S. Juan 9
9
Jesús ku jach ch'ensik u wich a muj yirik u ber a toj lik' kaj siji
1Kaj mʌni a Jesús tu yira junturi' xi'ra a muj yirik u ber a toj lik' kaj siji. 2Tu k'ato' u kʌ'sa winik ti':
—Rabí, ¿Mok tu kʌxta u k'ebʌn, a je' a xi'ra o u teto', ti' u siji junturi' xi'ra a muj yik u ber?
3Tu nuka Jesús:
—Mo' yok'o u k'ebʌn u tet y mix a ti', lʌji' yok'o ti' u jach e'sik u muk' K'uj yok'o ti'. 4Yʌnti' ak metik u meaj a mok tu tuchi'ten tuk'in ti'tʌ chuk'intʌ, binukaj tar u yak'ʌchʌ y mix mok ku bij meaj. 5Wo ti'tʌ yʌnen way yok'o lu'm, ten lʌjien u kip'i a lu'm.
6Kaj tsoy u yei'k, tu tuba yok'o a lu'm, tu meta chichin luk' yete u k'abu chi', y tu cho'a yok'o u wich a muj yirik u ber. 7Y tu ya'ti':
—Xen p'o'e a wich yok'o u kumi ja' u k'aba' siloé (a la' u nu'ku: «Tuchi'ta'»). Bini u p'o'e u wich y kaj suti ya chʌkʌ'pʌj u yirik u ber. 8U bojo' a xok'o kʌjtik yete a mok u yirmʌ u mʌn tu k'at tak'in a lay a xi'ra, tʌn u k'atko' yete u bojo':
—¿Mo' la' a je' a ku kuta u k'ate tak'in?
9Tax jujuntu tʌn u yei'ko':
—Lʌji'.
Y u jero' tʌn u yei'ko':
—Bex u wich,
Chen a ti' tʌn u yei'k:
—Lʌji' Tenen
10Lʌji' kaj k'ata' ti':
—¿Bik je'pʌk a wich?
11Tio' nuka ti':
—A ka wirik a xi'ra u k'aba' Jesús tu meta luk', y tu cho'a tin wich y tu ya'ten: “Xen p'o'e a wich yok'o u kumi ja' u k'aba' Siloé.” Ij binen in p'o'e in wich y lʌji' kaj je'pʌ in wich.
12Lʌji' ka tu k'ato' ti':
—¿To' tu tiʌ a lay a xi'ra?
Tu nuka:
—Mi' wue.
A ku ya'bati' fariseos ku chich k'atik ti' a xi'ra a je'chʌ u wich
13Tij pura' tu yiknʌ u winiko' a judíos a ku ya'batio' fariseos aj jea' u wich. 14Lʌji' u k'ini ku je'sik u bʌjo' a judíos tuk'in Jesús ka tu meta a luk', ka tu cho'a tu wich ij je'chʌ u wich a xi'ra. 15U winiko' a judíos a ku ya'batio' fariseos tu ka' k'ato' ti a xi'ra, bik je'chʌk u wich, ti' tu ka' nuka ti':
—Tu cho'a luk' tin wich y ti p'o'a in wich y beje' ya ki wirik ba'.
16Tax jujuntu u winik a judíos a ku ya'bati' fariseo tu yao':
—A lay a xi'ra mo ti u tar ich K'uj, muj je'sik u bʌj u k'ini ku je'sa' bʌj.
U jer tʌn u yei'ko':
—¿Bik jeu ye'sik ba' yete u muk' K'uj si a lay xi'ra k'ebʌnuka'?
Lʌji' chu'mpʌjo' y jʌtsik u bʌjo', 17Y tu ka' k'ato' ti' a mʌkʌ' u wich:
—¿Bik ka wei'k tech ti' a mok tu jea a wich?
Y ti tu ya'a:
—Ten in wei'k lʌji' profeta.
18Chen a judíos muj ch'eik u t'ʌn wa jach mʌkʌ' u wich a lay a xi'ra y bexi' wa jach jea' ti', hasta kaj pʌya' u tet y u nʌ'. 19Ij k'ata tio':
—¿Lʌji' u xi'ra a ti'a je'? ¿A te'x ka wei'k jach lik' muj yirik u ber toj kaj siji? ¿Y bik a beje' ya ku yirik u ber?
20U tet y u nʌ' tu nuko':
—In wej lʌji' u xi'ra in ti'a, ij toj lik' kaj siji muj yirik ba', 21Chen a beje' mi' weo' bik ya ku yirik ba', mix in weo' mok jei'k u wich, a ti' ya t'o'o, k'ate'x ti', jeu yei'k u bʌji'.
22U tet y u nʌ' tu yao' bex tu sajako' ti' a judíos, a judíos toj u ya'mo' wa yʌn mok ku yirik a Jesús lʌji' a Mesías a lay ku jara' pich'inta' yok'o u nʌji tuku much'ik u bʌjo' a judíos tuku xakik u t'ʌn K'uj. 23La'jen tu yao' u tet y u nʌ': «Ya t'o'o, k'ata wui'ti' u bʌji'.»
24Tu ka' t'ʌno' a xi'ra a mʌkʌ' u wich, y a'ti':
—A'e tsoy ba' ti K'uj, a teno' in wej a lay a xi'ra jach k'ebʌnuka'.
25Y tu ka' nuka tu ya'a:
—Mi' we wo yʌn u k'ebʌn, jay jump'eri' ba' in wej, a ten mij wik ba' ka'chik chen a beje' ya ki wirik.
26Ka' k'ata' ti':
—¿Bai tu meta tech? ¿Bik tu jea a wich?
27A ti' tu nuka:
—Ya sʌn ti wa'te'x, jay maj wui'ke'x in t'ʌn ¿biken a k'at in ka' ei'k teche'x? ¿Wo teche'x poch a t'urik?
28Jach k'ux a'a ba' ti' ij a'bti':
—Tech u kʌ'sa winikech chen a teno' u kʌ'sa winikeno' a Moisés. 29A teno' in we K'uj tu t'ʌna a Moisés: chen a lay mo' in wue tuba u tar. 30Chen a xi'ra tu nuka:
—¿Biken bex ka wei'ke'x? A teche'x ma' we tuba u tar a lay y u ka' sut ten tu jea in wich. 31Chen toj aj kej, a K'uj muj yui'k u t'ʌn a ku kʌxtiko' u k'ebʌn; chen wo yʌn juntu jach sajak ti K'uj y ku jach metik u t'ʌn, a lay ku yua' u t'ʌn ti' K'uj. 32Toj lik' u chuni mo' nʌj u'ak u ya'a wa yʌn mok ku jei'k u wich a to'o toj mʌkʌ' u wich kaj siji. 33Wo a je' xi'ra mo' ti' u tar ich K'uj, mix ba' jeu metik.
34Tu nuka y tu yao': Tech toj ne yʌn k'ebʌn kaj sijech ¿Y tech ka' tus kʌ'skeno'?
—Lʌji' kaj jara pich'inta'.
A mok mʌkʌ' u tuko'
35Tu yua a Jesús tuj jara pich'inta' a xi'ra a muj yik ba' ka'chik, y tuk'in ka tu yira, tu ya'ti':
—¿A tech ka jach ch'eik u tʌn u Ti'a K'uj?
36Tu nuka ti:
—¿Ts'uri, moki a lay, ti in ch'eik u t'ʌn?
37Jesús tu nuka:
—Toj a wirmʌ, lʌji' ten, a tʌn a t'ʌn yete beje'.
38Lʌji' ka tu xonkita u pix ti Jesús y tu ya'a:
—Kin ch'eik a t'ʌn Ts'uri.
39Tu ya'a a Jesús:
—A ten taren ti in wei'k o taj ba' ku metik tu woro a winik, ti' a bex a muj yirik ba', ku bij jea u wich y a ku yirik ba', ku bij mʌka' u wich.
40Chen yʌn jujunto' u winiko' a judíos a ku ya'batio' fariseos a tio' yete Jesús, tu ka'to' ti' Jesús:
—¿Yʌn wo bexi' a teno' mʌkʌ' in wicho'?
41Jesús tu nuka tio':
—Si wo te'x mʌkʌ' a wiche'x, mʌnʌ' k'ebʌne'x, chen a teche'x ka wei'k ka wirke'x ba', ya yʌn a k'ebʌne'x.
Currently Selected:
S. Juan 9: PLacNaha
Highlight
Share
Copy
Want to have your highlights saved across all your devices? Sign up or sign in
Sociedad Biblica de México AC
Free Reading Plans and Devotionals related to S. Juan 9
Deon Kipping - The Overflow Devo
Immersion Into John
Tell Great Stories, Live Great Lives
