Mefaʼ Meziŋ-ntō 6
6
Mɛ́ é ega ntsɔ́ʼɔ epuɔ esambīa, ŋ́gɛ pɔ́ etɛ́ne alúŋ epuɔ Yɛɛ́so
1Á lɛ afʉʼ mɛ́t, nnɔ Yɛɛ́so é nɔŋ efáŋa ŋgʉ̄ɔ mé mvhɔ. Epuɔ Yúda pīi é fhɔ́ɔ á apɛ́, ńnɔŋ eshúŋnɛ alāʼ epuɔ Glɛk, é shʉʼ nnáŋ tɛ nzwɛ́tte ánɛ epuɔ pīi, pɔ́ naáŋ á alāʼ ŋ́gɛ, mɛ́ é si ŋ́gē egapa etsō eleʼé tsem, ŋ́ŋɔ́ʼnɛ mepfók pīi, é fhɔ́ɔ ánɛ ewɔ́p eshhʉ̄. 2Meziŋ‑ntō Yɛɛ́so ntsɔp pīa mé legēm, é tɔ́ŋ nnɔ Yɛɛ́so tɛ é mi, ńdé ŋ́gɛ: «Á ka pɔ̄ŋ ŋ́gɛ, pek esákne á leshūŋ anu Ndém, ńcʉ́ʼɛ nzhɛ́ɛ áa anu legap etsō lejhʉ̄ ɛ́. 3Epɔ̄ memía, á pɔŋ ŋ́gɛ, pɛ eshʉ̄ʼ á nnɔ pɛ, ńtsɔ́ʼ epuɔ esambīa, ńtsékne afaʼ á letɛ̄ne etsō á mbū pɔ́p. Ŋ́ké ntsɔ́ʼ áa ndaʼ epuɔ pīi, pɛ é zhɛ́ á légɛ, pɔ́ wɛɛ̄ atswhī mbɔŋ, azhɛ̄‑anu á gɔ́ á athū pɔ́p, Azwakne Ndém á gɔ́ ánɛ pɔ́p. 4Ḿbiŋ ŋgɔ́ mé pek, azék afaʼ a egɔ́ á leswīŋte Ndém efʉʼ metsem, éshúŋ anu Ndém, ńdɔk ŋgʉ̄ɔ mé mvhɔ. » 5Epuɔ é júʼ anu jʉɔ mɛ́t, á pɔŋ á wɔ́p, pɔ́ lɛ ntsɔ́ʼ epuɔ. Mmɔʼ ŋgaŋ á gɔ́ Etiɛn, éyi a kuʼteé á Ndém efʉʼ metsem, Azwakne Ndém á zéŋ ŋgɔ́ ánɛ yí. Emɔ̄ʼ epuɔ é gɔ́ á Fílíio, Plokɔɔ, Nikanɔ́ɔ, Timɔŋ, Paamenas ŋ́ghʉ̄ á Níkola ŋiŋ Aŋtiɔsh yīi, a le sɛnnē sɛnne tɛ́ ncʉ́ʼ á ŋiŋ Yúda. 6Mɛ́ lɔk á wɔ́p eshʉʼ ntswī á mbū meziŋ‑ntō Yɛɛ́so. Pɔ́ swíŋte á Ndém ánɛ athū zɔ́p, ńzápa mbū á athū pɔ́p. 7Á gɔ́ épúp, ashuŋne Ndém á nɔŋ ntswīʼnɛ esāŋa ejʉʼ. Nnɔ Yɛɛ́so é nɔŋ nzáa ŋgʉ̄ɔ mé mvhɔ á Yelósalɛm. Wɔ nɔŋ‑epɔʼ tɛ nzáne, é véŋ anu Yɛɛ́so, ŋ́kúʼte.
Mɛ́ é ega ŋghíɛ mela á athū Etiɛn
8Etiɛn yīi pɔ́ le tsɔ́ʼ á yí, Ndém a le tsoktē apū zí, á nɔŋ ndɔ̄kɔ mete Ndém mīi é ánɛ yí, ŋ́ghʉ̄ɛ meŋkʉʼne anu mīi, é tswii mete Ndém á nnɔ alāʼ. 9Emɔ̄ʼ epuɔ é shʉʼ azɔ́p, ńzī á leŋak Etiɛn. Ŋ́gɔ́ epuɔ pīi, é cʉtɛ ŋgyā aswiŋte zīi mɛ́ tɔ́ŋɔ lɛ, ezi meŋkwa mīi mɛ́ lē ncuʼ á wɔ́p, ńdɔkɔ ndʉ́ɛ́ epuɔ Yúda pīi, pɔ́ fhɔ́ɔ á Silɛ̄ne, éfhɔ́ɔ á Alɛkzaŋdli, éfhɔ́ɔ á Silisi mbɔɔ Azíi. 10Pɔ́ a Etiɛn é le nɔ̄ŋ ŋŋāka épúp, pɔ́ láʼ te kūʼ á letsɔ̄ʼ anu á nchu yí í, melaʼ mīi Azwakne Ndém mé le nɔ̄ŋ ŋgyá á Etiɛn azhɛ̄‑anu. 11Á tsya á wɔ́p, pɔ́ mik epuɔ, ńtáŋ á wɔ́p ŋ́gɛ, pɔ́ eshúŋ epoó‑anu á athū Etiɛn, ńdé ŋ́gɛ, a á si eshúŋnɛ tépɔŋ ánɛ Mɔɔ́sɛ pɔ́ Ndém. 12Ńdé épúp, ńdɔk eswīte alāʼ pɔ́ a mekém alāʼ mbɔɔ wɔ kɛ́ʼte‑mbé Ndém, pɔ́ lɛ ŋgɔ̄ á Etiɛn, ńdɔk ŋgʉ̄ɔ mé mvhɔ wɔ sáʼ‑ŋgɔŋ. 13Ŋ́gē egʉɔ, ńdɔk megaŋ epoó‑anu pwɔ̄, pɔ́ ekó ntshí anu athū Etiɛn ndé ŋ́gɛ: «Ŋiŋ wuɔ a á si páʼa, éshúŋnɛ tépɔŋ efʉʼ metsem, ánɛ Mía Ŋgyā Ndém jʉɔ, ḿbiŋɛ ŋŋɔ́ʼnɛ lepé Ndém. 14Pek é júʼ, á nɔŋ ndʉ́ɛ́ ŋ́gɛ, Yɛɛ́so ŋiŋ Naázalɛt a a shʉʼ eták á Mía Ŋgyā Ndém wuɔ, épiŋ ekúmne á mɛt ŋgɔŋ yímpɛ, páʼ Mɔɔ́sɛ a le nɔ̄ŋ épúp. »
15Epuɔ metsem pīi é lɛ á ŋgyā asāʼ, é náŋte á esī, ńtshí menēk ánɛ Etiɛn, ḿbiŋ njʉ́ɔ eshhʉ̄ yí é sɛt nnɛ̄t ncʉ́ʼ páʼ eshhʉ̄ cɔʼ Ndém lā.
Currently Selected:
Mefaʼ Meziŋ-ntō 6: ybb
Highlight
Share
Copy
Want to have your highlights saved across all your devices? Sign up or sign in
© CABTAL
