Mefaʼ Meziŋ-ntō 2
2
Mɛ́ é ega eshúŋɔ páʼ Azwakne Ndém á le shʉ̄ʼ épúp
1Aleʼé lekāk zīi, mɛ́ lɛɛ́ ntɔ́ŋɔ lɛ Paŋtekɔt#2.1 Epuɔ Yúda é jhʉʉ́ lekāk Páska, á ghʉ eleʼé megēm táa, pɔ́ jhʉ́ lekāk Paŋtekɔt., á le shʉ̄ʼ ŋkuʼ, mbɔ epuɔ Yɛɛ́so metsem é mbú ncúʼte á taʼ ajʉʼ. 2Mɛ́ lɛ ŋgē ejʉ́ɔ, amɔ̄ʼ azō á zwɛt á athʉ́ páʼ afēm lā, ésóʼo ŋkó tɛ ndó ŋgyā zīi, pɔ́ ŋgɔ́ éwú. 3Pɔ́ jʉ́ɔ amɔ̄ʼ azō á ŋwak, ŋ́gɔ́ páʼ melē mmók lā, ŋ́gāpte nnɛ̄t, ŋ́gʉɔ ntshí á athū awíɛ awíɛ á nnɔ pɔ́p. 4Azwakne Ndém á lɛ mbú ŋkó ánɛ pɔ́p tɛ ndó, ḿbiŋ ŋghʉ̄, pɔ́ zi á leshūŋne melāʼ ndɛʼɛ. 5Á lɛ ánɛ meleʼé mɛ́t, mbɔ emɔ̄ʼ epuɔ Yúda é efhó á melāʼ melāʼ, éshʉʼ ncúʼte á Yelósalɛm, ŋ́gɔ́ epuɔ, ńnáŋ páʼ Ndém a á si ŋkɔ̄ŋɔ. 6Ńdɛ njúʼ azō mɛ́t, á lezwɛt páʼā, ńnáte eshʉʼ ncúʼte á ajʉʼ mɛ́t tɛ nzá, á lezēŋ epuɔ Yɛɛ́so. Epuɔ Yɛɛ́so é nɔŋ eshúŋnɛ, awíɛ awíɛ á júʼɔ mé alāʼ zɔ́p, á tsya á wɔ́p. 7Ŋ́kʉ̄ʼne á wɔ́p tɛ nchu wɔ́p é zó. Pɔ́ zɛ́tte ŋ́gɛ: «Epuɔ pīi, pɔ́ shúŋnɛ lāa, é té gɔ́ áa epuɔ Ŋgaliléa metsem ɛ́ lɛ̄? 8Pɔ́ é piŋ ŋghʉ̄ á lā, éshúŋ menu mé melāʼ mímpɛ, tɛ awíɛ awíɛ á pú njúʼɔ ɔ́? 9Emɔ̄ʼ epuɔ é tsetsɛlɛ pímpɛ, mbɔ pɔ́ efhó á ŋgɔŋ Páat, emɔ̄ʼ é fhó á ŋgɔŋ Mɛdi pɔ́ Elam, mbɔɔ Mezopotami. Emɔ̄ʼ é zéŋ efhó á Yudéa pɔ́ Kapados mbɔɔ á Pɔ́ɔŋ, ŋ́ghʉ̄ á Azíi. 10Emɔ̄ʼ é fhó á Fliji pɔ́ Pamfili mbɔɔ á Ejīpto, ŋ́ghʉ̄ eshhʉ̄ ŋgɔŋ Libi, éyi é páte á Silɛ̄ne. Emɔ̄ʼ epuɔ é fhó á Lóma. 11Epuɔ Yúda puɔ mɛ́t metsem, mbɔɔ epuɔ alāʼ ndɛʼɛ pīi, pɔ́ lē esɛt ncʉ́ʼ epuɔ Yúda, é pú nzéŋ ŋgɔ́ azɔ́p ega, páʼ epuɔ Klɛt, ŋ́ghʉ̄ epuɔ Alabi. Ḿpɛ metsem é si mbúu njúʼɔ páʼ, mɛ́ lɔkɔ alāʼ zímpɛ eshúŋɔ menu mbɔŋ mīi, Ndém a le ghʉ̄ʉ̄. » 12Anu á pú ntsyā á wɔ́p, pɔ́ kwaŋ kékáŋ, ńdé á tsetsɛlɛ pɔ́p ŋ́gɛ: «Ajʉɔ anu á páʼa, ńdɔkɔ ŋ́gɛ akɔ̄?» 13Emɔ̄ʼ epuɔ é gɔ́ éwú ŋké nzwī á wɔ́p zwii ŋ́gɛ: «Epuɔ Ŋgaliléa pīi, pɔ́ é pía meluʼ. »
Piɛ a á ega eshúŋnɛ á mbū alāʼ
14Piɛ pɔ́ a epi emɔ̄ʼ meziŋ‑ntō Yɛɛ́so, ntsɔp zɛ́mɔʼɔ́ mé legēm, é lɛ ndū á esī. Piɛ á lɔk ŋghi teté, ńchʉ́ nnɛ̄t ndé á mbū alāʼ ŋ́gɛ: «Pɛ epuɔ Yúda, mbɔɔ epuɔ metsem á ntē Yelósalɛm, pɛ etéŋɛ metuúŋ, ńzwíʼte, meŋ eshúŋ á wɛ́ anu zīi, á esī. 15Tsetsɔŋɔ, a zɛɛ́t áa menu levuʼɔ́ nzemɛ́nzēm, epuɔ puɔ é ka nú meluʼ tɛ mbía páʼ pɛ kwaŋa lā á. 16Menu mīi, é tsetsɔŋɔ ntɔ́kɔ la, é lɔkɔ mbūɔ̄ páʼ Joɛl ntswi‑ŋke Ndém, a le lé ŋ́gɛ: 17Ndém á si ndʉ́ɛ́ ŋ́gɛ:
A láʼ ekuʼe ánɛ mezoknzem eleʼé alāʼ,
meŋ enéŋ Azwakne zá té ndhʉ, ánɛ epuɔ metsem.
Epɔ̄ pɛ́, epi mbaŋa pɔ́ a epi wɔnzwí, e ecʉ́ʼ metswi‑ŋke pá.
Epɔ̄ ŋgwɛso pɛ́,
e ejʉ́ɔ njʉɔ te lí.
Mezwiŋ epuɔ,
e ejʉ́ɔ njʉ́ɔ lelɔ̄k.
18Ŋŋ, a láʼ ekuʼ ánɛ meleʼé alāʼ mɛ́t, meŋ enéŋ Azwakne zá té ndhʉ ánɛ mbaŋa pɔ́ wɔnzwí pīi, pɔ́ gɛ ŋghʉ̄ɛ ajū mīi, meŋ á si nzɛ́ttɛ,
pɔ́ ecʉ́ʼ metswi‑ŋke pá.
19Meŋ a shʉʼ eghʉʉ, ndajʉ́ɔ menu, a etó á lephū.
Éghʉ, meyiŋne menu mīi, pɛ e jʉ́ɔ ecɔʼe,
e etó á ndo esī atsetsáʼ.
Pɛ e shʉʼ ejʉ́ɔ metshi,
éjʉ́ɔ mmók,
éjʉ́ɔ amaane ŋghī mmók.
20Lezēk nu e shʉʼ ewhʉ nzém,
lezēk saŋ e esɛnne mbāŋ páʼ metshi lā.
Tɛ́ mía mía aleʼé alāʼ á mbū Atsyapuɔ a ekūʼ,
ŋ́gɔ́ ntsɔp aleʼé.
21Aleʼé alāʼ mɛ́t, ŋiŋ yīi a á gaʼte ntēŋ á Atsyapuɔ, a etswɛ́t. »
22Piɛ á zéŋ ndé ŋ́gɛ: «Pɛ epuɔ Islaɛl, pɛ echʉ́ nnɛ̄t njúʼ anu jʉɔ. Pɛ é si nzhɛ́ɛ á légɛ, Yɛɛ́so ŋiŋ Naázalɛt, a kɛ ŋiŋ, mbɔ Ndém a ke tswī á wɛ́ á légɛ, yí mé le tó á yí. A ke yá mete á mbū yí, á lelɔk ŋghʉ̄ meŋkʉʼne anu, pɔ́ ndajʉ́ɔ menu á tsetsɛlɛ pɛ. 23Yɛɛ́so wuɔ mɛ́t, pɛ ke gɔ̄ á yí, ŋ́gyá á mbū wɔ te zhɛ́‑Ndém, pɔ́ kwɛte á yí ánɛ mbaŋne paŋné, á kwhʉ́. Á gɔ́ anu zīi, Ndém a le té njhʉ̄ nzápa, ńnɔŋ nzhɛ́ɛ á légɛ, a láʼ egɔ́ épúp. 24Púp, ŋ́kɛ́ʼte meŋkhʉ lewhʉ̄ ánɛ yí, ŋ́ghʉ̄ á zím, melaʼ mīi, lewhʉ̄ a le gɔ a á le kūʼ á lekūʼte á yí, páʼ ŋgaŋ atʉɛ́ lā á. 25Efɔ Ndavít a le lé ánɛ anu Yɛɛ́so jʉɔ mɛ́t ŋ́gɛ:
“Meŋ ke nɔ̄ŋ njʉ́ɔ Atsyapuɔ Ndém, á lezēŋ meŋ
efʉʼ metsem.
Á nɔŋ ntɔ́tɛ á gá, á ŋkɔʼɔ́ apū ete, ḿbɔ́kɔ á gá á lecɔʼ.
26Melaʼ épúp tɛ́, ntē gá é naáŋ á mbɔŋɔ́, ŋghi lekāk é nɔŋ ntúɔ́ á nchu meŋ,
meŋ zi mbú ŋkwhʉ́ kwhʉ́,
mbɔ meŋ á zhɛ́ á légɛ,
o gɔ le gá wáʼ,
27melaʼ mīi, o te shʉʼ esákne á gá á apwɛt ɛ́.
Épīŋ le véŋ ŋ́gɛ,
meŋ yīi meŋ ndē efɛ́ nnɛ̄t za ŋgyá á mbū wu,
meŋ ndʉ́ á ntē lesi í.
28O le tswī á gá á mɛnzhɛ yīi, meŋ gɔ ezápa éwú, tɛ́ efú ntā á lezēŋ Ndém.
Meŋ a piŋ eshʉʼ ewɛ lekāk á lezēŋ wu.”»
29Piɛ á zéŋ ndé ŋ́gɛ: «Epɔ̄ memía pá, meŋ gɔ eshúŋ á wɛ́ té pɔ́k ŋ́gɛ, maŋgānjʉʼ yímpɛ Ndavít, a le kwhʉ́ʉ̄, mɛ́ túŋ á yí, lesi tsí é zɛɛ́t á alāʼ tɛ ntshí ayáʼa. 30A le tswī ŋke Ndém, ḿbiŋ nnɔ̄ŋ nzhɛ́ɛ alaʼne zīi, Ndém a le tswī á mbū yí tɛ ŋkā ŋ́gɛ, yí e shʉʼ eyá lefɔ tsí á mbū mmɔʼ ŋiŋ yīi, a á tó ánɛ nzwɛt zi. 31Ndavít a le té njhʉ̄ nzhɛ́ á légɛ, Ndém a a fú eghʉ, Nzaʼ‑Ŋkhʉ yīi a le laʼnēē, a ezím ánɛ lewhʉ̄. Púp tɛ́, a le lé ŋ́gɛ:
“Mɛ́ lɛ te á yí á apwɛt esákne,
nnɛ̄t zi é piŋ te á lesi lʉ́.”
32Ŋiŋ wuɔ mɛ́t, a á Yɛɛ́so. Ndém a ke ghʉ̄ʉ̄, á zím ánɛ lewhʉ̄. Pek, épuɔ Yɛɛ́so, é si ŋgɔ́ wɔ njhʉɛ‑njʉɔ́ metsem. 33Mɔʼɔ́ yi Ndém, a ke kɔʼné á yí, ńnáŋ ánɛ apū ete zí, ḿbiŋ ŋgyá Azwakne zí zīi, a le laʼnēē, á mbū yí. Ajū mīi pɛ júʼɔ, ńzéŋɛ njʉ́ɔ ayáʼa lāa, á si ŋgɔ́ Azwakne mɛ́t zīi, Yɛɛ́so a á zéŋ nnéŋ ánɛ pek azí, té ndhʉ. 34Ŋ́gɔ́ mé Ndavít, mbɔ a lɛ te lɔ̄k mbe nnɛ̄t zi ŋkɔ́ʼ mé lephū ɔ́. Táʼ, ŋ́ké mbīŋ ndé ŋ́gɛ,
Ndém a á lé á mbū Nzaʼ‑Ŋkhʉ yīi, a á mɔʼɔ́ ga, ŋ́gɛ:
“Shʉʼɛ nnáŋ
á ŋkɔʼɔ́ apū ete meŋ.
35Ńzwíʼte afʉʼ zīi, meŋ a ghʉ,
o etshíte mekhu mú ánɛ megaŋ mbo pú.”
36Pɛ, ńzwɛt Islaɛl, pɛ ecuŋte nzhɛ́ á mbɔŋɔ́ á légɛ, Yɛɛ́so wuɔ mɛ́t yīi, pɛ ke kwɛtē á yí ánɛ mbaŋne paŋné lā, Ndém a ke chʉ́ á yí, ńdɔk ŋghʉ̄ á Nzaʼ‑Ŋkhʉ, ńzéŋ nnéŋ á yí ŋ́gɛ, a enɔŋ esáʼa á wɛ́. »
37Epuɔ mɛ́t é júʼ anu mɛ́t, ŋ́gɔ̄ nnɛ̄t zɔp. Ńzɛ́tte á Piɛ pɔ́ meziŋ‑ntō ŋ́gɛ: «Epɔ̄ memía, tɛ pek é páʼa, éghʉ á lā?» 38Piɛ á pwɛt ŋ́gɛ: «Pɛ egɔ̄ nnɛ̄t zɛ, ŋgwáʼ atswhī tepɔŋ zɛ́, awíɛ awíɛ a evéŋ, mɛ́ enōʼ á yí á ntshi, páʼ a á néŋ ntē yí ánɛ Yɛɛ́so Klísto. Pɛ eghʉ̄ épúp, Ndém a elēkne mefa mɛ́, ḿbiŋ ŋgyá á wɛ́ Azwakne zí. 39Á zi ŋgē egɔ́, mbɔ Ndém a le laʼnē ajʉɔ anu, á mbū pɛ, mbɔɔ á mbū ewɔŋkhʉ̄ pɛ́, mbɔɔ á mbū epuɔ pīi, pɔ́ zɛɛ́t te zhɛ́ á Ndém. Á mbū ŋgɔŋ epuɔ metsem pīi, Atsyapuɔ Ndém yímpɛ, a a shʉʼ etɔ́ŋ á wɔ́p ŋ́gɛ, pɔ́ eshʉ̄ʼ mé lezēŋ tsí. » 40Piɛ á zéŋ eshúŋ menu tɛ é záne, ńdɔk ŋghʉ̄ pɔ́ véŋ á légɛ, anu Yɛɛ́so mɛ́t, á anuúnē. Ńték á wɔ́p ndé ŋ́gɛ: «Pɛ efók azɛ́ athū ánɛ ŋgʉɔ̄ʼ zīi, Ndém a gɔ eshʉʼ enéŋ ánɛ mefwɛ̄t puɔ mɛ́t. » 41Epuɔ tɛ nzáne é le júʼ anu Piɛ. Epuɔ pīi pɔ́ é véŋ, mɛ́ noʼ á wɔ́p á ntshi. Aleʼé mɛ́t, ŋiŋnɔŋ ajūɔ ntsāʼ tɛ́t, á shʉʼ ŋkó ánɛ nnɔ epuɔ Yɛɛ́so.
Ntií lenāŋ epuɔ Yɛɛ́so
42Pɔ́ lɛ si nnɔŋ nnéŋɛ ntē wɔ́p njúʼɔ anu zīi, meziŋ‑ntō Yɛɛ́so é zíʼnɛ á wɔ́p. Ḿbútɛ ŋgɔ́ɔ á taʼ nchu, ḿbwɔ́ʼtɛ mblɛ, ŋ́gaptɛ mpfɛ́tɛ. Ḿbiŋɛ ncúʼtɛ, éswíŋtɛ á Ndém, tɛ ŋiŋ a te ntshó ɔ́. 43Meziŋ‑ntō Yɛɛ́so é lɛ si ŋghʉ̄ɛ á ndajʉ́ɔ menu, pɔ́ meyiŋne mīi, é si nnɔŋ ntswīi mete Ndém. Epuɔ metsem é piŋ nnɔ̄ŋ njʉ́ɔ, ńcʉ́ʼɛ ncɔ̄ʼ cɔʼe. 44Wɔ fɛ́‑nnɛ̄t ŋgyá mé Yɛɛ́so tɛ mmī, é pú ncúʼte ncʉ́ʼ á taʼ, apa zɔ́p á zéŋ mbú ncʉ́ʼ á taʼ. 45Pɔ́ lɛɛ́ eswiŋɛ etsáʼ tsɔ́p pɔ́ etsō tsɔ́p, ŋ́gāptɛ ŋkāp á mbū awíɛ awíɛ, nzwiŋ yīi, e kuʼ á lelɔk ntɔ̄ŋ anu zīi, á ntshí ánɛ yí. 46Ńzéŋ nnɔŋ mbúu ncúʼtɛ á ntē Mía Ŋgyā Ndém eleʼé tsem. Ńnɔŋ ŋgúanɛ, ḿbútɛ etsō mpfɛ́tɛ mé lekāk, mbɔɔ mé ntē mbɔŋ. 47Ńnɔŋ ŋgūʼtɛ á Ndém efʉʼ metsem. Alāʼ ntsem á jʉ́ɔ lenāŋ tsɔ́p, ŋ́kɔ̄ŋ á wɔ́p. A egɔ́ eleʼé tsem, Ndém a eghʉ̄, epuɔ pīi pɔ́ fíɛ́ nnɛ̄t ŋgyáa á mbū Yɛɛ́so, ńdɔkɔ ntswɛ́tɛ, e ekó ánɛ nnɔ wɔ́p.
Currently Selected:
Mefaʼ Meziŋ-ntō 2: ybb
Highlight
Share
Copy
Want to have your highlights saved across all your devices? Sign up or sign in
© CABTAL
