Malakus 15

Pilato saʼ Yeso

(Mat 27.1-2, 11-14; Luk 23.1-5; Jɔn 18.28-38)

1Ambə tsuʼ u zow tsunə, ghə fɔɔngili a nii ghə, ngəd tə inaʼ, ghə̂ a dii a kəlaŋ ghə, nsə ghə̂ a ndaw tsə ghə adzəm n kwu tsu kədzəŋi ni sallə aghəə. Ghə n kùm tsu Yeso nə tətsaʼ, ney nuu ndòw wi, ndòw fuu tsəghə ndòw wi tə̀ Pilato. 2Pilato n bəb tə̀ wi nə̀, “Wə loʼ də̀ŋ kə ghə̂ a Təjuu ə?”

Yeso n dza nə̀, “I loʼ tə̀ wə dzanə.”

3Ghə fɔɔngili a nii ghə n kwɔɔ wi n ndəmə tə aghəə. 4Pilato n bəb kpiʼi tsu tə̀ wi nə̀, “Zow ndəmə ghəə ghey ghə kwɔɔnə wɔ tii, wə beeli way ə?”

5Yeso n ka beeli kìi shi ghə i loʼ zə, ghə i tii zə n tsəghə shi daŋŋə Pilato.

Ghə tsəʼlə saʼ nə̀ ghə wey Yeso

(Mat 27.15-26; Luk 23.13-25; Jɔn 18.39–19.16)

6Zə â loʼ nə̀, n nəŋə i Zə̂ kə Taa zaʼa kə, Pilato â bəghə tə n zəghə maʼa shi ndòw wù ndaw tsaʼ wey ghə̂ a Təjuu a bəbnə tə̀ wi. 7Wù loʼ n loʼ fu n ndaw tsaʼ ghə â tɔŋŋənə nə̀ a loʼ Barabas, ghə â fìi naŋanə wi nə̀ tə wey wù n ngəd key ghə â zuulə baalənə ghi ghə̂ ghey ghə saʼanə̀ naʼ i Roma n təŋkey ghə â ləghə way jìi zey ghə â saʼanə tii. 8Nɔɔ kə aghə̂ kə n dzəŋi bə ni bə dza nə̀ Pilato zəghə shi bə wù tə̀ tə a ghəŋŋə tsənə, 9tə n dza tə̀ ghə nə̀, “Ghaa ləghənu nə̀ n fuu shi bə ghaa n də̀ŋ kə ghə̂ a Təjuu kə ə?” 10Tə â bəb sey n təŋkey tə â khənu nə̀ ghə fɔɔngili a nii ghə â fuu nuu bə Yeso tə̀ wi n təŋkey ghə â ghoʼonu. 11Ghə fɔɔngili a nii ghey n kuu tənyɔʼ tə̀ ghə̂ ghey nə̀ ghə dza ndòw tə̀ Pilato nə̀ tə fuu shi bə ghə n Barabas. 12Pilato n kəm dza ndòw tə̀ ghə̂ ghey nə̀, “Ghaa nya ləghə nə̀ n ji ngee ghi wù wey ghaa dzanə nə̀ tə dza nə̀ i loʼ də̀ŋ kə Təjuu ə?”

13Ghə n dza shi kɔʼ nə̀, “Baa na wi n zat kə fəkaʼ.”

14Pilato n bəb tə̀ ghə nə̀, “N kee? Tə ghəŋə ghə i bəbə i ghaa zə.”

Ghə n fədlə buʼu shiə kɔʼɔ kə nbɔŋ nə̀, “Baa na wi n zat kə fəkaʼ.”

15Pilato n ləghə ni ghəŋə ghəə zey nɔɔ kə aghə̂ key ləghənə, sey, tə n chi zəghə tsu Barabas, fuu ndòw tə̀ ghə. Fuu ndòw Yeso nə̀ ghə bwɔd wi. Ambə ghə bwɔd tsunə wi, tə n daŋŋə fuu nuu ndòw wi nə̀ ghə ndòw baa wi n zat kə fəkaʼ.

Sowgoʼ tə kpaalə Yeso

(Mat 27.27-31; Jɔn 19.2-3)

16Sawgoʼ tey n ney nyi ndòw Yeso n fə̀ŋ ə bii kə gɔvənɔ, tɔŋɔ may bə sawgoʼ tə loʼ tey n saʼ kə tii kə. 17Ghə n dzəŋə kɔʼ Yeso n ndzə tə baŋa tə loʼ tə tə a loʼ ndzə tə kədə̀ŋ, faalə tsu taŋŋə kə fɔɔ nə təmgbii, dzəŋə naŋa kɔʼ n tow kə wi. 18Ghə n kaʼ ni tɔŋɔ zow wi dza nə̀, “Mbee, dəŋ kə Təjuu!” 19Ghə n kùm wi nə kətow n mbaŋ, tsə ntəghə n kow wi, təm ndòw tə tənguʼ n tənə wi, kum ndow kətow n tənə wi ghə ngɔɔmənə wi. 20Ambə ghə lənnə kow tsunə wi, ghə n tsɔʼ nuu kɔʼ ndzə tə baŋa tey n kow wi, dzəŋə dzəŋŋə kɔʼ ndzə tə wi, daŋŋə ney ndòw wi ni ndòw baa n zat kə fəkaʼ.

Ghə baa Yeso n zat kə fəkaʼ

(Mat 27.32-44; Luk 23.26-43; Jɔn 19.17-27)

21Nghee tə̀ ghə ndòwnə n jìi, ghə n kpiilə ndòw ghi wù loʼ zəd i wi i loʼnə nə̀ a loʼ Shimun, tə â nuu bənə n naʼ i Sirin, nyiə bə n naʼ i tii zə. Sawgoʼ tey n tənnə wi nə̀ tə boʼo zat kə fəkaʼ kə Yeso (Shimun â loʼ bày Alekzanda nsə Rufus). 22Ghə n ney ndòw Yeso n luʼu key ghə tɔŋŋənə nə̀ a loʼ Gɔgɔta, i diinə nə̀, “Luʼu kə kaŋ K-a-tow.” 23Ghə n dəmə ni fu wi n nlə mə nə̀ ghə n nyɔmə n tey u taw u loʼ wə ghə tɔŋŋənə nə̀ a loʼ Maya, Yeso n tuu ni mə̂. 24Ghə n daŋŋə baa tsu wi n zat kə fəkaʼ, dzawwə tsu ndzə tə wi n wû i ghə nə̀ ghə təm mbuʼ ni keeli bad key kay wù khənə ni ney. 25Ghə â bəd baa wi n zat kə fəkaʼ nə tənəŋə tətaandzuu (sə̀ kə tsə). 26Ghə n tɔ̀ɔ naŋa kɔʼ n zat kə fəkaʼ kə wi nə̀, zuŋ key ghə tsəʼlənə saʼ n tow kə wi tii loʼ nə̀, “Də̀ŋ kə Təjuu.” 27Ghə n baa naŋa kɔʼ soʼo ghə̂ a tsɔŋɔ ghə abəghə n zat kə fəkaʼ ghi wi, umɔʼ n kpii u wi u təmə wə, u loʼ wey n kpii u wi u kwɔɔ wə. 28[Zə â shi sey ni bə luulə tsu ghəə zey i tɔ̀ɔ doʼonə n màʼlə K-a-zə̀ nə̀, “Ghə â taŋ dzəŋi wi ghi ghə̂ a bəbə ghə.”]#15.28 Màʼlə u loʼ u khə way ghəllə zən.

29Ghə̂ ghey ghə â tsəghənə n jìi, n soʼo kətow, kpaalə Yeso dza nə̀, “Ahaa! N dza wə â dza nə̀ wə i saʼa maʼa ndaw Kəzə̀ i nii zə n Yerosalem, wə bəghə dzəŋŋə kɔʼ nə ntsuʼu ntəghə ə? 30Bəghəshi tsu bə wû wə wə̀ nya fey n zat kə fəkaʼ.”

31N jii i mɔʼɔ zə, ghə fɔɔngili a nii ghə nsə ghə̂ a dii a kəlaŋ ghə n sɔʼlə wi dza n wû i ghə nə̀, “Tə â bəghəshiə ghə̂ a loʼ ghə, tə bəghəshi tsu soʼo wû u wi nya. 32A dza i koʼ wù wey Zə̀ kə â dza naŋa nə̀ i tûm bənu tɔŋŋə də̀ŋ kə naʼ zə Izree, tə shi tsu bə fey n zat kə fəkaʼ, a i bəghəm fu bə tə̀ wi.” Ghə̂ ghey ghə â dzəŋi baanə ghə ghi Yeso n kpaalə soʼo wi.

Və i Yeso

(Mat 27.45-56; Luk 23.44-49; Jɔn 19.28-30)

33Ambə n fə̀ŋ ə tsə, ləm kə n bwù bə nə inaʼ, zə n doʼo ndòw kùm ndòw nə tənəŋə tətəghə. 34Nə tənəŋə tətəghə, Yeso n dey shi kɔʼ n dzə i taw zə dza nə̀, “Elɔi, Elɔi, lama sabadani?” I diinə nə̀, “Zə̀ kuŋ, Zə̀ kuŋ, a loʼ kee wə maʼa naŋanə mə sa a?”

35Ghə̂ a loʼ ghə fu n zow ghəə ghey tə dzanə, ghə n kee dza i ghə zə nə̀, “Zow na, tə tɔŋŋə Elayja!” 36Wù umɔʼ ə ghə n nyəŋ kɔʼ ndòw ghi sàa wə, kuu nyi tsu n nlə n mgbaŋŋə mə, khəə kɔʼ n mbaŋ, dii keeli kɔʼ ndòw n dzuu i Yeso nə̀ tə sɔllə mə̂, dza tə̀ ghə̂ ghey fu nə̀, “Saa ləmə tsu, a koʼ nə̀ Elayja î bəghə ney shiə tsuu bənu wi.”

37Yeso n dey shi kpiʼi kɔʼ n dzə i taw zə, daŋŋə kpu i kɔʼ.

38Kə̀ŋ wey wə â dzawwənə ndaw Kəzə̀ i nii zə n Yerosalem n bàalə shi tsu bə nə utɔŋ ubəghə ni zey tsu idəŋ tsu kùm itən. 39Wù nii ə təsawgoʼ wey tə â teynə fu n sə kə zat kə fəkaʼ n zow nghee tə deynə, koʼ nghee Yeso kpunə tii dza nə̀, “Wù wən â ndzəm loʼ waa Kəzə̀.”

40Gheyzən a loʼ ghə â loʼ fu ghə laalə bənə nə kədaa. Maliya Magdala, Maria nay Jems ghi Yosef, nsə Salome. 41Ghə â kaʼ ni dzûmə Yeso nə̀ tə nam loʼ n Galili, ghə n gaamə bə wi. Ndəmə gheyzən a loʼ ghə ghə â dzûmə kɔʼ bənə wi n Yerosalem n loʼ soʼo fu.

Ghə tsəllə Yeso

(Mat 27.57-61; Luk 23.50-56; Jɔn 19.38-42)

42Â loʼ n tsuʼ fey ghə bayyənə ghəə ghə tii, tɔŋŋə tsuʼ fey ghə̂ ghə a bayyə ghəə ghə ni zə̂ tsuʼ inaʼ. Ambə n nəŋə i fənə tə, 43Yosef, wù Alimatia n ndòw bə. Tə â loʼ wù nii n ndaw tsə, tə n ləmmə tənə bə i fɔɔ u Kəzə̀. Tə n kow tsu fə̀ŋ ndòw bəb ndòw vən i Yeso n wɔ Pilato. 44Dzuu zə n zum Pilato nghee tə zow tsunə nə̀ Yeso n ghaʼi kpu. Tə n tɔŋɔ tsu sawgoʼ zey zə â loʼnə tow kə fu ni bəb zow nə̀ ghab kə n shi nghee tə̀ Yeso mə kpunə. 45Ambə sawgoʼ zey bəghəm bənə nə tə n kpu, Pilato n dza tə̀ Yosef nə̀ tə loʼ ni ndòw ney vən i Yeso. 46Yosef n zuu kɔʼ ndzə tə fəmə tə, ndòw ney shi tsu bə vən i Yeso, baŋ kɔʼ tii, ndòw naŋa ndòw n say zey tə â təm nyi ndòwnə nə kənaa. Tə n bəŋŋə tsəd bə dzuu zə isay zey nə kənaa. 47Maliya Magdala, ghi Maria nay Yosef n tsìi laalə kənu, ndòw koʼ tsu luʼu key ghə naŋanə vən i Yeso zə tii.

Currently Selected:

Malakus 15: WEH

Highlight

Copy