋgò la lìŋgi lìwɔtì. 25Hwa mà mò wòmeya ò mbarza lùuwà la ŋgɛ̀ŋgi la èlèlè. 26Eyà hwa mà tìlè ò mbarza ò ŋmanyu tènyi lì aka mòhvò mò eni lì uŋmɛ̀lɛ̀ mamɛ ndèŋgàtɛ̀ à mà wòmàwɛ̀lɛ̀hwɛ̀ ò mbarza è mà hwɛ ndi nanù ema, “È kìŋgɛ yà Yudà.” 27Hwa mà wòmeyà hvɛ hwàyihwɛ̀ hwàhwàkɛ̀ ò mbarza mɔ̀kɔ ò lìya là ŋmalì, ɔnɛ̀yi hvɛ ò lìya la mòmɛ la ama Yerzù.#15.27 Lòŋgò la ikààtì ja wòrzò ì lati ŋmɛ̀ŋgɛ ema mò ùkirzɛ̀yi 28: È hvònda hwenè Èya hwe mà gbèyɛ̀nɛ hweyà ema hwe tìlahwì ò Kààtì yà Lohwà hwe òndìrzɛ̀hwɛ̀, è tìlahwì nanù ema, “Mɔ̀ à mà aŋgahwa nàa mɔ̀kɔ wà hwaŋga ema hwa gbeyà wòhwe.”

29Hwatò ema hwà mà akeyà ò tòŋgòŋgò ya eŋge èki, hwa mà hwɛ lì hvòkòmɛlɛ mèyòhvò me awu rzìi hwa a mò kikòwa nanù ema, “Aha! Ò mà òhwa òma ò wùùlɛ̀ e Ndawò yà Lohwà rzìi ò è òŋga ò ìtììtènì ja mèenyà meyawò. A arzùŋgɛ̀ ò wà witi, ò hwèlì tɛ e Ŋmanà wà ama Lohwɛ̀! 30Arzùŋgɛ̀ ò wa hwìti ò rzihwe ò mbarza!” 31Nànù mɛnɛ hvɛ ndi, Ipìlìrzì ndɛnɛ̀ nà hwà-òkòlèlì hwa mbenda hwa mà hwɛ lì mò kùwa. Hwà mà hwɛ lì a òhwanɛ̀ wɔ̀ hwìti nanù ema, “À ma hwɛ lì rzùŋgà hwatò ndi nàŋgɛ à rza tànɛyi lì àwòŋgòwànɛ̀ tɔ̀ mɔ̀ ŋmìti. 32È Mɔ̀ ema à òhwi nanù ema à Ɔ̀kirzɛ̀hwɛ̀yi, ema à hwèlì ndi è kiŋgɛ̀ ya wònyà Irzàyɛ̀lì à rzìhwe ò mbarza naŋgɛ aŋga nanù je ɛnɛ rzìi ì mò lòkɛ̀.” Hwàŋga hwàyihwɛ̀ ema hwa mà wòmàwɛlɛ̀hwɛ ò itòŋgòŋgò ja ama Yerzù wɔ̀ hvɛ hwa mà hwɛ̀ lì mò hwɛnyɛ.

È kpelì ya ama Yerzù

33O lìrzàkò la kɔ̀rzì ya ŋmèrze rzìi jììtìtì i lìŋga èki ya arzɛ natɛ̀ɛ lì uka ŋgɛ̀ŋgi iyàwò. 34È hvònda ŋgɛŋgi iyàwò ima ùke rzìi Yerzù a tɛɛ nà lìlò lì kàrzàmi nanù ema, “Èlòyi, Èlòyi, lama Rzàbatani!” Jànda ja enè Èya ì hwèlì ndi nanù ema, “Ìi Lohwà la ami, ìi Lohwà la ami, mamɛ ndeŋgatɛ ò nò kìnyɛ̀lɛ̀ e?” 35Lòŋgò la hwatò ema hwà mà tɛ̀mɛ̀ lì kòmbɛ̀nɛ̀ aŋga, nà òmà hwa mà hweye ène mbɔrzi rzìi hwa wòteya lì òhwa nanù ema, “È òkànèyà tɛ nà òmà mɔ̀ à hwɛlɛ ndi Èlàyijà ema a jèe a mò òŋgòwanè.” 36Munyanà mɔ̀kɔ à mà hwaŋga, a ɛ̀ndɛ, a wòwa è kùcha a è lìŋgɛ̀lɛ̀ ò èèye, a e tɔ̀tɔ̀ ò tenì ya jɔ̀ŋgɔ̀ ja hwènyɔ̀ɔnì hwe kpanyi rzìi a agbɛlɛlɛ Yerzù ò wàna ema a nyɔ. Oŋgò mòtò rzìi a òhwa nanù ema, “È mò hwɛmɛ ŋmìti, ì ɔ̀ŋgɔ nà òmà Èlàyijà à ja lì mò rzìhwirzɛ.” 37Yerzù à mà tɛ̀ɛ nà lìlò lì ndɛnɛ, rzìi a rzìyòwa mùùlù mò eni mò lìrzùkù.

38Lìhwàtù ema lì ma kɛ̀ɛ̀hwɛ̀ ò lì kahwa e Ndawò yà Lohwà rzìi lì nyàhweyà hwèhvàrzù hwèhwàkɛ̀ lì wòteyà ò ŋmanyu natɛ̀ɛ nà ò rze. 39Oŋgò ŋmànèlì wa njùma ema à ma tɛ̀mɛ̀ aŋga ò wòrzò wa ama Yerzù, à mà òkànèyà lùwa, rzìi a ɛnɛ hvɛ lì undɛ̀nɛ̀ la ama Yerzù, à mà òhwa nanù ema, “Nà e jɔ̀kɛ̀ ònò munyanà à mà hwɛ ndi è Ŋmanà wà ama Lohwɛ̀!”

40Ò mà hwɛ hwalanà ema hwa mà tɛ̀mɛ̀ hvòka rzi hwa ɔ̀ŋgɔ mamɛ yà arzɛ ema è mà gbèyɛ̀nɛ̀. Hwanù hwalanà hwa mà hwɛ ndi Màlìyɛ̀ mà Màdàlènì, Rzàlòmɛ̀, Màlìyɛ̀ è nyàŋgò yà ama Jèmìrzì enɔ̀ŋgɔ̀ni yà ama Jòrzɛ̀hvù. 41Hwanù hwalanà hwa mà nɔ̀ŋgɔ nà lì òŋgòwànà Yerzù ò lìwòŋgò là eni ò mbòwà yà Galìlì. Rzayì-rzayì jà hwalanà hvɛ ema hwa mà nɔ̀ŋgɔ Yerzù ò Jèrurzalɛ̀mù, wɔ̀ hvɛ hwa mà hwɛ aŋga.

Lì làmìrzɛ là ama Yerzù

42Wònò wùnyà wò mà hwɛ ndi wùnyà wò mòòŋgòlèlì (ène ŋgàna è hwèlì ndi ema wùùnya ndèŋgàna Wùnyà wò lì Arzìyòlɛ̀). Ò èŋgànɛ̀lɛ̀ rzɔ nà òmà ehwànà mòkò è mà rzihwe, 43Jòrzɛ̀hvù ema à mà hwɛ ndi mòtò wà è mbòwà ya Àrìmàtìyà mòtò mɔ̀kɔ wà èluhwe wà è ndawò ya hwèkànelì, ema mɔ̀ hvɛ ŋmìti à ma hwɛ lì ambɛlɛlɛ e hvònda yà hwejèelì hwe Likànèyà la ama Lohwɛ̀, à mà ɛ̀ndɛ lì ùŋmanɛ̀lɛ Pìlatò gbeye-gbeye ò lì mò ijòwa èhwembè ya ama Yerzù. 44Pìlatò à ma tàmà ò lì hwèya ema Yerzù à mà màa lì undɛ̀nɛ̀. À mà yòhwɛ òŋgò ŋmanèlì mò ndɛnɛ wà njùma rzìi a mò ijòwa ŋgà Yerzù à mà undɛ̀nɛ̀. 45Nà òmà Pìlatò à mà hweyànè òŋgò ŋmanèlì wa njùma ema Yerzù à mà ŋwa, rzìi a ŋgba wònjà ema Jòrzɛ̀hvù a wòwe èhwèmbè ya ama Yerzù. 46Jòrzɛ̀hvù rzìi à anda mbɔ̀mi yà lìhwàtù. À rzìhwìrzɛ̀ èŋge èèmbè yà ama Yerzù. À lìŋgɛ̀lɛ̀ èŋge èèmbè nà lìŋgi lìhwàtù, rzìi à naŋgɛlɛ èŋge èèmbè yà ama Yerzù ò tenì yà rzɔ̀ŋgɔ̀ ema è mà hvòmàhwà ò tenì yà lìŋyayì. À mà kulɛ̀ rzìi à iŋgòlɛ lìŋyayi lì ndɛ̀ɛ̀ndɛ̀ ò lì umba hwèkpèèlì hwe èŋge rzɔ̀ŋgɔ̀. 47Màlìyɛ̀ mà Màdàlènì nà Màlìyɛ̀ è nyàŋgò ya ama Jorzɛ̀rzì hwà mà injàneyà rzi hwa ɛnɛ èki ema hwà mà imeya Yerzù.

Currently Selected:

Makòrzì 15: bri

Highlight

Copy