Génesis 34
34
Bix beeta'abic óolaj ti' x Dina
1Dina le x ch'upul paal tu síijsaj x Lea ti' Jacobe', j bin u xíimbalt u yéet x ch'úupalalil caja'ano'ob ti' le cúuchilo' 2Ba'ale' ila'ab tumen Siquem u paal Hamor heveoil, u nojochil le cúuchilo' tu beetaj óolaj ti' iquil tu jáanpaytilac ca j chilaj x yéetel, ca tu wach'aj sujuytaj. 3Quex beyo', sen utzchaj tu yich leti', tu yóoltaj ca'ach u beet ca'a óolta'ac tumen x Dina. 4Ca túun j t'aanaj Siquem yéetel Hamor u taata, ca tu ya'alaj ti':
Taat, xeen a káat le x ch'úupal u ti'al ca dzo'ococ in beel x yéetel.
5Jacobe' tu yojéeltaj j beeta'ab óolaj ti' x Dina u x ch'upul paal tumen j Siquem, chéen ba'ale' ma' tu ya'alaj mix ba'ali' tumen u paalale' ti' yano'ob ca'ach ich co'ole', táan ca'ach u canantico'ob u yaalako'ob, le ca suunajo'obe' ca tu ya'alaj ti'ob. 6Ca'aliquile', j Hamor u taata j Siqueme', j bin t'aan yéetel Jacob.
7Le ca j u'ulo'ob u paalal Jacob te j káaxo' tu yojéeltajo'ob ba'ax dzo'oc u yúuchul, sen p'u'ujo'ob tumen lelo' jun p'éel ba'al sen nojoch subtzilil u ti'al Israel iquil chilajic j Siquem yéetel u x ch'upul paal Jacob. Lelo' jun p'éel ba'al ma' unaj u yúuchuli'. 8Ba'ale' j Hamore' j t'aanaj yéetelo'ob ca tu ya'alaj ti'ob:
In j xi'ipal j Siqueme' jach utz tu yich a wíidzine'ex. Jach beete'ex utz a cha'ique'ex u dzo'ocol u beel x yéetel, 9suunene'ex láaktzilil ti' to'on; beyo' to'one' je'el u páajtal u dzo'ococ c beel yéetel a x ch'upul paale'exe', te'ex xane' je'el u páajtal u dzo'ocol a beele'ex x yéetel le c ti'alo'obe'. 10P'áatene'ex cáajal t éetel. Le lu'uma' bey ba'al a ti'ale'exe'; cajlene'exi', beete'ex ba'al a cuxtale'ex, mane'ex lu'umo'ob.
11Siquem xane' tu ya'alaj ti' u taata x Dina yéetel ti' u sucu'uno'ob:
Tene' quin káat óoltic te'ex ca a éejemt te'ex, je'el in dzáic te'ex je'el ba'alac a káate'exe'. 12Mix ba'al ti' wa jun p'éel nojoch bo'olal asab ya'abil ti' u suuquil, tene' je'el in bo'otic te'exe', je'el xan in dzáic te'ex ya'ab siibalo'obe'; chéen cha'ex u dzo'ocol u beel le x ch'úupal tin wéetela'.
13Ba'ale', tu yo'olal tu beetaj óolaj ti' x Dinae', u paalal Jacobe' tu núucajo'ob ti' yéetel ti' Hamor u taata, ma' yéetel jaaj óolali', 14tu ya'alajo'ob ti'ob:
Ma' tu páajtal c dzáic c íidzin ti' jun túul j xiib ma' súutkupta'ani', tumen lelo' su'ubtzil c ti'al. 15Je'el u páajtal c éejemtique' wa te'exe' ca béeytale'ex je'el bixo'one', lela' u káat ya'ale'; yaan u súut kupta'al tuláacal j xiib yaan ichile'ex. 16Wa je'ele' te'exe' cu dzo'ocol a beele'ex yéetel c ch'upul paalal, to'on xane' cu dzo'ocol c beel yéetel a ti'ale'exi'; c cajtal ichile'ex beyo' c suut jun p'éelili' caaj. 17Ba'ale' wa ma' ta éejemtique'ex ba'ax c a'alique', c lukul waye' c bisic c íidzin.
18J Hamor yéetel j Siquem u paale' tu éejemtajo'ob le ba'ax a'ala'ab ti'obo'. 19Le j xi'ipalo' tu séeblaquil tu súut kuptajubáa, ma' tu pa'ataj u láak kiini', tumen jach utzchaj tu yich u x ch'upul paal Jacob. Tu yo'olal cu jach chíin poolta'al x Siquem ichil tuláacal u láaktzilo'ob u taata, 20j bino'ob leti' yéetel j Hamor u taata tu jool le nojoch caajo', tu'ux cu kax t'anta'al tuláacal ba'alo'ob, ca tu ya'alajo'ob ti' tuláacal le cajnáalo'obo'.
21Le máaco'oba' utz u bisicuba'ob t éetel, bin u ca'ajo'ob cajtal ichilo'on yéetel xan bin u ca'ajo'ob j meyaj waye', tu jaajile' yaan ya'ab lu'um u ti'alintajo'ob; to'one' je'el u páajtal c dzo'ococ c beel yéetel u x ch'upul paalalo'obe', leti'ob xane' je'el u páajtal u dzo'ocol u beelo'ob yéetel le c ti'alo'obe'. 22Chéen ba'ale' u ti'al ca páatac c béeytal jun p'éel caaje', leti'obe' chéen u káato'ob jun p'éel ba'al: tuláacal bin le c éet xiibo'ob yaan u súut kupta'alo'ob je'el bix suuquil ti'obe'. 23Tuláacal ba'ax u ti'alo'ob yéetel u yaalako'obe' bíin c ti'alac. Chéen yaan c a'alic bey, leti'ob túune' cu p'áatalo'ob cajtal t éetel.
24Tuláacal le u j xiibilo'ob cajnáalo'ob ichil le nojoch caaj u chucmajo'ob u nojochil u ti'al aj ba'atele', tu éejemtajo'ob le ba'axo'ob tu ya'alajo'ob j Hamor yéetel j Siquem u paal, ca j súut kupta'abo'ob. 25Ba'ale' Simeón yéetel Leví u paalal Jacob u sucu'uno'ob x Dinae', j bino'ob tu yóox p'éel kiin te noj caajo', ca'aliquil le xiibo'ob táan u mukyajtico'ob u ki'inamil le súut kuptajo', tu jíiltajo'ob u máascabo'ob ca tu láaj quíimsajo'ob le xiibo'ob, ma' yanchaj máax káatal tu beelo'obi' 26yéetel máascab tu quíimsajo'ob j Hamor yéetel j Siquem u paal; cu dzo'ocole' tu jóoksajo'ob x Dina tu yotoch Siqueme' ca j bino'ob. 27Kucho'ob xan u láak u paalal Jacob, cu dzo'ocol u máano'ob yóokol le quimeno'obo', tu ch'a'ajo'ob le ba'alo'ob yaan te j caajo', bey tu sutilaco'ob le kaas beeta'ab ti' x Dina u yíidzino'ob. 28Tu bisajo'ob j tamano'ob, Wacaxo'ob, burro'ob, tac xan tuláacal le ba'alo'ob yaan ich caajo', bey le yano'ob ichil le coolo'obo'. 29Tu ch'a'ajo'ob tuláacal le ba'alo'ob ichil le najo'obo', tu bisajo'ob xan le paalalo'obo' yéetel le co'olelo'obo' 30Jacob túune' tu ya'alaj ti' Simeón yéetel ti' Leví:
Te'exe' dzo'oc a p'atiquene'ex kaasil. Bejela'e' u cajnáalilo'ob le cúuchila', le j cananeob yéetel le j ferezeob, binel u ca'ajo'ob u ch'a'a p'eecteno'ob. Bíin u much'uba'ob u ti'al u loobiltiqueno'ob, tu yo'olal ma' ya'ab máaco'ob yaan tene' bíin u quíimso'ono'ob tac xan in láaktzilo'ob.
31Leti'obe' tu núucajo'ob ti':
¿Ca tucultique' u najmal u beetic ba'al ti' c íidzin bey jun túul x chocó pool co'olele'?
Currently Selected:
Génesis 34: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
