Génesis 8
8
Bix ch'éenic le Búulcabalo'
1Ku túune' tu ka'ajesaj Noé bey xan tuláacal le ba'alche'ob yano'ob yéetele', te ichil le cheemo'. Ca tu beetaj u yustaj iik yóok lu'um, le ja' túuno' jo'op' u sa'ap'al; 2ca j ka'al u sayabilo'ob u taamilo'ob le ka'anabo' bey xan u kalabilo'ob ca'an. Ca j jáaw u káaxal ja', 3le ja' túuno' jo'op' u sa'ap'al jujun p'íitil. Cu dzo'ocol u máan ciento cincuenta kiino'obe', le ja'o' j bin u sa'ap'al; 4tu kiinil diez yéetel siete ti' u mesil siete ca je'el le cheem yóokol u witzil Ararat. 5Ca'aliquile' le ja'o' táan u bin u sa'ap'al; tu yáax jun p'éel u kiinil u mesil diez páatji u yila'al u asab ca'anlil le witzo'obo'.
6Cu dzo'ocol u máan cuarenta kiino'obe', Noe' tu je'aj u calom kiinil le cheem tu beetajo' 7ca tu cha'aj jun túul j ch'oom; ba'ale' le j ch'oomo' xiknalnaj tzela'an tzéel tac ca j tij le lu'umo'. 8Cu dzo'ocol u máan kiin u cha'akabt le j ch'oomo', tu cha'akabtaj jun túul sacpacal u ti'al u yojéeltic wa dzo'oc u tijil le lu'umo'. 9Ba'ale' le sacpacalo' suunaj te j cheemo', tumen ma' j páatji u t'úuchul mix tu'uxi' tu yo'olal láili' pixa'an le lu'um tumen le ja'o'. Noé túune' tu jóoksaj u kabe' ca tu machaj le sacpacalo' ca tu yocsaj ichil le cheemo'.
10Noee' tu pa'ataj u máan u láak siete kiino'obe' ca tu cha'akabtaj tu ca'a téen le sacpacalo'. 11Táan u yéeksame'ental ca j suunaj le sacpacal yéetel jun chan xéet' u kab olivo tu coj. Bey tu yojéeltilac Noé táan u tijil le lu'umo'. 12Tu pa'ataj u máan u láak siete kiino'obe' ca tu ca'a cha'akabtaj le sacpacalo', ba'ale' ma' j suunaj le sacpacalo'.
13Seis cientos yéetel jun p'éel u ja'abil Noé ca j tij le lu'umo'. Tu yáax jun p'éel kiin ti' le yáax meso' Noee' tu je'aj u yóokol le cheemo' ca tu yilaj dzo'oc u tijil le lu'umo'. 14U ti'al u kiinil veinte yéetel siete ti' le ca'a p'éel meso' le lu'umo' dzo'oc ca'ach u ma'alob tijil. 15Ca j a'ala'ab túun ti' Noé tumen Ku: 16Jóoken ti' le cheem pa'ate' yéetel a watan, a paalal, yéetel a wilibo'ob. 17Jóokes xan tuláacal ba'alche'ob yano'ob ta wéetelo': le ch'íich'o'obo', alaktbil ba'alche'ob bey le cu jíilticuba'obo' u ti'al ca ki'itpajaco'ob tuláacal yóok lu'um, ca ya'abchajaco'ob ca u chupo'ob xan yóokolcaab.
18Jóoko'ob túun ti' le cheemo', Noé, u yatan, u paalal bey u yilibo'ob. 19Jóoko'ob xan tuláacal alaktbil ba'alche'ob, káaxil ba'alche'ob, le cu jíilticuba'ob tac xan le ch'íich'o'obo'. 20Cu dzo'ocole' Noé tu beetaj jun p'éel u multuunil kultaj#8.20 Multuunil kultaj ich castlan t'aane' Altar; cu kaaba'intic u multuunil kultaj tumen le úuchben máaco'obo' u ti'al u kultico'ob ca'ach Kue' cu dzapico'ob tuunicho'ob tu'ux cu dzáico'ob u ti'ibil óolalo'ob. u ti'al u tzicbe'enil Yuumtzil, tu ch'a'aj jujun túul ti' u jejeláasil u ma'alobil ba'alche'ob, ch'íich'o'ob ca tu táanbesaj ti' Yuumtzil bey tóocbil ti'ibil óolale'. 21Le ca j kuch u jadzutz qui'iboquil ti' Yuumtzile' tu ya'alaj: Mix bikin bíin in ca'a loolob t'ant le lu'um tu yo'olal u si'ipil wíinic, tumen likul tu táanquelmil chéen kaakas tuucul yaan ti' le máaco'. Mix xan bíin suunaquen in xu'uls tuláacal ba'alche'ob je'el bix dzo'oc in beetico'.
22Ca'aliquil dzaca'an yóokolcaabe',
yaan u yantal paakal yéetel jooch;
yaan u yantal ooxow yéetel que'el,
bíin yanac que'elil yéetel yáax kiinil,
bey xan kiino'ob yéetel u yáakabilo'ob.
Currently Selected:
Génesis 8: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
