Mefaʼ Meziŋ-ntō 5
5
Anu Ananias pɔ́ Safíla
1Mmɔʼ ŋiŋ a lɛ ánɛ nnɔ Yɛɛ́so, lezēŋ tsí é gɔ́ lɛ Ananias, nzwí yi á gɔ́ lɛ Safíla. Pɔ́ nzwí yi é gɔ́ á taʼ nchu, éswīŋ mmɔʼ ŋkāʼ yí. 2Ŋ́kwɛ́t, ŋ́gɛ́tte mmɔʼ ŋkāp, ńdɔ̄k mvuʼ ŋgʉ̄ɔ ŋgyá á mbū meziŋ‑ntō. 3Piɛ á zɛ́tte á yí ŋ́gɛ: «Melaʼ akɔ̄, o ó mvéŋ Sɛ́ta á kó á ntē wu, o shʉ̄ʉʼ mbɔ̄pte Azwakne Ndém, ŋ́gɛ́tte mmɔʼ ŋkāp ŋkāʼ é? 4O ó ŋgē eswiŋ ŋkāʼ, é gɔ́ éwú, o ó eswīŋ, ŋkāp é gɔ́ eju. Akɔ̄ á piŋ ŋghʉ̄, tɛ́ o efʉ̄ʼte ejʉɔ ntií anu ū? O ó si njʉ́ɔ ŋ́gɛ, o pɔptɛ á ŋiŋnɔŋ lɛ́? O pɔptɛ áa Ndém. » 5Ananias á lɛ ŋgē ejúʼ ashuŋne jʉɔ mɛ́t, ńtsɔ́ʼɔ ŋgwhʉ̄, ŋ́kwhʉ́. Epuɔ metsem é júʼ anu jʉɔ mɛ́t, ḿbú ncɔ̄ʼ tɛʼ. 6Á kwhʉ́ épúp, epɔ̄ ŋgwɛso é lɛ eshʉ̄ʼ, ńzémte apfhō zí, ŋ́kʉɛ ndɔ̄k ńtó, ŋ́gʉɔ ntúŋ.
7Ajūɔ meleŋ njhʉ̄ mɛ́ntɛ́t á ge etɔ́ke, nzwí yi Safíla á shʉʼ ŋkó azí á ŋgyā, a te zhɛ́ anu zīi, á ghʉ á ndō yi í. 8Piɛ á zɛ́tte á yí ŋ́gɛ: «Shúŋ á anuúnē, pɛ é eswīŋ ŋkāʼ wɛ́ wɔ̄, nzwiŋ ŋkāp wuɔ ɔ?» Á pwɛt ŋ́gɛ: «Ŋŋ, é ŋgɔ́ nzwiŋ mɛ́t. » 9Piɛ á zéŋ nzɛ́tte á yí ŋ́gɛ: «Pɛ ndō wu é ŋgɔ́ péʼe ŋkwāŋ akɔ̄, tɛ́ eshʉʼ ŋkwāʼne Azwakne Mɔʼɔ́ yímpɛ Ndém ḿ? Júʼ páʼ epuɔ é apɛ́ nzīŋɛ, é péʼe ŋgɔ́ epuɔ pīi, pɔ́ fhɔ́ɔ mé ntuúŋ ndō wu. Pɔ́ e zéŋ ekʉɛ á wú ajú tsetsɔŋɔ, égʉɔ etúŋ. » 10Piɛ á lé épúp, Safíla á tsɔ́ʼɔ á mvhɔ yí, ŋ́gwhʉ̄, ŋ́kwhʉ́. Ŋgwɛso mɛ́t, é kó á ŋgyā, ńjʉ́ɔ páʼ, a á kwhʉ́ azí, ńzéŋ ŋkʉ̄ɛ á yí, ŋ́gʉɔ ntúŋ á lezēŋ ndō yi. 11Alúŋ epuɔ Yɛɛ́so ntsem, á jʉ́ɔ anu jʉɔ mɛ́t, ḿbɔ́k tɛʼ, tɛ mbɔɔ epuɔ metsem pīi, é lɛ si njúʼɔ azɔ́p.
Meziŋ‑ntō é ega ŋghʉ̄ɛ meŋkʉʼne anu
12 Meziŋ‑ntō Yɛɛ́so é nɔŋ ŋghʉ̄ɛ á ndajʉ́ɔ menu, mbɔɔ emɔ̄ʼ ecū mīi, é tswii mete Ndém á tsetsɛlɛ epuɔ menɔŋ. Epuɔ Yɛɛ́so metsem é nɔŋ mbúu eshʉʼɛ ncúʼtɛ á Mía Ŋgyā Ndém, ánɛ ŋgyā lemu zīi, mɛ́ tɔ́ŋɔ lɛ, ezi Salomɔŋ. 13Epuɔ menɔŋ é lɛ si mbɔ́kɔ á lekō á nnɔ pɔ́p, tɛ́ epuɔ metsem é ké ŋgɔ́ si mbúu ŋkɔ̄ŋɔ ezɔp ntií tɛʼ. 14Epuɔ menɔŋ tɛ nzáne, ḿbaŋa pɔ́ wɔnzwí é nɔŋ efíɛ́ nnɛ̄t ŋgyáa mé Atsyapuɔ Yɛɛ́so, éshʉʼɛ ŋkúɔ́ ánɛ nnɔ wɔ́p. 15Páʼ meziŋ‑ntō Yɛɛ́so é le ghʉ̄ menu mɛ́t lā, epuɔ menɔŋ é kʉɛ megaŋ agɔ, ńdɔk ntó ńnɔ̄ŋte á legʉ̄ŋ mɛnzhɛ, ánɛ ekō pɔ́ a memɛ́ta. Ńzwíʼtɛ ŋ́gɛ, Piɛ a gē etɔ́ke, tsɔ zézeéŋ yi a etsīa ánɛ pɔ́p. 16Epuɔ é nɔŋ efhótɛ azɔ́p ánɛ mekap alāʼ mīi, é ŋgʉ̄ŋ Yelósalɛm, ńdɔ̄kɔ megɔ, mbɔɔ epuɔ pīi mesī é lē ŋgɔ á wɔ́p, éshʉʼɛ njʉ́ɔ meziŋ‑ntō Yɛɛ́so. Pɔ́ metsem é nɔŋ ntʉ̄ɛ̄.
Wɔ sáʼ‑alāʼ é ega ndʉɔ́ʼɔ meziŋ‑ntō Yɛɛ́so
17Tɛŋgyā wɔ nɔŋ‑epɔʼ, pɔ́ a nnɔ yí yīi, é fhɔ́ɔ ánɛ ŋkɔʼɔ́ epuɔ Sadúsia, pɔ́ lɛ nzī á lewɛ sɛ́h ntē ánɛ meziŋ‑ntō. 18Ńtó epuɔ, pɔ́ gʉɔ ŋgɔ̄ á wɔ́p, ńdɔk eshʉ̄ʼ ńnéŋ á ŋgyā atʉɛ́. 19Táʼ, cɔʼ Ndém á kó etsōʼ, éshʉʼ ntsɔ́ʼ nchu ŋgyā atʉɛ́ mɛ́t, pɔ́ tó. Á lé á mbū pɔ́p ŋ́gɛ: 20«Pɛ egʉ̄ɔ á Mía Ŋgyā Ndém, éshúŋ anu lenāŋ leswhī cʉɔ, á mbū alāʼ. » 21Meziŋ‑ntō é gʉɔ páʼ cɔʼ Ndém, a á lé. Njhʉ̄ é lá etsōʼetsōʼ nzemɛ́nzēm, pɔ́ gʉɔ á Mía Ŋgyā Ndém, ńzī á lezīʼne epuɔ.
Tɛŋgyā wɔ nɔŋ‑epɔʼ pɔ́ a epuɔ pí, é cʉ́ʼ ntɔ́ŋ wɔ sáʼ‑ŋgɔŋ Islaɛl, ánɛ mía acuʼte wɔp, ńtswī ŋ́gɛ, mɛ́ egʉɔ efāʼ meziŋ‑ntō Yɛɛ́so, á ŋgyā atʉɛ́, ńdɔk eshʉ̄ʼ. 22Wɔ píp‑ejʉʼ, é gʉɔ ŋkó éwú, pɔ́ té á wɔ́p jʉ́ɔ, ḿbīŋ nzem mbɛ́te eshúŋ á wɔ́p ŋ́gɛ: 23«Pek é gʉɔ á ŋgyā atʉɛ́, ŋ́gē eshʉʼe, é zɛ́t áa ŋkɛ kɛ, wɔ píp‑ŋgyā atʉɛ́, é zɛ́t á nchu ŋgyā nnáŋte. Táʼ, pek epīiŋ ntsɔ́ʼ ŋgyā, ŋ́ké te ŋiŋ éwú jʉ́ɔ. » 24Tɛŋgyā wɔ píp‑Mía Ŋgyā Ndém, pɔ́ a wɔ nɔŋ‑epɔʼ epi melʉɛ, pɔ́ júʼ épúp, á pú ŋkʉ̄ʼne á wɔ́p, pɔ́ té zéŋ nzhɛ́ páʼ pɔ́ e lé épúp ɔ́. Ńcʉ́ʼɛ ŋkwāŋa anu zīi, á ŋghʉ̄ meziŋ‑ntō Yɛɛ́so. 25Mmɔʼ ŋiŋ á lɛ ntɔ́kne á wɔ́p, ńdé á mbū pɔ́p ŋ́gɛ: «Epuɔ pīi, pɛ ke néŋ á wɔ́p á ŋgyā atʉɛ́ lā, a ayi pɔ́ é Mía Ŋgyā Ndém, ńzíʼnɛ epuɔ lée. 26Tɛŋgyā wɔ píp‑Mía Ŋgyā Ndém, pɔ́ a epuɔ pí, é lɛ ŋgʉ̄ɔ ndɔ̄k á wɔ́p eshʉ̄ʼ, tɛ́ ŋ́ké te lɔ̄k ete ɛ́, melaʼ mīi epuɔ tɛ nzáne é le pú ncúʼte éwú. Wɔ píp‑ejʉʼ é piŋ nnɔ̄ŋ mbɔ́kɔ mɛ́ á lelɔk metɔ́ ndʉɔ́ʼ á wɔ́p.
27Pɔ́ lɔk á wɔ́p eshʉ̄ʼ épúp, ńtshí á mvhɔ wɔ sáʼ‑alāʼ. Tɛŋgyā wɔ nɔŋ‑epɔʼ á kak á wɔ́p ŋ́gɛ: 28«Pek kɛ te pú mbé ŋ́gɛ, ndɛ́ʼ pɛ ezéŋ nzíʼne anu Yɛɛ́so wuɔ á mbū alāʼ kɛ? Pɛ ejʉ́ɔ ajū mīi pɛ é ghʉ. Pɛ é lɔk ashuŋne zí mɛ́t, ésɛ̄t á Yelósalɛm ntsem, ńzéŋ nnɔŋ efāʼa ŋ́gɛ mɛ́ elé ŋ́gɛ, pek zhɛɛ́ anu ánɛ lewhʉ̄ yi. »
29Piɛ pɔ́ a meziŋ‑ntō Yɛɛ́so, é pwɛt ndé ŋ́gɛ: «Pek pɔŋteé á lejūʼ nchu Ndém, ńtɔ́k á lejūʼ eyi ŋiŋnɔŋ. 30Ndém wɔ maŋgānjʉʼ pímpɛ, a ke ghʉ̄ʉ̄, Yɛɛ́so á zím ánɛ lewhʉ̄. Á Yɛɛ́so mɛ́t yīi, pɛ ke kwɛtē á yí ánɛ mbaŋne paŋné lā. 31Ndém a ke kɔʼné á yí nnáŋ á ŋkɔʼɔ́ apū ete yí, á cʉ́ʼ efɔ, ńzéŋ ndɔ̄k á yí ŋghʉ̄ á Ŋghʉɛ‑mɛ́‑tswɛ́t. Ŋ́ghʉ̄ɛ épúp, ŋ́gɛ epuɔ Islaɛl metsem e ewáʼ atswhī tepɔŋ zɔ́p, Ndém a elēkne mefa mɔ́p. 32Pek é si nnɔŋ esáʼa ajū mīi, pek é si nzhɛ́ɛ, mbɔ pek ke jʉ́ɔ̄, ésáʼa épúp, ḿpek a Azwakne Ndém páʼ, Ndém a ke yá á mbū epuɔ pīi, pɔ́ é si njúʼɔ nchu yí. »
33Wɔ sáʼ‑alāʼ é júʼ ajʉɔ anu mɛ́t, ntɔ̄ŋ wɔ́p é fuʼ, pɔ́ cʉ́ʼɛ efāʼa áa lezwhīte meziŋ‑ntō Yɛɛ́so. 34Tɛ́ mmɔʼ ŋiŋ á lu á esī á nnɔ pɔ́p, lezēŋ tsí é gɔ́ lɛ Ŋgamaliɛl, éfhɔ́ɔ á nnɔ epuɔ Falísia, ŋ́gɔ́ á ŋkɛʼte‑mbé Ndém, mɛ́ kɔŋ á yí tɛʼ. Á lé ŋ́gɛ: «Mɛ́ etswī, epuɔ puɔ e enáʼ ntó mé apɛ́. » 35Ńcʉ́ʼ nzem, ndé á mbū wɔ sáʼ‑ŋgɔŋ Islaɛl ŋ́gɛ: «Pɛ epuɔ Islaɛl, pɛ elāk athū zɛ́, ánɛ anu zīi pɛ faʼa á leghʉ ánɛ epuɔ puɔ. 36Ŋgia é ka esāk páʼ mmɔʼ ŋiŋ a ke lū azí á esī, lezēŋ tsí é gɔ́ lɛ Tedas. Á gɛ, yí é mía ŋiŋ, epuɔ menɔŋ é tsé á nzem yí tɛ nnɔ̄ŋ ŋkūʼɔ ajūɔ ŋkhʉ lekua. Táʼ, mɛ́ shʉʼ nzwhí á yí, nnɔ yí é pú ntáka, azí anu á pú mbí. 37Azí á tɔ́k, mmɔʼ ŋiŋ ndɛʼɛ, á zéŋ ndū azí á esī, ŋguʼ lesāŋ alāʼ, ŋ́gɔ́ á ŋiŋ Ŋgaliléa, lezēŋ tsí é gɔ́ lɛ Yúdas. Ŋ́ghʉ̄, epuɔ menɔŋ é tsé á nzem yí tɛ nzá. Mɛ́ shʉʼ nzwhí á yí azí. Epuɔ pīi é ŋgɔ́ á nzem yí njúʼɔ nchu yí, é pú ntáka. 38Tsetsɔŋɔ, ánɛ anu jʉɔ, meŋ shúŋɔ á wɛ́ ŋ́gɛ, ndɛ́ʼ pɛ ezéŋ epuɔ puɔ ncʉ̄te, pɛ etshī á wɔ́p nnéŋ, pɔ́ egʉ̄ɔ. A gɔ́ éyi, anu epuɔ puɔ á fhɔ́ɔ á mbū epuɔ menɔŋ, mbɔ a shʉʼ etáka. 39Ḿbiŋ ŋgɔ́ éyi, á fhɔ́ɔ á mbū Ndém ndeŋ ndeŋ, mbɔ pɛ gɔ le ánɛ pɔ́p kuʼ. Pɛ ghʉɛ tépɔŋ, pɛ a Ndém mé cʉ́ʼɛ ndʉɔ́ʼɔ. »
Wɔ sáʼ‑ŋgɔŋ é pú mvéŋ anu Ŋgamaliɛl. 40Ńtswī mɛ́ tɔ́ŋ meziŋ‑ntō Yɛɛ́so, mɛ́ lɔk á wɔ́p eshʉ̄ʼ, pɔ́ tswi mɛ́ tswá á wɔ́p. Pɔ́ piŋ mbé ŋ́gɛ, ndɛ́ʼ pɔ́ zéŋ eshúŋ anu á mbū ŋiŋ, ánɛ lezēŋ Yɛɛ́so. Ńtshī á wɔ́p nnéŋ, pɔ́ gʉɔ. 41Meziŋ‑ntō Yɛɛ́so é ge efhó á mvhɔ wɔ sáʼ‑ŋgɔŋ, ntē wɔ́p é nɔŋ ŋkáka melaʼ mīi, Ndém a á jʉ́ɔ ŋ́gɛ, pɔ́ kuʼ páʼ mɛ́ gɔ enéŋ esē á athū pɔ́p, melaʼ Yɛɛ́so. 42Pɔ́ gʉɔ épúp, ńnáŋa ŋgʉ̄ɔ eleʼé tsem á Mía Ŋgyā Ndém, mbɔ á meŋgyā meŋgyā, ńzíʼnɛ epuɔ, ńtswīi ŋke mbɔŋ ŋ́gɛ, Yɛɛ́so a á Nzaʼ‑Ŋkhʉ yīi, Ndém a le laʼnēē.
Currently Selected:
Mefaʼ Meziŋ-ntō 5: ybb
Highlight
Share
Copy
Want to have your highlights saved across all your devices? Sign up or sign in
© CABTAL
