Jɔn 3

Yeso chwìti inug abə Nìkòdemòs

1Wə̀d mɔ̀ʼɔ ya yaʼ angu ne ikum məd ya Nìkòdemòs. Məd ya yaʼ atog wə̀d mə̀Ju inga ikoʼi mə̀Farìsi. 2Wə̀d gho̰ ya ghò abə Yeso izimi pè ghà ibo gha, “Àchwitìnùg, tè kyèri gha àghò ya wə̀d ne Ŋwiye cha gha wì chwiti inug ina imbə̀ʼ icheg ne chəyi wə̀d mɔ̀ʼɔ ne tì wì ghi iyeti inug mbo̰ kirəndə à ya wə̀d ne Ŋwiye yaʼi tì məd.”

3Yeso ya ywìtì ibo gha, “Mə ghà kwàʼ tesiʼ ine gha, mbi mənyìʼ ywìrì gwi wə̀d ighəm ndəŋ bɔŋ wì se nyḭ̀yḛ inga anug ìfɔ̀n Ŋwiye.”

4Anug ya chè Nìkòdemòs, wì si ywìrì bìri abə Yeso gha, “Wə̀d kə fə mə̀ kweg si wə̀d kyen, mbi kə ywiri gwi aməd iye? Tì wì ywirì nyi inga fibum abə ngɔb məd, ni gha mbe ywirì gwi aməd ighəm ndəŋ?”

5Yeso ya ywìtì ibo gha, “Mə ghà kwàʼ tesiʼ ine gha, Chəyi wə̀d ne tì wì nyi inga anug ìfɔ̀n Ŋwiye, kirəndə mbi gwi aməd ane mənib fɔrɔ ane Azwighi Ŋwiye. 6Wə̀d ne wə̀d-aku gwi ya wə̀d-aku. Àsi wə̀d ne Azwighi Ŋwiye gwi ya wə̀d ne Azwighi Ŋwiye yaʼi inga məd. 7Imbə̀ʼ anug chè yi awe imbə̀ʼ icheg ne mə̀ gha ine gha mbi mənyìʼ gwi wə̀d ighəm ndəŋ. 8Afim ya chè ghò aba ne ze kəbi. Àghò ya zùghə aziŋ məd, si ya gha, chəyi àghò we se kyère asiŋi ne ze yèʼe angu fɔrɔ asiŋi ne ze ghò angu. À ya icheg ne ze bə yaʼ tì wə̀d ne Azwighi Ŋwiye yaʼi inga məd.”

9Nìkòdemòs ya ywìrì bìri ibo gha, “Anug icheg azo̰ kə ghi chè iye?”

10Yeso ya ywìtì ibo gha, “Àghò ya wə̀d ne chwìte inug abə mə̀Izre, aghə si ghì chəyi àghò kyèri anug azo̰? 11Mə ghà tesiʼ ine gha, tì ya ghà inug ne tì kyeri bə̀ ghà inug ne tì bari, si ya gha, chəyi mbə̰ bəd ne chwìte inug mbe kə̀bə̀ ni bḛ inug ne te ghà. 12Mə fə ghàm inən imbə̀ʼ inug ne dùwə̀ igun isəg, chəyi mbə̀ bḛ. Mbə̀ kə si bḛ iye anyumə̀ ne mə̀ ghàmi inən imbə̀ʼ inug ne yaʼi ikaŋ àbɔ̀ŋɔ?” 13Chəyi wə̀d mɔ̀ʼɔ ne kə kweʼì kɔʼ ghò ikaŋ àbɔ̀ŋɔ. À ya məyi Ŋwan Wə̀d we ne ya swiʼi ikaŋ àbɔ̀ŋɔ. 14Icheg ne Muse ya zi jo ze ne wì ya tangi ane brons#3:14 Brons ya mbe gha atə̰ bronze ane ìngam mə̀kara igun fized si nɔ̀ ikaŋ inga ibad zɔbi, à ya bə̀ icheg ne mbi biri nɔ̀ Ŋwan Wə̀d ikaŋ. 15Mbi biri nɔ̀ aməd ane ni gha wə̀d ijìm ne nɔŋi ibḛfiŋ igun məd mənyìʼ jəg ìtḛ̀ ighə̀m imɔʼ.

16Ŋwiye ya taŋ kɔ̀ŋ bəd məjìm igun isəg, ane chà ìwi Ŋwan we ne ya məyi imɔʼ gha wə̀d ijìm ne nɔŋi ìwi ibḛfiŋ igun məd, chəyi wì biri ku nim. Wì biri jəg ìtḛ̀ ighə̀m imɔʼ. 17Chəyi Ŋwiye ya chà ìwi Ŋwan igun isəg gho̰ gha wì yeʼe saʼ bəd imbə̀ʼ inug tibɔ̀ŋ. Ŋwan məd ya yèʼe ni ghì gha bəd pum. 18Wə̀d ijìm ne bḛ aməd, wè fə pum. Àsi wə̀d we ne chəyi wì bḛ aməd, Ŋwiye biri sɔb isaʼi igun məd chə aməd imbə̀ʼ icheg ne chəyi wì bḛ Ŋwan Ŋwiye we imɔʼ. 19Isaʼi we ne yaʼi igun bəd igun isəg ya gha, Ìzḛzḛ fə yèʼe igun isəg, si ya gha, bəd kɔ̀ŋ yaʼ afub chè ìzḛzḛ imbə̀ʼ icheg ne mbɔb mbe kiri ghiyə inug tibɔ̀ŋ. 20À ya ane imbə̀ʼ icheg ne bəd məjìm mbe ne ghìyə̀ inug tibɔ̀ŋ ya pàbà ìzḛzḛ. Chəyi mbɔb ya kə̀bə̀ ni nyi inga ìzḛzḛ imbə̀ʼ icheg ne chəyi mbi ya kə̀bə̀ gha ìmbɔb inug tibɔ̀ŋ duwə asaŋ. 21Àsi bəd mbe ne fàʼà inug ne koʼi, mbi ya kɔ̀ŋɔ̀ ni yaʼ inga ìzḛzḛ. Aton ya gha, ìzḛzḛ biri ghì bəd kyeri gha, ighi ne mbɔb mbe fàʼà ya inug ne Ŋwiye kə̀bi.

Anug ne Jɔn we ne nàʼà mənib ywirì ghà imbə̀ʼ Yeso

22Anyumə̀ ne Yeso ya màni ni ghàm inug mbo̰, wì ya nɔ̀ʼ tì ìmbi mə̀mə̀nənùg ghò a Jùdeyà. Wì ya chughi angu ane nyumə̀ mɔ̀ʼɔ tì inɔb bə̀ nàʼ mənib abə bəd. 23Jɔn yaya bə̀ nàʼà mənib abə bəd asiŋi mɔ̀ʼɔ ne mbi yaya kàrà ane Anɔ̀n iban Salìm. Wì yaya nàʼà mənib abə bəd angu imbə̀ʼ icheg ne mənib ya nɔʼ inga asiŋi ze. Bəd yaya ghò ibo, wì bə̀ nàʼà mənib inɔb. 24Anyumə̀ we, chəyi mbi ya kiri gwi Jɔn zì inga nəb ndəŋ . 25Mə̀mə̀nənùg ìmbi Jɔn mɔ̀ʼɔ yaya tàŋà anug mɔ̀ʼɔ tì Ju mɔ̀ʼɔ imbə̀ʼ ikuchèg tesiʼ ni sòrì nyɔd bə̀ sòrì ighi icheg ne mə̀nɔ̀ʼɔ̀ chwi. 26Mə̀mə̀nənùg ìmbi Jɔn mbe ya ghò pè ghà abə Jɔn gha, “Àchwitìnùg, Àghò kɔ̀ndi wə̀d we ne ya yaʼi tì ine igyi Jodàn, injḭ ìywin. Wə̀d we ne àghò yaya ghà inug chɔm abə bəd imbə̀ʼ aməd. Məd we se nàʼà mənib abə bəd. Bəd məjìm mbe se ghò ibo.”

27Jɔn ya ywìtì inɔb gha, “Chəyi wə̀d ya bèrè aghi mɔ̀ʼɔ kirənde à ya Ŋwiye nàʼi ibo. 28Mbə̰ ya yaʼ awən angu anyumə̀ ne mə̀ ya gha, ‹Mo kayi Wə̀d we ne Ŋwiye zɔ̀ʼi. Mo ya wə̀dtɔm ne Ŋwiye ya cha ibo imbìghè.› 29Mbaʼ igən ya wə̀d ne beri àyi igən. Àsi ìsə̀ʼ mbaʼ igən ya gyènde icheg ne wì chùghi iban se zùghə icheg ne mbaʼ igən we ghàmà. À ya icheg ne mo we bə̀ se gyènde. 30Inug məd ijìm mənyìʼ chè imbìghè. Ìmbum tì inug mənyìʼ se bə̀ndə̀ anjìm.”

Yeso ya wə̀d ne nɔ̀ʼi ikaŋ àbɔ̀ŋɔ

31Jɔn we ne yaya nàʼà mənib ya ywìrì gha, “Wə̀d we ne nɔ̀ʼi ikaŋ àbɔ̀ŋɔ ya wə̀d ne beri ati chè bəd məjìm. Wə̀d we ne mbi gwi aməd igun isəg ya wə̀d igun isəg. Wì ya ghàmà məyi inug mbe ne yaʼi inga isəg. Àsi Wə̀d we ne nɔ̀ʼi ikaŋ àbɔ̀ŋɔ, we bèrì ati chè bəd məjìm. 32Wì ya ghà anug ne wì bàri bə̀ zug, si ya gha, chəyi wə̀d mɔ̀ʼɔ ne bḛ anug məd. 33Àsi wə̀d we ne bḛ anug məd, ze chwi gha, tengàŋ bḛ gha anug ne Ŋwiye we ghà ya tesiʼ. 34Wə̀d gho̰ ne Ŋwiye cha ya ghàmà Ìngam Ŋwiye imbə̀ʼ icheg ne Ŋwiye we nàʼà àzi Azwighi ibo ne chəyi tì mbi mə̀grì. 35Mbaʼ kɔ̀ŋ ìwi Ŋwan. Ane, wì fə sàŋì inug ijìm ibo ikye ibo. 36Wə̀d ijìm ne nɔŋi ìwi ibḛfiŋ igun Ŋwan Ŋwiye, wì fə jəg ìtḛ̀ ighə̀m imɔʼ. Àsi wə̀d ne chəyi wì bḛ Ŋwan Ŋwiye, chəyi wì biri jəg ìtḛ̀ ighə̀m imɔʼ. Ane, agaŋ Ŋwiye ze igun tengàŋ.”

Currently Selected:

Jɔn 3: MBTP

Highlight

Copy