Génesis 31
31
Jacobe' cu tucultic bix cun j púudzul ti' Labán
1Ba'ale' Jacobe' tu yojéeltaje', u paalal bin Labane' táan u máan u tzicbalto'ob: Jacobe' dzo'oc u ch'i'ic tuláacal ba'ax ca'ach u ti'al c taata, let o'olal dzo'oc u ayikaltal. 2Tu yilaj xan Jacob ma' ma'alob u pacta'al tumen Labán je'el bix ca'ache'. 3Yuumtzile' tu ya'alaj túun ti' Jacob: Suunen tu lu'umil a taata, tu'ux caja'an a láaktzilo'ob, teen quin in láakintech.
4Jacobe' tu túuxtaj t'anbil x Raquel yéetel x Lea, u ti'al ca xi'ico'ob ich cool tu'ux caja'an ca'ach yéetel u j tamano'ob, 5ca tu ya'alaj ti'ob:
Dzo'oc in wilic, a taataexe' ma' tu t'aaniquen je'el bix ca'ache'; ba'ale' u Ku in taatae' mantadz cu láakintiquen. 6Te'exe' a sen ojele'ex, tene' in meyajtmaj a taataex je'el bix quin páajtale', 7leti' xane' dzo'oc u tusiquen, ya'ab u téenel cu kexic u bo'olal in meyaj. Quex beyo' Kue' ma' tu cha'ic u beetic teen mix jun p'éel kaas; 8ba'ale' jela'an u jóokol ti', le ca tu ya'alaj: In ca'aj in bo'ot teech yéetel j tamano'ob jóomjom boox', tuláacal u x ch'uupilo'obe' cu síijsico'ob u mejenilo'ob jóomjom booxo'ob; le ca tu ya'alaj: In ca'aj in bo'ot teech yéetel t'óot'ol booxo'obe', tuláacal u mejenilo'ob túune' t'óot'ol boox u síijilo'ob. 9Bey úuchic u luksa'al ti' tumen Ku tuláacal u j tamano'ob ca tu dzáa ti' teen.
10Jun p'éel u kiinil u báaxalo'ob le aalako'obo', yanchaj teen jun p'éel náay, ichil in wayake' tin wilaj bix u x yo'omta'al le x ch'uupo'ob tumen le u j xiibilo'ob t'óot'ol booxo'ob yéetel le t'úunt'un booxo'obo'. 11Ichil le in náayo' u ángel Ku tu t'anajen tin kaaba', teen xane' tin núucaj ti' Je'elena'. 12Ca túun tu ya'alaj teen le ángelo': Jach pact ma'alob, yaan a wilique' tuláacal le j tamano'ob yo'omquintico'ob u x ch'uupilobo' t'óot'ol booxo'ob, wáawayo'ob yéetel t'úunt'un booxo'ob, tumen dzo'oc in sen ilic tuláacal le ba'axo'ob u beetmaj teech Labano'. 13Teen le Ku chíicpaj teech Betelo', te tu'ux ta jun páaycuntaj le tuunich, ca xan ta beetaj teen jun p'éel séeb chi'e'. Co'ox, tzelabáa ti' le cúuchila', suunen te j lu'um tu'ux síijecho'.
14X Raquel yéetel x Lea túune' tu núucajo'ob ti':
Mina'an mix jun p'éel ba'al c ti'al tu yotoch c taata, 15jela'an c ilic, bey mix máaco'on ti'e'. Ma' chéen lelo', tu conajo'on, tu ayikalcuntubáa yéetel le bo'ol ta beetaj ti' iquil dzo'oquic a beel t éetelo'. 16Tu jaajile', tuláacal le ayikalil tu luksaj Ku ti' c taatae' c ti'al yéetel ba'al u ti'al c paalal. Bey túuno' beet tuláacal ba'ax dzo'oc u ya'alic teech Ku.
Jacobe' j luk Padan-aram
17-18Jacobe' tu líiksajubáa u ti'al u suutbal Canaán, tu'ux caja'an ca'ach u taata. Ca tu beetaj u na'at'al le camello'ob tumen u paalal yéetel tumen u yatano'ob, tu ch'a'aj tuláacal ba'axo'ob yaan ti'e', ca j bin yéetel tuláacal le ba'alche'ob tu náajaltaj Padan-aram. 19Ca'aliquile' Labane' j bin táanxel tu'ux u kos u j tamano'ob, x Raquele' tu yoclaj le beetbil kuob cu ti'alintico'ob bey láaktzilil. 20Bey úuchic u tu'usul Labán le arameo tumen Jacob iquil tu baljilac u binbal. 21J púudz yéetel tuláacal le ba'ax yaan ti'o'. Séeba'an tu ch'actilac u yáalcab ja'il Éufrates, bin tu beetaj tac tu káaxilo'ob Galaad.
Labane' cu ch'a'apachtic Jacob
22Cu dzo'ocol óox p'éel kiine', Labane' tu yojéeltaj u púudzul Jacob. 23Láakinta'an túun tumen u láaktzilo'obe' ca j jóok u ch'a'apachte, cu dzo'ocol u máan siete kiino'obe' tu chucpachtaj tu káaxilo'ob Galaad. 24Ba'ale' ti' le áakabo' Kue' j chíicpaj ti' Labán le j arameoil ichil jun p'éel náay, ca tu ya'alaj ti': Ch'e'en xiquinte, ma' a dzíidzic t'anic Jacob.
25Labane' tu chuc pachtaj Jacob tu káaxilo'ob Galaad, le tu'ux je'el ca'ach Jacob. Ti' xan je'el Labán yéetel u láaktzilo'obi', 26ca tu tzaj t'antaj ti' Jacob:
¿Ba'ax teen ta tusajen? ¡Ta taasaj in x ch'upul paalal beyo'ob wíinico'ob j ma'acho'ob ti' ba'atele'! 27Ba'ax teen ta tusajen iquil báalam púudziquech, mix ta wa'alaj teni'. Wa ca in wojéelte', dzo'oc ca'ach in láakintic a jóokbal yéetel qui'imac óolale', yéetel boboj paax, bey yéetel arpae'. 28Mix ta p'ataj in dzu'udzic in x ch'upul paalal, mix in dzu'udzic in wáabilo'obi'. Péecnajech beyech jun túul j ma' na'ate'. 29Tene' dzo'oc ca'ach in beetic te'ex loob ti' tuláacale'ex wa ma' tu yo'olal tu t'anajen oknejiac u Ku a taata, ca tu ya'alaj teen: U'uy ma'alob, ma' a dzíidzic t'antic Jacob. 30Ba'ale', wa jach a káat suut tu yotoch a taatae', let o'olal xan jóok a binbale', ¿ba'axten ta woclaj in kuob?
31Jacob túune' tu núucaj ti' Labán:
Tu yo'olal sajacchajen; tene' tin tuclaj je'el a toquic teen a x ch'upul paalal quex ma' in káate'. 32Ba'ale' wa ti' wa máax yaan a kuobe'. ¡Ca quíimic! C láaktzilo'obe' je'el u jaajcuntico'obe'. A'al teen, wa yaan teen ba'al a ti'ale' bise.
Ba'ale' Jacobe' ma' u yojel ca'ach wa x Raquel tu yoclaj u beetbil kuobo'.
33Labane' j ooc tu pasel Jacob, cu dzo'ocole' ti' u ti'al x Leae' bey xan ti' le u ti'alo'ob le ca'a túul x koso'obo', ba'ale' ma' tu nactáantaj le beetbil kuobo'. Le ca j jóok tu pasel x Leae', j ooc ti' le u ti'al x Raquelo', 34leti'e' tu ch'a'aj le beetbil kuobo' ca tu dzaj ichil u xéequil le camello, cu dzo'ocole' ca j culaj yóokol. Labane' tu bojlaj tuláacal le paselo', ba'ale' ma' tu nactáantaji'. 35X Raquel túune' tu ya'alaj ti':
Taat, ma' a p'u'ujul wa ma' tin líikil tumen táan u in wilic in nook.
Tu yo'olal máanic Labán u caxant le beetbil kuobo' cu dzo'ocole' ma' tu nactáantaji' 36Jacobe' j p'u'uji ca tu tzaj t'antaj ti' Labán beya':
¿Ba'ax si'ipilil tin beetaj, ba'ax in keban iquil ta ch'a'a paachtilaquen yéetel jaaj óolal? 37Dzo'oc a bojlic tuláacal ba'ax in ti'al, ¿ba'ax ta nactáantaj ti' ba'alo'ob ta wotoch u taal? ¡Dzáa way tu táan a láaktzilo'ob yéetel tu táan in ti'alo'oba', u ti'al ca u ya'alo'ob máax ti' to'on ca'a túulo'on a'alic u jaajil! 38Buul veinte ja'abo'ob meyajnajen ta wéetel, mix jun téen j p'áat ma' u chuquic u kiinil u síijsaj a x tamano'ob mix a x yuuco'obo'; mix jun téen tin ch'a'aj in jaant quexi' jun túul u mejenilo'ob a j tamano'ob; 39mix jun téen tin taasaj teech le aalako'ob cu quíimsa'alo'ob tumen le j chi'ibalo'obo', wa ma' yanchaj in bo'otic leti'e' loobo'; yéetel kiin wa yéetel áakab ca ocla'ac a waalake', teche' ca beetic in bo'otic. 40Yéetel kiine' quin mukyajtic ooxow; yéetel áakabe' quin mukyajtic que'el, tac in wenel ca'ach cu bin. 41Veinte ja'abo'ob tin beetaj ta wotoch, je'el le ba'ax dzaab tena': Tu yo'olal a ca'a túul x ch'upul paalale' tin meyaj teech catorce ja'abo'ob; tu yo'olal a waalako'obe' seis ja'abo'ob; jun tiich' ca kexic ca'ach u tojol in náajal. 42Wa ma' tu yo'olal ti'anchajic tin wéetel u Ku Abrahame', le Ku cu kultic ca'ach Isaac in taatae', jach in wojel, chéen x pikib kabil ca bin a wa'al teen ca'ach ca xi'iquen. Ba'ale' Ku tu yilaj in óotzil óolal yéetel u yich in meyaj, oknejiac túune' tu ya'alaj teech u nu'uc.
Jacob yéetel Labane' cu beetico'ob jun p'éel nup t'aan
43Labán túune' tu núucaj ti' Jacob:
Le x ch'upul paalala', in x ch'upul paalal, le áabiltzilo'obo' in wáabilo'ob; le j tamano'obo', in j tamano'ob; ¡tuláacal le ba'alo'ob ca wilic weya' láaj in ti'al! Quex beyo', ¿ba'ax je'el u páajtal in beetic bejela'a' tu yo'olal in x ch'upul paalal, tu yo'olal le paalal yanchaj ti'obo'? 44Let o'olale' co'oten, teech tin wéetele' co'ox beetic jun p'éel nup t'aan, u ti'al ca meyajnac bey jun p'éel jaajcunajil ichil tu ca'a túulalo'on.
45Jacob túune' tu ch'a'aj jun p'éel tuunich ca tu dzaj bey u chuun jun p'éel ocome', 46ca tu ya'alaj ti' u láaktzilo'ob:
¡Much'quint te'ex tuunicho'ob!
Tuláacalo'obe' tu much'quintajo'ob tuunicho'ob u ti'al u beetico'ob jun p'éel multuun, ti' jano'ob tu yicnal le multuuno'. 47Labane' ichil u t'aane' tu dzaj u kaaba'int le cúuchilo' Jegar Sahaduta, Jacobe' ichil xan u t'aane' leti'e' tu dzaj u kaaba'inte' Galaad.#31.47 Jegar Sahaduta yéetel Galaad le ca'a p'éel t'aano'oba' u káat u ya'al jun p'éelili' ba'al: U niquibil tuunich.
48Labán túune' tu ya'alaj:
Bejela'e' le multuuna' u jaajcunajil ichil tu ca'a túulalo'on.
Le t o'olal Galaad u kaaba' le cúuchilo', 49bey xan tu kaba'intaj Mizpa, tu yo'olal tu ya'alaj Labán:
Yuumtzil ca u pact to'on le quéen ch'éenec c ilicbae'. 50Wa ca loobiltic in x ch'upul paalale', wa xan cu dzo'ocol a beel yéetel u láak co'olelo'ob u nuupinto'obe', quex ca mina'anac mix máac bey aj jaajcunaj ichil to'one' Ku ca u beetajubáa aj jaajcunajil.
51Labane' tu ca'a a'alaj ti' Jacob:
Pacte, je'el le multuunicho'obo' yéetel le ocom tin dzaj ichil to'on ca'a túulo'ona'. 52Tu ca'a p'éelal beyo'ob aj jaajcunajilo'obe', lelo' u káat u ya'ale': mix teech, mix teen bíin c ch'act u ti'al c loobilticbáa. 53U Ku a nool Abraham yéetel in nool Nacor ca u ya'alo'ob u jaajil ichil to'on tu ca'a túulalo'on.
Jacob túune' jalach t'aanaj tu kaaba' Junab ku, le Ku cu kulta'al ca'ach tumen Isaac u taatae'. 54Cu dzo'ocole', Jacobe' tu táanbesaj quíimsbil ba'alche'ob te j jo'ol lu'umo', ca tu t'anaj janal u láaktzilo'ob u ti'al u kax t'antico'ob ba'ax dzo'oc u beetico'ob; jaano'ob tuláacalo'ob, ti' xan tu máansajo'ob áakab te jo'ol lu'umo'.
55Tu ja'atzcabil u láak kiine', j líik Labane' ca tu dzu'udzaj u yáabilo'ob bey xan u x ch'upul paalal; cu dzo'ocol u qui' t'antico'obe' suunaj tu lu'umil.
Currently Selected:
Génesis 31: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
