Mefaʼ Meziŋ-ntō 4
4
Piɛ pɔ́ Jáaŋ á mvhɔ asāʼ
1Piɛ pɔ́ Jáaŋ é zɛ́t nzhɛ á eshúŋnɛ á mbū alāʼ, emɔ̄ʼ wɔ nɔŋ‑epɔʼ é shʉʼ ntswɛ́tte á wɔ́p, pɔ́ a tɛŋgyā wɔ píp‑Mía Ŋgyā Ndém, ŋ́ghʉ̄ emɔ̄ʼ epuɔ Sadúsia. 2Pɔ́ le nɔ̄ŋ nzáŋa á lɔ́ŋ tɛʼ, melaʼ mīi Piɛ pɔ́ Jáaŋ, é si nzíʼnɛ alāʼ ŋ́gɛ, Yɛɛ́so a ke ké nzím ánɛ lewhʉ̄ páʼā, epuɔ menɔŋ e shʉʼ ezéŋ ezím azɔ́p. 3Pɔ́ gɔ á wɔ́p, ŋ́gʉɔ nnéŋ á ŋgyā atʉɛ́, tɛ́ njhʉ̄ e elá, mɛ́ ejʉ́ɔ anu zɔ́p, melaʼ mīi á le gē egɔ́, mbɔ njhʉ̄ e é ndáʼ ntɔ́k. 4Táʼ, epuɔ tɛ nzá pīi, pɔ́ é júʼ anu Piɛ pɔ́ Jáaŋ, pɔ́ le véŋŋ̄, éshʉʼ ŋkó ánɛ nnɔ epuɔ Yɛɛ́so. Pɔ́ metsem é nɔŋ ŋgʉ̄ɔ ajūɔ ŋiŋnɔŋ ntsāʼ táa. 5Njhʉ̄ é lá, mefɔ asāʼ, pɔ́ a mekém alāʼ, ŋ́ghʉ̄ wɔ kɛ́ʼte‑mbé Ndém, é pú ncúʼte á Yelósalɛm. 6A lɛ éwú ŋgɔ́ á Hána, éyi a á tɛŋgyā wɔ nɔŋ‑epɔʼ, ŋ́ghʉ̄ á Kayif pɔ́ Jáaŋ, mbɔɔ Alɛkzaŋdle, ńzéŋ ŋghʉ̄ epuɔ metsem, ánɛ atseŋ ŋgyā wɔ tɛŋgyā wɔ nɔŋ‑epɔʼ. 7Pɔ́ tswi mɛ́ lɔk á Piɛ pɔ́ Jáaŋ, éshʉ̄ʼ mé mvhɔ zɔp, pɔ́ ŋak á wɔ́p ŋ́gɛ: «Pɛ é lɔk ete awɔ́, kɛ́ lezēŋ awɔ́, tɛ́ ndɔk mbɛ́t ŋkeluʼ jʉɔ ɔ̄?» 8Azwakne Ndém á ziɛ ntē Piɛ, á lé ŋ́gɛ: «Pɛ mefɔ asāʼ pɔ́ mekém alāʼ, 9ajū mīi, pek é ghʉ ánɛ ŋkeluʼ jʉɔ, á si ŋgɔ́ anu mbɔŋ. A gɔ́ éyi, pɛ é jʉ́ɔ ŋ́gɛ, pɛ e zɛ́tte á wék, ajū mīi, á ghʉ tɛ́ ŋgaŋ agɔ wuɔ, á te, 10mbɔ pɛ, mbɔɔ epuɔ Islaɛl metsem, pɛ ezhɛ́ á légɛ, mete Yɛɛ́so Klísto ŋiŋ Naázalɛt mé ghʉ, tɛ́ ŋiŋ wuɔ á ge etshí á mvhɔ pɛ egā, ŋ́gɔ́ ntenté. Á Yɛɛ́so yīi, pɛ ke kwɛtē á yí ánɛ mbaŋne paŋné, tɛ́ Ndém á ghʉ á zím ánɛ lewhʉ̄. 11Yí mé si ŋgɔ́ á ŋiŋ yīi, mɛ́ le tí ánɛ yí á ntē aŋwaʼne Ndém ŋ́gɛ:
“Tɔ́ yīi, pɛ mepɔɔ‑ŋgyā, é ke kʉŋtē ŋgwáʼ,
ewiɛ́ mé le shʉ̄ʼ ncʉ́ʼ á tɔ́ lezhō ŋgyā.”
12Epuɔ menɔŋ é gɔ ezápa á nzem Yɛɛ́so, tɛ́ ndáʼ ntswɛ́t, melaʼ mīi, mmɔʼ ŋiŋ a te éwú á ndo esī atsetsáʼ ega yīi, Ndém a le néŋ ŋ́gɛ, ḿpɛ eláʼ ntsīa á nzem yí, ńtswɛ́t ɛ́. »
13Wɔ sáʼ‑ntsaŋ, é júʼ ntií zīi Piɛ pɔ́ Jáaŋ é lɔkɔ mbwɛ̄tɛ anu mɛ́t ésa saá, té pɔ́k, ńzéŋ njʉ́ɔ páʼ pɔ́ é epuɔ, ńnáʼ mmɛ̄ azɔ́p mɛɛ ŋgɔ́, mbɔ pɔ́ la aŋwaʼne zíʼnɛ ɛ́. Ńjʉ́ɔ épúp, á tsya wɔ́p. Pɔ́ yiŋ, ńzhɛ́ á légɛ, pɔ́ a Yɛɛ́so é kɛɛ́ nziŋɛ. 14Ńjʉ́ɔ, ŋiŋ yīi a á ntē, á tshí á lezēŋ pɔ́p páʼā, nchu wɔ́p é tsɛ́tte. 15Pɔ́ náŋ tɛ ntswī, Piɛ pɔ́ Jáaŋ, é fhó á ŋgyā ntó. Pɔ́ cʉ́ʼ esāp á tsetsɛlɛ pɔ́p, 16tɛ ndé ŋ́gɛ: «Ḿpɛ é páʼa, éghʉ lɛ akɔ̄ ánɛ epuɔ puɔ ɔ̄? Epuɔ Yelósalɛm metsem, é si nzhɛ́ɛ á mbɔŋɔ́ ŋkʉʼne anu jʉɔ zīi, pɔ́ ke ghʉ̄ʉ̄, tɛ ŋgɔ́ yīi, ḿpɛ gɔ le kūʼ á lelʉʼ ɛ́. 17Táʼ, eyímpɛ leghʉ tɛ anu jʉɔ, á le zéŋ ntswīʼne esāŋ ejʉʼ ɛ́, a gɔ́ áa lepē á wɔ́p, ŋ́kāk á wɔ́p, tɛ pɔ́ le zéŋ eshúŋ anu á mbū ŋiŋ, ánɛ Yɛɛ́so ó. » 18Pɔ́ zéŋ ntɔ́ŋ á Piɛ pɔ́ Jáaŋ, ḿbú ndʉ̄ʼ ŋ́gɛ, ndɛ́ʼ pɔ́ zéŋ ndɔ̄k lezēŋ Yɛɛ́so eshúŋ anu á mbū ŋiŋ, mbɔɔ á lepiŋ nzéŋ nzíʼne anu zí. 19Piɛ pɔ́ Jáaŋ é pwɛt ŋ́gɛ: «Pɛ méŋwɛ̄t, e esáŋ azɛ́ ajū mīi, Ndém a kɔɔ̄ŋ ŋ́gɛ, mɛ́ eghʉ̄. A kɔɔ̄ŋ ŋ́gɛ, mɛ́ ejúʼ nchu yí, kɛ nchu wɛ́ ɛ́? 20Ŋ́gɔ́ mé pek, mbɔ pek gɔ eké eshúŋ áa ajū mīi, pek ke jʉ́ɔ̄, ńzéŋ njúʼ. » 21Wɔ sáʼ‑ntsaŋ é tswiʼne nzéŋ ŋkāk á wɔ́p, tɛ́ ntshī á wɔ́p nnéŋ, pɔ́ gʉɔ. Pɔ́ té pú njʉ́ɔ mmɔʼ eshhʉ̄ yīi, pɔ́ gɔ elɔ̄ɔk ntswá á wɔ́p ŋgʉɔ athʉ́ lepé ɛ́, melaʼ mīi, alāʼ ntsem á lɛ si nnɔŋ ŋgūʼtɛ á Ndém, ánɛ anu zīi á tɔ́k. 22Ŋiŋ wuɔ mɛ́t yīi, a ke tē ánɛ ntií zīi, mɛ́ zi la amɔ̄ʼ azō épúp jʉ́ɔ la, a le gɔ́ mbɔ a á tɔ́k ŋguʼ megēm lekua.
Aswiŋte epuɔ Yɛɛ́so
23Mɛ́ tshi á Piɛ pɔ́ Jáaŋ nnéŋ páʼā, pɔ́ gʉɔ ntswɛ́tte nnɔ wɔ́p, ḿbɛ́te eshúŋ á wɔ́p páʼ wɔ tɛŋgyā wɔ nɔŋ‑epɔʼ, pɔ́ mekém alāʼ, é kó ndé épúp. 24Pɔ́ júʼ anu mɛ́t, ḿbú mbúte ŋ́gɔ́ á taʼ nchu, ŋ́ghʉ̄ aswiŋte jʉɔ á mbū Ndém ndé ŋ́gɛ: «Efɔ esaʼ‑ŋgɔŋ, wu mé le ghʉ̄ lephū pɔ́ esī atsetsáʼ mbɔɔ mentshi, ńzéŋ ŋghʉ̄ etsō etsem. 25Wu mé le ghʉ̄ʉ̄, maŋgānjʉʼ wek Ndavít yīi, a lɛɛ́ njúʼɔ nchu wú, á lɔk mete Azwakne jú ndé ŋ́gɛ:
“Epuɔ pīi é té epuɔ Islaɛl ɛ́, é si nzáŋa á lɔ́ŋ melaʼ akɔ̄?
Elāʼ é táŋa menāŋ ndémndēm, ńtswí akɔ̄?
26Mefɔ é ndo esī atsetsáʼ ega, ńcūŋtɛ ncu,
wɔ sáʼ‑ŋgɔŋ é cúʼte
ntshí á taʼ nzem,
ŋ́gɛ, pɔ́ gɔ á ndʉɔ́ʼ Ndém
pɔ́ ŋiŋ yīi, a ke chʉ́ á yí ndɔk ŋghʉ̄ á Nzaʼ‑Ŋkhʉ.”
27Anu zīi Ndavít a le léē, á ke tɔ́k á tésɔŋ ega páʼa: Efɔ Elōde pɔ́ Pɔ́ŋse Pilat mbɔɔ epuɔ pīi, é té epuɔ Islaɛl ɛ́, é pú ntshí á taʼ nzem, ńtshí ntāŋ Yɛɛ́so. Á Yɛɛ́so, mbɔŋ Njuʼ‑Nchu wu yīi, o ke chʉ́ á yí, ńdɔk ŋghʉ̄ á Nzaʼ‑Ŋkhʉ á ntɔ̄ŋ apuʼ. 28Pɔ́ le táŋ menāŋ ánɛ yí páʼā, á lɔk mbō páʼ wu Ndém, o le lɔ̄k mete mú, ńzápa épúp ánɛ lekɔŋ wu, tɛ efhó tɛ afʉʼ. 29Tsetsɔŋɔ, Mɔʼɔ́ wek, jʉ́ɔ ntií zīi, epuɔ puɔ é lɔkɔ nnēkɛ á wék la, ŋ́ghʉ̄, pek wɔ júʼ‑nchu wú, e ecʉ́ʼ mé leshūŋ anu jú, éshúŋ té pɔ́k. 30Ghʉɛ̄, pek eghʉ̄, megɔ e ezāŋne, ńnɔŋ ŋghʉ̄ɛ mendajʉ́ɔ menu ánɛ lezēŋ Yɛɛ́so, mbɔŋ Njuʼ‑Nchu wu. A etsīa épúp, tɛ́ mɛ́ elɔk njʉ́ɔ mete mú. » 31Aswiŋte á le gē emi, ajʉʼ zīi pɔ́ é ntshí éwú, á cʉʼne, Azwakne Ndém á ziɛ ntē wɔ́p metsem, ŋ́ghʉ̄ pɔ́ cʉ́ʼɛ eshúŋɔ áa anu Ndém, té pɔ́k.
Epuɔ Yɛɛ́so é puteé azɔ́p akɔ̄ lɛ́ púte
32Nnɔ epuɔ Yɛɛ́so é le nɔ̄ŋ nnáŋa, ŋ́gɔ́ɔ á taʼ nchu, ńzéŋɛ ŋgɔ́ɔ á taʼ ntē. Á tsia épúp, ŋiŋ a te tswhī ŋgwɛ̄ amɔ̄ʼ azō, tɛ ndé ŋ́gɛ, á gɔ́ azí yíléyī í. Ajūɔ awiɛ́, á lɛ azi epuɔ metsem. 33Meziŋ‑ntō é nɔŋ ntswīʼnɛ eshúŋnɛ ŋgyáa njúʼɔ á mbū epuɔ, páʼ Atsyapuɔ Yɛɛ́so a ke zím ánɛ lewhʉ̄. Ndém á nɔŋ ŋghʉ̄ɛ menu membɔŋ té ndhʉ ánɛ epuɔ metsem. 34Ŋiŋ á nɔŋ te mbúŋɔ azō á tsetsɛlɛ pɔ́p ɔ́. A ekūʼ amɔ̄ʼ afʉʼ, epuɔ e egʉɔ eswīŋɛ meŋgyā mɔ́p kɛɛ́ meŋkāʼ mɔ́p lɛ́ɛ, 35ḿbúu ndɔ̄kɔ ŋkāp eshʉʼɛ nnɔ̄ŋɔ á mvhɔ meziŋ‑ntō Yɛɛ́so. Pɔ́ egāptɛ á mbū awíɛ awíɛ, ánɛ páʼ azí anu, á si nnɔŋ nzáŋa á yí épúp. 36Mmɔʼ ŋiŋ a lɛ azí éwú, ŋ́gɔ́ lɛ Yosɛ́p, ŋ́gɔ́ ndhu Levi, ŋ́gɔ́ ŋiŋ ŋgɔŋ Shʉple. Meziŋ‑ntō Yɛɛ́so, é lɛɛ́ ntɔ́ŋɔ á yí lɛ, Baanabas, ńdɔkɔ ŋ́gɛ, Ŋgyaa‑Ŋgate. 37Á gʉɔ eswīŋ azí mmɔʼ ŋkāʼ yí, ńdɔ̄k ŋkāp eshʉʼ ŋgyá á mbū meziŋ‑ntō Yɛɛ́so.
Currently Selected:
Mefaʼ Meziŋ-ntō 4: ybb
Highlight
Share
Copy
Want to have your highlights saved across all your devices? Sign up or sign in
© CABTAL
