Mavanga 6
6
Baasooli baatu tsambu mu ukumbasa bilumbi
1Mu bilumbu mobiina, litangu li bayihi laakapfuna, Bayudaayo ba baakayambila ndaha a Bangeleke, baakaŋono. Bo baakaŋono mu toni ati, pasi ilumbu, mu tangu a kabili a byudya, Bayudaayo ba baakayambila Ibeleho, baakafumbasa bakwili ba bo ba bakaasu. 2Ni mu buuna, kuumi bilumbi byole byakungi konge yoosi yi bayihi, na baaleeli: «A hwafwana huli bisu mu unyaha ulongese mambu ma Nzambi mu toni a isalu hya kabili a byudya ve. 3Ni mu buuna, baana ba ngu, soolowani ŋa hati la benu, babahala tsambu ba bu utiila imbangi hi ibwe, ba baaluula mu Livupu la Ngidi na mu tsiki. Na bisu a benu livani bo isalu mohinihi. 4Buuna bisu lu ukaahwada tangu yoosi, mu lisambulu na mu isalu hi ulongese mambu ma Nzambi.»
5Baatu boosi baasiingi mambu ma bo baayabisi. Ni mu buuna, bo baasooli Etyene bahala li laaluula mu hiitu na mu Livupu la Ngidi, Filipo, Pokole, Nikanoli, Timoni, Palamenasi na Nikolasi musi Antyokya, wu asiingi usalila Nzambi Bayudaayo. 6Na baamwesi bo huli bilumbi, bi byasambili mu bo na byasuusili bo myoho. 7Mambu ma Nzambi maakatsamuha, litangu li bayihi laakakula bulahi hu Yeruselemi. Na litangu lilinene li banganga ba Nzambi, baakasa hiitu mu Yisu.
Kaangili a Etyene
8Etyene wu aba aluula mu matwala na mu hyese akavanga bipadi na bimangu bibinene ŋa hati la baatu. 9Mwa litangu la baatu layakaakana na nde. Baatu mobaana aba ba kabu la baatu ba nzo lisambulu yi Bayudaayo, li bakateele kabu li «baviha na ba baaba bunyanga». Kabu mo aba na Bayudaayo ba misyenge mya Kilene na ba mya Alekizandi. Itwadi na bakima ba hu itanzi hya Silisiya, na ba tsi ya Asiya, bo boosi baakakini na Etyene. 10Ka bo a baatwali ubiingala nde ve, mu toni ati nde akayambila mu tsiki yi Livupu laakava nde. 11Ni mu buuna, bo baayuhisini na baatu, na uva bo mbongo, mana baatu mobaana baleele: «Bisu layuha nde mu utuha Moose na Nzambi!» 12Bo baatelimisi baatu boosi ŋa yulu a nde, bakuutu ba mabuli, na bakuutu ba mikele. Titswene bo baakangi nde mu mifudi na baabiti nde hu pfuundu banzonzi ba Bayudaayo. 13Bo baabiti ka bambangi ba mapfuta mu uyakese nde. Bo baaleeli: «Bahala molinili lili mu ukwilala mu ubaayambila bubi, mu toni a nzo a Nzambi a bisu ya ngidi na mu mikele mya Moose! 14Bisu laayuha nde mu uleele ti Yisu, musi Nazareti, utsala nzo a Nzambi na usanza bipfu bi Moose hasiisili bisu.» 15Boosi ba baaba baatsahala hutso a nzo a pfuundu banzonzi ba Bayudaayo, baasungimini Etyene, na baamoni hiinzi hya nde hyakituhi we hya pofi.
Currently Selected:
Mavanga 6: TSA
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
