Matyo 23

Yeso gbeʼre eto bɔ bɛɛrɛ abwa mɔ mbɔʼ eto ebe bɔ Juu

(Mak 12:38-39; Luk 11:43, 46; 20:45-46)

1Yeso gâ ebe ebaŋabɔ mane bɔ bɛɛrɛ abwa mɔ kpe, 2“A shi ndɛʼ ekama ebe bàtee atsɛrɛ mane bɔ Farisii é tee etsɛrɛ Mose. 3Éngɛ mbɔn zɔ gɛ̀rɛ̀ kìrì abwa gimkpaʼ yɛ angɔ à ma ga endɔn ngɛ. Bɛʼngɛ mbɔn ke sa le abwa yɛ angɔ ma le ngɛ bo mbɔʼnga angɔ ke ma le abwa yɛ angɔ ma tee ngɛ bo. 4Angɔ ba ga ebe bɔ kpe e fwɛʼ abwa yɛ a me fɔɔ gɛ̀rɛ̀ me kɔrɔ ebe angɔ é fwɛʼ ngɛ. Angɔ gɛrɛ ke doʼo é sàa ebwo àmɔ̀ kpe mbɔɔ kpede angɔ é fwɛʼ abwa yɛ bo. 5E na le abwa gimkpaʼ mbɔʼtye bɔ zɔ angɔ. E be ŋwɛʼrɛ atsɛrɛ Ngwe gè efwɔ bwo akwɔb è ge ekɔshi mane ebwo àmɔ̀, akwɔb angɔ shi me klɔ fɔɔ akwɔb abɔ be. Angɔ le adzɔ ǹdiri angɔ me dɔɔ ghɛʼ. 6Angɔ be doʼo efwɔ nchwɔnchwɔ efwɔ antara ma doʼo é tsɔmɔ ene etan nchwɔnchwɔ efwɔ ndɔ tsaʼra Ngwe bɔ Juu. 7Angɔ be doʼo kpe e ma gamma endɔɔ efwɔ ewu̧ ene eghɔ gɛrɛ doʼo kpe e ma zɔʼrɔ angɔɔ kpe ‘Àtee abwa.’ 8Bɛʼngɛ ma mbɔn ngɛ, e ke ne zɔʼrɔ angɔn kpe ‘Àtee abwa’ bo mbɔʼnga mbɔn mwɔ bwɔngwa gɛ̀rɛ̀ me le Àtee abwa ŋwaʼ. 9Mbɔn gɛrɛ ke ma ngo zɔʼrɔ gho deʼ a chwâ nɔ kpe ‘Àtɛ’ bo mbɔʼnga mbɔn be le tyetye àtɛ ŋwaʼ wɛ e mwɔ ekere ngɛ. 10Kà e zɔʼrɔ angɔn kpe ‘Àtee abwa’ bo mbɔʼnga mbɔn be le tye gho kɛ̀ ŋwaʼ chwɛ̀ʼ wɛ ma Ǹtɔmzhwaʼa ngɛ. 11Gho kɛ̀ abwaʼ ndzɔn wara ngo mwɔ gho afwɛʼ endɔn. 12Egho e ma kwaʼ ekwa ma ke mwɔ gho kɛ́ ngɛ, e ba bwaara engɔ. Egho wɛ gɛrɛ ma bwaara ekwa mɔ ngɛ, e ba bèʼrè engɔ ekere.”

Yeso tɔn endooro aghɔɔ angɔ

(Mak 12:40; Luk 11:39-42, 44, 52; 20:47)

13“E yà me ngoʼo endɔn, ngwo nɛɛ! Mbɔn bàtee atsɛrɛ mane bɔ Farisii mbɔʼnga mbɔn na bɔ ndooro aghɔɔ! Mbɔn ba gwɔb anduʼndɔ ebe bɔ kpe angɔ ke nyii efwɔ ebwa m̀fɔ̀ ekere bo, bɛʼngɛ nyɛ̀rɛ̀ zèʼe éngɛ mbɔn mɔ ke ma ngo nyii efwɔ bo kà saa abɔ tsɛrɛ byɛ e me doʼo é nyii efwɔ ngɛ e nyii bo! 14[E yà me ngoʼo endɔn ngwo nɛɛ! Mbɔn bàtee atsɛrɛ mane bɔ Farisii mbɔʼnga mbɔn na bɔ endooro aghɔɔ! Mbɔn ba ndooro ayeti, ma bwɛ ela angɔ, bèʼrè akwa ene atsaʼra Ngwe dɔɔdɔɔ, nyɛ̀rɛ̀ zèʼe éngɛ enyii ndzɔn yà me ngoʼo.] 15E yà me ngoʼo endɔn ngwo nɛɛ! Mbɔn bàtee atsɛrɛ mane bɔ Farisii, mbɔʼnga mbɔn na bɔ endooro aghɔɔ. Mbɔn ba zhiri a chwâ mane efwɔ ndim é le gho ŋwaʼ wɛ e ma ngo bɛrɛ ene Ngwe ngɛ. Èndzobo chɛ engɔ bɛrɛ ene Ngwe ngɛ, mbɔn le engɔ bɔɔ fɔɔ angɔn ene akyɛ fyee me koʼro é ngɔ̀ɔ efwɔ edzɔwu. 16E yà me ngoʼo endɔn ngwo nɛɛ! Mbɔn eto byɛ aghɔɔ ndzɔn me fo ngɛ. Mbɔn ba tee kpe mala gho kanna ebwa deʼ ene ndɔngwe kɛ̀, e ke tiri engɔ kpe è le ebwa wɛ bo, bɛʼngɛ gho deʼ kanna ene ela aklibi àfɔ̀n efwɔ ndɔngwe kɛ, engɔ à da le ebwa wɛ a kanna é le ngɛ. 17Mbɔn bàfò aghɔɔ, bɔ atii, ne ewe a me fɔɔ ewe, ela aklibi àfɔ̀n kà ndɔngwe kɛ̀ yɛ e me le ela aklibi àfɔ̀n wɛ pɛ mɛ̀ɛrɛ ngɛ? 18Mbɔn gɛrɛ ba tee kpe mala gho deʼ kanna ebwa efàarà echud tɔ̧ɔrɔ Ngwe, engɔ kpe mala è ne le ebwa wɛ bo tsɛʼ ebwa deʼ bo. Bɛʼngɛ mala engɔ kanna mbɔʼ etɔ̧ɔrɔ Ngwe edɔm echud mɔ, engɔ fwɛʼ ebwa wɛ a kanna é le ngɛ. 19Mbɔn bàfò aghɔɔ! Ne ewe me fɔɔ ewe? Etɔ̧ɔrɔ kà echud ghɔ Ngwe yɛ e ma le etɔ̧ɔrɔ Ngwe njɛ pɛ ngɛ? 20Éngɛ mala gho deʼ kanna abwa ene echud tɔ̧ɔrɔ Ngwe, engɔ na kanna anyi mane ela etɔ̧ɔrɔ gimkpaʼ byɛ e mwɔ edɔm aŋu ngɛ. 21Mala gho deʼ gɛrɛ kanna abwa ene ndɔngwe kɛ̀, engɔ na kanna mbɔʼ ndɔngwe kɛ mane Ngwe yɛ ma tsɔmɔ aŋu ngɛ. 22Mala gho deʼ gɛrɛ kanna abwa mbɔʼ ekere, engɔ na kanna abwa mbɔʼ atan m̀fɔ̀ Ngwe mane engɔ wɛ è me tsɔmɔ edɔm aŋu ngɛ.

23Ànkwɔ̀nɔ̀ endɔn bàtee atsɛrɛ mane bɔ Farisii, mbɔʼnga mbɔn na bɔ ndooro aghɔɔ! Mbɔn ba gɛ̀bɛ̀ enklila mbɔn ene aklo wum, ndɛʼ eklo ŋwaʼ ebe Ngwe, enklila é fuʼ ende na mint, dil mane kumin byɛ mbɔn me le ngɛ. Bɛʼngɛ mbɔn sèrè angwa abwa wɛ atsɛrɛ Ngwe ma tee ngɛ na, é fwɛʼ ebwa wɛ e me koʼro ngɛ, é le eklasɔn, mane é shi ńtara bɔ ene Ngwe ngɛ. Mbɔn be koʼro é ma fwɛʼ abwa yɛ mbɔn à dye ma le ngɛ ne ma sèrè angwa ebwa wɛ atsɛrɛ Ngwe ma tee ngɛ bo. 24Mbɔn ato byɛ e me fo aghɔɔ ngɛ, mbɔn na nu èzɛ̀ʼ é kɛ̀ɛ mɔm é chi ampiʼ engii efwɔ mɔm mɔn shì mà mɛ̀ʼ angwa m̀pwɔ̀ eguńked! 25Ànkwɔ̀nɔ̀ endɔn bàtee atsɛrɛ mane bɔ Farisii, mbɔʼnga mbɔn na bɔ ndooro aghɔɔ! Mbɔn na sò echim ǹtoʼ mane eka, efwɔ shi me shwe ene ela byɛ mbɔn me fèere ebe bɔ mane angɔ byɛ mbɔn me shi ene àngwa ngɛ. 26Bàfò aghɔɔ bɔ Farisii! Mbɔn dye sò ela byɛ e mwɔ efwɔ ǹtoʼ ngɛ akuchim ya ngo pɛ. 27Ànkwɔ̀nɔ̀ endɔn bàtee atsɛrɛ mane bɔ Farisii mbɔʼnga mbɔn na bɔ ndooro aghɔɔ! Mbɔn ne mwɔ ne etoshe byɛ e me shii zhwaʼ ene mbàn bla, e ma nara ese efwɔ mɔ shi mwɔ ewuu bɔ kudu mane nyɛmɛrɛ akwa bɔ byɛ à sa fwe sa ngoʼo ngɛ. 28Nkirinkin, eleabwa ndzɔn ya tee ese kpe mbɔn ba le abwa yɛ a me koʼro efàarà Ngwe ngɛ, bɛʼngɛ ńtara ntsɔn me shwe ene endooro aghɔɔ mane abwa bɔɔbɔɔ.

Yeso ga aŋu Ngwe ma ngo gè enyii ekwa angɔ ngɛ

(Luk 11:47-51)

29Ànkwɔ̀nɔ̀ endɔn bàtee atsɛrɛ mane bɔ Farisii mbɔʼnga mbɔn na bɔ ndooro aghɔɔ! Mbɔn à ba byɛ ashe nchwɔnchwɔ ebe bàmɛnɛkɔn Ngwe, è nɔ̀ɔ etoshe ebe abɔ byɛ a ma le abwa yɛ a me koʼro efàarà Ngwe ngɛ. 30Éngɛ mbɔn ba ga kpe mala mbɔn a me mwɔ endzobo ètɛ sam mbɔn, shi mbɔn à ke buumu angɔ é zhudu bàmɛnɛkɔn Ngwe bo. 31Aŋu mbɔn à ma ga éngɛ ngɛ, e we tee éŋwaʼaŋwâʼ kpe mbɔn na bwɔ ebe abɔ byɛ â zhudu bàmɛnɛkɔn Ngwe ngɛ. 32Mbɔn ngɔɔ embè mɛ̀ɛrɛ̀ abwa yɛ ètɛ sam mbɔn à klada ngɛ! 33Mbɔn jwere mane bwɔ jwere bɔɔbɔɔ, mbɔn ke zhuŋu kpe mbɔn ba ngo pɛ etsɛrɛ esɛʼ tɔn edzɔwu asatan ke nyii bo. 34Éngɛ mmɛ ga endɔn kpe mmɛ wa sàa bàmɛnɛkɔn Ngwe, bɔ azɔm mane bàtee abwa endɔn mbɔn ba ngo zhudu adeʼ, kɔ̀mmɔ̀ adeʼ ene ezɔd baʼra, sɔm adeʼ efwɔ ndɔngwe bɔ Juu gɛ̀rɛ̀ chwee angɔ efwɔ abɛ ne abɛ. 35Enyɛrɛ éngɛ, enɔgho mbɔʼ abɔ byɛ à ma le abwa yɛ a me koʼro efàarà Ngwe byɛ mbɔn a zhudu edɔm ese ngɛ ba ngo zeʼ ato ndzɔn nyɛ̀rɛ̀ zèʼe endzobo ene anɔm Abɛl, anɔm Zakariya ŋwɔ Bɛrakya wɛ mbɔn à zhudu aghɛɛghɛɛ ndɔngwe kɛ̀ mane echud tɔ̧ɔrɔ Ngwe ngɛ. 36Mmɛ ga éŋwaʼa endɔn kpe enɔgho abɔ byɛ ya ngo mwɔ ato bɔ efwɔ ekyɛ zɔnɔ.”

Yeso tee edoʼ ene bɔ Jerusalɛm

(Luk 13:34-35)

37Yeso fɔɔ embè ga kpe, “Wa mmɛ ngà! Bɔ Jerusalɛm! Bɔ Jerusalɛm! Mbɔn byɛ mbɔn à zhudu bàmɛnɛkɔn Ngwe gɛ̀rɛ̀ ma timi bɔntɔm byɛ Ngwe me saa endɔn ngɛ ene atye. Akyɛ akɛkɛ mmɛ shi kpe mmɛ shunu angɔn na engwa ekwaʼ ma zobo bwɔ efwɔ eblaba mɔ nɔ mbɔn tɔn! 38Éngɛ mbɔn zhuru, Ngwe shi gli efwɔ ndɔ ndzɔn, è nɔ ekɛɛ 39Enyɛrɛ enjitsɔ sa ngɔɔ embè, mmɛ ga endɔn kpe mbɔn ke ma ngo zɔ angu bo bwɛn èndzobo chɛ mbɔn ma ngo ga kpe ‘Ngwe ndɛʼ m̀bɔ̀nɔ ebe engɔ wɛ me zeʼe ene ekumu Masakɛ ngɛ.’ ”

Currently Selected:

Matyo 23: nbt

Highlight

Copy