Mefaʼ Meziŋ-ntō 3
3
Piɛ pɔ́ Jáaŋ é ega mbɛ́tɛ ŋkeluʼ
1Á lɛ amɔ̄ʼ aleʼé, ánɛ menu ntɛ́t mbwɛɛ́t‑njhʉ̄, ŋ́gɔ́ njhʉ̄ aswiŋte, Piɛ pɔ́ Jáaŋ é pe ŋgʉ̄ɔ mé Mía Ŋgyā Ndém. 2Ŋ́gē eshʉʼ ánɛ mmɔʼ nchu mbuʼ Mía Ŋgyā Ndém, éyi mɛ́ tɔ́ŋɔ lɛ, Mbɔŋ Nchu Mbuʼ, mmɔʼ ŋiŋ á náŋ éwú, mbɔ mɛ́ le gē ezhí á yí, á gɔ́ ŋkeluʼ. Á lɛɛ́ ŋgɔ́ɔ eleʼé etsem, mɛ́ ekʉ̄ɛ á yí ndɔ̄kɔ eshʉ̄ʼɛ éwú nnáŋa ŋ́gɛ, a elɔ́ ŋkāp á mbū epuɔ pīi, é si ntɔ́kɔ ŋgʉ̄ɔ mé Mía Ŋgyā Ndém. 3Á jʉ́ɔ á Piɛ pɔ́ Jáaŋ, pɔ́ nɔŋ ntɔ́kɔ, á lɔ́ á wɔ́p azō. 4Pɔ́ swáŋ menēk mɔ́p ntshí ánɛ yí, Piɛ á lé á mbū yí ŋ́gɛ: «Cʉtɛ á wék. » 5Á cʉte á wɔ́p, ńnɔŋ ŋkwāŋa ŋ́gɛ, pɔ́ e yá á yí azō. 6Piɛ á lɛ ndé á mbū yí ŋ́gɛ: «Meŋ te ŋkāp zīi, meŋ gɔ eyá á mbū wu wɛ̄ɛ. Táʼ, azá ajū mīi meŋ wɛ̄ɛ, meŋ a yá mé wu: ánɛ lezēŋ Yɛɛ́so Klísto ŋiŋ Naázalɛt, lū á esī nzīŋ. » 7Ńdé épúp, ŋ́kímne apū ete zí ndɔk mbwʉ́ʼɛ á yí. Afʉʼ mɛ́t afʉʼ mɛ́t, mekhu mí é lɛ ntēte. 8Á kyɛ́t ntshí á ajʉʼ, ńzī á leziŋ, pɔ́ a pɔ́p é gē egʉɔ mé Mía Ŋgyā Ndém, á ziŋɛ ŋkyɛ́ttɛ, ŋ́gūʼtɛ á Ndém. 9Epuɔ metsem, é jʉ́ɔ páʼ ŋiŋ mɛ́t, a á si nnɔŋ nziŋɛ, ńnɔŋ ŋgūʼtɛ á Ndém. 10Ŋ́gīŋ á yí, ńjʉ́ɔ á gɔ́ á ŋiŋ yīi, a gɛ nzóko nnáŋa á nchu mbuʼ yīi, mɛ́ tɔ́ŋɔ lɛ, Mbɔŋ Nchu Mbuʼ, ńdɔ́ɔ ndɔ̄ lā. Pɔ́ jʉ́ɔ á ŋiŋ mɛ́t á nɔŋ nzīŋɛ, menēk mɔ́p é tóte á athū, á pú ntsyā á wɔ́p.
Piɛ a á ega á Ŋgyā Ndém, ŋ́kɛ́ʼtɛ anu Yɛɛ́so eshúŋɔ epuɔ
11Ŋiŋ mɛ́t á nɔŋ nzhɛ̄nɛ á Piɛ pɔ́ Jáaŋ, á nɔŋ ŋkʉ̄ʼnɛ epuɔ. Mɛ́ pú nnáte eshʉ̄ʼ ntswɛ́tte á wɔ́p éwú, ánɛ ŋgyā lemu zīi, mɛ́ tɔ́ŋɔ lɛ, ezi Salomɔŋ. 12Piɛ á jʉ́ɔ páʼ alāʼ á cúʼte, ńdé ŋ́gɛ: «Pɛ epuɔ Islaɛl, akɔ̄ á pú ŋkʉ̄ʼnɛ á wɛ́ ánɛ anu jʉɔ ɔ? Pɛ cʉʉ á wék páʼa, melaʼ akɔ̄? Pɛ é kwaŋ ŋ́gɛ, ŋiŋ wuɔ, a á ziŋ páʼa, á fhó ánɛ mete mék, kɛ á fhó ánɛ páʼ, pek é epuɔ membɔŋ á mvhɔ Ndém ḿ? 13Ndém mé ghʉ tɛ á ziŋ, ńdɔkɔ ŋkɔ́ʼnɛ nzwiŋ Yɛɛ́so, á Njuʼ‑Nchu Ndém Ablaham, ŋ́gɔ́ á Ndém Izak, ńzéŋ ŋgɔ́ á Ndém Yakɔ́p, éwɔ maŋgānjʉʼ pímpɛ. Yɛɛ́so wuɔ mɛ́t, pɛ ke gɔ̄ á yí, ŋ́gyá á mbū wɔ sáʼ‑ŋgɔŋ. Pilat á kó njʉ́ɔ azí tɛ ndé ŋ́gɛ, mɛ́ etshī á yí nnēŋ, pɛ mé lʉʼ. 14Yɛɛ́so a lɛ ŋiŋ, éfhó á mbū Ndém, ŋ́gɔ́ á Júʼɔ́‑Mbū‑Ndém. Pɛ ké ŋkʉ̄ŋne á yí kʉŋne. Ḿbiŋ ŋ́gɛ, Pilat, a etshī á ŋiŋ yīi, a gɛ nzóko nzwhítɛ epuɔ nnéŋ. 15Pɛ elɔ̄k ŋghʉ̄, mɛ́ zwhí á Ŋghʉɛ mɛ́ gɔ́ éwú. Ndém á ké mbīŋ ŋghʉ̄, á zím ánɛ lewhʉ̄, tɛ pek é lɔk menēk njʉ́ɔ, tɛ́ eshúŋɔ páʼa. 16Mete Yɛɛ́so mɛ́t mé ghʉ, tɛ́ ŋkeluʼ jʉɔ zīi, pɛ jʉ́ɔ á yí, ńzhɛ́ á yí la, á te páʼa. Éfhó ánɛ wék lefɛ̄ nnɛ̄t ŋgyá mé Yɛɛ́so. Wék á lefɛ̄ nnɛ̄t ŋgyá á mbū yí, mé ghʉ tɛ́ ŋkeluʼ jʉɔ é te, páʼ pɛ jʉ́ɔ á ziŋɛ lāa.
17«Á tsetsɔŋɔ me epɔ̄ memía, meŋ á zhɛ́ á légɛ, ajū mīi, pɛ a wɔ sáʼ‑ŋgɔŋ pɛ́, é ke ghʉ̄ ánɛ Yɛɛ́so, pɛ ke gē eghʉ, pɛ te nzhɛ́ ajū mīi, Ndém a le zī ŋkwaŋte ɛ́. 18Emuɔ menu mɛ́t é ke gē etɔ́k páʼā, Ndém yí méŋwɛ̄t mé ghʉɛ. A le té njhʉ̄, ńdɔ̄k nchu metswi‑ŋke pí metsem ndé ŋ́gɛ, Nzaʼ‑Ŋkhʉ, a a láʼ ejʉ́ɔ ŋgʉɔ̄ʼ. 19Tsetsɔŋɔ, pɛ egɔ̄ nnɛ̄t zɛ, ŋ́gwáʼ atswhī tepɔŋ zɛ́, ḿbīŋ nzem á mbū Ndém, a elēkne mefa mɛ́. 20A etsīa épúp, Ndém a eswíte ntē wɛ́, ńzéŋ ntó á Yɛɛ́so, á Nzaʼ‑Ŋkhʉ, a ezéŋ eshʉ̄ʼ á mbū pɛ, páʼ Ndém a le laʼnēē. 21Ánɛ tsetsɔŋɔ, a pɔŋteé á yí á lenāŋ á lephū, tɛ ndáʼ ntshí ánɛ afʉʼ zīi, Ndém a a ghʉ, akʉ̄ɛ akʉ̄ɛ, a ecʉ́ʼ eswhī, páʼ a le lɔ̄k nchu metswi‑ŋke pí, ńdé épúp, tɛ efhó tɛ afʉʼ. 22Mɔɔ́sɛ a le lé azí ŋ́gɛ: “Atsyapuɔ Ndém, a a shʉʼ etó mmɔʼ ntswi‑ŋke yi páʼ meŋ lā, a eshʉ̄ʼ á tsetsɛlɛ pɛ. A a shʉʼ egɔ́ mmɔʼ ŋiŋ alāʼ wɛ. Pɛ eshʉʼ njúʼ akɔ̄ lɛ́ zīi, a gɔ á eshúŋ pɛ. 23Tɛ ŋiŋ á gɔ́ te júʼ nchu ntswi‑ŋke Ndém wuɔ mɛ́t ɛ́, mɛ́ fhó ánɛ nnɔ epuɔ Ndém, éfók á yí, ńzwhí.” 24Mbɔ metswi‑ŋke Ndém metsem, tɛ efhó ánɛ Samiɛ, ŋ́gʉɔ mbú ŋkó ánɛ mvuʼ, é le zeéŋ eshúŋ azɔ́p anu zīi, a shʉʼ eghʉ̄ ayáʼa. 25Alaʼne zīi, Ndém a le lɔ̄k nchu memɔʼɔ́ pɛ́, métswi‑ŋke pí ndé, á zeéŋ ŋgɔ́ á si ncʉ̄tɛ á wɛ́ azɛ́. Pɛ zeéŋ ŋgɔ́ á ntē eka yīi, Ndém pɔ́ a wɔ maŋgānjʉʼ pɛ́ é le kʉɔ́ʼē, melaʼ mīi a le lé á mbū Ablaham ŋ́gɛ: “Meŋ a shʉʼ ezápa ánɛ nzwɛt ju, éghʉ anu mbɔŋ ánɛ melāʼ ntsem, á ndo esī atsetsáʼ,” 26melaʼ epúp tɛ́, Ndém a ke gē ezi a letō á Njuʼ‑Nchu yi, ńtó á yí melaʼ mɛ́. Ńtó á yí ŋ́gɛ, a eshʉ̄ʼ ŋghʉ̄ anu mbɔŋ ánɛ pɛ, éfhó ánɛ mɛnzhɛ tepɔŋ, éfók á wɛ́. »
Currently Selected:
Mefaʼ Meziŋ-ntō 3: ybb
Highlight
Share
Copy
Want to have your highlights saved across all your devices? Sign up or sign in
© CABTAL
