Matyo 22
22
Ghɔɔmə i fənkəfən bòʼ zə̂ kə ney zə iwû
(Luk 14.15-24)
1Yeso n ghɔɔmə kpiʼi tsu tə̀ ghə n ghɔɔmə i fənkəfən dza nə̀, 2“Fɔɔ wə idəŋ u loʼ tə a loʼ də̀ŋ kə loʼ kə, kə â bayyənə zə̂ kə waa wi u num wə tə â neynə wey. 3Tə n tûm shi ndòw ghə̂ a kəfwaʼ a wi nə̀ ghə ndòw tɔŋɔ bə ghə̂ ghey tə â naʼanə n zə̂ kə tii kə. Ghə̂ a tii ghə n tuu ni bə. 4Sey tə n tûm kpiʼi tsu ghə̂ a kəfwaʼ a loʼ ghə dza tə̀ ghə nə̀, ‘Ndòw dza ndòw na tə̀ ghə̂ ghey n mə naʼanə ghə nə̀, mə n khəələ naŋa zə̂ kə, n wey tsɔm u təmbɔŋ nsə mbɔŋ tə kâa tə, fə̂ udzəm wə n doʼo, ghə bə zə̂ kə ney zə iwû kə waa wuŋ.’ 5Ghə̂ a tii ghə n ka tsəm kɔʼ say kətow, fədlə ghəŋŋə ndòw kə ghəə a ghə. Wù ghə umɔʼ n nuu soʼ ndòw n sum u wi, u loʼ wə n nuu ndòw n luʼu kə bikiwən kə wi, 6ghə̂ a loʼ ghey n kwu tsu ghə̂ a kəfwaʼ ghey mɔm dzɔb tsu ghə nə nfən, wey maʼa tsu ghə. 7Də̀ŋ key n fəələ nay ndòw n fə̀ŋ n ghəə a tii ghə, tûm ndòw sawgoʼ tə wi fu, ghə n ndòw weyyə maʼa tsu ghə̂ ghey ghə mə weyyənə ghə̂ a kəfwaʼ a wi ghə, kpəghə maʼa kɔʼ naʼ i ghə nə̀ uvəllə. 8Sey tə n tɔŋɔ bə ghə̂ a kəfwaʼ a wi, dza ndòw tə̀ ghə nə̀, ‘Mə n khəələ naŋa zə̂ kə ney zə iwû kə waa wuŋ kə, ghə̂ ghey n mə naʼanə, ghə ka kɔʼ kpii dzə ni bə zə̂ fə̂ wuŋ.’ 9Sey, ndòw na n faabə tə̀ jìi tey inaʼ, ghaa tɔŋɔ bə ghə̂ ghey ghaa koʼnə, nə̀ ghə bə nə kəzə̂. 10Ghə̂ a kəfwaʼ ghey n ndòw soʼo, tɔŋɔ bə ghə̂ ghey ghə â koʼnə. Ghə̂ a dzuŋu ghə nsə ghə̂ a bəbə ghə, ndaw kəzə̂ zey n luu tsu n wɔ ghə̂ ghə.
11Ambə də̀ŋ key bənə ni bə koʼ ghə̂ ghey ghə â bənə, tə n bə koʼ tsu wù loʼ nə̀ tə ka dzəŋə ndzə tə ney zə iwû tə. 12Tə n bəb ndòw tə̀ wi nə̀, ‘N fə, wə nyi n ngee fa nə̀ wə khə way ndzə tə ney zə iwû tə ə?’ Wù tii n zow doʼo ndòw kə mɔŋ, ka beeli. 13Də̀ŋ key n dza ndòw tə ghə̂ a kəfwaʼ ghə nə̀, ‘Kòw kɔʼ na wi nə ubaʼ, nə awɔɔ nsə nə ifuu, ghaa maʼa ndòw wi bii nə kələm, tə i dey fu, fəə asɔŋ.’ 14N təŋkey, Zə̀ kə naʼlə ndəmə aghə̂, tə n sày shi bə kə sə̂ fə aghə̂ n fəŋŋə kə ghə.”
Ghə bəb Yeso n ghəə ghə bòʼ Màʼlə kə tsow kə
(Mak 12.13-17; Luk 20.20-26)
15Sey, ghə̂ a tə Falasi ghə n nuu shi ndòw bii, ndòw saalə tsu nghee tə̀ ghə loʼnə ni kwu Yeso n ghɔɔmə i wi. 16Ghə n tûm tsu tsətəndəghə tə ghə nsə ghə̂ a Helɔd a loʼ ghə. Ghə n bə koʼ bə Yeso, dza tə̀ wi nə̀, “Wù dii wə, ghey khənu nə̀ wə dza tsə kə isəŋə, wə dii ghɔɔmə i Kəzə̀ tə̀ i khə ni doʼo, wə saʼa way ghɔɔmə tə aghə̂ tə, n təŋkey, wə khə way nəŋə i wù zə. 17Dza bə tə̀ ghey ghəə zey wə moʼlənə, laŋ kə diinu nə̀ ghey i tsow màʼlə kə tə̀ Siza mɔ laŋ kə dii way ə?”
18Yeso n khə moʼlə tə ghə, sey, tə n dza tə̀ ghə nə̀, “Ghə nəb ityim ghən, a loʼ kee ghaa bii kaabənə mə ə? 19Ney dii bə na khəə wey ghaa tsownə màʼlə kə tii.” Ghə n ney dii bə wi n khəə u fəngɔʼ wə. 20Tə n bəb tə̀ ghə nə̀, “À wən loʼ tûm usə̂ u ndee tii? À wən loʼ zəd i ndee tii?” 21Ghə n dza, “À loʼ tum usə u Siza nsə zəd i Siza zə.” Sey tə n dza ndòw tə̀ ghə nə̀, “Fuu ndòw na fə̂ key kə loʼnə kə Siza kə tə̀ Siza, ghaa fuu ndòw soʼo fə̂ key kə loʼnə K-a-zə̀ kə tə̀ Zə̀ kə.” 22Ambə ghə zow tsunə sey, dzuu zə n ngii zum ghə n jìi zey tə â beelinə ghə tii, ghə n zəghə tsu wi, nuu ndòw i ghə zə.
Ghə bəb Yeso n ghəə ghə bòʼ zhəm dzəŋŋə zə ivə
(Mak 12.18-27; Luk 20.27-40)
23Nghee tə̀ Yeso dza nə̀ ghə fuu tə Siza fə key kə loʼnə kə Siza kə, n tsuʼ fə tii fə kələ, ghə̂ a Sadusi ghey ghə dzanə nə̀ zhəm dzəŋŋə zə ivə i way, n bə n səə Yeso, bəb tə̀ wi nə̀, 24“Wù dii wə, Mushi â dza tə̀ ghey nə̀, abə wù kpuu tsunə nə̀ tə khə way waa ghə, waazə ə wi khə ni nyə̀ŋŋə̀ ndòw wey wi, tə ji fuu tsu wi n waa. 25Nya, waazə a loʼ ghə â loʼnu, tow ghə usəghəmbəghə, wù sə̂ isə wey n ney ndòw wey, bə kpuu nə̀ tə ka waa ji, naŋa sə̂ tsu wey tə̀ waazə. 26Zə n bɔɔmə bə shi kɔʼ soʼo nə̀ wù wey tə â dzûmə ndòwnə wi, bə kpuu kɔʼ nə̀ tə ka waa jii ghi wey kpusə wey tə nyəŋŋə ndownə. Zə n bə shi kɔʼ soʼo ighələ ghi waazə a loʼ ghey ni ndòw kùm tow ghə usəghəmbəghə. 27Wey kpusə wey n baa bə kpuu tsu soʼo. 28Nya, abə ghə i zhəm dzəŋŋə bənə nə̀ ivə, weyzən wey î baa loʼ wey ndee, ghə â sə ney tsəghə may ndòwnə wi tow ghə usəghəmbəghə ə?”
29Yeso n beeli ndòw ghə nə̀, “Ghaa n nyəŋ laʼ ni bəghəm nə̀ zhəm dzəŋŋə zə ivə i way n təŋkey, ghaa khə way ghəə zey ghɔɔmə i Kəzə̀ i diinə, ghaa khə soʼo way daʼa K-a-zə̀ kə. 30Abə ghə̂ a zhəm dzəŋŋə bənə nə ivə, ghə ney way wû zə, ghə a fuu soʼo way gheyzən ghə tə num ghə, ghə fəd muu tə a loʼ tsətəndəghə tə Kəzə̀ idəŋ. 31Ghaa ka kam tɔŋɔ koʼ n màʼlə K-a-zə̀, ghəə ghey Zə̀ kə dzanə bòʼ zhəm dzəŋŋə zə ivə ə? Tə â dza, 32‘N loʼ Zə̀ kə Abraham, Zə̀ kə Ayzik, nsə Zə̀ kə Yakɔb kə.’ Tə way dzə Zə̀ kə ghə̂ a kpuu ghə, tə̀ loʼ Zə̀ kə ghə̂ ghey ghə loʼnə utaw.” 33Ambə Nɔɔ kə aghə̂ kə zow tsunə ghəə ghən, dzuu zə n zum ghə n jìi zey Yeso â diinə ghəə ghə tii.
Làŋ key kə tsəghəshinə laŋ wə udzəm
(Mak 12.28-34; Luk 10.25-28)
34Ambə ghə̂ a tə Falasi a zow tsunə nə̀ Yeso n fìi naŋa dzuu i ghə̂ a tə Sadusi ghə, ghə təmdzəŋi bə iwû, 35wù ghə umɔʼ, tə â loʼnə wù dii kəlaŋ n bəb ndow Yeso n ghəə zə ni mɔm koʼ wi nə̀, 36“Wù dii wə, a loʼ laŋ kə ghaa kə, kə tsəghəshinə laŋ wə udzəm ə?”
37Yeso n beeli ndòw wi nə̀, “I ləghə Mûkəbii, Zə̀ kə kə̀ n fə̀ŋ zə idzəm, n zay kə kə̀ kədzəm, nsə moʼlə tə tə̀ tədzəm. 38À wən loʼ laŋ kə sə isə kə, kə tsəghəshinə laŋ wə udzəm. 39Laŋ key kə dzûmə ndòwnə bɔɔmə loʼ soʼo tə a loʼ kə kən, kə dza nə̀, ‘I ləghə wù wey tə kuʼlə loʼnə n səə wɔ tə̀ wə ləghənə wû wə wə̀.’ 40Laŋ udzəm nsə ghəə ghey tûm tə Kəzə̀ tə â diinə bɔɔmə tey n laŋ wən ubəghə.”
Ghə bəb aghəə tə̀ Yeso bòʼ Bəghəshi
(Mak 12.35-37; Luk 20.41-44)
41Nghee tə̀ ghə̂ a tə Falasi a təmdzəŋi bənə, Yeso n bəb ndòw tə̀ ghə nə̀, 42Ghaa moʼlə nə̀ ngee bòʼ wù wən Zə̀ kə â dza naŋa nə̀ i tûm bənu ə? Tə baa loʼ waa ndee?
Ghə n beeli ndòw wi dza nə̀, “Tə loʼ waa Devid.”
43Tə n bəb ndòw tə̀ ghə nə̀, “À kee loʼ kee Zay kə Zow kə â ghəŋə nə̀ Devid tɔŋɔ wi nə a loʼ ‘Mûkəbii’ ə? Devid n dza,
44‘Mûkəbii â dza tə̀ Mûkəbii wuŋ nə̀,
Doʼo tsu n kpii kuŋ kə təmə kə,
Tə̀ n ghəŋə nə̀ ghə̂ a təngəmə ghə a təm bə tənguʼ n tənə wɔ.’
45Abə Devid â tɔŋɔnə wi nə̀ a loʼ ‘Mûkəbii’, tə loʼ ngee ni loʼ waa Devid ə?”
46Wù umɔʼ ə ghə n tsəm way ni beeli kɔʼ wi. Ni zey tsu n nəŋə i tii zə, ndòw n sə kə, wù umɔʼ n ka kəm bəb kpiʼi wi n ghəə zə.
Currently Selected:
Matyo 22: WEH
Highlight
Share
Copy
Want to have your highlights saved across all your devices? Sign up or sign in
© 2022 CABTAL
Matyo 22
22
Ghɔɔmə i fənkəfən bòʼ zə̂ kə ney zə iwû
(Luk 14.15-24)
1Yeso n ghɔɔmə kpiʼi tsu tə̀ ghə n ghɔɔmə i fənkəfən dza nə̀, 2“Fɔɔ wə idəŋ u loʼ tə a loʼ də̀ŋ kə loʼ kə, kə â bayyənə zə̂ kə waa wi u num wə tə â neynə wey. 3Tə n tûm shi ndòw ghə̂ a kəfwaʼ a wi nə̀ ghə ndòw tɔŋɔ bə ghə̂ ghey tə â naʼanə n zə̂ kə tii kə. Ghə̂ a tii ghə n tuu ni bə. 4Sey tə n tûm kpiʼi tsu ghə̂ a kəfwaʼ a loʼ ghə dza tə̀ ghə nə̀, ‘Ndòw dza ndòw na tə̀ ghə̂ ghey n mə naʼanə ghə nə̀, mə n khəələ naŋa zə̂ kə, n wey tsɔm u təmbɔŋ nsə mbɔŋ tə kâa tə, fə̂ udzəm wə n doʼo, ghə bə zə̂ kə ney zə iwû kə waa wuŋ.’ 5Ghə̂ a tii ghə n ka tsəm kɔʼ say kətow, fədlə ghəŋŋə ndòw kə ghəə a ghə. Wù ghə umɔʼ n nuu soʼ ndòw n sum u wi, u loʼ wə n nuu ndòw n luʼu kə bikiwən kə wi, 6ghə̂ a loʼ ghey n kwu tsu ghə̂ a kəfwaʼ ghey mɔm dzɔb tsu ghə nə nfən, wey maʼa tsu ghə. 7Də̀ŋ key n fəələ nay ndòw n fə̀ŋ n ghəə a tii ghə, tûm ndòw sawgoʼ tə wi fu, ghə n ndòw weyyə maʼa tsu ghə̂ ghey ghə mə weyyənə ghə̂ a kəfwaʼ a wi ghə, kpəghə maʼa kɔʼ naʼ i ghə nə̀ uvəllə. 8Sey tə n tɔŋɔ bə ghə̂ a kəfwaʼ a wi, dza ndòw tə̀ ghə nə̀, ‘Mə n khəələ naŋa zə̂ kə ney zə iwû kə waa wuŋ kə, ghə̂ ghey n mə naʼanə, ghə ka kɔʼ kpii dzə ni bə zə̂ fə̂ wuŋ.’ 9Sey, ndòw na n faabə tə̀ jìi tey inaʼ, ghaa tɔŋɔ bə ghə̂ ghey ghaa koʼnə, nə̀ ghə bə nə kəzə̂. 10Ghə̂ a kəfwaʼ ghey n ndòw soʼo, tɔŋɔ bə ghə̂ ghey ghə â koʼnə. Ghə̂ a dzuŋu ghə nsə ghə̂ a bəbə ghə, ndaw kəzə̂ zey n luu tsu n wɔ ghə̂ ghə.
11Ambə də̀ŋ key bənə ni bə koʼ ghə̂ ghey ghə â bənə, tə n bə koʼ tsu wù loʼ nə̀ tə ka dzəŋə ndzə tə ney zə iwû tə. 12Tə n bəb ndòw tə̀ wi nə̀, ‘N fə, wə nyi n ngee fa nə̀ wə khə way ndzə tə ney zə iwû tə ə?’ Wù tii n zow doʼo ndòw kə mɔŋ, ka beeli. 13Də̀ŋ key n dza ndòw tə ghə̂ a kəfwaʼ ghə nə̀, ‘Kòw kɔʼ na wi nə ubaʼ, nə awɔɔ nsə nə ifuu, ghaa maʼa ndòw wi bii nə kələm, tə i dey fu, fəə asɔŋ.’ 14N təŋkey, Zə̀ kə naʼlə ndəmə aghə̂, tə n sày shi bə kə sə̂ fə aghə̂ n fəŋŋə kə ghə.”
Ghə bəb Yeso n ghəə ghə bòʼ Màʼlə kə tsow kə
(Mak 12.13-17; Luk 20.20-26)
15Sey, ghə̂ a tə Falasi ghə n nuu shi ndòw bii, ndòw saalə tsu nghee tə̀ ghə loʼnə ni kwu Yeso n ghɔɔmə i wi. 16Ghə n tûm tsu tsətəndəghə tə ghə nsə ghə̂ a Helɔd a loʼ ghə. Ghə n bə koʼ bə Yeso, dza tə̀ wi nə̀, “Wù dii wə, ghey khənu nə̀ wə dza tsə kə isəŋə, wə dii ghɔɔmə i Kəzə̀ tə̀ i khə ni doʼo, wə saʼa way ghɔɔmə tə aghə̂ tə, n təŋkey, wə khə way nəŋə i wù zə. 17Dza bə tə̀ ghey ghəə zey wə moʼlənə, laŋ kə diinu nə̀ ghey i tsow màʼlə kə tə̀ Siza mɔ laŋ kə dii way ə?”
18Yeso n khə moʼlə tə ghə, sey, tə n dza tə̀ ghə nə̀, “Ghə nəb ityim ghən, a loʼ kee ghaa bii kaabənə mə ə? 19Ney dii bə na khəə wey ghaa tsownə màʼlə kə tii.” Ghə n ney dii bə wi n khəə u fəngɔʼ wə. 20Tə n bəb tə̀ ghə nə̀, “À wən loʼ tûm usə̂ u ndee tii? À wən loʼ zəd i ndee tii?” 21Ghə n dza, “À loʼ tum usə u Siza nsə zəd i Siza zə.” Sey tə n dza ndòw tə̀ ghə nə̀, “Fuu ndòw na fə̂ key kə loʼnə kə Siza kə tə̀ Siza, ghaa fuu ndòw soʼo fə̂ key kə loʼnə K-a-zə̀ kə tə̀ Zə̀ kə.” 22Ambə ghə zow tsunə sey, dzuu zə n ngii zum ghə n jìi zey tə â beelinə ghə tii, ghə n zəghə tsu wi, nuu ndòw i ghə zə.
Ghə bəb Yeso n ghəə ghə bòʼ zhəm dzəŋŋə zə ivə
(Mak 12.18-27; Luk 20.27-40)
23Nghee tə̀ Yeso dza nə̀ ghə fuu tə Siza fə key kə loʼnə kə Siza kə, n tsuʼ fə tii fə kələ, ghə̂ a Sadusi ghey ghə dzanə nə̀ zhəm dzəŋŋə zə ivə i way, n bə n səə Yeso, bəb tə̀ wi nə̀, 24“Wù dii wə, Mushi â dza tə̀ ghey nə̀, abə wù kpuu tsunə nə̀ tə khə way waa ghə, waazə ə wi khə ni nyə̀ŋŋə̀ ndòw wey wi, tə ji fuu tsu wi n waa. 25Nya, waazə a loʼ ghə â loʼnu, tow ghə usəghəmbəghə, wù sə̂ isə wey n ney ndòw wey, bə kpuu nə̀ tə ka waa ji, naŋa sə̂ tsu wey tə̀ waazə. 26Zə n bɔɔmə bə shi kɔʼ soʼo nə̀ wù wey tə â dzûmə ndòwnə wi, bə kpuu kɔʼ nə̀ tə ka waa jii ghi wey kpusə wey tə nyəŋŋə ndownə. Zə n bə shi kɔʼ soʼo ighələ ghi waazə a loʼ ghey ni ndòw kùm tow ghə usəghəmbəghə. 27Wey kpusə wey n baa bə kpuu tsu soʼo. 28Nya, abə ghə i zhəm dzəŋŋə bənə nə̀ ivə, weyzən wey î baa loʼ wey ndee, ghə â sə ney tsəghə may ndòwnə wi tow ghə usəghəmbəghə ə?”
29Yeso n beeli ndòw ghə nə̀, “Ghaa n nyəŋ laʼ ni bəghəm nə̀ zhəm dzəŋŋə zə ivə i way n təŋkey, ghaa khə way ghəə zey ghɔɔmə i Kəzə̀ i diinə, ghaa khə soʼo way daʼa K-a-zə̀ kə. 30Abə ghə̂ a zhəm dzəŋŋə bənə nə ivə, ghə ney way wû zə, ghə a fuu soʼo way gheyzən ghə tə num ghə, ghə fəd muu tə a loʼ tsətəndəghə tə Kəzə̀ idəŋ. 31Ghaa ka kam tɔŋɔ koʼ n màʼlə K-a-zə̀, ghəə ghey Zə̀ kə dzanə bòʼ zhəm dzəŋŋə zə ivə ə? Tə â dza, 32‘N loʼ Zə̀ kə Abraham, Zə̀ kə Ayzik, nsə Zə̀ kə Yakɔb kə.’ Tə way dzə Zə̀ kə ghə̂ a kpuu ghə, tə̀ loʼ Zə̀ kə ghə̂ ghey ghə loʼnə utaw.” 33Ambə Nɔɔ kə aghə̂ kə zow tsunə ghəə ghən, dzuu zə n zum ghə n jìi zey Yeso â diinə ghəə ghə tii.
Làŋ key kə tsəghəshinə laŋ wə udzəm
(Mak 12.28-34; Luk 10.25-28)
34Ambə ghə̂ a tə Falasi a zow tsunə nə̀ Yeso n fìi naŋa dzuu i ghə̂ a tə Sadusi ghə, ghə təmdzəŋi bə iwû, 35wù ghə umɔʼ, tə â loʼnə wù dii kəlaŋ n bəb ndow Yeso n ghəə zə ni mɔm koʼ wi nə̀, 36“Wù dii wə, a loʼ laŋ kə ghaa kə, kə tsəghəshinə laŋ wə udzəm ə?”
37Yeso n beeli ndòw wi nə̀, “I ləghə Mûkəbii, Zə̀ kə kə̀ n fə̀ŋ zə idzəm, n zay kə kə̀ kədzəm, nsə moʼlə tə tə̀ tədzəm. 38À wən loʼ laŋ kə sə isə kə, kə tsəghəshinə laŋ wə udzəm. 39Laŋ key kə dzûmə ndòwnə bɔɔmə loʼ soʼo tə a loʼ kə kən, kə dza nə̀, ‘I ləghə wù wey tə kuʼlə loʼnə n səə wɔ tə̀ wə ləghənə wû wə wə̀.’ 40Laŋ udzəm nsə ghəə ghey tûm tə Kəzə̀ tə â diinə bɔɔmə tey n laŋ wən ubəghə.”
Ghə bəb aghəə tə̀ Yeso bòʼ Bəghəshi
(Mak 12.35-37; Luk 20.41-44)
41Nghee tə̀ ghə̂ a tə Falasi a təmdzəŋi bənə, Yeso n bəb ndòw tə̀ ghə nə̀, 42Ghaa moʼlə nə̀ ngee bòʼ wù wən Zə̀ kə â dza naŋa nə̀ i tûm bənu ə? Tə baa loʼ waa ndee?
Ghə n beeli ndòw wi dza nə̀, “Tə loʼ waa Devid.”
43Tə n bəb ndòw tə̀ ghə nə̀, “À kee loʼ kee Zay kə Zow kə â ghəŋə nə̀ Devid tɔŋɔ wi nə a loʼ ‘Mûkəbii’ ə? Devid n dza,
44‘Mûkəbii â dza tə̀ Mûkəbii wuŋ nə̀,
Doʼo tsu n kpii kuŋ kə təmə kə,
Tə̀ n ghəŋə nə̀ ghə̂ a təngəmə ghə a təm bə tənguʼ n tənə wɔ.’
45Abə Devid â tɔŋɔnə wi nə̀ a loʼ ‘Mûkəbii’, tə loʼ ngee ni loʼ waa Devid ə?”
46Wù umɔʼ ə ghə n tsəm way ni beeli kɔʼ wi. Ni zey tsu n nəŋə i tii zə, ndòw n sə kə, wù umɔʼ n ka kəm bəb kpiʼi wi n ghəə zə.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022 CABTAL