Jɔn 2

Yeso fəd mmuu nə nlə

1Ambə tsuʼu n tsəghə tsunə ntəghə, zə̂ kə ney zə iwû kə loʼ kə n loʼ n naʼ i Kana n mboʼo Galili. Này Yeso n loʼ fu. 2À n loʼ nə̀ ghə n naʼa soʼo Yeso nsə ngəd tə wi tə nə̀ ghə bə fu. 3Ambə nlə n sày səə tsunə, này Yeso n dza ndòw tə̀ wi nə̀, “Nlə n ghə mə n may.” 4Yeso n dza ndòw tə̀ wi nə̀, “A nay, i zey laalə mə n jii i ghaa zə ə? Nəŋə zuŋ i ka kam kpii dzə.” 5Này Yeso n kuŋŋə dza ndòw kə tə̀ ghə̂ a kəfwaʼ ghey fu nə̀, “Ghəŋə ndòw na ghə i ghaa zə tə i dzanə nə̀ ghaa ghəŋə.” 6Ghə â kpeyyə naŋa nyi tsu tsɔm wə mmuu fu nə atay utuubə, nə ghə̂ a Təjuu ghə i kali wû zə tii tə̀ laŋ kə dzanə sey nə̀ ghə i zow n sə K-a-zə̀. Tsɔm kəmɔʼ n loʼ ni ney tə̀ a loʼ jɔg tə mmuu tətuubə. 7Yeso n dza ndòw tə̀ ghə̂ a kəfwaʼ ghə nə̀, “Luulə tsu na mmuu mə n fə̂ wən.” Ghə n luulə tsu soʼo fə̂ u tii wə. 8Tə n dza ndòw tə̀ ghə nə̀, “Tey shi kɔʼ na nya, ghaa ndòw fuu ndow tə̀ wù wey tə laalənə ghəə ghən.” Ghə n ndòw fuu ndow soʼo. 9Ambə wù tii mɔm zow kɔʼnə, à n loʼ nə̀ mmuu mey mə n fəd nə nlə, tə n khə way luʼu key nlə n tii n nuu bənə tii, ghə̂ a kəfwaʼ ghey ghə â teynə mmuu n tii mə n kee khə. Ghə i tii zə n tsəghəshi wi, sey, tə n tɔŋɔ tsu num weyzən, 10dza tə̀ wi nə̀, “Ghə bəghə ghə n ney bə dzə nlə n dzuŋu mə isə, ambə ghə̂ a mə̂ kow tsunə, ghə n ney bə n mey n tɔʼɔ dzɔbə way n nəŋə i tii zə. Wə u kee ndow bə nə nya n nlə n dzuŋu mə.”

11À wən loʼ tsəə ə Yeso i sə̂ isə zə tə â ghəŋənə n naʼ i Kana n mboʼo Galili. Â loʼ soʼo fu ngəd tə Yeso tə â koʼnə daʼa kə wi kə, sey, ghə n bəghəm fuu tə̀ wi.

12Ambə ghəə ghən a tsəghə tsunə, Yeso ghi nay wi, ghi waazə a wi ghə, nsə ngəd tə wi tə n ndòw n Kapenum, doʼo kəŋə ndòw tsuʼu n loʼ mə fu.

Yeso dzum shi aghə̂ n Ndaw Kəzə̀ n Yerosalem

(Mat 21.12-13; Mak 11.15-17; Luk 19.45-46)

13À n loʼ nə̀ Zə̂ kə taa zaʼa kə ghə̂ a Təjuu kə n shɔd, Yeso n nuu kɔʼ ndòw n Yerosalem. 14Nghee tə ndownə fu tii n Ndaw Kəzə̀ i nii zə n Yerosalem, tə n koʼ aghə̂ ghə fìilənə mbɔŋ tə, tənjì nsə buŋu tə. Tə n koʼ soʼo ghə̂ ghey ghə kweyyə fuunə khəə wə, ghə doʼ kaabənə fu n baŋŋə u ghə. 15Tə n bəghə kɔʼ ikwɔɔ nə ubaʼ, baʼ dzum shi nyam tey tədzəm fu tii n ndaw Kəzə̀ i nii zə n Yerosalem, tɔŋŋə təmbɔŋ nsə njì tə, saŋŋə maʼa khəə u ghə̂ a kweyyə ghə ukhəə ghey, tuŋu maʼa baŋŋə u ghə. 16Tə n dza ndòw tə̀ ghə̂ ghey ghə â fìilənə buŋu tey nə̀, “Shi na n fə̂ wən a bii! Kə ghaa nə kəm ghəŋŋə nə̀ ndaw Bày wuŋ doʼo luʼu kə bikiwən.” 17Ngəd tə wi tə n daŋŋə moʼlə bə nə̀ màʼlə K-a-zə̀ kə dza nə̀, “Ləghə i dzəŋi kə ndaw Kəzə̀, zə î ney nuulənu mə.”

18Ghə̂ a nii a Təjuu ghə n bəb tə̀ wi nə̀, “Wə̀ khə tsəə i ghaa zə ni dii bə tə̀ ghey keeli tsu nə̀ wə̀ khənu daʼa kə tii kə ni ghəŋə ghəə ghən ə?”

19Yeso n dza ndòw tə̀ ghə nə̀, “Saʼa maʼa tsu na Ndaw Kəzə̀ zən, mə i bəghə dzəŋŋə kɔʼ nə ntsuʼ ntəghə.”

20Ghə̂ a nii a Təjuu ghey n bəb ndòw tə̀ wi nə̀, “Wə̀ dza wə loʼ ni bəghə dzəŋŋə nə ntsuʼ ntəghə abə ghə saʼa maʼa tsu ə? Ndaw Kəzə̀ i nii zən n Yerosalem, â ney ghey n num tə nghəm nkaykə nsə num tə tətuubə ni bəghə!” 21À n loʼ sey nə̀ Ndaw Kəzə̀ i nii zey Yeso â dzanə â loʼ wû u wi. 22Ambə Zə̀ kə zhəm dzəŋŋə bənə wi nə ivə, ngəd tə wi tə n moʼlə bə nə̀ tə ma sey dza, sey ghə n bəghəm ghɔɔmə i Kəzə̀ nsə ghəə ghey Yeso â dzanə.

Yeso khə moʼlə tə ghə̂ adzəm

23Nghee tə̀ Yeso â loʼnə n Yerosalem n nəŋə i Zə̂ kə taa zaʼa kə, ndəmə aghə̂ n bəghəm n wù wey tə loʼnə ghii wə nghee tə̀ ghə â koʼnə tsəə tey tə fwaʼanə. 24Yeso n ka kee fuu dzə fə̀ŋ ə wi tə̀ ghə, kùmnə tə â khə may moʼlə tə ghə tədzəm. 25Ghə i loʼ i way dzə wù â loʼnə ni dza tə̀ wi bòʼ ghə, boʼnə wû wi, tə â khə may ghəə ghey a loʼnə n fə̀ŋ tə ghə.

Currently Selected:

Jɔn 2: WEH

Highlight

Copy