Luuka 22

Bakuutu ba Bayudaayo baakoti pfuundu yimbi mu Yisu

1Mukungi mapa ma maaveledaana, wu bubateele «mukungi a Paake» aba aka bebele. 2Bakuutu ba banganga ba Nzambi na bakuutu ba mikele baakasaha manzila ma uduba Yisu. Ka bo baaba na boomo bwa baatu.

Yuda asahi manzila ma usumbasa Yisu

3Mono buni Satana hakoti mu Yuda, nga nduhi a Isikaryoti, wu aba mumosi ŋa hati la kuumi na bilumbi byole. 4Yuda ayayuhasana na bakuutu ba banganga ba Nzambi, na bakuutu ba bakeedi ba nzo a Nzambi. Bo baayuhisini mu usaha buni nde hakisumbasa bo Yisu. 5Bo baaba na kinya na bo baakuti mu uva Yuda mbongo. 6Yuda asiingi na abwi mu usaha nzila yimbwe mu usumbasa bo Yisu, hwavele baatu uyaba.

Yisu atumi mu uvangimasa metse ma mukungi a Paake

Mataayi 26.17-19; Malako 14.12-16

7Ilumbu hi mukungi mapa ma maaveledaana, hi baakatsuha bungodu bwa Paake hyatoodi. 8Yisu atsindihi Peetelo na Yowani hu busu na aleeli bo: «Yavangilaani bisu ilaambu hya Paake.» 9Bo baafuuli nde: «Huni we tondi ti bisu liyavangimasa hyo?» 10Nde afutili bo: «Ŋa benu lu ukoto mu musyenge, bahala limosi, na lisanga li laaluula mu mamba, sa ayabwana benu. Dukalaani nde hutso a nzo yi nde hukoto, 11na benu lileele nga nzo bunuubu: “Mulongisi ti: ‘Itini hya nzo hi me undya Paake na bayihi ba me huni hili?’” 12Buuna nde sa alaha benu itini hinene hi baamiivanga hu yulu ibanga. Ni huuna benu luvangimasa Paake.» 13Bo boole baayeni, baamoni mambu we bu Yisu hayabisi bo mo. Peetelo buna Yowani baavangimisi ilaambu hya Paake.

Ilaambu hya Pfumu

Mataayi 26.20,26-29; Malako 14.17,22-25; 1 Koliito 11.23-26

14Tangu bu yatoodi, Yisu atsahili ŋa metse na bilumbi. 15Nde ni uleele bo: «Me mbeedi na lehemene mu udya ilaambu hya Paake moyi na benu, tswamina me mono pasi. 16Ka, me ndeele benu, me a humbwendya hyove, nate bu Nzambi huva tsalu a hyo hu Ipfumu hya nde.» 17Nde avoli mbuungu, afutili matondo huli Nzambi, na aleeli: «Volwani mbuungu moyi, na kabasanani yo. 18Me ndeele benu, vangani buuna, mu toni ati, me a umbwenywa vinye ve, nate bu Ipfumu hya Nzambi hyuya.» 19Titswene nde avoli lipa, afutili matondo huli Nzambi, abukili lo, akabili bo mu bitini na aleeli: «Yiniyi ni nyutu a me yi me piidi mu benu. Saani buuna mu uyibwala me monyi.» 20Nde asiidi ka bumosi mu mbuungu. Bu bo baamani udya, Yisu aviidi bo mbuungu na aleeli: «Mbuungu mo yiniyi ni lahi li linyatihi, ŋa hati la Nzambi na baatu. Lahi moliina baasiidi lo mu makila ma me, ma maatsamuhi mu benu.

21Ka monwani, nde wuna wu usumbasa me, ni ŋa metse ŋa ali na me. 22Mwana a muutu sa akwa we bu huli kesili a Nzambi. Ka ni lingebe huli nde wuna wu usumbasa nde!» 23Na bilumbi byabandihi ufulasana ŋa hati la bo: «Na akisa buuna?»

Na afulala bukuutu?

Mataayi 20.24-28; 19.28; Malako 10.41-45

24Ŋa hati li bayihi hwabwidi kele yinene, mu uyaba na ŋa hati la bo aba afulala bukuutu. 25Yisu aleeli bo: «Bapfumu ba mabuli ma matsi makima, bubaatsahilala baatu ba bo. Na babali na lituma ŋa yulu a bo, bubaasa ti baateele bo “banga mavanga ma mabwe”. 26A huyelemene buuna mu benu ve. Nyaha wu aluta bukuutu ŋa hati la benu, aba we ngebe a benu; wu ubaatuma benu, aba we musalili a benu. 27Na fuli bukuutu, wuli ŋa metse vo musalili wuli mu uva nde byudya? Wuli ŋa metse, ni mukuutu. Ka me ndi ŋa hati la benu we musalili. 28Benu likwilili na me hutso mapasi ma me. 29Ni mu buuna, we bu Taata a me hava me lituma, me kaka ndi mu upa benu lituma, 30Ni mu buuna benu lu udya na unywa na me, hutso Ipfumu hya me. Na benu sa litsahala ŋa makiti ma bupfumu, mu utsundasa bibandu kuumi na byole bya Isereli.»

Yisu ayabisi ti Peetelo sa atuna nde

Mataayi 26.31-35; Malako 14.27-31; Yowani 13.37-38

31«Simoni, Simoni! Kele! Satana amiivondo muswa mu ususa benu ŋa iyengese, we bu bubayengese mbutu a looso. 32Ka me atsambili mu we, mana hiitu hya we mu Nzambi, hiveletsuda. Na ŋa we uyafutaha huli me, hwadisa baana ba ngu a we.» 33Peetelo aleeli nde: «Pfumu, me ndi wu avangama mu uyene na we hutso a kondaayi na ukwa na we.» 34Yisu afutili nde: «Peetelo, me ndeele we, tsusu na maakohele loloyi, we sa tuna me tuna tatu.»

Mbongo, koome na sabila

35Nde abweleele bo: «Ŋa me atsindihi benu hwavele ipoholo hya mbongo, tso koome, tso bikoodi, benu laakiimi mu isiha?» Bo baafutili: «Isiha tso imosi ve.» 36Na nde aleeli bo: «Ka bunuubu, woosi nga ipoholo hya mbongo, nyaha avolo hyo. Ni we nga koome ka. Na wu avele na sabila, asumbasa ikutu hya nde na asumba sabila a nde. 37Ka me ndeele benu, hwafwana mu ukuhasa ma mumbihuli a Nzambi hasonehe mu me: “Baasuusi nde mu litangu la banga mamabi, na dyambu mo liinili lafwana utswiha mu toni a me#Esa 53.12.” Mu toni ati moosi ma baasonehe mu me, sa matswiha.» 38Bayihi baaleeli: «Pfumu, mono basabila boole.» Na nde afutili bo: «Baana tsiitsa!»

Yisu asambili ŋa isyelo hya Olive

Mataayi 26.36-46; Malako 14.32-42

39Bu nde hapali, nde ayeni we bu hwaba ipfu hya nde hu isyelo hya Olive. Bayihi ba nde baaduukili nde. 40Bu nde hatoodi ŋa mbuha moyina, nde aleeli bo: «Sambilaani, mana Nzambi akumbasa benu mu uvelenyahula hiitu mu nde.»

41Titswene nde atahuhi mwana lala na bo, na asambili. 42Yisu aleeli: «Taata, tso we tondi, maasila me mbuungu yi mapasi yiniyi. Nyaha litondo la we livangama, ka a la me ve.» 43Na pofi amati huli Nzambi, ayamonehele na nde, mu uhwadisa nde. 44Hutso maangongo, nde akasambila na mifudi mi myavyohelele. Hyunga hya nde hyakituhi we matangi ma makila ma maakabwa ŋa toto. 45Bu nde hamani usambila buuna, Yisu atelimi, ayasusaha hu pedu bayihi ba nde. Nde abiisi bo tolo, utso ikolili na lingebe. 46Yisu aleeli bo: «Muhima benu lili mu ubwamina? Telemaani, na sambilaani, mana Nzambi akumbasa benu mu uvelenyahula hiitu mu nde.»

Yisu bamiiyakaanga

Mataayi 26.47-56; Malako 14.43-50; Yowani 18.3-11

47Nde a hamani utoyo ve, konge a baatu yayidi. Nga nduhi a Yuda, mumosi ŋa hati la kuumi na bilumbi byole, aba ŋa busu. Nde ayasusaha ŋa pedu a Yisu mu uviva nde. 48Yisu aleeli nde: «Yuda, ni mu muvivu we misuumbasa Mwana a muutu!» 49Bilumbi bya Yisu, bu byamoni ma maaba mu uvyoho, baafuli nde: «Pfumu, litina bo mu basabila ba bisu?» 50Na, mumosi mu bo ateti musalili wu mukuutu banganga ba Nzambi, na akesi nde tswi la mbahala. 51Ka Yisu aleeli: «Nyahani! Buuna ka tsiitsa.» Yisu abembi tswi la bahala mo, na abeelusi nde. 52Titswene nde aleeli huli bakuutu ba banganga ba Nzambi, huli bakuutu ba bakeedi ba nzo a Nzambi, na huli bakuutu ba Bayudaayo ba baayidi, hu uyakanga nde: «Benu limiiya na basabila, na makooko we me wuli ipumbulu. 53Me kamba tangu yoosi na benu mu litandala la nzo a Nzambi, na benu a laakaangi me ve. Ka tangu mo yiniyi ka ya benu na yi matwala ma piipidi.»

Peetelo atuni Yisu

Mataayi 26.57-58; Malako 14.66-72; Yowani 18.13-17

54Bu bo baamani ukanga Yisu, bo baabiti nde hu nzo mukuutu banganga ba Nzambi. Peetelo akadukala bo mu lilalala. 55Ŋa butima bu litandala la nzo, bo baaduuki mbaahu, na baatsahili. Peetelo atsahili ŋa hati la bo.

56Musalili mumosi wu mukaasu wu abeedi na bo, mu liyalala la mbaahu adihuli Peetelo. Mukaasu asungimini nde na aleeli: «Bahala molinili ka labeedi na Yisu!» 57Ka nde atuni na aleeli: «Mukaasu, me a nzaabi nde ve!» 58Mwana a tangu hole yivyoho, muutu mukima amoni nde na aleeli: «We kaka li mumosi wa ŋa hati la bo.» Na Peetelo akaali: «Bahala, a me ve!» 59Humbisa a bebele a ngunga mosi, mukima abwesilasa: «Mu mbuli, bahala molinili kaka libeedi na nde, mu toni ati nde musi Ngalili.» 60Peetelo akaali: «We, me a nzaabi ma we tondi uleele ve.» Mu tangu moyina, bu nde haba kini mu utoyo, tsusu akohili. 61Pfumu akinguhi na atali Peetelo. Na Peetelo ayibwili monyi mu mambu ma Pfumu haleeli nde: «Tsusu na maakohele loloyi, we utuna me tunala tatu.» 62Peetelo apali mu litandala, nde abwi mu ulila mu mifudi.

Baatu baakanyongese Yisu

Mataayi 26.67-68; Malako 14.65

63Baatu ba baakakelese Yisu baakakwede nde, na baakatete nde. 64Bo baakafungala nde hiinzi, na baakava nde byuhu, na ubaaleele: «Bihula! Na leele na miitete we.» 65Bo baahwadi mu usinzatuha nde.

Yisu ŋa busu bwa pfuundu banzonzi ba Bayudaayo

Mataayi 26.59-66; Malako 14.55-64; Yowani 18.19-24

66Ŋa busi bwakiidi, bakuutu ba tungi la bula, bakuutu ba banganga ba Nzambi na balongisi ba Mikele, boosi baakuukimi. Baabiti Yisu ŋa busu bwa pfuundu a bo, pfuundu banzonzi yi Bayudaayo. 67Bo baleeli: «Tso we ni Kristo, leele bisu.» Yisu akaali bo: «Tso me ndeeli benu lo, benu a lusinga ve. 68Tso me piidi benu hyuhu, benu a lukaala me ve. 69Umata loloyi, Mwana a muutu sa atsahala ŋa mbahala a Nzambi a Pungu.» 70Boosi baaleeli: «We kaahu Mwana a Nzambi we li?» Na nde afutili bo: «Benu mwakulu limileele lo.» 71Na bo baaleeli: «Bisu a lisaali na nzala bambangi ve. Mu toni ati bisu limiyuha bisu mwakulu ma mamipala mu munywa a nde.»

Currently Selected:

Luuka 22: TSA

Highlight

Copy