Génesis 27
27
Isaaque' cu dzáic u qui' t'aan ti' Jacob
1Cu dzo'ocol u jach nuxibtal Isaaque' j p'áat mina'an u sáasil u yich. Jun p'éel kiine' tu t'anaj Esaú u yáax paale', ca tu ya'alaj ti': In paal.
Ca tu núucaj Esaú: T'aanen in taata.
2Isaaque' tu ya'alaj: Je'el bix a wilica' dzo'oc in sen ch'i'ijil, je'el in quíimil je'el ba'alac kiine'. 3Let o'olale' in káat ca a bis a julubo'ob yéetel a x p'unche' j káax u ti'al a dzonic jun túul ba'alche'. 4Beet teen jun p'éel janal jach qui' tin chi'e' ca a taas in jaante. Quin dzáic teech túun in qui' t'aan ma'ili' quíimquene'.
5Ba'ale' x Rebecae' tu yu'ubaj ba'ax tu ya'alaj Isaac ti' Esaú. Let o'olale' le ca j bin Esaú j káax u quíims wa ba'ax ba'alche'il u ti'al u taata, 6x Rebecae' tu ya'alaj ti' Jacob, u yíidzin Esaú:
Ile tin wu'uyaj táan u t'aan a taata yéetel a sucu'un Esaú, leti'e' tu ya'alaj ti' beya': 7Xeen j káax a quíims wa ba'ax ba'alche'il, u ti'al a beetic jun p'éel janal jach qui' u ti'al in jaante, ca in dzáa teech in qui' t'aan tu táan Yuumtzil ma'ili' quíimiquene'. 8Bey túuno' in paal u'uy ma'alob le ba'ax quin in wa'al techa'. 9Xeen ca a wil tu'ux yaan u múuch'ul le j tamano'obo', ca a taas teen ca'a túul u asab ma'alobil ti' u mejenil j tamano'ob. Bin in ca in beet jun p'éel janal jach qui' je'el bix utz tu t'aan a taatae'. 10Teech bíin a bis ti' u ti'al u jaante; beyo' cu dzáic teech u qui' t'aan ma'ili' quíimique'.
11Ba'ale' Jacobe' tu ya'alaj ti' u maama:
In sucu'une' piim u tzo'otzel tene' ma'. 12Wa in taata cu t'at'al kabtiquen tac u kaj óoltiquene' bíin u tuculte' chéen táan in tusic. Bey túuno' loolob t'aan bíin in kam tu jeel qui' t'aan.
13Ba'ale' u maamae' tu núucaj ti':
In paal, le loolob t'aano' lúubuc tin wóokol. Teche' beet ba'ax quin wa'alic, taas teen le mejen j tamano'obo'.
14Jacob túune' j bine' ca tu taasaj le mejen j tamano'ob ti' u maamao'. X leti'e' tu beetaj jun p'éel janal jach je'el bix qui' tu chi' Isaaque', 15ca xan tu jóoksaj tu najil tu'ux u ta'acmaj u asab ma'alobil u nook Esaú u yáax paale', ca tu dzaj u búuquint Jacob u j t'uup. 16Cu dzo'ocole' tu pixaj u kabo'ob tac u caal Jacob yéetel u kéewelilo'ob le j tamano'obo' le tu'ux mina'an u tzo'otzele', 17ca tu dzaj tu kab Jacob u paal, le waaj yéetel le janal u máakantmajo'.
18Bey túuno' Jacobe' j ooc tu'ux ca'ach yaan u taatae' ca tu ya'alaj ti':
Taat, dzo'oc in suut.
Isaaque' tu káat chi'itaj ti': ¿Máaxech ichil in ca'a túul paalali'?
19Jacobe' tu núucaj ti': Teen Esaú a nojoch paal. Dzo'oc in beetic le ba'ax ta wa'alaj tene'. Líiken, culen, jaant u bakel le ba'alche' dzo'oc in taasic techa', ca a dzáa teen a qui' t'aan.
20Isaaque' tu káatchi'itaj ti': In paal. ¿Bix úuchic a nactáantic tu séeblaquil?
Yuumtzil a Ku tu yáantajen in caxtej, tu núucaj Jacob.
21Ba'ale' Isaaque' tu ya'alaj ti':
Naadzabáa ti' teen, cha'a in t'áal kabtquech u ti'al in wojéeltic wa tu jaajil teech in paal Esaú.
22Ca'a tu nadzajubáa Jacob u ti'al ca t'áal kabta'ac tumen u taata. Isaac túune' tu ya'alaj: U juum a t'aane' u juu u t'aan Jacob, ba'ale' a kabe' u kab Esaú. 23Beyo' ma' tu kaj óoltaji', tumen u kabe' jach piim u tzo'otzel je'el bix Esaú u sucu'une'. Ba'ale' le ca tu yóoltaj a dzáa u qui' t'aan ti'e', 24tu ca'a káatchi'itaj ti': ¿Jach wa tu jaajil teech in paal Esaú?
Jacobe' tu núucaj: Teen Esaú.
25U taata túune' tu ya'alaj ti':
Dzáa teen in jaant le janalo', u ti'al ca in dzáa teech in qui' t'aan.
Jacobe' tu dzaj le janal u jaant u taata, ca xan tu taasaj vino ti'. Isaaque' jaane' ca xan ukulnaji. 26Cu dzo'ocole' tu ya'alaj ti':
Naadzabáa in paal dzu'udzeni'.
27Le ca tu nadzajubáa Jacob u ti'al u dzu'udze', Isaaque' tu yúudzbentaj u nook, ca tu qui' t'antaj beya':
Tu jaajile' lela' u qui'iboquil in paal.
Bey u qui'iboquil jun p'éel káax
qui' t'anta'an tumen Yuumtzile'.
28U dzáa teech Ku u ja'il le ca'ano'
yéetel u asab ma'alobil u joochilo'ob le lu'umo',
ya'ab trigo yéetel ya'ab vino.
29Ya'ab máaco'ob bíin u meyaj techo'ob;
yéetel ya'ab múuch' caajo'ob bíin xolaco'ob ta táan.
Méektáant a láaktzilo'ob;
xolaco'ob ta táan.
Le máaxo'ob bíin loolob t'antiqueche' bíin loolob t'anta'aco'ob,
le máaxo'ob bíin qui' t'antiqueche' bíin qui' t'anta'aco'ob.
30P'elac jóokic jacob tu'ux dzo'oc u qui' t'anta'al tumen u taatae', Esaue' j suunaj tu dzoon. 31Leti' xane' tu beetaj jun p'éel qui'iqui' janal ca tu bisaj ti' u taata, ca tu ya'alaj ti':
Taat líiken, jaant u janalil le ba'alche' tu dzoonaj a paal, ca dzáa teen a qui' t'aan.
32Isaac túune' tu káatchi'itaj ti': ¿Teche' máaxech?
Ca tu núucaj: Teen Esaú a nojoch paal.
33Isaaque' sen ja'ak u yóol, táan u quiquilaanquil ca tu ya'alaj:
¿Máax túun yáax j taas teen janal? tene' tin jaantaj ma'ili' kuchuqueche', tin dzaj in qui' t'aan ti', beyo' j p'áat in qui' t'antmaj.
34Le ca tu yu'ubaj Esaú ba'ax cu ya'alic u taatae', yaayaj okolanaji ca tu ka'am a'alaj: ¡dzáa teen xan a qui' t'aan in taata!
35Ba'ale' Isaaque' tu núucaj ti':
A wíidzine' taal u tusen ca tu bisaj le qui' t'aan u najmal in dzáic teech ca'acho'.
36Ca tu ya'alaj Esaú: Let o'olal ma' cunel u kaaba'intic Jacobi'. Dzo'oc ca'a téen u tusiquen. Táanile' tu luksaj teen u tojol j yáax paalil'; Bejela'e' dzo'oc u luksic teen le qui' t'aan u najmal in kamico'. ¿Ma' wa j p'áat mix jun p'éel qui' t'aan in ti'alinti'?
37Isaac túune' tu núucaj ti':
Tene' tin dzaj ti' Jacob páajtalil ta wóokol, tin dzaj xan tuláacal u láaktzilo'ob u ti'al u palitzilto'ob, yéetel tin dzíiboltaj ca yanac ya'abcach trigo yéetel ya'abcach vino ti'. ¿Ba'ax cu páajtal in beetic ta wo'olal in paal?
38Esaú túune' tu ya'alaj ti': In taata, ¿chéen wa jun p'éel qui' t'aan cu páajtal a dzáic? Dzáa ti' teen xan a qui' t'aan.
Ca j ka'am okolnaj tu ca'a téen.
39Isaac túune' tu ya'alaj ti':
Yaan a cajtal náach ti' le ma'alob lu'umo'obo',
náach xan cu bin j káaxal ja' ti' teech.
40Yaan a toquicabáa yéetel a máascab
yaan xan a meyajtic a wíidzin;
ba'ale' le quéen mu'uka'anchajaqueche', yaan a toquicabáa ti'.
Bix úuchic u púudzul Jacob ti' Esaú
41Ti' le kiin túuno' Esaue' tu ch'a'a p'ectaj Jacob tu yo'olal qui' t'anta'abic tumen u taata. Ca tu tuclaj: Ma' náach yanil u kiinil c yaj óoltic u quíimil in taatai'; cu dzo'ocol lela' yaan in quíimsic in wíidzin Jacob'.
42Le ca tu yojéeltaj Rebeca le ba'ax cu tucultic u beetic Esaue', tu túuchi'itaj t'anbil Jacob ca tu ya'alaj ti':
Il a wile, a sucu'un Esaue' u káat u quíimsech tu yo'olal ba'ax ta beetaj ti'o'. 43Let o'olale' in paal, u'uy ma'alob ba'ax quin in wa'al teech; púudzen tu séeblaquil tu lu'umil Haran xeen tu yotoch in sucu'un Labán. 44P'áaten tu yicnal dze'edze'ec kiin ca'aliquil u jóomol yóol a sucu'un 45ca tu'ubuc ti' le ba'ax a beetmaj ti'o'. Bey túuno' quin túuxtic a'albil teech ca suunaquech. Ma' in káat ca sa'atac ti' jun p'éelili' kiin in ca'a túul paalali'.
46Cu dzo'ocole' x Rebecae' tu ya'alaj ti' Isaac:
Dzo'oc u sen náacal in wo'ol ti' le cuxtal cu dzáic teen le x ititaob dzoca'an u beelo'ob yéetel Esauo'. Wa cu kuchul j dzo'ocol u beel Jacob yéetel jun túul x ititail je'el bix le cajacbalo'ob way Canaana' asab utz ca quíimquen.
Currently Selected:
Génesis 27: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
