Lukas 12

Ikpaa kûm nəb ityim

(Mat 10.26-27)

1Nghee tə̀ nɔɔ kə aghə̂ kə təŋŋə bənə, bwùlə bə n kow awaazə, Yeso n kaʼ tsu dzə ni ghɔɔmə tə̀ dzûmə tə wi tə dza, “Ney na ghə̂mə zə n ghə̂ a tə Falasi, a loʼ ghə nəb ityim. 2Abə ghə i tsət doʼo kə ngee zə i bə doʼlənu təghə, abə i nyi doʼo kə ngee zə i bə doʼlənu n mgbaŋ. 3Sey ghə i ghaa zə ghaa dzanə nə kələm, zə̀ i shiə bənu n sə a zow ghə, i ghaa zə ghaa i tsɔŋ dzanə n fəŋ ə ndaw ghə i naʼa shiə kɔʼɔnu tə̀ ghə̂ adzəm a zow.

Wù wey a khənə ni tsəŋ

(Mat 10.26-27)

4N dza bə tə̀ ghaa a fə ghuŋ ghə, kə ghaa nə tsəŋənə ghə̂ ghey ghə weynə wû u wù wə, kəm khə way ghə̂ i loʼ zə ni ghəŋə ghi muu i wù zə. 5N dza n dza bə tə̀ ghaa ndzoʼo wù wey ghaa khənə ni tsəŋ. I tsəŋə na Zə̀ kə, n təŋkey, tə khə kədaʼa ni wey tsu wù, tə kəm ney kɔʼ zay kə wi, tə maʼa ndòw nə uvəllə, a wən loʼ wù wən ghaa khənə ni tsəŋ. 6Tə̂ ghə mgbaŋa fiilə ughala utaa nə ntwɔllə nbəghə. Seykə Zə̀ kə tsəmə neyzəə way ghala kə loʼ kə. 7Kuum kuum sa, kasə̀ nyuŋ tə kətow tə ghaa, Zə̀ kə khənu taŋa tii, sey, kə ghaa nə tsəŋənə ghə i loʼ zə təŋkey ghaa tsəghəshinu ndəmə ghala wən a kòʼonə tə̀ Zə̀ kə.

Ka i dədlə tow kə n ghəə a Yeso

(Mat 10.32-33; 12.32; 10.19-20)

8N kûm dza bə isəŋə tə̀ ghaa nə̀, wù wey tə bəghəmnə mə n sə kə aghə̂, Waa wù sɔŋtsuʼ i bəghəm soʼonu wi nsəkə tsətəndəghə tə Kəzə̀. 9Wù wey tə tuu maʼanə mə n sə kə aghə̂, Waa wù sɔŋtsuʼ i tuu maʼa soʼonu wi nsəkə tsətəndəghə tə Kəzə̀. 10Wù wey tə ghɔɔmə bəəbənə ghəə ghə n kow Waa wù sɔŋtsuʼ, Zə̀ kə i loʼnu ni neyzəə wi, wù wey tə kee ghɔɔmə bəəbənə ghəə ghə n kow Zay kə Zow kə, Zə̀ kə i neyzəə way wi. 11Abə ghə ney bənə ghaa n səə ngəd tə saʼa tə təsaʼ tə n ndaw kədzəŋi ni saʼ ghaa, kə ghaa nə fəmənə wû i ghaa zə ni moʼlə zeeli ghə zey ghaa i dzanə fu. 12Təŋkey Zay kə Zow kə i diinu tə̀ ghaa, ghəə zey ghaa khənə ni dza.”

Zəzəə fə fənkəfən bòʼ wù kuum u laʼlə wə

13Wù umɔʼ n fəŋŋə kə aghə̂ key n dza shi kɔʼ nə̀, “Wù dii, kələ wɔ, dza nə̀ waazə wùŋ wən dzaw bə fə u bày ghey wey ghi mə.” 14Yeso n beeli ndòw wi nə̀, “Â towbəghə a fu ndee mə n daʼa kə tii kə nə n doʼo wù wey n saʼanə nkee n dzaw fuunə fə u ghaa wə?” 15Yeso n dza ndòw tə̀ ghə nə̀, “Ney kɔʼ na ghə̂mə zə n ləghə i fə u mbi, n təŋkey ghə muu i wù i taŋa way n ndəmə tə ufə tey tə khənə.” 16Sey tə n dza ndòw ghə n zəzəə fə fənkəfən fə loʼ fə nə̀, “Sûm u wù kuum u loʼ wə a ngii dzɔbənu. 17Tə n kaʼ ni moʼlə n fəŋ ə wi dza, ‘Mə i jiə ngee nsə n fə wən n sə khə way luʼu kə ni zaa may fəzəə wùŋ wən ə?’ 18Ahaa! Mə n moʼlə, mə i saʼa dzəŋŋə tsu saŋ kpaa wùŋ, N bəghə kɔʼ u nii wə tə̀ n loʼ ni zaa may səb ghuŋ n naŋa soʼo fə wùŋ u loʼ wə. 19Abə n fwaʼ may tsunə ghəə ghən, mə i daŋŋə kaali tsu wû wuŋ nə̀, ‘mbwɔɔ, wə̀ tsəm khə ndəmə ufəzəə, ni zə n ndəmə tənum. Zə̀ələ doʼo tsu izəzə, wə i zəə, zow kədzuŋ.’” 20Zə̀ kə n dza tə̀ wi nə̀, “Dzəŋsə k-a-fə kən, na sa n tsuʼu tə n ney nuulə zay kə, sey a i kòʼ nə à keeli ndee ndəmə tə ufə tən wə̀ fwaʼ naŋanə?” 21“À wən loʼ nghee i loʼnə tii ghi wù wey tə zuŋŋə naŋanə ndəmə ufə, fwaʼa way fwa K-a-zə̀ kə.”

Gaʼ fəŋ n kow Zə̀ kə

(Mat 6.25-34)

22Yeso n dza ndòw tə̀ dzûmə tə wi tə nə̀, “N dza bə tə ghaa nə kə̂ ghaa nə ngii baŋŋə fəŋ bòʼ muu i ghaa. Kə̂ ghaa nə baŋŋənə fəŋ nə̀, ‘mə i zəə kee nkee mə i dzəŋŋə kee n wû wùŋ ə?’ 23Təŋkey muu i tsəghəshi ufəzəə, vən fə uwû fə wù fə u tsəghəshi ndzə̂ tə. 24Koʼo na ŋɔɔŋɔɔ wə, u zəghə way fə wə, kpey naŋŋə way fəzəə u loʼ wə n luʼu kə loʼ kə. Seykə, Zə̀ kə u fuunə ghə n fəzəə wə. Ghaa tsəghəshinu nnən mə. 25À loʼ ndee fa n mbi tə loʼ ni kuu kpiʼi nyaŋi fə inəŋə n muu i wi abə tə baŋŋə fəŋ n muu i wi ə? 26Abə ghaa way ni ghəŋə nyanyi fə ighəə tə à loʼ i zən, ghaa sə wû i ghaa i fəmmə n fə u loʼ wey nə̀ a loʼ kee? 27Koʼo na nghee tə tsaŋ u ji u nyimnə tii, ghə fwaʼa way, falə way ndzə tə ghə tə, seykə, kasə̀ Solomun n ghaʼ i wi zə idzəm tə n way ni lab dzɔb uwû tə̀ a loʼ ghə. 28Abə Zə̀ kə loʼnə ni laalə dzɔb tə̀ tsaŋ u ji wən u nyimnə na ambə tsətsə nə ghə n kpəghə maʼa nə uvəllə, tə î sə boʼo labə ngee ghaa? Ghaa ngiʼi khə nyaŋi fə bəghəm i fə̀ŋ. 29Kə ghaa nə̂ fəmənə wû i ghaa zə bòʼ fə key ghaa i zəənə nkee fə key ghaa i məənə, 30təŋkey, ghə̂ a tətum n mbi a fa nyəŋə kaabə tsə n baa fə u tii wə, zə i loʼnə nə̀ Bày ghaa idəŋ khənu nə ghaa ləghənu fə u tii wə. 31Ghaa khə ni fəd kəŋ ndòw dzə fɔɔ u Kəzə̀, Zə̀ kə i ngəŋə fuu ghaa n fə wən udzəm. 32Sey, kə̂ ghaa nə tsəŋənə, abə ghaa təbə kənə, n təŋkey Bày ngii duʼlənu ni fu ghaa n fɔɔ u wi. 33Fii na fə u ghaa wə, ghaa i fuu ndòw khəə u tii wə tə̀ ghə̂ a laa ghə. Kəŋ tsu na mbəghə wə ukhəə wən u dənə way, ghaa nyi naŋa ndòw fə u ghaa idəŋ, n təŋkey tsɔŋ u way fu tə̀ ghə loʼ ni tsɔŋ nkee sə̂soʼo tə̀ loʼ ni bəəbə maʼa. 34Keeli tsu na nə̀, luʼu key fə u wù u loʼnə tii, fə̀ŋ ə wi î doʼlə soʼo fu.

Dzûmə tə khə ni lə̀mə tə̀nə Mûkəbii ə ghə

35Ndzuŋŋə tsu na wû i kəfwaʼ zə, ghaa daa naŋa tsu udaa 36tə̀ a loʼ ghə̂ a kəfwaʼ ghey ghə ləmmənə mûkəbii ə ghə nə̀ abə tə dzəŋŋə bənə n luʼu kamali, bə buʼ tsu fuʼ u ndaw, ghə i zaŋə chi tsu tə̀ wi. 37A i loʼ ghə i dzuŋu zə tə̀ ghə̂ a kəfwaʼ ghey mûkəbii ə ghə i kwɔɔlə bənə ghə nə̀ ghə loʼ n luʼu k-a-fwaʼ abə tə i dzəŋŋə bənə. N kûum dza bə isəŋə nə̀ tə i ndzuŋŋə tsu uwû tə bə fuu ghə n fəzəə wə. 38Ndzuŋ î loʼ tə̀ ghə̂ a kəfwaʼ ghey mûkəbii î bəghə kwɔlənə nə̀ ghə nam loʼ kə idəŋ ghə ləmənə wi, abə tə bə kə n nəŋə i ghaa zə, n fəŋ ə tsuʼu tə nkee n tsuʼ u zowwə̀. 39Keeli tsu na nə̀, abə mûkəbii mə khənə nəŋə zey wù tsɔŋɔ bəghənə tii, tə̂ tə ka bəghəm nə̀ ghə tsɔŋ ndaw wi. 40Sey ghaa khə ni ndzuŋŋə tən tsu wû i ghaa, boʼnə ghaa khə way nəŋə zey Waa wù sɔŋtsuʼ loʼ ni bə tii.”

Zəzəə fə fənkəfən kuum wù kəfwaʼ u dzuŋu wə ghi u bəbə wə

(Mat 24.45-51)

41Pita n bəb ndòw tə̀ wi nə̀, “Mûkəbii, wə̀ zəzəə fə fənkəfən fən khəə tə̀ ghey mɔ tə̀ ghə̂ ghə adzəm?” 42Mûkəbii n beeli ndòw wi nə̀, “Wù kəfwaʼ u sə̀ŋi u loʼ wù wey tə khənə tow kə, tə̀ mûkəbii wi loʼ ni gaʼ fə̀ŋ n kow wi, tə ney naŋa wi tə a loʼ wù kətow nə tə i nyaŋə fə u ghə̂ a kəfwaʼ a loʼ ghə, nsə ni fu soʼo ghə n fəzəə wə n nəŋə i ghə i zə̂ə zə. 43Ndzuŋ i loʼ tə̀ wù kəfwaʼ wən mûkəbii î bəghə kwɔllənə wi nə̀ tə fwaʼa dzɔbə fwaʼ kə wi. 44N kùm dza bə tə ghaa nə̀ mûkəbii wey i kɔʼlə naŋa kɔʼɔ wi nə̀ tə i laalə tə̀ fə u wi wə udzəm. 45Abə wù kəfwaʼ wey dza tsunə n fə̀ŋ ə wi nə̀, ‘Mûkəbii wùŋ i loʼlənu n bwey i wi,’ kaʼ ndòw ghə̂ a kəfwaʼ a loʼ ghey nə u bwɔdlə wə, agheynum nsə gheyzən ghə ighəllə, maŋa zəə i wi zə, məə khəə bə nlə. 46Mûkəbii wey î ndòw bəghə n tsuʼ fə loʼ fə nə̀ wù kəfwaʼ wey khə way, n nəŋə zey tə mə mòʼlə way nə̀ tə loʼ ni bə tii, tə i fuu wi n fən mə, tə ney təm naŋa dzəŋi ndòw wi ghi ghə̂ a bəbə ghə. 47Wù kəfwaʼ wey tə khənə ghəə ghey mûkəbii ə wi ləghənə, ka kee fwaʼ tə̀ tə mə̀ khənə ni fwaʼ î ndəŋə məə n fən. 48Abə tə wey tə khə way ghə zey mûkəbii ləghənə, ghəŋə bəəbə tsu n ghəə à loʼ ghə, tə î məə nyaŋi fə n fən, n təŋkey wù wey ghə ndəŋ funə wi n fə wə, tə i sey khə ni fu dzəŋŋə soʼo ndəm. Abə tə wey ghə fu naŋanə ndəmə ufə nə̀ tə i laalə, ghə î sey tsaʼa soʼo ndəmə aghəə n wɔ wi.

Ghə̂ ghə î dzawwə uwû bòʼ Yeso

(Mat 10.34-36)

49N bə fa n mbi ni bə daa təluʼu nə uvələ, tə i mə fa loʼ nə tə nya bəʼlənu. 50A loʼ kə nə̀, N nam khə ndəm uchɔd ni koʼ isə tə̀ wù nə ney mmuu n Kəzə̀ mə n dzuu. Mə i sa loʼ kə nə imôw ni ndòw kùm n nəŋə zey zə maynə tii. 51Ghaa moʼlə nə̀ n fa bə mbi ni bə fu ibuulə ə? Ngaŋ! N bə ni bə ghəŋə nə̀ ghə̂ a dzawwə doʼo. 52Sey, ni zey tsu nya ndòw isə aghə̂ n ndaw imɔʼ ghə i tsɔbə tow wə n wû i ghə, nə a loʼ aghə̂ ataa n ndaw imɔʼ, aghə̂ atəghə ghə zùulə ballə ghə̂ ghə abəghə. 53A wey loʼ nghee zə i doʼlənə tii, bày nə dəmə ghi waa wi u num wə, waa u num u nə dəmə ghi bày. Nay nə dəmə soʼo ghi waa wi u zən wə, waa u zən u nə dəmə ghi zə̂. Inum nə dəmə ghi wey waa wi, wey waa nə dəmə ghi inum wi.” 54Yeso n kəm dza ndòw tə̀ nɔɔ key nə̀, “Abə ghaa kòʼnə mbaʼ tə kɔʼɔnə n bad key nyî i nyiətsunə tii, ghaa n daŋŋə dza nə̀, ‘ghow zə î tsunu na,’ zə n teeli tsu soʼo. 55Abə ghaa koʼnə zəŋ ə bad kə itən kə, ghaa n dza, ‘tsə̂ wə î zeeli nu na,’ zə n teeli doʼo kə sey. 56Ghə nəb ityim ghən, ghaa khə kə ni tiilə kòʼ i ghəlikətsə nsə bikighow kə, a kee loʼ kee ghaa sə̂ way ni tiilə dza ghəə ghən a tsəghənə nya a? 57Ghaa nə saʼa n wû i ghaa, ghəə zey i kpiinə. 58Abə wə ndòwnə n ndaw tsə ghi wù wey wə̀ khənə saʼ ghi wi, dəm tsu nə wə bayyə nuu tsu ghə i tii zə n ji. Bə a way sey, ghə i ney fu ndòw wɔ̀ tə̀ wù saʼa u təsaʼ wə, tə i ney fu tsəghə ndòw wɔ̀ tə̀ sawgoʼ tə, ghə i ney fii naŋa ndòw wɔ̀ n ndaw tsaʼ. 59N sa kûm dza bənu, nə abə i doʼo tsunə sey, wə i shi way n ndaw tsaʼ nə wə ka tsə may ndaŋ kə kə̀.”

Currently Selected:

Lukas 12: WEH

Highlight

Copy