Génesis 3
3
Adán yéetel x Evae' tu maanba'alto'ob u t'aan Yuum Ku
1Le caano' asab yaan ca'ach u na'at ti' tuláacal u ba'alche'ilo'ob káax beeta'ano'ob tumen Ku Yuumtzil. Le caano' tu káatchi'itaj ti' le x co'olelo':
¿Bey túuno', Kue' tu ya'alaj te'ex ma' a jaantique'ex u yich mix jun cúul che' yaan tu cúuchil le paakala'?
2Le co'olelo' tu núucaj ti':
Je'el u páajtal c jaantic u yich je'el ba'alac che'ile', 3ba'ale' ma' u najmal c jaantic u yich le che' yaan tu chúumuc le paakala'. Kue' tu ya'alaj ti' to'one' ma' u najmal c jaantiqui', mix c machic u yich le che'o', tumen wa c beetique', c quíimil.
4Ba'ale' le caano' tu ya'alaj ti' le co'olelo':
Ma' jaaji'. Ma' ta quíimile'ex. 5Kue' u sen ojel, le kiin bíin a jaante'ex u yich le che'o' yaan u kuchul a wojéelte'ex ba'ax utz yéetel ba'ax kaas; bey túuno' bíin p'áataque'ex beye'ex Kue'.
6Le co'olelo' tu yilaj qui'ichquelem u yich le che'o', ca j taacchaj u jaantic, u ti'al ca kuchuc yantal u na'at. Bey túuno', tu t'ocaj jun p'éel u yich ca tu jaantaj. Cu dzo'ocole' ca tu dzaj ti' u yíicham, leti' xane' tu jaantaj. 7Tu séeblaquil je'epaj u yicho'ob tu ca'a túulalo'ob ca tu yilajo'ob chacnuul yanilo'ob. Ca túun tu chuyajo'ob u le'ilo'ob x ko'och, ca tu pixajuba'ob yéetel.
8Le wíinic yéetel u yatane' tu yu'ubajo'ob táan u máan Ku Yuumtzil te tu cúuchil le paakalo' ca'aliquil táan u yustaj u yiikal ocnaj kiin; ca j áalcabnajo'ob u ti'al u ta'acbesicuba'ob ichil u che'ilo'ob u cúuchil le paakalo'. 9Ba'ale' Ku Yuumtzile' tu t'anaj le wíinico' ca tu káatchi'itaj ti': ¿Tu'ux yanech?
10Le máaco' tu núucaj: Tin wu'uyaj táan a máan tu cúuchil le paakalo' ca tin ch'a'aj sajaquil, tumen chacnulen; let o'olale' tin ta'acbesajinbáa.
11Ca túun j káatchi'ita'ab ti' tumen Ku: ¿Máax a'al teech chacnul a wanil? ¿Dzo'oc wa a jaantic u yich le che' le tin wa'alaj teech ma' a jaantique'?
12Le wíinico' tu núucaj: Le co'olel ta dzaj teen in wéet cajtalo' tu dzaj teen u yich le che'o', teen xane' tin jaantaj.
13Ku Yuumtzile' tu káatchi'itaj xan ti' le co'olelo': ¿Ba'ax teen ta beetaj le ba'ala'? Leti'e' tu núucaj: Le caano' tu tusajen, le beetique' tin jaantaj u yich le che'o'.
14Ku Yuumtzile' tu ya'alaj túun ti' le caano': Tu yo'olal le ba'ax dzo'oc a beetico' loolob t'anta'an yanilech ichil tuláacal le ba'alche'obo'. Líikbal ti' le kiina' jíiltbil bíin máanaquech, lu'um xan bíin a jaante. 15Teech yéetel le co'olelo' yaan in beetic a p'ecticaba'ex, bey cun j úuchul xan ti' a ch'i'ibal yéetel u ch'i'ibal leti'. U ch'i'ibal leti'e' yaan u quiimbesiquech ta pool, teech xane' yaan a chi'ic u tuncuy.
16Ti' le co'olelo' tu ya'alaj:
Le quéen yanac a paale' yaan in ya'abcuntic a ki'inamilo'ob, yéetel ki'inamil bíin síijic a paal. Ba'ale' a dzíibolale' leti' cu bin u bisech ti' a wíicham, leti'e' yaan u yantal u áajtalil ta wóokol.
17Ti' le j xiibo' tu ya'alaj: Bey tumen ta wu'uyaj u t'aan a watano' iquil ta jaantilac u yich le che' tin wa'alaj ma' a jaantico', bejela'e' le lu'umo' yaan u mukyajtic loolob t'aan tu yo'olal a si'ipil; yéetel talam meyaj ca bin a beet u dzáic ba'al a jaant tuláacal u kiinilo'ob a cuxtal. 18Le lu'umo' yaan u dzáic teech ki'ixo'ob yéetel j múulo'ob, yaan a jaantic u xíiwilo'ob káax. 19Yaan a náajaltic a wo'och waaj yéetel u kíilcabil a táan jo'ol, tac quéen suunaquech lu'umil, tu yo'olal lu'um beeta'abiqueche', lu'um xan bíin suunaquech.
20Le j xiibo', Eva#3.20 Eva u kaaba' yáax co'olel. Le kaaba'a' u káat ya'ale' Cuxtal. Adan j dzáa le kaaba' ti'a' tumen tu ya'alaj: leti' bíin maamatzilta'ac tumen tuláacal aj kuuxa'an. tu dzajilac u kaaba'int u yatan, tumen leti'e' suunaj maamatzil ti' tuláacal wíinic; 21Ku Yuumtzile' tu beetaj búuco'ob yéetel u kéewelil le ba'alche'ob, u ti'al u búucbesicuba'ob le j xiib yéetel u yatan; 22ca tu ya'alaj: Bejela'e' le wíinico' dzo'oc u béeytal je'el bix jun túul ti' to'one', tumen yojel ba'ax utz, yojel xan ba'ax kaas. Bic xi'ic u ch'a'a xan u yich u che'il cuxtal, ca u jaante', ca cuxlac u ti'al ja'abo'ob mina'an u xuul.
23Let o'olale' Ku Yuumtzile' tu jóoksaj le wíinic tu cúuchil le paakal cu kaaba'intic Edén, ca tu dzaj u ti'al u meyajt le lu'um iquil beeta'abico'. 24Le ca j dzo'oc u jóoksic le máaco', tu dzaj tu lakin le u cúuchil paakalo' u cajnáalilo'ob ca'an, yaan tac u xiiko'ob bey xan jun p'éel t'aba'an máascab cu sutul suut ti' tuláacal u tzéelilo'ob u ti'al ma' u cha'ic ca náadzac mix máac ti' u che'il le cuxtalo'.
Currently Selected:
Génesis 3: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
