Luuka 24

Tsuuhili a Yisu Kristo

Mataayi 28.1-8; Malako 16.1-8; Yowani 20.1-13

1Mu ilumbu hi limiingu ŋa hati a ngwali, bakaasu baayeni hu ngila. Bo baabiti maadi ma tsulu a nyafi ma bo baavangimisi. 2Bo baamoni ti manya li baadibuhi munywa ikotili hya ngila, laaba baavengolo ŋa muvanga. 3Bo baakoti hutso a ngila, ka a baamoni nyutu a Pfumu Yisu ve. 4Bu matsimi ma bo maaba helini-helini, babahala boole mu bikutu bi bibaamwedeme, baayamonehele ŋa busu bwa bo. 5Mu boomo, bakaasu baatsokihi biinzi bya bo mu toto. Babahala mo baaleeli bo: «Mu hima benu lili mu usaha ŋa hati la babaakwa wu uli monyi? 6Yisu a hali ŋa ve, ka nde amiisuuha ŋa hati la babaakwa. Yibwalaani ma nde haleeli benu ŋa nde haba hu Ngalili: 7“Baafwana uyeholo Mwana a muutu ŋa myoho mya banga masumu, na ukomene nde ŋa kuruwa, na nde sa asuuha mu lipfu mu ilumbu hi bitatu.”» 8Buuna bakaasu baayibwili monyi mu mambu ma Yisu. 9Bo baamati hu ngila na baayayabisa moosi huli bilumbi kuumi na imosi na huli bana boosi. 10Hwabeedi Mariya musi Magadala, Yane, Mariya ngu a Yaki. Bakaasu bakima ba baabeedi na bo, bo kaka baatoosili musamu mowunuwu huli bilumbi. 11Ka bilumbi byatsimi ti ma bakaasu baayaleele bo, a mali na lisunga ve. Bo a baasiidi hiitu mu mo ve. 12Ka Peetelo atelimi na ayeni tiinu hu ngila. Nde abandimi na nde amoni ndulu birende bya tsanda ya lino. Titswene nde afutihi, hutso a kimwili yindahi, a ma maabwidi.

Yisu apfuuti nzila na bayihi boole ba baakayene hu bula bwa Emawusi

13Ilumbu mohina, bayihi boole baakayene hu bula bumosi nduhi Emawusi. Taha mu uto hu musyenge a Yeruselemi, mangunga moole mu dwe la miilu. 14Bo baakalelesene mu misamu myosi mi myabwidi. 15Bu bo baakalelesene na baakatsotso mambu mo, Yisu nde mwakulu ayidi bebele na bo na apfuuti nzila na bo. 16Bo baakamono nde, ka Nzambi asi bo muyungu ti bo baveledihula nde. 17Yisu afuuli bo: «Benu ki mambu lili mu utsotso mu nzila?» Bo baatsikimi na baamwesi lingebe la bo. 18Mumosi mu bo, nga nduhi a Kelopasi, akaali nde: «Mu boosi ba bali mu Yeruselemi, ndulu ni we dimbili ma mamiivyoho bilumbu mobiinibi?» 19Yisu ti: «Mo ka ki mo?» Bo baafutili nde: «Ma maabwa mu toni a Yisu, musi Nazareti, nde beedi mumbihuli a Nzambi wu matwala. Nde amwese mo mu mavanga na mu mambu ŋa busu bwa Nzambi na ŋa busu bwa baatu boosi. 20Bakuutu ba banganga ba Nzambi na batumi ba bisu, baayehuli nde, batsundisi nde nate hu lipfu, na baakomini nde ŋa kuruwa. 21Bisu likasa hiitu ti nde ni wu kiiyobolo Isereli. Ka ŋa yulu a maana moosi, loloyi ka bilumbu bitatu umata bu maana mosi maabwa. 22Ŋa hati la bisu mwa bakaasu hakwe, bali mu uleele mya kimwili. Ni mbuli: bo baayeni hu ngila a nde ŋa hati a ngwali, 23ka bo a baamoni mvumbi a nde ve. Bo baayafutaha, baayayabisa bisu ma bo baamoni mu imono-miisu. Mu imono-miisu mo, bapofi baayabisi bo, ti nde monyi ali. 24Bakima ŋa hati la bisu, baayeni hu ngila. Bo baamoni mambu moosi we bu bakaasu baayabisi. Ka uto ti Yisu, bo a baamoni nde ve.»

25Buuna Yisu aleeli bo: «Baatu ba baavele buyedi, na banga matsika mu usa imiinu mu moosi ma mimbihuli mya Nzambi myayabisi! 26Beedi hwafwana ti Kristo a maamono pasi, tswamina Nzambi ayusa nde?»

27Na nde abinduli bo mambu moosi ma baasonehe mu nde mu Muhanda a Ngidi woosi, umata mu mabuuku ma Moose nate mu mabuuku moosi ma mimbihuli. 28Bu bo baatoodi bebele na bula bu bo baakayene, Yisu asiidi we wu uvyoho bula mobuuna. 29Ka bo baayayiini nde na uleele: «Ba na bisu, mu toni ati, ilumbu hi mikulamana na butsuhu bwaka bebele.» Nde akoti mu uba na bo. 30Nde atsahili ŋa metse na bo, nde avoli lipa, asambili na asyemi lo. Titswene nde abukili lo na aviidi bo lo. 31Buuna, miisu ma bo maadibumi na bo baadihuli Yisu. Ka nde adimbili ŋa busu bwa bo. 32Na bo baalelisini: «Bisu laamono kinya we mbaahu hutso mitima mya bisu, ŋa nde akayambilanga na bisu mu nzila yoosi. Bisu laamono ka kinya ŋa nde akabindulanga bisu ma baasonehe ma Ngidi.»

33Bayihi baaboole ba, baatelimi mawasa-mawasa, baafutihi hu Yeruselemi. Na bo baayabiisa bilumbi kuumi na imosi bi byaba byakuukama na bakima. 34Bayihi baaboole, baaleeli bo: «Ni mbuli! Pfumu amiisuuha ŋa hati la babaakwa. Ni mbuli! Nde miyamonehele huli Simoni.» 35Bo mwakulu baaviidi ikumbu mu ma bo baamoni mu nzila, na buni bo baadihuli Yisu mu tangu a kabili lipa.#Mav 1.6-8

Yisu amonihili huli bayihi

Mataayi 28.16-20; Malako 16.14-18; Yowani 20.19-23

36Bo baaba kini mu utoyo, ŋa Yisu nde mwakulu hayamonehele mutele, ŋa hati la bo. Nde aleeli: «Nyaha hyenze hiba na benu.» 37Bo baaba na boomo, napa tsisu, mu toni a bo baatsimi ti, bo bamiimono mukuyi. 38Na Yisu aleeli huli bo: «Mu hima laaka pupa-pupa? Na mu hima lili na paha moyiniyi hutso mitima mya benu? 39Talaani makaka ma me, na miilu mya me. A wu ni me! Bembaani me, na monwani! Mukuyi a hali na musunya ve, tso visi ve. Ka a huli buuna mu me muutu ve, benu li miimono ti me na byo.» 40Bu nde haleeli buuna, nde amwesi bo myoho na miilu mya nde. 41Bo a baaba na hiitu ve mu toni ati, bo baaba baaluula mu kinya na mu kimwili. Yisu afuuli bo: «Benu lili na isiha hyudya ŋaniŋa?» 42Bo baaviidi nde itini hya tswi wu baakaanga. 43Yisu avoli nde na adiidi ŋa miisu ma bo.

44Titswene nde aleeli bo: «Monwani mambu ma me anzaabisi benu ŋa me amba kini ŋa hati la benu. Hwafwana ti, mambu momanima moosi ma baasonehe ma Ngidi mu me, matswiha. Mambu mo mali mu mikele mya Moose, hutso mabuuku ma mimbihuli na mu buuku li Mikuunga.» 45Buuna nde adibuli bo buyedi mana bo batsikaha mambu ma Ngidi. 46Na nde aleeli bo: «Ni mu buuna, baasonehe ti Kristo sa amono pasi yi lipfu. Na mu ilumbu hi bitatu, nde sa asuuha mu tsi a babaakwa. 47Bo baabwesonehe ti, sa balongese mu nduhi a nde, Musamu wu Mubwe huli baatu ba matsi moosi. Mana bo basobo mbiili a bo, na bayaka nyahulili masumu. Bo sa batswamina ulongese mo hu musyenge a Yeruselemi. 48Benu lili bambangi ba mambu momanima. 49Buuna, me tsa tsindaha me mwakulu ŋa yulu a benu, wu Taata a me hasiidi lahi. Ka benu, kwilalaani hutso musyenge nate bu benu lu uyaka matwala ma Livupu la Ngidi.»

Yisu avati hu yulu

50Titswene Yisu abiti bo hu mbadi musyenge, bebele na bula bwa Beetanya. Na nde asyenuli myoho na asyemi bo. 51Bu nde haba mu usyeme bo, nde atahuhi na bo, na avati hu yulu.

52Ka bo, humbisa a hu bo baakongimini mu uyusa nde, bo baafutihi hu Yeruselemi na kinya yi yafulala. 53Bo baakapfuutana tangu yoosi mu litandala la nzo a Nzambi na baakayusa Nzambi.

Currently Selected:

Luuka 24: TSA

Highlight

Copy