Lukas 6

Yeso loʼ Də̀ŋ kə tsuʼ inaʼ

(Mat 12.1-8; Mak 2.23-28)

1N tsuʼ inaʼ u ghə̂ a Təjuu u loʼ wə, Yeso n bwey tɔɔlə ndòw n sûm zə asaŋ i loʼ zə. Dzûmə tə wi tə n kpey bə tow wə asaŋ, foʼo tsu n wɔ, fəə bə. 2Ghə̂ a tə Falasi a loʼ ghə n bəb ndòw tə ghə nə̀, “A loʼ kee ghaa ghəŋə ghəə ghən n tsuʼ inaʼ ə, nə a loʼ sey Laŋ kə saa kə̀ ka bəghəm naŋa?” 3Yeso n beeli ndòw ghə dza, “I sey dii nə̀ ghaa ka kam tɔŋŋə koʼ tsə ghəə ghey fɔɔ Devid nsə ghə̂ a wi ghə â ghəŋənə nghee dzəŋ â zabənə ghə ə? 4Nghee tə̀ tə â nyi ndòwnə n ndaw Kəzə̀, ney kɔʼ baa K-a-zə̀ key laŋ kə â diinə nə̀ â khə kə ghə fɔɔngili ni zə, zə kɔʼ ghi ghə̂ a wi ghə.” 5Ni gûŋ kɔʼ, Yeso n dza tə ghə nə̀, “Waa wù sɔŋtsuʼ loʼ Də̀ŋ kə tsuʼ inaʼ.”

Yeso baŋŋə wù nə kpii kə n kpu doʼo

(Mat 12.9-14; Mak 3.1-6)

6Ambə n tsuʼ inaʼ u ghə̂ a Təjuu u loʼ wə, Yeso n loʼ n ndaw kədzəŋi tə diinə, wù loʼ n loʼ fu nə kpi kə wi kə zəə kə n kpu doʼo. 7Ghə̂ a tə Falasi nsə ghə̂ a dii a kəlaŋ ghə n loʼ fu, ghə n tɔ̀ʼɔ laalə Yeso ni koʼ nə̀ tə i baŋŋənu wù n tsuʼ inaʼ tə̀ ghə kwu wi nə̀ tə bwù kəlaŋ. 8Yeso n loʼ nə tə n zowkeeli moʼlə tə ghə tə, tə n dza ndòw tə̀ wù wey kpi kə â kpu doʼonə nə̀, “Nuu kɔʼ, wə təmi shi bə fa isə.” Tə n daŋŋə nuu kɔʼ, təmi shi i ndòw. 9Yeso n dza ndòw tə ghə nə̀, “N dza n bəb bə tə̀ ghaa nə̀, Laŋ kə saa kə dza nə̀ ngee bòʼ tsuʼ inaʼ a? Nə a i ghəŋə ghəə a dzuŋu ghə mɔ a bəbə ghə ə? Nə a bəghəshi muu i wù mɔ nə a bəəbə maʼa?” 10Tə n laalə tsəghə ndòw aghə̂ adzəm, dza ndòw tə wù wey nə̀, “Naalə shi ndòw wɔɔ kə kə̀.” Tə n naalə shi i ndòw. Wɔkə wi kə n daŋŋə taw doʼo bə. 11Ghə̂ ghey n fəələ ndòw n nəghə, kaʼ ni ghɔɔmə n wû i ghə dza, “Ghə loʼ ni baa ji ngee ghi Yeso ə?”

Yeso say Tsətəndəghə tə wi

(Mat 10.1-4; Mak 3.13-19)

12Ambə n tsuʼ fə loʼ fə, Yeso n nuu kɔʼ ndòw nə ukaʼ ni ndòw gɔŋŋə, gɔŋŋə bweeli ndòw tsuʼ fə tii fə tə Zə̀ kə. 13Ambə tsuʼ u zow tsunə, tə n tɔŋɔ bə dzûmə tə wi, sày kɔʼ tow u ghə ighəm nsə ghə̂ ghə abəghə nə ghə doʼo ngəd tə wi. 14Ghə â loʼ; Shimun tə wən tə â tsə̀ tsu zəd i wi zə nə̀ a loʼ Pita, ghi waazə wi Andria; Jem ghi Jɔn, Filip ghi Batolomio; 15Matiə ghi Tɔmɔs; Jem waa Afus, nsə Shimun wən ghə â tɔŋŋə soʼonə wi nə̀ à loʼ wù wən tə ngii ləghənə naʼ i wi zə; 16Judas waa Jem, nsə Judas Iskariɔt, tə â fiinə Yeso.

Yeso dii aghəə, baŋə soʼo aghə̂

(Mat 5.1-12)

17Ambə Yeso nuu tsu bənə nə ukaʼ ghi tsətəndəghə tə wi tə, tə n tey n bəghə i loʼ zə, nɔɔ kə dzûmətə wi kə n loʼ fu, nsə ndəmə ghə̂ a loʼ ghə ghə â nuu bənə n Judeya, Yerosalem, n nguŋ i Tayra, nsə n Sidɔn. 18Ghə â bə ni bə zow ghɔɔmə i wi nsə ni baŋə wû i ghə. Yeso n baŋə ghə, baŋə soʼo ghə̂ ghey zay u bwu wə â fəmmənə ghə. 19Ghə̂ ghə n dəmə ni mɔm wi təŋkey daʼa kə â shiə bə n kow wi baŋə aghə̂ adzəm.

Iduʼlə nsə mow zə

(Mat 5.1-12)

20Yeso n laalə ndòw dzûmə tə wi, dza tə̀ ghə nə̀, “Buulə i loʼ tə ghaa ghey ghaa laanə, n təŋkey, fɔɔ u Kəzə̀ u loʼ u ghaa wə̀. 21Buulə i loʼ tə̀ ghaa ghey dzəŋ zabənə ghaa nya, n təŋkey, ghaa i zəə kownu. Buulə i loʼ tə̀ ghaa ghey ghaa deynə nya, n təŋkey ghaa i tsoʼonu. 22Buulə i loʼ tə̀ ghaa ghey ghə bàanə ghaa, dzùm ghaa, kpaalə ghaa, khəə ghəə a bwù ghə n zəd a ghaa bòʼ Waa wù sɔŋtsuʼ. 23Ghaa khə ni duʼlə, bənə, abə ghəə a shiənə sey ghi ghaa, n təŋkey naamə kə ghaa kə i downu idəŋ. Təŋkey, ghə bày a ghə â fwaʼa soʼo sey ghi tûm tə Kəzə̀ tə. 24Chɔt u loʼ tə̀ ghaa ghey ghaa kuumnə nya təŋkey ghaa n keeli may ndzuŋ ə ghaa. 25Chɔt u loʼ tə ghaa ghey ghaa zəə kownə nya təŋkey nəŋə zə i bəghənu ghaa i loʼ n dzəŋ. Chɔt u loʼ tə ghaa ghey ghaa tsoʼonə nya təŋkey ghaa nə mownu, ghaa i deyyə. 26Chɔt u loʼ tə̀ ghaa ghən ghə ghɔɔmənə ghəə à dzuŋu ghə bòʼ ghaa nya təŋkey a loʼ soʼo sey ghə bày a ghə ghə â ghəŋənə ghi tûm tə Kəzə̀ tə tsɔŋɔ tə.

Iləghə na ghə̂ a təngəmə a ghaa ghə

(Mat 5.38-48; 7.12a)

27N dza bə tə̀ ghaa nə̀, ghaa khə ni ləghə ghə̂ a təngəmə a ghaa ghə, ghəŋə ndzuŋ tə ghə̂ ghey ghə bàanə ghaa. 28I fuu buulə zə tə̀ ghə̂ ghey ghə tsɔɔmənə ghaa, gɔŋŋə tə ghə̂ ghey ghə chɔdlɔnə ghaa. 29Abə wù bwɔd nyi ndòwnə wɔ̀ nə kədzòʼ, dii may ndòw kə loʼ key tə bwɔd soʼo. Nə̀ wù ney nuu sàŋ zə, fu may ndòw wi n danchiki fə tə keeli. 30Abə a loʼ kə ndee tə nɔɔnə fə kə kə̀, fu ndòw. Nə̀ wù loʼ bə bəkeeli ndòw fə kə, ka bəb dzəŋŋə dzə. 31I ghəŋə ndòw ghəə ghə tə ghə̂ ghə ighələ tə̀ wə ləghənə nə̀ ghə i ghəŋə tə̀ wɔ̀. 32Abə wə̀ ləghə kə ghə̂ ghey ghə ləghənə wɔ̀, wə̀ i zəə kee tii? Ghə̂ a bəbə a ngəŋə ləghə soʼo ghə̂ ghey ghə ləghənə ghə. 33Abə wə ghəŋə kə ndzuŋ tə̀ ghə̂ ghey ghə ghəŋənə ndzuŋ tə̀ wɔ, wə̀ tii zəə kee? Ghə̂ a bəbə a ghəŋə soʼo sey. 34Abə wə̀ fùulə fuu shiə kə fə kə tə̀ ghə̂ ghey wə moʼlənə nə̀ ghə i tsə̂ə dzəŋŋə bənu, wə̀ zəə kee tii? Ghə̂ a bəbə a ngəŋə fuulə fuu shiənu tə ghə̂ a bəbə ghə, moʼlə nə̀ ghə i tsə̂ə dzəŋŋə bə soʼo udzəm. 35Sey, i ləghə na ghə̂ a təngəmə a ghaa ghə, ghəŋə ndzuŋ tə̀ ghə̂ ghə, fuulə fuu shiə fə u ghaa, moʼlə way nə ghə i teeli fu dzəŋŋə. Abə ghaa ghəŋənə sey, ghaa i keeli naamə kə nii kə, ghaa i loʼ luʼu wey waa a Kəzə̀ a səŋi a loʼnə tii, n təŋkey, tə ghəŋə ndzûŋ tə̀ ghə̂ à məə ghə nsə ghə̂ a bəbə ghə. 36I kwɔɔlə na sî zə tə̀ ghə̂ ghə ighələ tə̀ Bày ghaa kwɔɔlənə sî zə tə̀ ghə̂ ghə.

Ka i saʼa dzə wù

(Mat 7.1-5)

37Kə ghaa nə saʼabəəbənə ghə̂ ghə, n təŋkey Zə̀ kə i saʼa bəəbə soʼo ghaa. Kə ghaa nə tsəʼlənə saʼ n kow ghə̂ a loʼ ghə təŋkey Zə̀ kə i tsəʼlə saʼ soʼo n kow ghaa. Ghaa khə ni neyzəə ghəə a bəbə ghey ghə ghəŋənə tə ghaa, Zə̀ kə i neyzəə soʼo ghəə a ghaa a bəbə ghə. 38I fuu ndòw na fə̂ wə tə̀ ghə̂ ghə, Zə̀ kə i fu dzəŋə tə̀ ghaa n fəŋ i dzuŋu zə, ghə i mən nyi tsu, ghə soʼlə tsu, ghə kuu luulə kɔʼ sa, wə i shiə a bii, n təŋkey fòʼ zey wə̀ fuu shiənə tii, a loʼ soʼo n foʼo tii Zə̀ kə i fuunə tə̀ wɔ.” 39Yeso n dza ndòw soʼo ghɔɔmə i fənkəfən i loʼ zə tə ghə nə̀, “wù fəbə way ni tali dzə wù fəbə u loʼ wə, tə̂ ghə i dzəŋi ndòw bwù nyi tsu nə kəbùʼ. 40Waa kəmàʼlə way dzə ni tsəghəshi dzə wù dii wə, a kee loʼ nə abə tə tɔʼ zoʼlə tsunə tə loʼ ni bə doʼo tə̀ a loʼ wù dii wey. 41A loʼ kee wə laalənə fəghə fey n sə̂ i waazu kee koʼo way kəm kə fəkaʼ key n sə̂ zə ə? 42Wə loʼ ngee ni dza tə̀ waazu nə̀, ‘N waazə, na n shiələ bə fəghə fey n sə̂ zə,’ nə̀ a loʼ sey wə buʼu koʼo way kaʼ fey n sə̂ zə ə? Nəb ityim tə a loʼ wɔ, buʼ shiələ nuu tsu dzə kaʼ fey n sə̂ zə, sey wə i loʼ ni tɔʼ koʼ təluʼu ni shiələ nuu fəghə fey n sə̂ i waazu.

Fəkâʼ n tam u wi wə

(Mat 7.16-20; 12.33-35)

43Keeli tsu na nə̀, kaʼ fə dzuŋu fə way ni mə̀ dzə tam u bəbə wə, ighələ tə̀ kaʼ fə bəbə fə way ni mə dzə tam u dzuŋu wə. 44Saa koʼo keeli fəkaʼ n tam u wi. Wu way dzə ni kɔy tam u təfig nə təmgbii nkee tə kɔy lami n kɔɔ tə təmgbii. 45Wù dzuŋu ghəŋə kə ghəə a dzuŋu ghey a shi kɔʼ bənə n fə̀ŋ ə wi. Wù bəbə ghəŋə kə ghəə a bəbə ghey a shi kɔʼ bənə n fəŋ ə wi, kuumnə wù ghɔɔmə kə ghəə ghey a kuʼ doʼonə n fəŋ ə wi.

Ghə̂ à bəghə a təndaw ghə abəghə

(Mat 7.24-27)

46A loʼ kee ghaa tɔŋɔnə mə nə ‘Mûkəbii’, ‘Mûkəbii’, nə a loʼ sey ghaa ghəŋə way ghəə ghey n dzanə. 47N dza n dii bə tə ghaa nghee tə wù wey tə bənə n səə mə, zəllə ghɔɔmə zuŋ, ghəŋə ndòw ghəə ghey n dzanə loʼnə a tii. 48Tə loʼ tə̀ a loʼ wù wey tə a dza i bəghə ndaw, tə n bow dzɔb nyi tsu ndòw tsə kə ndaw, bɔm kɔʼ bə tsə̂ u tii wə nə atay. Ambə dzuu naali tsən bənə ndaw tii, zə n way ni beeli təŋkey ghə â bɔm dzɔbnu. 49Abə wù wey tə zownə ghɔɔmə zûŋ zə, ghəŋə way ghə zey n dzanə. Tə loʼ tə a loʼ wù wey tə bɔmnə ndaw n ghəlikətsə nə tə ka tsə kə sət dzə. Ambə dzuu naali tsən bənə n ndaw tii, zə n beeli, luʼlə may tsu.”

Currently Selected:

Lukas 6: WEH

Highlight

Copy