Lukas 1
1
1Mûkəbii Tiofilos, nsə ndəmə tə aghə̂ tə n kùm fwaʼ ni koʼ nə̀ ghə tɔ̀ɔ naŋa tsu bə ghəə ghey ghə â shinə n fəŋŋə kə saa. 2Ghə â bɔɔmə tɔ̀ɔ ghəə ghey ghə â zownə, tə̀ nghee ghə̂ ghey ghə â koʼnə ghəə a tii ghə nə nzeyyə â naʼlənə. 3À wən loʼ ghə i tii zə a Mûkəbii, nghee n tɔ̀ʼ fwɔli kɔʼ bənə ghəə a tii ghə nə nzeyyə, mə n koʼ tsunə nə̀ i dzɔbənu nə̀ n faalə tɔ̀ɔ tsu bə ghəə a tii ghə tə wɔ, 4sey nə̀ wə tɔʼ keeli tsu isəŋə n ghəə ghey wə̀ khə dzənə.
Tsəndəghə ə Kəzə̀ naʼa bə ji i Jɔn wù fuu u mmuu Kəzə̀ mə
5N tsuʼu mey Helɔd â loʼ tsənə də̀ŋ kə n naʼ i Judeya, fɔɔngili u loʼ wə n loʼ tsə fu ghə tɔŋɔnə nə̀ a loʼ Zakalia. Tə â loʼ fɔɔngili n dəŋə kə Fɔɔngili Abijà. Zəd i wey wi zə â loʼ nə a loʼ Elisabet. Tə â shi bə soʼo n sad i ndaw i fɔɔngili tɔŋŋə Erɔn. 6Ghə n dzəŋi muu muu i dzuŋu zə n sə̂ K-a-zə̀, naŋŋə laŋ u Kəzə̀, khə way bwù i loʼ zə. 7Seykə, ghə n khə way waa təŋkey Elisabet â jiə way. Ghə n loʼ soʼo nə ghə n dən. 8Ambə nəŋə i kəfwaʼ i kpii tsunə tə sad i ndaw i fɔɔngili Zakalia ni fwaʼ, tə n ndòw n tsuʼ fə loʼ fə ni ndòw fwaʼ fwaʼ kə wi n sə̂ K-a-zə̀ tə a loʼ fɔɔngili. 9N doʼo i ghə fɔɔngili, ghə â təm mboʼ ni say wi nə tə̂ nyi ndow n Ndaw Kəzə̀ i nii zə n Yerosalem ə Bày, nsə ni daa inəŋ n tsə zey ghə fəələnə maʼlə wə tii. 10Ambə nəŋə zey tə̂ daanə nəŋ zə, nɔɔ kə aghə̂ kə n loʼ bii ghə gɔŋŋə. 11Sey, tsəndəghə ə Kəzə̀ n təmi bə n səə tsə zey ghə fəələnə maʼlə wə tii n bad kə kpii u wi u təmə wə. 12Ambə Zakalia koʼ ndòwnə wi, tə n taa vəi kɔʼ, kaʼ ni tsəŋ. 13Tsəndəghə ə Kəzə̀ zey n dza ndow tə wi nə̀, “Ka tsəŋ dzə a Zakalia. Zə̀ kə n zow gɔŋŋə zə zə̀. Wey wə Elisabet î jiə bə wɔ n waa u nûmwə, wə i tsə̀ tsu zəd i wi nə a loʼ Jɔn. 14Tə î ney bə wɔ n duʼlə zə nsə saŋəzə, ndəmə aghə̂ ghə i duʼlə soʼo n ji i wi. 15Zə î doʼlə sey, n təŋkey, tə î bə doʼlə wù nii wə n sə kə Mûkəbii. Kə tə nə məənə nlə n tawmə nkee fə u taw wə. Ni ney nuu bə n ji i wi, Zay kə Zow kə nə lòʼ n kow wi. 16Tə i ney dzəŋŋə bə fə̀ŋ tə ghə̂ ghə Izree tə̀ Bày Zə̀ kə ghə. 17Tə i bəghə n sə kə Bày. Tə i khə zay kə nsə daʼa kə, tə̀ tûm Kəzə̀ Elayja â khənə. Tə î bəghə təmə dzəŋi bə ghə bày nsə waa a ghə ghə̀. Tə i ney dzəŋŋə bə ghə̂ ghey ghə tawnə n tow kə tə Zə̀ kə, ghə kweyyə fə̀ŋ tə ghə, ghə keeli utɔb tə̀ a loʼ ghə̂ ghey ghə loʼnə tsətsəghə n sə̂ K-a-zə̀. Tə i bayyə naŋa tsu aghə̂ tə̀ Bày, tə î bəghənə.” 18Zakalia n bəb ndòw tə̀ tsəndəghə ə Kəzə̀ zey nə̀, “mə î sə loʼ ni keeli ngee nə̀ ghəə ghən ghə î bə neynu bənə kə ə? Koʼo, mə n dən, wey wùŋ n dən soʼo.” 19Tsəndəghə ə Kəzə̀ zey n beeli ndòw wi nə̀, “N loʼ Gabriya, wù tûm wey tə fwaʼa nə tə̀ Zə̀ kə, Zə̀ kə tûm mə nə̀ n bə naʼa bə tûm i dzuŋu zən tə̀ wɔ. 20Nghee wə bəghəmmə way ghɔɔmə zuŋ zən, wə î kəm khəə way ghəə ghə ni ndòw kùm n tsuʼ fey ghəə a tii ghə adzəm î neynə bənə kə tii. Ghəə ghən adzəm ghə î ney kəbənə n nəŋə ghə.” 21Ghə̂ ghə n sə̀ loʼ a bii, ləmmə kìi Zakalia, məʼlə fə key kə kwu naŋanə wi n fəŋ ə Ndaw Kəzə̀ i nii zey n Yerosalem. 22Ambə tə shi bə nə̀, tə n kəm way ni ghɔɔmə̀. Ghə n daŋŋə keelinə tə n koʼ faalə kə ighəə kə loʼ kə n fəŋ ə Ndaw Kəzə̀ i nii zə n Yerosalem. Sey, tə n ghɔɔmə tə̀ ghə nə tə foʼlə ndòw aghəə n wɔ. 23Ambə nəŋə i kəfwaʼ i wi i may tsunə, tə n fən dzəŋŋə ndòw n ndaw wi. 24Ghab kə n ka shi, wey wi tɔŋŋə Elisabet n bɔŋ kɔʼ waa. Tə n nyi doʼo ndòw n ndaw təndzɔŋɔ tətaa. 25Tə n dza n fəŋ ə wi nə̀, “À ghəə ghən ghəŋə Bày, tə dii bənə ləghə i wi zə tə̀ mə, ney nuu tow kə dədlə kə n kôw mə̀ n fəŋŋə kə aghə̂.”
Tsəndəghə naʼa ji i Yeso
26Ambə nəghə u Elisabet u kuum tsunə ndzɔŋɔ tə tətuubə, Zə̀ kə n tûm ndòw tsəndəghə ə Kəzə̀ u loʼ wə ghə â tɔŋŋə nə̀ a loʼ Gabriya n naʼ i loʼ zə n mboʼo Galili tɔŋɔ Nazaled. 27Tə â tûm wi tə̀ weyzən u loʼ wə tɔŋŋə Maria nə tə ka kam nyəŋi koʼ tsə ghi weynum, Yosef â nyi naŋanə n wey. Yosef â shi bə n sad i kəbii i Fɔɔ Devid. 28Tsəndəghə ə Kəzə̀ zey n ndòw n səə Maria dza tə̀ wi nə̀, “N tɔŋŋə zow bə wɔ a Maria, Bày n wɔ ləghə, tə u loʼ soʼo ghi wɔ.” 29Ghɔɔmə i tii zə n ngii fəmmə Maria n fə̀ŋ. Tə n məʼlə dza, “À wən loʼ ndzoʼo tɔŋɔ zow i ghaa zə ə?” 30Tsəndəghə ə Kəzə̀ zey n dza ndòw tə̀ wi nə̀, “Ka tsəŋ dzə a Maria, Zə̀ kə n wɔ ləghə, fu wɔ n naamə kə. 31Wə̀ i bɔŋɔnu, wə̀ i ji bə waa u num wə. Wə̀ i tsə̀ tsu zəd i wi nə̀ a loʼ Yeso. 32Tə i bə doʼlə wù nii wə, ghə i tɔŋŋə wi nə̀ a loʼ Waa Zə̀ kə Idəŋ kə. Bày Zə̀ kə Mbi î fu wi n kuu kadə̀ŋ kə bày wi kə, tɔŋɔ Devid. 33Tə nə saʼa n sad i kəbii i Yakɔb tə̀ mbi nə bə may. Saʼ i wi i nə may koʼ way.” 34Maria n bəb ndòw tə̀ tsəndəghə ə Kəzə̀ zey nə̀, “Zə i kaʼa tsu ngee nə n ka kam nyəŋi koʼ ghi weynum ə?” 35Tsəndəghə ə Kəzə̀ zey n beeli ndòw wi nə̀, “Zay kə Zow kə î tsuu bə n kow wɔ, daʼa K-a-zə̀ kə i tsət bə wɔ. À wey loʼ ghə i tii zə ghə î tɔŋɔnə waa u zow wey wə̀ i jiənə nə̀ a loʼ Waa Kəzə̀. 36Koʼo! Tiəm wə wən Elisabet ghə a dzanə nə̀ tə loʼ kəkàa, tə n waa bɔŋ nə tədənə, a nya loʼ təndzɔŋɔ tətuubə tə̀ tə â bɔŋnə. 37I dii tsu nə̀ ghə i loʼ i tsəm way ni tsəghəshi Kəzə̀.” 38Maria n beeli ndòw wi dza, “N loʼ wù kəfwaʼ a Bày, i doʼo tsu kə tə̀ wə̀ dzanə.” Sey, tsəndəghə ə Kəzə̀ zey n nuu tsu.
Maria bwey koʼ ndow Elisabet
39Tsuʼu mə n tsəghə i tsu, Maria n luumə kuumə kɔʼ ufə, nuu kɔʼ ndòw n naʼ i nii i loʼ zə n Judeya, zə â loʼnə nə ukaʼ. 40Ambə tə n ndòw nyi ndòwnə fu, tə n ndow n ndaw Zakalia, tɔŋɔ zow ndòw Elisabet. 41Ambə Elisabet zow tsunə tɔŋɔ zow i Maria zə, waa n soʼlə tsu n nəghə u wi. Zay kə Zow kə n tsu bə n kow wi. 42Sey Elisabet n dza ndòw tə̀ Maria n dzə̀ i taw zə nə̀, “Buulə i loʼ tə̀ wɔ n fəŋŋə kə agheyzən. Buulə i loʼ ghi waa wey wə̀ i jiənə.” 43“À shi kee n sə keelinə ndzoʼo kɔʼlə mən ə? N ndaa loʼ ndee tə̀ nay Mûkəbii ni bwey koʼ bə mə̀ ə? 44Nghee n zow tsunə dzə̀ zə, waa u duʼlə, soʼlə tsu n nəghə wùŋ.” 45“Buulə i loʼ ghi wɔ nghee wə̀ khənə bəghəm i fə̀ŋ zə nə̀ ghə zey Mûkəbii dzanə zə î bə doʼlənu isəŋə.”
Ndzaŋ a Maria
46Sey Maria n dzanə, “Fə̀ŋ zuŋ fuu kali u Bày, 47zay kuŋ kə duʼlənu ghi Zə̀ kə, tə loʼ bəghəshi wùŋ. 48Təŋkey tə ndaa mòʼlə bə soʼo mə, wù kəfwaʼ a wi. Ni zey tsu nya ndòw isə, num tə num, ghə̂ a nə zɔŋɔtsə buulə i Kəzə̀ zə n kow mə. 49Zaamə mbi n ghəŋə ghəə a nii ghə n kow mə. Zəd i wi i zownu. 50Sii i kwɔɔlə i wi zə î loʼ kow ghə̂ ghey ghə ngɔɔmənə wi nûm tə nûm. 51Tə n ghəŋə ndəmə ghəə a nii ghə n wɔɔ kə wi. Dzùm sàŋŋə maʼa ghə̂ ghey ghə khənə wû i ghaŋŋə zə n fə̀ŋ tə ghə. 52Tə n tsuulə ghə̂ ghey ghə loʼ nə də̀ŋ u nii wə n kuu u ghə, ney kɔʼlə naŋa kɔʼ ghə̂ ghey ghə tsuulə tsunə wû i ghə zə. 53Tə n chi ghə̂ ghey ghə â loʼnə n dzəŋ n fə u dzuŋu wə, kee dzùm dzəŋŋə ghə̂ a kùm ghə̀ n wɔ a zum ghə̀. 54Tə n gaamə shi ghə̂ a kəfwaʼ a wi ghə, tɔŋɔ ghə̂ ghə Izree tə̀ tə â dza naŋanə nə̀ i nə kwɔɔlənu sii zə n kow ghə, 55ighələ tə̀ tə â dza naŋanə tə̀ ghə bày a saa ghə nə i nə ghəŋŋə sey tə Abraham nsə waa a waa a wi ghə tə̀ mbi nə bə may.” 56Sey, Maria n doʼo tsu ghi Elisabet təndzɔŋɔ tətəghə, kəm nuu dzəŋŋə ndòw n ndàw wi.
Ji i Jɔn wù fuu u mmuu n Kəzə̀ mə
57Ambə nəŋə i kpii tsunə tə̀ Elisabet ni ji, tə n ji bə waa u num wə. 58Nghee tə sali i ndaw i wi nsə ghə̂ ghə ukɔli a wi a zow tsunə nə̀ Bày n ngii dii wi n sî i kwɔɔlə zə, ghə n duʼlə dzəŋi ghi wi. 59Ambə tsuʼu n tsəghə tsunə ifam, ghə̂ ghə n bə ni bə faalə waa, ghə n ləghə ni tsə̀ zəd i bày n kow wi nə a loʼ Zakalia. 60Zə̂ n dza ndow nə̀, “Ngaŋ! Zəd i wi zə i loʼ nə a loʼ Jɔn.” 61Ghə n dza tə̀ wi nə̀, “Wù loʼ way dzə n sad i ndaw i ghaa tə̂ khənə zəd zən.” 62Sey, ghə n fòʼlə tsu aghəə tə bày wi Zakalia n wɔɔ ni keeli tsu zəd zey tə ləghənə ni fu tə̀ waa. 63Tə n foʼlə tsu awɔɔ nə ghə fu bə wi n bad kamaʼlə. Ambə ghə fu ndownə, tə n tɔ̀ɔ tsu nə̀, “Zəd i wi i loʼ nə a loʼ Jɔn.” Dzuu zə n zum ghə. 64Dzuu i wi zə n daŋŋə chi kɔʼ, nyim kə wi kə ziilə tsu, tə n kaʼ ndow ni ghɔɔmə, fuu nkɔʼlə tə Zə̀ kə. 65Ghə̂ ghə ukɔli ghey n khə itsəŋ n fə̀ŋ tə ghə, ghə n ghɔɔmə kaabə tsə ghəə ghən n naʼa tey tə loʼnə nə ukaʼ n naʼ i Judeya idzəm. 66Ghə̂ ghey ghə â zownə ghəə a tii ghə, n ney naŋa n fə̀ŋ tə ghə. Ghə n bəbə nə̀ “Waa wən i bəghə doʼlə ndzoʼo wù ghaa wə ə?” Ghə â bəbə sey, n təŋkey, ghə â koʼ tsunə daʼa K-a-zə̀ kə loʼ n kow wi.
Ndzaŋ a Zakalia
67Sey, Zay kə Zow kə n tsu bə n kow bày wi tɔŋɔ Zakalia, tə n kaʼ ni ghɔɔmə dza, 68“Kɔʼlə n loʼ tə Bày, Zə̀ kə ghə̂ ghə Izree, kûmnə tə n bə ni bə bəghəshi ghə̂ a wi. 69Tə n fu saa n bəghəshi u nii wə. Wù nə tə shi n salli ndaw i wù kəfwaʼ a wi tɔŋɔ Devid, 70tə̀ tə â khə dza naŋanə tə̀ tûm tə Kəzə̀ tə wi tə zow tə n num tə ibam tə nə̀, 71Tə i bəghəshiə saa n wɔɔ kə ghə̂ a təngəmə a saa ghə nsə ghə̂ ghey ghə bàa nə saa. 72À wən loʼ ni dii bə sii i kwɔɔlə i Kəzə̀ tə̀ tə â dza naŋanə tə ghə bày a saa a sə̂ isə ghə. Tə n moʼlə kaa n zow mey tə â zə̂nə ghi ghə 73tɔŋɔ kaa mey tə â zə̂nə ghi Abraham bày saa u sə isə wə; 74nə tə î bəghəshi saa n wɔɔ kə ghə̂ ghey ghə bàanə saa, sey nə̀ a i loʼ ni fwaʼa tə wi nə tsəŋ i way, 75nə a i fwaʼa tə wi n fə̀ŋ tə zow tə, loʼ tsətsəghə n sə kə wi n tsuʼu ndzəm tə mbi nə bə may. 76Abə wɔ̀ n waa, ghə i tɔŋŋə wɔ nə̀ à loʼ wù tûm Zə̀ kə Idəŋ kə. Təŋkey, wə i ndòw dzə isə ni bayyə naŋa tsu jii tə Mûkəbii. 77Wə ghəŋə nə̀ ghə̂ a wi a keeli tsu nə̀ ghə î keeli ibəghəshi, abə Zə̀ kə neyzəənə ghəə a ghə a bəbə ghə. 78Zə i doʼlə sey, n təŋkey, Zə̀ kə saa kə khə fə̀ŋ zey i ngii khə sî i kwɔɔlə zə. Zə i ghəŋə nə̀ tsə̂ wə idəŋ u taw tsu bə n kow saa. 79Zə i ney bə luʼu tə zow tə tə̀ ghə̂ ghey ghə loʼnə nə kələm, nsə ghə̂ ghey ghə loʼnə tə̀ ghə nya sòʼo ivə. Zə i dii bə jii i dzuŋu zey i fuunə buulə zə tə saa.” 80Waa tii, tɔŋɔ Jɔn n nyim kɔʼ bə n wù, keeli tsu fə̀ŋ, ndow muu doʼo ndow n mbvən ə ntsaŋ ni ndòw kùm n nəŋə zey tə â kaʼnə ni naʼa tûm Kəzə̀ tə̀ ghə̂ ghə Izree ghə n mgbaŋ.
Currently Selected:
Lukas 1: WEH
Highlight
Share
Copy
Want to have your highlights saved across all your devices? Sign up or sign in
© 2022 CABTAL
Lukas 1
1
1Mûkəbii Tiofilos, nsə ndəmə tə aghə̂ tə n kùm fwaʼ ni koʼ nə̀ ghə tɔ̀ɔ naŋa tsu bə ghəə ghey ghə â shinə n fəŋŋə kə saa. 2Ghə â bɔɔmə tɔ̀ɔ ghəə ghey ghə â zownə, tə̀ nghee ghə̂ ghey ghə â koʼnə ghəə a tii ghə nə nzeyyə â naʼlənə. 3À wən loʼ ghə i tii zə a Mûkəbii, nghee n tɔ̀ʼ fwɔli kɔʼ bənə ghəə a tii ghə nə nzeyyə, mə n koʼ tsunə nə̀ i dzɔbənu nə̀ n faalə tɔ̀ɔ tsu bə ghəə a tii ghə tə wɔ, 4sey nə̀ wə tɔʼ keeli tsu isəŋə n ghəə ghey wə̀ khə dzənə.
Tsəndəghə ə Kəzə̀ naʼa bə ji i Jɔn wù fuu u mmuu Kəzə̀ mə
5N tsuʼu mey Helɔd â loʼ tsənə də̀ŋ kə n naʼ i Judeya, fɔɔngili u loʼ wə n loʼ tsə fu ghə tɔŋɔnə nə̀ a loʼ Zakalia. Tə â loʼ fɔɔngili n dəŋə kə Fɔɔngili Abijà. Zəd i wey wi zə â loʼ nə a loʼ Elisabet. Tə â shi bə soʼo n sad i ndaw i fɔɔngili tɔŋŋə Erɔn. 6Ghə n dzəŋi muu muu i dzuŋu zə n sə̂ K-a-zə̀, naŋŋə laŋ u Kəzə̀, khə way bwù i loʼ zə. 7Seykə, ghə n khə way waa təŋkey Elisabet â jiə way. Ghə n loʼ soʼo nə ghə n dən. 8Ambə nəŋə i kəfwaʼ i kpii tsunə tə sad i ndaw i fɔɔngili Zakalia ni fwaʼ, tə n ndòw n tsuʼ fə loʼ fə ni ndòw fwaʼ fwaʼ kə wi n sə̂ K-a-zə̀ tə a loʼ fɔɔngili. 9N doʼo i ghə fɔɔngili, ghə â təm mboʼ ni say wi nə tə̂ nyi ndow n Ndaw Kəzə̀ i nii zə n Yerosalem ə Bày, nsə ni daa inəŋ n tsə zey ghə fəələnə maʼlə wə tii. 10Ambə nəŋə zey tə̂ daanə nəŋ zə, nɔɔ kə aghə̂ kə n loʼ bii ghə gɔŋŋə. 11Sey, tsəndəghə ə Kəzə̀ n təmi bə n səə tsə zey ghə fəələnə maʼlə wə tii n bad kə kpii u wi u təmə wə. 12Ambə Zakalia koʼ ndòwnə wi, tə n taa vəi kɔʼ, kaʼ ni tsəŋ. 13Tsəndəghə ə Kəzə̀ zey n dza ndow tə wi nə̀, “Ka tsəŋ dzə a Zakalia. Zə̀ kə n zow gɔŋŋə zə zə̀. Wey wə Elisabet î jiə bə wɔ n waa u nûmwə, wə i tsə̀ tsu zəd i wi nə a loʼ Jɔn. 14Tə î ney bə wɔ n duʼlə zə nsə saŋəzə, ndəmə aghə̂ ghə i duʼlə soʼo n ji i wi. 15Zə î doʼlə sey, n təŋkey, tə î bə doʼlə wù nii wə n sə kə Mûkəbii. Kə tə nə məənə nlə n tawmə nkee fə u taw wə. Ni ney nuu bə n ji i wi, Zay kə Zow kə nə lòʼ n kow wi. 16Tə i ney dzəŋŋə bə fə̀ŋ tə ghə̂ ghə Izree tə̀ Bày Zə̀ kə ghə. 17Tə i bəghə n sə kə Bày. Tə i khə zay kə nsə daʼa kə, tə̀ tûm Kəzə̀ Elayja â khənə. Tə î bəghə təmə dzəŋi bə ghə bày nsə waa a ghə ghə̀. Tə i ney dzəŋŋə bə ghə̂ ghey ghə tawnə n tow kə tə Zə̀ kə, ghə kweyyə fə̀ŋ tə ghə, ghə keeli utɔb tə̀ a loʼ ghə̂ ghey ghə loʼnə tsətsəghə n sə̂ K-a-zə̀. Tə i bayyə naŋa tsu aghə̂ tə̀ Bày, tə î bəghənə.” 18Zakalia n bəb ndòw tə̀ tsəndəghə ə Kəzə̀ zey nə̀, “mə î sə loʼ ni keeli ngee nə̀ ghəə ghən ghə î bə neynu bənə kə ə? Koʼo, mə n dən, wey wùŋ n dən soʼo.” 19Tsəndəghə ə Kəzə̀ zey n beeli ndòw wi nə̀, “N loʼ Gabriya, wù tûm wey tə fwaʼa nə tə̀ Zə̀ kə, Zə̀ kə tûm mə nə̀ n bə naʼa bə tûm i dzuŋu zən tə̀ wɔ. 20Nghee wə bəghəmmə way ghɔɔmə zuŋ zən, wə î kəm khəə way ghəə ghə ni ndòw kùm n tsuʼ fey ghəə a tii ghə adzəm î neynə bənə kə tii. Ghəə ghən adzəm ghə î ney kəbənə n nəŋə ghə.” 21Ghə̂ ghə n sə̀ loʼ a bii, ləmmə kìi Zakalia, məʼlə fə key kə kwu naŋanə wi n fəŋ ə Ndaw Kəzə̀ i nii zey n Yerosalem. 22Ambə tə shi bə nə̀, tə n kəm way ni ghɔɔmə̀. Ghə n daŋŋə keelinə tə n koʼ faalə kə ighəə kə loʼ kə n fəŋ ə Ndaw Kəzə̀ i nii zə n Yerosalem. Sey, tə n ghɔɔmə tə̀ ghə nə tə foʼlə ndòw aghəə n wɔ. 23Ambə nəŋə i kəfwaʼ i wi i may tsunə, tə n fən dzəŋŋə ndòw n ndaw wi. 24Ghab kə n ka shi, wey wi tɔŋŋə Elisabet n bɔŋ kɔʼ waa. Tə n nyi doʼo ndòw n ndaw təndzɔŋɔ tətaa. 25Tə n dza n fəŋ ə wi nə̀, “À ghəə ghən ghəŋə Bày, tə dii bənə ləghə i wi zə tə̀ mə, ney nuu tow kə dədlə kə n kôw mə̀ n fəŋŋə kə aghə̂.”
Tsəndəghə naʼa ji i Yeso
26Ambə nəghə u Elisabet u kuum tsunə ndzɔŋɔ tə tətuubə, Zə̀ kə n tûm ndòw tsəndəghə ə Kəzə̀ u loʼ wə ghə â tɔŋŋə nə̀ a loʼ Gabriya n naʼ i loʼ zə n mboʼo Galili tɔŋɔ Nazaled. 27Tə â tûm wi tə̀ weyzən u loʼ wə tɔŋŋə Maria nə tə ka kam nyəŋi koʼ tsə ghi weynum, Yosef â nyi naŋanə n wey. Yosef â shi bə n sad i kəbii i Fɔɔ Devid. 28Tsəndəghə ə Kəzə̀ zey n ndòw n səə Maria dza tə̀ wi nə̀, “N tɔŋŋə zow bə wɔ a Maria, Bày n wɔ ləghə, tə u loʼ soʼo ghi wɔ.” 29Ghɔɔmə i tii zə n ngii fəmmə Maria n fə̀ŋ. Tə n məʼlə dza, “À wən loʼ ndzoʼo tɔŋɔ zow i ghaa zə ə?” 30Tsəndəghə ə Kəzə̀ zey n dza ndòw tə̀ wi nə̀, “Ka tsəŋ dzə a Maria, Zə̀ kə n wɔ ləghə, fu wɔ n naamə kə. 31Wə̀ i bɔŋɔnu, wə̀ i ji bə waa u num wə. Wə̀ i tsə̀ tsu zəd i wi nə̀ a loʼ Yeso. 32Tə i bə doʼlə wù nii wə, ghə i tɔŋŋə wi nə̀ a loʼ Waa Zə̀ kə Idəŋ kə. Bày Zə̀ kə Mbi î fu wi n kuu kadə̀ŋ kə bày wi kə, tɔŋɔ Devid. 33Tə nə saʼa n sad i kəbii i Yakɔb tə̀ mbi nə bə may. Saʼ i wi i nə may koʼ way.” 34Maria n bəb ndòw tə̀ tsəndəghə ə Kəzə̀ zey nə̀, “Zə i kaʼa tsu ngee nə n ka kam nyəŋi koʼ ghi weynum ə?” 35Tsəndəghə ə Kəzə̀ zey n beeli ndòw wi nə̀, “Zay kə Zow kə î tsuu bə n kow wɔ, daʼa K-a-zə̀ kə i tsət bə wɔ. À wey loʼ ghə i tii zə ghə î tɔŋɔnə waa u zow wey wə̀ i jiənə nə̀ a loʼ Waa Kəzə̀. 36Koʼo! Tiəm wə wən Elisabet ghə a dzanə nə̀ tə loʼ kəkàa, tə n waa bɔŋ nə tədənə, a nya loʼ təndzɔŋɔ tətuubə tə̀ tə â bɔŋnə. 37I dii tsu nə̀ ghə i loʼ i tsəm way ni tsəghəshi Kəzə̀.” 38Maria n beeli ndòw wi dza, “N loʼ wù kəfwaʼ a Bày, i doʼo tsu kə tə̀ wə̀ dzanə.” Sey, tsəndəghə ə Kəzə̀ zey n nuu tsu.
Maria bwey koʼ ndow Elisabet
39Tsuʼu mə n tsəghə i tsu, Maria n luumə kuumə kɔʼ ufə, nuu kɔʼ ndòw n naʼ i nii i loʼ zə n Judeya, zə â loʼnə nə ukaʼ. 40Ambə tə n ndòw nyi ndòwnə fu, tə n ndow n ndaw Zakalia, tɔŋɔ zow ndòw Elisabet. 41Ambə Elisabet zow tsunə tɔŋɔ zow i Maria zə, waa n soʼlə tsu n nəghə u wi. Zay kə Zow kə n tsu bə n kow wi. 42Sey Elisabet n dza ndòw tə̀ Maria n dzə̀ i taw zə nə̀, “Buulə i loʼ tə̀ wɔ n fəŋŋə kə agheyzən. Buulə i loʼ ghi waa wey wə̀ i jiənə.” 43“À shi kee n sə keelinə ndzoʼo kɔʼlə mən ə? N ndaa loʼ ndee tə̀ nay Mûkəbii ni bwey koʼ bə mə̀ ə? 44Nghee n zow tsunə dzə̀ zə, waa u duʼlə, soʼlə tsu n nəghə wùŋ.” 45“Buulə i loʼ ghi wɔ nghee wə̀ khənə bəghəm i fə̀ŋ zə nə̀ ghə zey Mûkəbii dzanə zə î bə doʼlənu isəŋə.”
Ndzaŋ a Maria
46Sey Maria n dzanə, “Fə̀ŋ zuŋ fuu kali u Bày, 47zay kuŋ kə duʼlənu ghi Zə̀ kə, tə loʼ bəghəshi wùŋ. 48Təŋkey tə ndaa mòʼlə bə soʼo mə, wù kəfwaʼ a wi. Ni zey tsu nya ndòw isə, num tə num, ghə̂ a nə zɔŋɔtsə buulə i Kəzə̀ zə n kow mə. 49Zaamə mbi n ghəŋə ghəə a nii ghə n kow mə. Zəd i wi i zownu. 50Sii i kwɔɔlə i wi zə î loʼ kow ghə̂ ghey ghə ngɔɔmənə wi nûm tə nûm. 51Tə n ghəŋə ndəmə ghəə a nii ghə n wɔɔ kə wi. Dzùm sàŋŋə maʼa ghə̂ ghey ghə khənə wû i ghaŋŋə zə n fə̀ŋ tə ghə. 52Tə n tsuulə ghə̂ ghey ghə loʼ nə də̀ŋ u nii wə n kuu u ghə, ney kɔʼlə naŋa kɔʼ ghə̂ ghey ghə tsuulə tsunə wû i ghə zə. 53Tə n chi ghə̂ ghey ghə â loʼnə n dzəŋ n fə u dzuŋu wə, kee dzùm dzəŋŋə ghə̂ a kùm ghə̀ n wɔ a zum ghə̀. 54Tə n gaamə shi ghə̂ a kəfwaʼ a wi ghə, tɔŋɔ ghə̂ ghə Izree tə̀ tə â dza naŋanə nə̀ i nə kwɔɔlənu sii zə n kow ghə, 55ighələ tə̀ tə â dza naŋanə tə̀ ghə bày a saa ghə nə i nə ghəŋŋə sey tə Abraham nsə waa a waa a wi ghə tə̀ mbi nə bə may.” 56Sey, Maria n doʼo tsu ghi Elisabet təndzɔŋɔ tətəghə, kəm nuu dzəŋŋə ndòw n ndàw wi.
Ji i Jɔn wù fuu u mmuu n Kəzə̀ mə
57Ambə nəŋə i kpii tsunə tə̀ Elisabet ni ji, tə n ji bə waa u num wə. 58Nghee tə sali i ndaw i wi nsə ghə̂ ghə ukɔli a wi a zow tsunə nə̀ Bày n ngii dii wi n sî i kwɔɔlə zə, ghə n duʼlə dzəŋi ghi wi. 59Ambə tsuʼu n tsəghə tsunə ifam, ghə̂ ghə n bə ni bə faalə waa, ghə n ləghə ni tsə̀ zəd i bày n kow wi nə a loʼ Zakalia. 60Zə̂ n dza ndow nə̀, “Ngaŋ! Zəd i wi zə i loʼ nə a loʼ Jɔn.” 61Ghə n dza tə̀ wi nə̀, “Wù loʼ way dzə n sad i ndaw i ghaa tə̂ khənə zəd zən.” 62Sey, ghə n fòʼlə tsu aghəə tə bày wi Zakalia n wɔɔ ni keeli tsu zəd zey tə ləghənə ni fu tə̀ waa. 63Tə n foʼlə tsu awɔɔ nə ghə fu bə wi n bad kamaʼlə. Ambə ghə fu ndownə, tə n tɔ̀ɔ tsu nə̀, “Zəd i wi i loʼ nə a loʼ Jɔn.” Dzuu zə n zum ghə. 64Dzuu i wi zə n daŋŋə chi kɔʼ, nyim kə wi kə ziilə tsu, tə n kaʼ ndow ni ghɔɔmə, fuu nkɔʼlə tə Zə̀ kə. 65Ghə̂ ghə ukɔli ghey n khə itsəŋ n fə̀ŋ tə ghə, ghə n ghɔɔmə kaabə tsə ghəə ghən n naʼa tey tə loʼnə nə ukaʼ n naʼ i Judeya idzəm. 66Ghə̂ ghey ghə â zownə ghəə a tii ghə, n ney naŋa n fə̀ŋ tə ghə. Ghə n bəbə nə̀ “Waa wən i bəghə doʼlə ndzoʼo wù ghaa wə ə?” Ghə â bəbə sey, n təŋkey, ghə â koʼ tsunə daʼa K-a-zə̀ kə loʼ n kow wi.
Ndzaŋ a Zakalia
67Sey, Zay kə Zow kə n tsu bə n kow bày wi tɔŋɔ Zakalia, tə n kaʼ ni ghɔɔmə dza, 68“Kɔʼlə n loʼ tə Bày, Zə̀ kə ghə̂ ghə Izree, kûmnə tə n bə ni bə bəghəshi ghə̂ a wi. 69Tə n fu saa n bəghəshi u nii wə. Wù nə tə shi n salli ndaw i wù kəfwaʼ a wi tɔŋɔ Devid, 70tə̀ tə â khə dza naŋanə tə̀ tûm tə Kəzə̀ tə wi tə zow tə n num tə ibam tə nə̀, 71Tə i bəghəshiə saa n wɔɔ kə ghə̂ a təngəmə a saa ghə nsə ghə̂ ghey ghə bàa nə saa. 72À wən loʼ ni dii bə sii i kwɔɔlə i Kəzə̀ tə̀ tə â dza naŋanə tə ghə bày a saa a sə̂ isə ghə. Tə n moʼlə kaa n zow mey tə â zə̂nə ghi ghə 73tɔŋɔ kaa mey tə â zə̂nə ghi Abraham bày saa u sə isə wə; 74nə tə î bəghəshi saa n wɔɔ kə ghə̂ ghey ghə bàanə saa, sey nə̀ a i loʼ ni fwaʼa tə wi nə tsəŋ i way, 75nə a i fwaʼa tə wi n fə̀ŋ tə zow tə, loʼ tsətsəghə n sə kə wi n tsuʼu ndzəm tə mbi nə bə may. 76Abə wɔ̀ n waa, ghə i tɔŋŋə wɔ nə̀ à loʼ wù tûm Zə̀ kə Idəŋ kə. Təŋkey, wə i ndòw dzə isə ni bayyə naŋa tsu jii tə Mûkəbii. 77Wə ghəŋə nə̀ ghə̂ a wi a keeli tsu nə̀ ghə î keeli ibəghəshi, abə Zə̀ kə neyzəənə ghəə a ghə a bəbə ghə. 78Zə i doʼlə sey, n təŋkey, Zə̀ kə saa kə khə fə̀ŋ zey i ngii khə sî i kwɔɔlə zə. Zə i ghəŋə nə̀ tsə̂ wə idəŋ u taw tsu bə n kow saa. 79Zə i ney bə luʼu tə zow tə tə̀ ghə̂ ghey ghə loʼnə nə kələm, nsə ghə̂ ghey ghə loʼnə tə̀ ghə nya sòʼo ivə. Zə i dii bə jii i dzuŋu zey i fuunə buulə zə tə saa.” 80Waa tii, tɔŋɔ Jɔn n nyim kɔʼ bə n wù, keeli tsu fə̀ŋ, ndow muu doʼo ndow n mbvən ə ntsaŋ ni ndòw kùm n nəŋə zey tə â kaʼnə ni naʼa tûm Kəzə̀ tə̀ ghə̂ ghə Izree ghə n mgbaŋ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022 CABTAL