Mefaʼ Meziŋ-ntō 1
1
Menu mīi Lúkási a le tí ánɛ Yɛɛ́so á ntē mvhɔ aŋwaʼne zí
1Ndi Teofil, meŋ ndɛ á ntē mvhɔ aŋwaʼne zá, ḿbɛ́tɛ menu mīi, Yɛɛ́so a le zī á leghʉ, mbɔɔ emi a le zī á lezīʼne á mbū epuɔ, tɛ efhó á letseŋ, 2ŋ́gʉɔ ŋkó ánɛ aleʼé zīi, Ndém a le ghʉ̄ʉ̄, á kɔ́ʼ mé lephū. Ŋ́gē ekɔ́ʼ mé éwú, ńzóʼ Azwakne Ndém, ńték meziŋ‑ntō pīi a le tsɔ́ʼ á wɔ́p, páʼ pɔ́ e cʉ́ʼ eghʉ épúp. 3A le gɔ́ tɛ ŋkwhʉ́ nzím, ńzéŋ ndɔ̄k eleʼé alāʼ megēm lekua, ŋ́kwaʼ mbú ntswī nnɛ̄t zi á mbū pɔ́p. Ŋ́ghʉ̄ ŋ́gɛ, pɔ́ echʉ́ nnɛ̄t nzhɛ́ á légɛ, a á ŋiŋ nte, ńzéŋ nnɔŋ eshúŋɔ á wɔ́p anu ánɛ Lefɔ Ndém.
Nzoknzem ashuŋne Yɛɛ́so á mbū meziŋ‑ntō pí
4Á lɛ amɔ̄ʼ aleʼé, Yɛɛ́so pɔ́ a meziŋ‑ntō pí é cúʼte, ńnɔŋ mpfɛ́tɛ azō, á tswɛte á wɔ́p ŋ́gɛ: «Ndɛ́ʼ pɛ efhó á Yelósalɛm ŋgʉ̄ɔ ajʉʼ. Pɛ enáŋ éwú, ńzwíʼte ajū mīi, meŋ ke lɔ̄k nchu gá eshúŋ á wɛ́ ŋ́gɛ, Mɔʼɔ́ ga a ke phʉ́ á wɛ́. 5Meŋ ke lé ŋ́gɛ, Jáaŋ a kɛ si nnōʼo epuɔ á ntē ntshi, á cʉʉ́ʼ eleʼé shɔ́ʼɔ́ lɛ́, Ndém a enōʼ á wɛ́ á ntē Azwakne yí. » 6Pɔ́ zɛ́t ncúʼte épúp, ńzɛ́tte á yí ŋ́gɛ: «Mɔʼɔ́ wek, tsetsɔŋɔ á lɔkɔ ŋgɔ́ afʉʼ zīi, o o piŋne lefɔ, éyá á mbū epuɔ Islaɛl lɛ́?» 7Yɛɛ́so á pwɛt á mbū pɔ́p ŋ́gɛ: «Mɔʼɔ́ ga mé wɛɛ̄ afʉʼ, kɛ aleʼé lɛ́ɛ, ázi a lɔkɔ ŋghʉ̄ɛ menu mí. Pɛ te pɔŋté á wɛ́ á lezhɛ̄ ɛ́. 8Azwakne Ndém mé gɔ eshʉʼ esóʼo ánɛ pɛ, éyá á wɛ́ mbʉʼ, tɛ́ pɛ elɔk eshúŋ ajū mīi, pɛ é si nzhɛ́ɛ ánɛ meŋ, ńzī á tésɔŋ Yelósalɛm, éshúŋ mmāk ŋgɔŋ Yudéa, ŋ́kó á Samalía ntsem, éshúŋ shúŋ tɛ ndáʼ mbú ŋ́kó á nzokó ŋgɔŋ. »
Yɛɛ́so a á ega ŋkɔ́ʼɔ mé lephū
9Yɛɛ́so á mak á leshūŋ menu muɔ mɛ́t, Ndém á lɔk á yí ŋgē ekɔ́ʼ mé lephū, pɔ́ nɔŋ ncʉ̄ʉ á yí, alɔ á piŋ ŋkʉ̄ŋɛ á yí, tɛ pɔ́ té zéŋ á yí njʉ́ɔ ɔ́. 10Pɔ́ zɛ́t ncʉ̄ʉ lephū cʉʉ, páʼ Yɛɛ́so a á kɔ́ʼ mé éwú, emɔ̄ʼ epuɔ mémpīa é lɛ ŋŋwāk á lezēŋ pɔ́p, ŋ́kʉ̄ɛ mefhɔ́ menzhó, 11ńdé á mbū pɔ́p ŋ́gɛ: «Pɛ, epuɔ Ŋgaliléa, pɛ tshií egā ncʉ̄ʉ akɔ̄ á lephū ú? Yɛɛ́so wuɔ mɛ́t yīi, Ndém a á fhó á mbū pɛ efók, ńdɔk ŋkɔ́ʼ mé lephū la, a eláʼ ezéŋ epiŋ nzem ánɛ ntií zīi, pɛ jʉ́ɔ á lɔkɔ ŋkɔ́ʼɔ ŋgʉ̄ɔ la. » 12Meziŋ‑ntō Yɛɛ́so, é lɛ efhó á ndo lekwɛ̄t yīi, mɛ́ tɔ́ŋɔ lɛ, Lekwɛ̄t Methʉ́ Olive, ḿbīŋ nzem mé tésɔŋ Yelósalɛm. Ŋgia á lefhō á lekwɛ̄t mɛ́t, ŋ́kó á Yelósalɛm, é té tswhi esāk á. 13Pɔ́ piŋ nzem tɛ ŋkó á Yelósalɛm páʼā, ḿbē mé ntē ŋgyā yīi, pɔ́ gɛ nzī mbōtɛ éwú, ánɛ leleŋ athʉ́. É lɛ wɔ, Piɛ, Jáaŋ, Jáak pɔ́ Aŋdlɛya, mbɔɔ Fílíio, ŋ́ghʉ̄ á Tomási, Baatelemi pɔ́ Matío, mbɔɔ Jáak méŋ Alfɛ pɔ́ Simɔŋ yīi, mɛ́ lɛɛ́ nzéŋɛ ntɔ́ŋɔ á yí lɛ, Nzɔŋɔ‑alāʼ, ŋ́ghʉ̄ á Yúdas méŋ Jáak. 14Pɔ́ lɛɛ́ mbú ncúʼtɛ ŋgɔ́ɔ á taʼ nchu, éswíŋtɛ á Ndém efʉʼ metsem, pɔ́ a Malía mía Yɛɛ́so, mbɔɔ emɔ̄ʼ wɔnzwí, ŋ́ghʉ̄ epɔ̄ memía Yɛɛ́so.
Mɛ́ é ega ntsɔ́ʼɔ á ŋiŋ yīi, a a jhʉ́ ajʉʼ Yúdas
15Á shʉʼ ŋgɔ́ amɔ̄ʼ aleʼé, epuɔ Yɛɛ́so é cúʼte tɛ ŋgɔ́ á ŋiŋnɔŋ ajūɔ ŋkhʉ mé megēm mbīa. Piɛ á pʉ́ʼɛ nnɛ̄t á tsetsɛlɛ pɔ́p, ńdé ŋ́gɛ: 16«Epɔ̄ memía, anu zīi Azwakne Ndém á le ghʉ̄ʉ̄, Ndavít á lé á ntē aŋwaʼne Ndém, á pɔŋteé á lepo. Ajū mīi, a le té njhʉ̄ ndé, á le cʉtē á Yúdas yīi, a le jhʉ́ á zoʼ, ŋ́gɔ́ mvhɔ tɛ́ mɛ́ shʉʼ ŋgɔ̄ á Yɛɛ́so. 17A lɛ ŋiŋ nnɔ yímpɛ, tɛ ŋgwɛ̄ azí afaʼ á tsetsɛlɛ pímpɛ. » 18Ŋkāp tepɔŋ zīi a ke tswíī, a ke lɔ̄k nzó ŋkāʼ. Ŋkāʼ mɛ́t tɛ́ a le ŋém á esī éwú mvhɔ mvhɔ, levem tsí é vɛ́t, metū mí é tó esāŋ ejʉʼ, á kwhʉ́. 19Epuɔ Yelósalɛm metsem, é ke pú njúʼ ajʉɔ anu mɛ́t, tɛ ntswhī ŋkāʼ wuɔ mɛ́t, mé alāʼ zɔ́p lɛ: Akɛldama. Ńdɔkɔ ŋ́gɛ, ŋkāʼ metshi#1.19 Ashuŋne jʉɔ mɛ́t (akem 18-19), á si ŋgɔ́ azi ŋiŋ yīi, a le tí aŋwaʼne jʉɔ, á té ashuŋne Piɛ ɛ́.. 20Á zéŋ ŋgɔ́ anu mɛ́t, tɛ́ Ndavít a le cuŋtē ndé á ntē amɔ̄ʼ azɔp‑ntshi zí ŋ́gɛ:
“Mɛ́ eshʉʼ mbú ŋgwáʼ
ŋgyā zi,
tɛ ŋiŋ á le éwú nnáŋ.”
Mɛ́ le zéŋ ntí ŋ́gɛ:
“Ŋiŋ ndɛʼɛ a eshʉʼ njhʉ́ ajʉʼ zí.”
21-22Púp, á mbɔŋ ŋ́gɛ, mmɔʼ ŋiŋ a eshʉʼ ntswɛ́tte á wék, ḿpek a pɔ́p e ekʉ́ʼne eshúŋ ajū mīi, pek é si nzhɛ́ɛ ánɛ Yɛɛ́so, páʼ a ke zím ánɛ lewhʉ̄. Ŋgaŋ a egɔ́ á ŋiŋ yīi, ḿpɛ a pɔ́p a Atsyapuɔ Yɛɛ́so, é kɛ si ŋkʉ́ʼnɛ nziŋɛ efʉʼ metsem, tɛ efhó afʉʼ zīi, Jáaŋ a le nōʼ á yí á ntshi, ŋ́gʉɔ ŋkó ánɛ aleʼé zīi, Ndém a le ghʉ̄ʉ̄, á kɔ́ʼ mé lephū. »
23Pɔ́ júʼ ashuŋne Piɛ, ńdɛ efāʼ epuɔ mémpīa ntshí á ajʉʼ. Mmɔʼ ŋiŋ á gɔ́ lɛ Yosɛ́p, éyi mɛ́ lɛɛ́ nzéŋɛ ntɔ́ŋɔ á yí lɛ, Baasabas mbɔɔ lɛ Zwistwis, ḿbiŋ ŋghʉ̄ á Matías. 24Epuɔ metsem é pú eswíŋte á Ndém ndé ŋ́gɛ: «Ndi, wu yīi o ó si nzhɛ́ɛ ajū mīi, á ntē ŋiŋnɔŋ ntsem, lɛ eshʉ̄ʼ ánɛ epuɔ puɔ mémpīa, ńtsɔ́ʼ ewu ŋiŋ yīi, o ó kaŋ ŋ́gɛ, 25a ecʉ́ʼ á nziŋ‑ntō Yɛɛ́so, ńjhʉ́ ajʉʼ Yúdas. Ŋ́ghʉ̄ mefaʼ mīi a kɛɛ́ ŋghʉɛ, mbɔ a ke pīŋ ntshī nnéŋ, ŋ́gʉ̄ɔ mé azí ajʉʼ zīi, a á kɔŋ. » 26Aswiŋte á mi, pɔ́ faʼ, á whʉ ánɛ Matías. Mɛ́ néŋ á yí á nnɔ epi emɔ̄ʼ meziŋ‑ntō Yɛɛ́so ntsɔp zɛ́mɔʼɔ́ mé legēm.
Currently Selected:
Mefaʼ Meziŋ-ntō 1: ybb
Highlight
Share
Copy
Want to have your highlights saved across all your devices? Sign up or sign in
© CABTAL
Mefaʼ Meziŋ-ntō 1
1
Menu mīi Lúkási a le tí ánɛ Yɛɛ́so á ntē mvhɔ aŋwaʼne zí
1Ndi Teofil, meŋ ndɛ á ntē mvhɔ aŋwaʼne zá, ḿbɛ́tɛ menu mīi, Yɛɛ́so a le zī á leghʉ, mbɔɔ emi a le zī á lezīʼne á mbū epuɔ, tɛ efhó á letseŋ, 2ŋ́gʉɔ ŋkó ánɛ aleʼé zīi, Ndém a le ghʉ̄ʉ̄, á kɔ́ʼ mé lephū. Ŋ́gē ekɔ́ʼ mé éwú, ńzóʼ Azwakne Ndém, ńték meziŋ‑ntō pīi a le tsɔ́ʼ á wɔ́p, páʼ pɔ́ e cʉ́ʼ eghʉ épúp. 3A le gɔ́ tɛ ŋkwhʉ́ nzím, ńzéŋ ndɔ̄k eleʼé alāʼ megēm lekua, ŋ́kwaʼ mbú ntswī nnɛ̄t zi á mbū pɔ́p. Ŋ́ghʉ̄ ŋ́gɛ, pɔ́ echʉ́ nnɛ̄t nzhɛ́ á légɛ, a á ŋiŋ nte, ńzéŋ nnɔŋ eshúŋɔ á wɔ́p anu ánɛ Lefɔ Ndém.
Nzoknzem ashuŋne Yɛɛ́so á mbū meziŋ‑ntō pí
4Á lɛ amɔ̄ʼ aleʼé, Yɛɛ́so pɔ́ a meziŋ‑ntō pí é cúʼte, ńnɔŋ mpfɛ́tɛ azō, á tswɛte á wɔ́p ŋ́gɛ: «Ndɛ́ʼ pɛ efhó á Yelósalɛm ŋgʉ̄ɔ ajʉʼ. Pɛ enáŋ éwú, ńzwíʼte ajū mīi, meŋ ke lɔ̄k nchu gá eshúŋ á wɛ́ ŋ́gɛ, Mɔʼɔ́ ga a ke phʉ́ á wɛ́. 5Meŋ ke lé ŋ́gɛ, Jáaŋ a kɛ si nnōʼo epuɔ á ntē ntshi, á cʉʉ́ʼ eleʼé shɔ́ʼɔ́ lɛ́, Ndém a enōʼ á wɛ́ á ntē Azwakne yí. » 6Pɔ́ zɛ́t ncúʼte épúp, ńzɛ́tte á yí ŋ́gɛ: «Mɔʼɔ́ wek, tsetsɔŋɔ á lɔkɔ ŋgɔ́ afʉʼ zīi, o o piŋne lefɔ, éyá á mbū epuɔ Islaɛl lɛ́?» 7Yɛɛ́so á pwɛt á mbū pɔ́p ŋ́gɛ: «Mɔʼɔ́ ga mé wɛɛ̄ afʉʼ, kɛ aleʼé lɛ́ɛ, ázi a lɔkɔ ŋghʉ̄ɛ menu mí. Pɛ te pɔŋté á wɛ́ á lezhɛ̄ ɛ́. 8Azwakne Ndém mé gɔ eshʉʼ esóʼo ánɛ pɛ, éyá á wɛ́ mbʉʼ, tɛ́ pɛ elɔk eshúŋ ajū mīi, pɛ é si nzhɛ́ɛ ánɛ meŋ, ńzī á tésɔŋ Yelósalɛm, éshúŋ mmāk ŋgɔŋ Yudéa, ŋ́kó á Samalía ntsem, éshúŋ shúŋ tɛ ndáʼ mbú ŋ́kó á nzokó ŋgɔŋ. »
Yɛɛ́so a á ega ŋkɔ́ʼɔ mé lephū
9Yɛɛ́so á mak á leshūŋ menu muɔ mɛ́t, Ndém á lɔk á yí ŋgē ekɔ́ʼ mé lephū, pɔ́ nɔŋ ncʉ̄ʉ á yí, alɔ á piŋ ŋkʉ̄ŋɛ á yí, tɛ pɔ́ té zéŋ á yí njʉ́ɔ ɔ́. 10Pɔ́ zɛ́t ncʉ̄ʉ lephū cʉʉ, páʼ Yɛɛ́so a á kɔ́ʼ mé éwú, emɔ̄ʼ epuɔ mémpīa é lɛ ŋŋwāk á lezēŋ pɔ́p, ŋ́kʉ̄ɛ mefhɔ́ menzhó, 11ńdé á mbū pɔ́p ŋ́gɛ: «Pɛ, epuɔ Ŋgaliléa, pɛ tshií egā ncʉ̄ʉ akɔ̄ á lephū ú? Yɛɛ́so wuɔ mɛ́t yīi, Ndém a á fhó á mbū pɛ efók, ńdɔk ŋkɔ́ʼ mé lephū la, a eláʼ ezéŋ epiŋ nzem ánɛ ntií zīi, pɛ jʉ́ɔ á lɔkɔ ŋkɔ́ʼɔ ŋgʉ̄ɔ la. » 12Meziŋ‑ntō Yɛɛ́so, é lɛ efhó á ndo lekwɛ̄t yīi, mɛ́ tɔ́ŋɔ lɛ, Lekwɛ̄t Methʉ́ Olive, ḿbīŋ nzem mé tésɔŋ Yelósalɛm. Ŋgia á lefhō á lekwɛ̄t mɛ́t, ŋ́kó á Yelósalɛm, é té tswhi esāk á. 13Pɔ́ piŋ nzem tɛ ŋkó á Yelósalɛm páʼā, ḿbē mé ntē ŋgyā yīi, pɔ́ gɛ nzī mbōtɛ éwú, ánɛ leleŋ athʉ́. É lɛ wɔ, Piɛ, Jáaŋ, Jáak pɔ́ Aŋdlɛya, mbɔɔ Fílíio, ŋ́ghʉ̄ á Tomási, Baatelemi pɔ́ Matío, mbɔɔ Jáak méŋ Alfɛ pɔ́ Simɔŋ yīi, mɛ́ lɛɛ́ nzéŋɛ ntɔ́ŋɔ á yí lɛ, Nzɔŋɔ‑alāʼ, ŋ́ghʉ̄ á Yúdas méŋ Jáak. 14Pɔ́ lɛɛ́ mbú ncúʼtɛ ŋgɔ́ɔ á taʼ nchu, éswíŋtɛ á Ndém efʉʼ metsem, pɔ́ a Malía mía Yɛɛ́so, mbɔɔ emɔ̄ʼ wɔnzwí, ŋ́ghʉ̄ epɔ̄ memía Yɛɛ́so.
Mɛ́ é ega ntsɔ́ʼɔ á ŋiŋ yīi, a a jhʉ́ ajʉʼ Yúdas
15Á shʉʼ ŋgɔ́ amɔ̄ʼ aleʼé, epuɔ Yɛɛ́so é cúʼte tɛ ŋgɔ́ á ŋiŋnɔŋ ajūɔ ŋkhʉ mé megēm mbīa. Piɛ á pʉ́ʼɛ nnɛ̄t á tsetsɛlɛ pɔ́p, ńdé ŋ́gɛ: 16«Epɔ̄ memía, anu zīi Azwakne Ndém á le ghʉ̄ʉ̄, Ndavít á lé á ntē aŋwaʼne Ndém, á pɔŋteé á lepo. Ajū mīi, a le té njhʉ̄ ndé, á le cʉtē á Yúdas yīi, a le jhʉ́ á zoʼ, ŋ́gɔ́ mvhɔ tɛ́ mɛ́ shʉʼ ŋgɔ̄ á Yɛɛ́so. 17A lɛ ŋiŋ nnɔ yímpɛ, tɛ ŋgwɛ̄ azí afaʼ á tsetsɛlɛ pímpɛ. » 18Ŋkāp tepɔŋ zīi a ke tswíī, a ke lɔ̄k nzó ŋkāʼ. Ŋkāʼ mɛ́t tɛ́ a le ŋém á esī éwú mvhɔ mvhɔ, levem tsí é vɛ́t, metū mí é tó esāŋ ejʉʼ, á kwhʉ́. 19Epuɔ Yelósalɛm metsem, é ke pú njúʼ ajʉɔ anu mɛ́t, tɛ ntswhī ŋkāʼ wuɔ mɛ́t, mé alāʼ zɔ́p lɛ: Akɛldama. Ńdɔkɔ ŋ́gɛ, ŋkāʼ metshi#1.19 Ashuŋne jʉɔ mɛ́t (akem 18-19), á si ŋgɔ́ azi ŋiŋ yīi, a le tí aŋwaʼne jʉɔ, á té ashuŋne Piɛ ɛ́.. 20Á zéŋ ŋgɔ́ anu mɛ́t, tɛ́ Ndavít a le cuŋtē ndé á ntē amɔ̄ʼ azɔp‑ntshi zí ŋ́gɛ:
“Mɛ́ eshʉʼ mbú ŋgwáʼ
ŋgyā zi,
tɛ ŋiŋ á le éwú nnáŋ.”
Mɛ́ le zéŋ ntí ŋ́gɛ:
“Ŋiŋ ndɛʼɛ a eshʉʼ njhʉ́ ajʉʼ zí.”
21-22Púp, á mbɔŋ ŋ́gɛ, mmɔʼ ŋiŋ a eshʉʼ ntswɛ́tte á wék, ḿpek a pɔ́p e ekʉ́ʼne eshúŋ ajū mīi, pek é si nzhɛ́ɛ ánɛ Yɛɛ́so, páʼ a ke zím ánɛ lewhʉ̄. Ŋgaŋ a egɔ́ á ŋiŋ yīi, ḿpɛ a pɔ́p a Atsyapuɔ Yɛɛ́so, é kɛ si ŋkʉ́ʼnɛ nziŋɛ efʉʼ metsem, tɛ efhó afʉʼ zīi, Jáaŋ a le nōʼ á yí á ntshi, ŋ́gʉɔ ŋkó ánɛ aleʼé zīi, Ndém a le ghʉ̄ʉ̄, á kɔ́ʼ mé lephū. »
23Pɔ́ júʼ ashuŋne Piɛ, ńdɛ efāʼ epuɔ mémpīa ntshí á ajʉʼ. Mmɔʼ ŋiŋ á gɔ́ lɛ Yosɛ́p, éyi mɛ́ lɛɛ́ nzéŋɛ ntɔ́ŋɔ á yí lɛ, Baasabas mbɔɔ lɛ Zwistwis, ḿbiŋ ŋghʉ̄ á Matías. 24Epuɔ metsem é pú eswíŋte á Ndém ndé ŋ́gɛ: «Ndi, wu yīi o ó si nzhɛ́ɛ ajū mīi, á ntē ŋiŋnɔŋ ntsem, lɛ eshʉ̄ʼ ánɛ epuɔ puɔ mémpīa, ńtsɔ́ʼ ewu ŋiŋ yīi, o ó kaŋ ŋ́gɛ, 25a ecʉ́ʼ á nziŋ‑ntō Yɛɛ́so, ńjhʉ́ ajʉʼ Yúdas. Ŋ́ghʉ̄ mefaʼ mīi a kɛɛ́ ŋghʉɛ, mbɔ a ke pīŋ ntshī nnéŋ, ŋ́gʉ̄ɔ mé azí ajʉʼ zīi, a á kɔŋ. » 26Aswiŋte á mi, pɔ́ faʼ, á whʉ ánɛ Matías. Mɛ́ néŋ á yí á nnɔ epi emɔ̄ʼ meziŋ‑ntō Yɛɛ́so ntsɔp zɛ́mɔʼɔ́ mé legēm.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© CABTAL