Génesis 20
20
Tu ca'a téen cu ya'alic Abraham u yíidzin x Sara
1Abrahame' jóok ti' le cúuchil tu'ux yaan ca'acho', ca j bin tu lu'umilo'ob Néguev, ca j p'áat tu yáamil ichil Cades yéetel shur tu nojoch caajil Gerar. 2Ca'aliquil ti' yaan te'elo' jo'op' u ya'alic íidzinil ti' x Sara u yatan. Abimelec u ajawil Gerar túune' tu túuchi'itaj ch'a'abil x Sara u ti'al u yatante; 3ba'ale' ti' le áakabo' tu wayaktaj u ya'ala'al ti' tumen Ku: Yaan a quíimil, tumen le co'olel a ch'a'amajo' yaan u yíicham.
4Tu yo'olal ma' yanchaj ba'al u yila'a x yéetele', tu núucaj ti': In Yuumtzil, ¿Je'el wa quíimsic le máax ma' yanac u si'ipile'? 5Leti'e' j Abraham a'al teen u yíidzin le co'olela', x leti' xane' bey tu jedz a'aljilaco', le máaco' in sucu'un, bey túuno' tene' tin beetaj tuláacal lela' yéetel ma'alob tuucul, mix ba'al kaas in beetmaj.
6Kue' tu núucaj ti' ichil le wayako': tene' jach in wojel teche' ta beetaj yéetel ma'alob tuucul. Let o'olal ma' tin cha'aj a nupicabáa x yéeteli' u ti'al ma' a kebantal tin táan. 7Ba'ale' bejela'e' sut u yatan le máaco', tumen leti'e' jun túul aj bóobat je'el u káat óol ta wo'olal u ti'al ma' a quíimil; ba'ale' wa ma' ta sutic ti'e' teech yéetel a láaktzilo'obe' manaltzail a quíimile'ex.
8Tu ja'atzcabil u láak kiine' Abimeleque' j líike' ca tu t'anaj u palitzilo'ob, ca tu tzicbaltaj ti'ob ba'ax tu wayaktaj: le ca tu yu'ubajo'obe' sen tu ch'a'ajo'ob sajaquil. 9Cu dzo'ocole' Abimelque' tu t'anaj Abraham ca tu ya'alaj ti':
¡Il ba'ax dzo'oc a beetic! ¿Ba'ax kaasil tin beetaj teech u ti'al a taasic jun p'éel talam keban tin wóokol yéetel yóokol in wéet caajalo'ob? Le ba'alo'ob beya' ma'atech u beeta'al. 10¿Ba'ax ca'ach ca tuclic ca ta beetaj le ba'ala'?
Bey a'ala'abic ti' Abraham tumen Abimeleco', 11Abrahame' tu núucaj:
Tene' tin tuclaj mina'an wal u tziiquilo'ob Kue', ma' xan ca u quíimseno'ob tu yo'olal in watani'. 12Ba'ale' tu jaajile' leti'e' in wíidzin, u x ch'upul paal in taata yéetel u láak co'olel, let o'olal páatchaj u dzo'ocol in beel x yéetel. 13Le ca tu ya'alaj teen Ku ca jóokoquen tu yotoch in taatae' tin káat óoltaj ti' leti' je'el tu'uxac ca kuchuco'one' ca u ya'al u sucu'unen.
14Abimelec túune' tu sutaj ti' Abraham x Sara u yatan, cu dzo'ocole' tu síaj xan j tamano'ob, wacaxo'ob palitzilo'ob yéetel x palitzilo'ob. 15Ca tu ya'alaj ti':
Je'el in lu'umila', yéey le cúuchil utz ta wich u ti'al ca cajlaquechi'.
16Ti' x Sarae' tu ya'alaj:
Le ba'alo'ob Dzo'oc in dzáic ti' a sucu'uno'; u tojol mil plata taakino'ob; leti' bíin u ye'es utzil co'olelech tu táan tuláacal le máaxo'ob yano'ob ta wéetelo'. Mix máac bíin páatac u t'aan kaas ta wo'olal.#20.16 U t'aan kaas ta wo'olal: le t'aan beya' ti' hebreo t'aan u taal ma' jach sáasili'. Cu tucla'al t'aanaj bey Abimeleco' tu yo'olal tu yóoltaj u yatant ca'ach x Sara.
17Abraham túune' payalchi'inaj ti' Junab Ku, Kue' tu sutaj u toj óolal Abimelec bey xan ti' u yatan, tu dzaj xan u toj óolal u x palitzilo'ob, u ti'al ca páatac u yantal u paalalo'ob, 18tumen tu yo'olal x Sarae', Yuumtzile' tu beetaj ma' u yantal u yaal mix jun túul ti' le co'olelo'ob cajacbalo'ob tu yotoch Abimelec.
Currently Selected:
Génesis 20: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
